Mateo 21

Jesús ijiojwa'm japa Jerusalén

(Mc 11.1-11; Lc 19.28-40; Jn 12.12-19)

1Ti majleyeyisi jlaja Jerusalén, japo Jesús ti jla'yis japo t'eyasajnas yiyeyisi siujlieja isi' tomi ilia'm jle' iyo'ate Betfagé, je wuj jlajak isi', yi'i jlaja tikijnaki siujlieja jle' iyo'ate Olivokiet. Jesús sekyi'i ti ijliuye japo t'eyasajnas times, 2ti iyone 'ate:

—Maye'ni, joyeyi siojona isi' atayeje. Siuti jawayeyi, sek ja'wena'yi jana malekiat'io tilie'nitie, jlas po'. Lanajinie'e, sek jane'yi ka anamayeyik'inie'e. 3Siuti ja poye pa jan'yasajyi'n ti jawo'ate, “¿Yot'iyi'ni ti jilienajyi?”, ka woyenie'e 'ate, “Saka'niona isitia'n. Jon ka jlajma nekiaj'lanie'e ka pajata.”

4'Naka'ne siu'nie siuti iyoyi ka ineyi janak jloma, siupi Sinia' injwejlanik jiwo iyoyi ti ijwi'il ti iyo'ate:

5“Jwelajia'm napo i'nio' yiji jana Sión.

Wonayi 'ate:

'Yena'yi ilia'm ni aska anechiyas ti ijio'wase,

je initonit, yi' ape'e ni malekiat'io jlas,

jlet jana inlajwa ti titilki'ni.”#Zac 9.9

6Ijiatjliyi yam'ni'ne japok t'eyasajnas, iyo siupi ja Jesús iyone. 7Namisi'ne jlaja malekiat'io ti ijwienisi'i ja jlas. Iyoyisi jika apekiaye jawa ji'wuye, sekyi'i ti yinisie ape'e ja Jesús. 8Siojopo i'nio' ti je pini' its'inayisi k'iye ajnat'e jawa ji'wuye siojo iniu'we. Ijia japo isimisie jawa a'la' k'ase'l ti yinis k'iye. 9Siojopo inian'ni, siojopo 'wanjlik'i isia'm kia'iyojliyi, ti tanisi ape'e ti iyoyits'i 'ate:

—¡Tonitie 'ni David jlas! ¡Saka'niona 'esiji kanwe'en nak 'es, ti jla'am ti 'nes ti name ni iyo ni Saka'niona!#Sal 118.25-26 ¡Tiwunitie pi Sinia' ti yi' poliyi!

10Jakayi ti Jesús ijiojwa'm jlaja Jerusalén, pesiejak'i'ni japo jitiej ijiutie ti'yasanisi'ni, ti iyoyits'i 'ate:

—¿Ten 'ni i'nio'?

11Ijia isiujlie ti iyo'ate:

—Siu'nie injwejlanik jiwo Jesús, ti Nazaret jlele ti yiji jana Galilea.

Jesús ijiut kisie'e siupuwa je 'yu'we ka tenaja kiajwe japa Sinia' ji'wuk

(Mc 11.15-19; Lc 19.45-48; Jn 2.13-22)

12Ti Jesús 'yu kiajwe jlaja Sinia' ji'wuk, ijiut kisie'e wikie'eyi siojopo tik'iajwajyi'n, siu'neje japo takawejnajne'n. Yajmatk'i isia'm jawa tejeyisi ape'e siojopo jilis its'iuyetits'i'ni jawa wikijniest'ejes, siu'neje jawa ji'wetis pet jawa ojwos ti tiwena'ni kia'iyojliyi. 13Sekyi'i iyone'ne 'ate japoka:

—Siuniwa inamtis t'ipi iyo'ate, “Siujlie'e i'yuk jle' jawo'ate 'najla 'wet.”#Is 56.7 ¡Siuti asa'am jiwonayi kajlajnatas ji'weta'!#Jer 7.11

14Ti Jesús je taljli'ijyi ts'e yi'i jlaja 'najla'wet, siojopo i'nio' talojo' siu'neje japo je t'ojni'n tikiniejeje'ni, 'yina je iyo ka je ijwajiete'n. 15'Yina japo kia'lis ti sekyi'i tanayisi ape'e, ti ijiunitis ja Jesús, ti iyoyits'i 'ate:

—¡Tonitie 'ni David jlas!

Jlam'ne pet siojopo pa'yijis jika anechiyasas siojopo jlameje, siu'neje japo jiwos pet nak Moisés jika'neyasajnaye, ti ipi'yayis siojowa iyo japo kia'lis ti tanisi ape'e, jwesis'ne kajeyepa ti i'winisieje ja Jesús siojowa iyoyi ti i'winki'n siojowa wask'i'nelaja je ti'wena'ni. 16'Yina kiak iyonayisi ja Jesús, 'ate:

—¿Jipe'ya siunie iyoyisi?

Jesús isiujlie ti iyo'ate:

—Ji'yu, ape'yayi. 'Yina, ¿jet'i ji'yenajajyi siuniwa inamtis t'ipi ti ijwil naka?, ti iyo'ate:

“Sinia' jlejni napo sajmela'aja'n ti je iliyi ti itipisi'n

ka ijnonit ti a'am.”#Sal 8.2

17Jesús ti tajlayi japoka, yam'ne ti teje 'nijiye yi'i jlaja isi' jle' iyo'ate Betania. Sek ijio'wejen'ne.

Jesús imiesi'n japak higok

(Mc 11.12-14,20-25)

18Siojo k'iejli mot, ti yapilie Jerusalenne, Jesús inil'lia'n. 19I'winayi jlajak higok yi' jikiuts'i ja 'nayi. Yama ti i'yene ka jla' poye, ji'wole 'nejie'e jiwekie'e jlaja a'la'. Sekyi'i ti Jesús kiak iyonayi:

—¡Je pajna'a ka a' poye!

Yiyik'i wek ti kia'iyo, iyoyeyi siukia iyo ti 'ya'al jlaja higok jakayi.

20Siojopo t'eyasajnas ti i'winisie kanwojliyisipi pa, sekyi'i iyoyis'ne 'ate, ti i'yasis'ni:

—¿Yot'iyi'ni ti 'yal ta'a?

21Jesús isiujlie ti iyo'ate:

—Ijiate siu'nie jayo'nase, siuti ja lajk'ipa ka askakiujnieyeja', astankiujnieye japoye, ja akajlajyi siunie awone jana higok. Ja ke 'najataja ka 'najanayi paka awonayi, siu'neje ti jawone'ate jana tikijnaki ti ja amtiye'yi, “¡Taj'le ni jle'yi, ma isia'm yi'i ni i'niat!” Ijiatjliyi ka kiak iwoyeyinie'e. 22Ja k'iejliyeyipe siupi ja 'ajlayi pi Inia', siuti astankiujnieye ja poye, ijiate ja 'wenayepe siupa ja 'ajlayi.

Jijweye iyo pi Jesús

(Mc 11.27-33; Lc 20.1-8)

23Jesús ti itimayi siukia iyo jakayik'i, 'yina ijioyi'ni siujlieja 'najla'wet. Siuti taka'neyasa'n, 'nesa'ni japoka siojopo pa'yijis jika anechiyasas, siu'neje japo kijilas ti kia'iyo anechiyasas, ti ijioyisi ti iyonits'i 'ate ja Jesús:

—¿Tent'ipa ajweye ni jikiene niwaka? ¿Ten siupi jitiajleje?

24-25Jesús isiujlie japok ti iyo'ate:

—Kia'awo po' siu'nie jayo, ti ja'yasa aswa'am: ¿Yot'it'iyi'nijpe pa Juan ti 'yakajli ti iniejiejne'n papo i'nio? ¿Mi paka pi Sinia' ti tajle, ni'ne ka napokaye napo i'nio? Siuti jakiujliek'i'm ti a'yasajyi'n, ka ijwila'asemna'a pet siunie i'nio' atajleje ni ijwiye, ti it'imina ti akajli niwa siuniwa alesane.

Ti ipi'yayeyis ti kia'iyo, ti kiak iyoyeyisi ti ininekiajlisi:

—¿Tepat'e si'lij janiujwata'a? Siuti jayok'iate, “Tajle pa Sinia'”, ka woyena'a 'ate, “¿Yot'iyi'ni jiateje ti jikakiuye?” 26Je 'esiji ka yok'iate, “Tajle napo i'nio'”, 'napok je 'es jla'am napo i'nio', kajeyepa ti wikie'eyi ti je 'yakakiuyis pak Juan ti jla'am ti Sinia' jijwejlanik jiwo.

27Ijiatjliyi iyoyis'ne wek 'ate, ti isiujlieyisi ja Jesús:

—Je kasts'ajane.

Jesús iyo'ne 'ate:

—Ijiatp'ane, kia'awo, 'wanjliyi je ajwe'lase'm siunie atajleje ni ijwiye ti it'imina ti akajli siuniwa alesane.

Jesús i'yejnap jiwek siupi i'nio' jilis papo times

28“¿Tepa astankiujnieye jiwonayi ape'e siu'nie? 'Yejne'n, pojompe pa i'nio' times papo jilis. Ijwienjli siupapo jilis ti iyone'ate, 'Nak jajoyi iwiesoki; maj, kijme'n.

29“Isiujlie pi jinia' ti iyo'ate, Jewa'a, je awo kayik.

“Paj ti jitienkiujnieye 'wena iyonayi'ijyi jiwekie'e, sekyi'i ti yamat'ipi, ti ijioyi pi inwasok.

30“Sekyi'i yamat'ijyi ti ijioyi siupa jlas jikiecha 'neje ti iyone 'ate, Majna'a pet kajo iwiesoki, kijmenna'a.

“Isiujlie pi jinia' ti iyo'ate, Ijiatp'ane, jayiknie'e.

“'Yina jla'm iyo. Je ya'am. 31Papok siupapo times, ¿tepa yi'i siupi je ika'm ape'e pi jinia' ji'lij ti ijliutieje siupi jikijmaye?”

Isiujlisie'ne ti iyo'ate:

—Siupi iniajnat ti ijioyi.

Sekyi'i Jesús iyo'ne 'ate:

—Ijiatk'i siu'nie jayoyi, siunapo isi'm ilia'm niwa inkat'ijnieyejes ti i'ye'n ilia'm ti ijioyi'ni jana Roma, siu'neje napo asejnia siunapo 'yuyi'ni napo ijia jwa'yis, napok siunapo jana'n ask'ioye ti ja'noyi ni Sinia' jika anechijiayas. 32Kajeyepa ti Juan inajiejnawo 'nesape ti i'winkinta'ase'm ni siunie 'nayi ti tijnajyi, 'yina je woyejliyi, ti jikakiuye. Iyoye'eje jlam jlosikis ink'iejyisa', napok siunapo ijiajwa'yis jiwos siu'neje napo isi'm ilia'm niwa inkat'ijnieyejes, kajeyepa ti je 'yakakiuyis.#Lc 3.12; 7.29-30 Jejwela' ka je a'wenayeta, ji'wenayeta ka jakayeyi ka awoyeyi asosikis ink'iejyisa' pet ka je akakiuye.

Jesús jla'm i'yejnap jiwek papo inkijmayewos ti laj jlosikie'

(Mc 12.1-12; Lc 20.9-19)

33“K'iuyeyi siu'nie jajwi'lase'meje, ti jayamtiyi'ijyi ask'ioye, ti ja'yejnap jiwek: Pojompe pi i'nio' yikiaj'l isia'm puwa ts'ejnietio' yi'i pi jiwasok.#Is 5.1-2 Itijat'ijiampe siojopa sisaj siupa jane'ne pa ts'ejnietio' t'e'. Ilisane 'neje siojopa jane'yi'ni siupa jan'yena ti toj pijia'm, ti jan'yen'ni ape'e. 'Yina ti iyoyeyi ka nek, jlampa wakajlayi yikiajli'ni papok inkijmayewos ka inkijmajne'n kiu' ti sek je yi'i, ti ijioyi japa ajnat jikiecha. 34Yiyi siupi k'ie' ti 'yoyeta'a puwa ts'ejnietio', ijliu'ne papo jikawos ka jitiej inayi ka poye japa ka inlesank'iye. 35Je 'es ti 'nesat'iyipi papok siupapo inkijmayewos, isimat'iyits'ipe, yejes'ni pi ijwienjli, ijwienjli'ne siupa ilianisi, jikiecha siupa sisajas itietisijin'ni. 36Sekyi'i ti ijliuyet'ijyi papo ijia, papok 'loj'ne, 'yaka'm ape'e siupapo iniajnat ti ijliutie'ni. Kiak iyonjliyisi papo ijia siupi iyone.

37“Ts'ijiye p'an ti ijliuyeta pak jlas kajeyepa ti ijwilta ka lajak'ipa ka tiwonaja, ti iyo'ate, 'Wanjliyi ja ke injweyisie'ne kajeyepa ti je 'wenayi yas.

38“I'winat'iyispe ilia'm, 'yina iyoyis'ne 'ate, 'Yaka 'nakayet'e siu'nie ja tekiajla'a siu'nie ajnat. ¡'Yena'yi ilia'm, jaliana, 'nakayeyijna'a ka sikimita 'ni ajnat!

39“Sekyi'i isimat'iyits'ipe ijioyisi 'wechaja pa inwasok, sek yinayisi'i ti ilianis.”

40Jesús iyo'ne 'ate:

—Siuti ja'nes siupi jika'niona pak inwasok, askatejnisieyi ¿tepa janwonayi ape'e papo inkijmayewos?

41Isiujlisie'ne ti iyo'ate:

—Ja ke inaj'wite kanlajne'n papoka, kajeyepa ti laj jlosikisie'; ka iwoyejyinna'a papo ti jank'iuyet'e, siupapo japoye jla'm japa janlesan'ni k'iye, ti takawijnanata.

42Jesús kiak iyoye'ijyi 'ate:

—¿Jet'i ji'yena'ijyi siuniwa inamtis t'ipi ti iyo'ate:

“Siojona sisaj siunapo 'wukiul jiwos iwit'iane,

jla'aka p'an siu'nie jloma ti jiateje ti laja po'

ti 'yaka'm ape'e niwa ijia.

Lapakawo ti je 'wena paka kiak iwone naka ni Saka'niona.

Siuti a'wena ni jikijmaye iyone, wuj ti kasteliaja”?#Sal 118.22-23

43Nak ajwe'el ti jatala'ase nak Sinia' jika anechijiayas, ja tekiajlaja siunapo i'nio' japoye siuniwa jla' ti ja nekiajle ni Sinia'. 44Jlajmiliet siojona sisaj, siunie janoyiji'n ape'e jawo jwala'. Ni'ne ka janakaye jla'am jana sisaj ka inojwi'n ape'e jawo makie ni i'nio'.

45Siojopo pa'yijis jika anechiyasas, siu'neje japo Fariséojos, ti ipi'yayeyis ja Jesús siukiwa ti jla'm i'yejnap jiwek, itijnisieyisi ti jlamis ti tijwela'ni. 46Jakayi ti iyoyetajas ka inkimits'i, lapakawo ti je ijwiyisie japo i'nio', kajeyepa ti 'yijenisi ti Jesús pak Sinia' jijwejlanik jiwo.

Currently Selected:

Mateo 21: CRT97

Highlight

Copy