Luk 12

Ga lageng angalang kalang ga babé

(Matié 10:26–27)

1A duro wolé lé na, kalang bub bub yau bera ké ddoderé gusugang gondigé. Tumu jua, Jésu yégé anjama gai wa: Ga lageng angalang subugu do Parisié togé, to do poré, na babé gogé. 2Henga mam ga ké ba bburogegé na, ka hangé waldong wang, henga mam ga ké ba wosegé na, ka solgé. 3Na ca ma, kual go keng ba yei duro delem na, ka jei waldong wang. Kual go keng ba yei go nyilei sema kalang a duro kulu goang lébé na, ka tei bérné ca kulu dang.

Ddi go kenga geré muro

(Matié 10:28–31)

4Kajanderndeng, ’enung wa yogeng, ddo keng lo ké ga deddé gusugeng muro ’eno, ama kardené kang dono do lo henga ga ddang pena ’eno. 5’Enung dar ca gelegeng ddi go kenga geré muro, gergenga Kumu muro, ddi go da deddegeng, kardené ddi danga dono do bogegeng cin tua do kerbinya, ’I, ’enung wa yogeng, na ddi go keng gerei muro.

6Ké kel tê tê bai danga sula sua ’eno ga? Ama Kumu guiaba pena a duroigé ’eno. 7Kederem ga caigeng kau, ddi ddoginyégé mam. Ga logeng muro ’eno, cawa keleigeng ddi tê tê combu.

Ké ga yo hendé dang ké ga mainyé ca ka sela Jésu Krist ’eno

(Matié 10:32–33; 12:32; 10:19–20)

8’Enung wa yogeng: Kema goni goni goa yé kual tumu kalang, ddia go kuang na, Kumu Kurondi kau da yé kual goi tumu kangiyong ga Kumu kai bu’. 9Ama kema goni goni goa main tumu kalang ddia selang ’eno na, Kema Kurondi kau da main tumu kangiyong ga Kumu kai, ddia selai ’eno bu’.

10Kema goni goni goa yé kual go isini ca Kema Kurondi na, ka burogi, ama kema goa yé kual go isini ca Habé ga Kumu kai na, ké go burogi ’eno bering.

11Kiddin ga ka ’yang nageng duro kulu go yaué go Juib kogé ca kaidé kual caigeng tumu ga gemdong dang ga ddo ca na, keng solé kegero dang ’eremé ca kual go kenga ’yé yo ’eno. 12Cawa a kiddin lé na, Habé ga Kumu kai da gelgeng kual go keng da yégé.

Kual go kera ca kema go lainyong go mader

13Kema go pena a duro kalang ga yaué yei Jésu wa: Bagulong, ji yai kermeng ca ddi gosinyani deba do bbani toi do ba ddeniang na. 14Jésu jogu yei wa: Bajandeng, na wanga suang go kaidé kual ca gosinyegeng deba dogeng ga? 15Kardené ddi yégé kalang mam wa: Ga lageng angal, ga maga gusugengang tabelang do ca lainyong, cawa kema jomang cindi ca henga gai ’eno, ddiang henga combu kau, bbala ’eno. 16Ddi yégé kual go kera wa: Kema go pena go lainyong ba nyim gasa combu a duro yagé goi. 17Ddi ’eremé, ddi yé gusi wa: ’Enung da la wa ga? ’Enungang kiddin ga bbalé ca magé gasa gang lé mam ’eno. 18Kardené ddi yé wa: Sela, kua na henga ga ’enung dar ca lo, ’enung da dosié tuguluyong gang cong, ’enung da gaddu ga ddang ga gemdong ga ddogé, ’enung da bé gasa gang dang henga ga ddaderong mam kené. 19Kardené ’enung da yé gusung wa: Gusu jianga henga ga lainyong combu, ga bbalé lo ddegelé nain, bega gelalé, ji da, ji sa, gusin muain. 20Ama Kumu yei wa: Jia kema go mam, soindo do labegé lé kua na, ka ai keudin, main kain na, henga mam ga ji ba magagé ca gusin na, ké jia wang ga? 21Jésu jogu yégé wa: Kema goni goni go yaué henga ga lainyong nain ca gusi na, ddia kema goang henga ga lainyong tumu Kumu ’eno.

Bo cindi gusu Kumu

(Matié 6:25–34)

22Kardené Jésu yégé anjama gai wa: Selageng, na ca ma, ’enung wa yogeng, ga solegeng kegero ca henga ga do ga kenga da abuang gusugeng ’eno, dang badigé ga kenga da dar ca so gusugeng ’eno bu’. 23Cawa keu degeng ddi henga ga do, gusugeng ddi badigé. 24Ga selageng ga ga, ké gesu ’eno, ké wala ’eno, kang kiddin ga tugulu ga ca bogé henga kené ’eno bu’, ama Kumu wa abegé. Keleigeng ddi kelé go ceddong kogé combu. 25Na wang a duroigeng bbal ca arné ddegelé doi cainé lam dang ’eremé goi ga? 26Keng nia bbala ca lo henga bbani ’eno na, cawa ma keng sol kegero ca henga ga ddang ga? 27Selageng, binyé ga a duro yagé, ké la gié ’eno, ké tega badigé ’eno bu’. Ama ’enung wa yogeng wa, Salomon bang dang lainyong nain kau, ddi si badigé ga walia ga main binya kogé kain ’eno. 28Kumu nia bburoga hademé ga malgé duro yagé labegé, waindo ké bégé cin tua do kurjo na, main kain na, ddianga dono do bbalé sogeng badigé gusugeng ’eno ga? Bo cindi gogeng bbania mena kain ga? 29Ddo keng solé kegero waindo waindo ca daré henga ga do dang ga so ’eno. 30Cawa kalang ga delinya, ké wa dara henga lé main kain mam waindo waindo, Ama keng danga Ba go solé henga mam ga keng wa daregé. 31Ga daragenga Leu do Kumu toi tumu jua, kardené Kumu da begeng henga ga ba ji bu’.

Lainyong go a dang ni

(Matié 6:19–21)

32Cinga do wusin, ddo mé lo muro ’eno, cawa Baigeng danga gusu mowa ca bogeng Leu. 33Ga kelegeng henga gageng cong, keng bigé ga nyagé laré lé, ga cugenageng magela do basé belé malgi ca gusugeng, ga yauageng lainyong gogeng a dang ni, na kiddin ga ké go belé malgi ’eno bua, na kiddin ga kema koigé ’eno bua, na kiddin ga hagenyé go keregé ’eno bu’. 34Cawa kiddin ga lainyong gogeng wo kené na, ddaindegeng kau sia kené bu’.

Ga gié ga jomé yoal yoal

35Ga nyanageng gusugeng ca henga ga wa orang, ga saddageng bbala gogeng wurondegeng bua, dda tua dogeng arinya dang bu’. 36Jimageng main ga gié ga amé bagulondigé, kiddin ga ddia jiga to soré go ’yo ca ddagé kulu kibi na, ka hangi. 37Ga gié lé bagulondigé nia jiga waigang cindegé yoal yoal na, kanga gusu mowa. ’Enung wa yogenga cindi waldong wang: Ddia saddu bbala goi, ddia sigé jom dugo, ddi bigé do. 38Ddi nia jiga duro soindo kau keddebor waigang cindegé yoal yoal na, kanga gusu mowa. 39Ga selageng kual lé toi ddara: Gulong bagulondi nia sela kiddin ga koia da ’erga kené na, ddia nari andong duro kulu lé. 40Keng kau jimageng yoal yoal bu’, cawa Kema Kurondi da jiga kiddin ga keng ba ’erem kené ’eno.

Go gié go geddang dang go basé geddang

(Matié 24:45–51)

41Piér yei wa: Bagulong, ji yé kual go kera la caini mera laba, na ca kalang mam ga? 42Bagulong jogu yei wa: Na wanga go gié go geddang dang go nari ga? Na ddi go Bagulondi ba si ca kondia jima yoal yoal ca magé gulong goi. Kiddinya bbal na, kondia gusonyagé ga gié kané do gogé. 43Go gié lé bagulondi nia jiga waii duro gié main kain lé na, ddianga gusu mowa. 44’Enung wa yogenga cindi waldong wang: Go gié lé Bagulondi da si ca magé henga gai mam. 45Ama go gié lé nia yé gusi wa: Bagulondeng jaga dé, ddi nia osum togé kamdi ga gié, ga bainyong dang kandu, ddi nia di, ddi si, ddi koi céré. 46Ama kardené bagulondi lé da jiga wolé go ddi wa amei ’eno, a kiddin ga ddi sela ’eno bu’. Ddia tei bbani ’eno, ddia gosinyi daiang kalang ga basé geddang.

47Go gié go ba sol henga ga bagulondi ba dar, ama ddi nia nyana gusi ca lo henga ga bagulondi kai ga ddi ba dargé lé ’eno na, ka teiang belau nain. 48Ama go gié go sela henga ga bagulondi kai ga ddi ba dargé ’eno ma, ddi lé henga ga bbalé togé na, ka teia bbani. Ddi go ké ba bi henga combu na, ka ’enger henga gusi combu bu’. Ddi go ké ba bi henga cainé nain na, ka ’engeri henga cainé nain bu’.

Kalang cuderong ca Jésu

(Matié 10:34–36)

49’Enung ’erga ca debé tua ca delinya, ’enung dara ca tua jagu ’enda. 50Na gad ’enung wa disé go pena, ’enung wa duro solé bera ca seré to kual lé. 51Keng ’erema ca ’enunga ’erganga jalua juam ca delinya ga? ’Enung wa yogeng, na kain ’eno, ’enung ’erganga coaderang. 52Ba ji tuma kua, gulong goang kalang bai na, da cuderong, subu da lé tebenang ga sua, ga sua da lé tebenang subu. 53Ba da lé tebenang kurondi, kurong da lé tebenang bai. ’Ya da lé tebenang turma, turmo da lé tebenang ’yoa, kurong da lé tebenang malgo, kurong tamdi da lé tebenang malgo bu’.

Ga selageng kiddin orang gogé toigé

(Matié 16:2–3)

54Jésu yégé kalang ga yaué combu wa: Kiddin ga kenga sol meddalin wa doarang a toiné na, kobegeng padda keng yé wa: Kumu ji ’yoab ca hongé kang, kardené henga lé lang kain bu’. 55Kiddin ga kenga sol kal yaga a kuaba go goiyong na, keng yé wa: Kiddinya ca ’elua, kardené henga lé lang kain bu’. 56Ga babé, kengang dono do solé henga ga delinya ka, dang ga dang toigé, cawa ma keng sela saman do cakcak lé kua toa ’eno ga?

Ga nyanageng kualang kageng ga tebena

(Matié 5:25–26)

57Keng kaidé kual go geddang duroigeng ’enoa cawa ga? 58Kema nia sin kual cain ca ddia orang nain tumu ga bedang na, ji bia gusin waiai, ji nia nyana kualang nai a duro giyong ’eno na, ddia ’yang nain tumu go kaidé kual, go kaidé kual da bi kuaba asengar, asengar da debin duro gerngang. 59’Enung wa yoin, ji go andong dong ’eno bera jia boia sula toi do karé ba.

Currently Selected:

Luk 12: TNG1978

Highlight

Copy