Mateo 20
20
Jesús i'yejnap jiwek papo inkijmayewos
1“Siunie Sinia' jika anechijiayas iyoye 'ate siu'nie: Pojompe pa i'nio' ti k'iejli mot ya'am ti iyojon jikawosa', ti t'osijiap'ni pi jiwasok. 2'Yina ti i'wi'in papo jikawos ti iyojyi'n, inipe'yayisi ti jloma 'nejie'e japa jan'yenis, sekyi'i ti yamat'iyijipi siupuwa ts'ejnietio' ti jankima.
3“Ti kilie' tojwat'ik'inipe, yamat'ijyi ti ijio isija'm, 'yina sek i'wi'ne papoka ti laj jikijmayeja'. 4Iyone'ne 'ate papoka, Asam'neje, maye'ni, kimats'iji'n yi'i ja iwiesok. Jayo askajaye siuti jakimajyi'n ijiap.
5“Siupa ti 'najlikis, siupa jikimet pak inwasok siu'neje ti kilie' iyoyeta 'ate isia'm ti iyotajyin'ni papo jikawosa'. 6Siupa ti no'otiet'iyijpe yamat'iyi wek, sekyi'i i'wi'in papoka ti lajk'iyipa kawo, ti je isimk'iji'n. Sekyi'i i'yasen'ne ti iyo'ate, ¿Yot'iyi'n ti nak jikasitiek'ijin'ni jitijwayek'i jakia jloma ti je k'iejliyi paka woyeyi ka kimats'iji'n?
7“Isiujlisie'ne pet ti iyo'ate, Lapakawo ti lajk'i wek paka isimajape'n.
“Iyo'ne 'ate ti isiujlie, Ijiatp'ane, maye'ni, joye ts'iji yi'i ja iwiesok. Kimajyi'n ijiap.
8“Ti kilie' 'yuyet'ipi, siupa anechiyas iyonat'iyijpe 'ate pak jikawo i'yena papok inkijmayewos, Ane napo inkijmayewos, tesk'i. Najnat siunapo 'wanjlik'i'ne isia'm ti 'yuyi ni jikijmaye, jlampet siunapo inia'an ti isimk'iji'n ja 'wanjliyek'i isia'm.
9“Ijiatjliyi, papok inia'an ti titisiek'i siupapo no'ot ti 'yuyi pi jikijmaye ijniujliji siupi k'ie' japa jikaja ti jloma ijwienjli pa i'nio' ti isijme'n siojopa tiwenaja'm pet. 10'Yina ti jiwekie'aja t'ipi pet ti yiyi ja tanaja papok siupapo yapijle'e ti isimk'iji'n, itijnisiejesi'ne ka jikaja int'a'n pijia'm, kajeyepa ti inia'n ti isimk'iji'n. Jlam'neje kia'iyo jikaja ijniujliji siupapo 'wanjlik'i isia'm ti yija'm pi jikijmaye, ti ti'yena japa jloma. 11Ti i'winisie ti kia'iyo, jiwak yikiajlits'i'ne pa anechiyas, 12ti iyonisi 'ate, Jlam'ne jlajayi ti majleyeyi ka iliki, ti jiwekie'aja pet ti 'nes'ni inetitinki ijwienjlie'et'i jiwek jakia yiyisi ti isimk'iji'n, jikaja ijniujliyiji'ijyi jana sakaja ti sa'am ti atejwajak'i jakia jloma ti akimak'iji'n, anopajayajam'ni ki kilie' ti kio'yojwe'n.
13“Siupi anechiyas isiujlie pi ijwienjli papok inkijmayewos ti iyone 'ate, 'Ni isiecha je alaki, jlam'ne ajwe'la'm ti 'nelanjie'e ti jloma jana ja'yena jakijme'n ijiap, 'yina anipe'yak'ne ti kia'iyo. 14Siujlie'e akaja. Maj. Ti awojonk'iye ka ijniujlietiji jana jikaja siunie je pajk'i ti yiyi ni jikijmaye jana akaja, 15'yina ya'am isimet. Siojona 'yaka wikiniet'aj, siupi jayone isimet, ¿yot'iyi'ni ti jlolsinayik'i'm naka siunie awo ti 'es?”
16Jesús yine ape'e ti iyo'ate:
—Kiak jawoyi, siunapo 'wanjlik'i isia'm ja nan'ni, jlampet siunapo inian'ni ja 'wanjliyek'i isia'm.
Ti Jesús najapajayiji ti inijwel'ni ti ja'na'al
(Mc 10.32-34; Lc 18.31-34)
17'Yina ja Jesús ti yiji ja ji'niayi ti teje 'niji yi'i jlaja Jerusalén, tanayi japo t'eyasajnas, i'nialkit'ne siojo ijioyi'i, ti iyone 'ate:
18—'Yejne'n, siuti jajiok Jerusalenne, ja 'nakayeyi ti ja tekiajlaja siunapo pa'yijis jika anechiyasas wus ni I'nio' Jlas, siu'neje napo jiwos pet ni Moisés jika'neyasajnaye, ti iyoyisink'iye ka tiliana. 19Janekiajlayinie'e napok Roma jlele ti janlakiyis siunie janwonisi, ti jank'ajas'ni, siu'neje ti jank'iejwatits'i jana cruz. 'Yina jloma janajapeja janapi pijia'm ti jantajli ni a'no'.
Siupa ti'yasane siojopa jlet papok Santiago siu'neje pa Juan
(Mc 10.35-45)
20Siujlieja Zebedeo k'iemjla ijioyi ja Jesús ti jla'yis japo jilis Santiago siu'neje ja Juan. Yiyi ja Jesús ti t'akosjlete'l itiyeyijin kiajwe, ti ti'yasane siupi iyo kawoyi. 21Sekyi'i iyone'ne 'ate:
—¿Ten siupi jisitia'n?
Isiujlie ti iyo'ate:
—Ts'ijiye ti jawo anechiyasa', wojwanna'a anechiyasa' 'napo ilis, janjwanjli pa jantom 'niji ajweyeje, siunie jikiecha nak jantome a'lame.
22Jesús isiujlie ti iyo'ate:
—Je 'najanayi siunie jit'iejlayik'i'm. ¿Jijwelat'inie'e ka'yayejyi siunie ja'yaje, siunie pajyi?
Iyoyis'ne 'ate:
—Ja'yaki.
23Jesús isiujlie ti iyo'ate:
—Ijiate ja'yayejyi naka siunie pajyi, iyo'ate iyo ti anilayiti, 'yina jlampet siunie ti japoye paka inejyi'n 'niji ijwiyeje, ni'ne ka inejyi'n i'lieme, ja ke yama ka i'ye'en. Ijwienjli jla'am siunie Inia' janakaye jla'am ti janekiajle napok siunapo pajk'i ta'a ti iwiakajlanit k'iye.
24Siojopo ijia t'eyasajnas, siojopo itijwa'm sikioye, ti ipi'yayeyis japo Santiago siu'neje ja Juan ti kia'iyo, 'yina jwesiejayisia'm. 25Jesús tani'ne ti iyone 'ate, ti iyom wita'm:
—'Najanayi, siunapo i'nio' yiyits'i niwa ajnatis, siunapo jika anechiyasas, iyone pi iyone, jlampet siunapo yi' kiajwe nak anechiyas initonitieje'n ape'e pet. 26Ti asa'am je 'es ka kiak awoyeyi siunie iniwonisi napoka. Siunie jawo ka ini'najnat astepe'e, 'esiji ka iniwojwa'n aska woye. 27Siunie jawo ka awoye aska anechiyasa', 'esiji ka iniwojwa'n askipinikie'. 28'Yina kiak iyoyi ni I'nio' Jlas ti 'nes, je iyo jikawosa', 'wenajliyi jla'am ti iniwojwa'n inkawoye, jla'yi ti iwi'in jakia ji'wasankiye ti iyoyi lajaye ti ijwiejiete'n napo i'nio' ti je pini'.
Jesús ijwiejiete'n papo talojo' times ti i'wijnajne'n
(Mc 10.46-52; Lc 18.35-43)
29Ti tajlayi isia'm jlajak isi' Jericó, 'loj japo i'nio' yamk'i ja Jesús. 30'Yina times japo talojo' yiyits'iji'n ts'e yi'i ja 'nayi kius, ti ipi'yayek'i'ni japo i'nio' ti yitinis'ni ja Jesús, kajeyepa Jesús sek iniu'we, tanayis'ni ti iyo'ate:
—¡'Yaka'niona, David jlas, kasp'elisi'n wata'a!
31Tijliukietaja'ni ti tiwonaja 'ate:
—¡K'iu'wate!
'Yina kat'ajayi ti 'yakets'iyisiap ti tanis'ni ti iyo'ate:
—¡'Yaka'niona, David jlas, kasp'elisi'n wata'a!
32Ti Jesús ipi'yayeyi, yajapaja'n. Tanayi'ni japoka, i'yasen'ne ti iyone 'ate:
—¿Ten siupi jiwoyeyi ka iyo'nase?
33Iyoyis'ne 'ate ti isiujlisie:
—'Yaka'niona, awoktajank'iye ka i'winaja'n.
34Jesús wuj ti ip'ilisi'n japoka. Isiesa'ak'i jawa jitiete, 'yina ijiate isis'ne japoka. Sekyi'i ti yamayisk'i ja Jesús ti yama.
Currently Selected:
Mateo 20: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
