Luk 13

Keng nia bega kebegeng ’eno na, kenga ma

1A kiddin lé na, kalang ga pena ’erga yé Jésu kual go ga Galali kogé, ké ga Pilat ba deddegé kiddin ga ké wa tibé Kumu. 2Jésu jogu yégé wa: Keng ’erema ca ga Galali ga ké ba deddegé lé na, ka kalang ga lo isinwa nain ddi ga Galali kané mam ga? 3Na main kain ’eno, ama ’enung wa yogeng wa, keng nia bega kebegeng ’eno na, keng mam da ma mainya nagé kain bu’. 4Kiddin ga kalang ga moac ca margem ga kulu go porio go Silo go ba ba caigé deddegé lé na, keng ’erema ca kandia ga lo isinwa nain, ddi kalang kané ga Jorsalem mam ga? 5Na main kain ’eno, ama ’enung wa yogeng wa, keng nia bega kebegeng ’eno na, keng mam da ma mainya nagé kain bu’.

Kual go kera go ca tuagiang do basé wo kua

6Kardené Jésu yégé kual go kera ca kema pena go ba besen tuagiang duro yagé goi go sur. Ddi ’yé guso ca daré wo gua, ama ddi wa ’eno. 7Ddi yei kema go magé yagé goi wa: Sela, ddegelé subu ’enung wa orang ca daré tuagiang lé wo gua, ama ’enung wa ’eno, ji wala cong, to nar kiddin kalin yag na cawa ga? 8Ama kema go magé yagé lé jogu yei wa: Bagulong, dda duro ddegelé lé kua dé, ’enung da yagu toa dang, ’enung da ba gur toa. 9Amalaiga dain to da wo, to nia wa ’eno na, jia walo cong dé.

Jésu bo tama do hoamya labia duro wolé go jurgum

10Wolé go jurgum go pena na, Jésu gelgé duro kulu go yaué go Juib kogé. 11Ddi wai tama doang hoamya a kené, to danga habé ga isini kedera tumu din ddegelé moac ca margum, ké andego gungddang, toang dono do paié guso ’eré dang ’eno. 12Kiddin ga Jésu ba sola na, ddi ta, ddi ya wa: Tama, mé wai labia a duro hoamya dué lé ’enda. 13Ddi si kobi ca, kobapadda to pai guso ’eré dang tebba, to osum debain Kumu. 14Ama gumu go a duro kulu go yaué go Juib kogé lé mainyang Jésu ca kondia bo tama labia duro wolé go jurgum. Ddi yégé kalang ga yaué combu wa: Wolé wo kené jis go lo gié, ’eragengang kenga wai labia duro wolé lé, ama na duro wolé go jurgum ’eno. 15Bagulong jogu yei wa: Keng ga babé, kema goni goni a duroigé go poré si goi, kau kura goi ca oré boi kang a duro wolé go jurgum ’eno ga? 16Tama lé kua, to Abraham moindi, Sidan saddo ddegelé moac ca margum, na ddar go ké pora dang a duro saddé gua lé, a duro wolé go jurgum ’eno ga? 17Kual go Jésu ba jogu yégé kai ga tebena lé na, dasi légé, ama kalang ga yaué combu mam na, gusugé mowegé nain ca gié goi go ddari mam go ddi ba légé.

Kual go kera ca laidong cindo

(Matié 13:31–32; Mark 4:30–32)

18Jésu yégé wa: Leu do Kumu toi gené mainya wa kain ga? ’Enung da geso danga wa ga? 19To mainya laidong cindo do kema ba aio geso duro yagé goi kain, to gar, to malgu belé main sia kain, ceddong ’yé gaddu gulondigé kelia.

Kual go kera go ca subugu do céré toi

(Matié 13:33)

20Jésu jogu yégé com: ’Enung da geso Leu do Kumu toi danga wa ga? 21To mainya subugu do tama ba aio debo cin keberang do duro ’engo do asé dura pena kain, bera to sodu keberang lé mam.

Gulong kebi go toal

(Matié 7:13–14, 21–23)

22Jésu dal gulong go gemdong dang go karang, ddi gelgé a duro giyong kiddin ga ddi wa oré Jorsalem. 23Ga pena ’engeri wa: Bagulong, kalang ga ddain da wai minyé na, ka bbani ga? 24Jésu jogu yégé wa: Ga bia gusugeng ca andong duro gulong kebi go toal, cawa ’enung wa yogeng, kalang combu da gesau ca ka andong kené, ama ké go bbalé andong ’eno.

25Kiddin ga gulong bagulondi nia sai dang ca gurongu kebu na, keng ga ’eré dong da osum ddagé kulu kibi lé, kenga yei wa: Bagulong, ji hangani kulu kibi. Ddia jogu yegeng wa: ’Enung sela kiddin ga keng basé saga kené ’eno. 26Kardené kenga yei wa: Ni di, ni si nang nageng kiddin ga ji ba gelni a duro giyong go gulong go gumu goni. 27Ddi da yogeng com: ’Enung sela kiddin ga keng ba saga kené ’eno. ’Erageng ni waldong hasang nang, keng mam ga lo isinwa. 28A kua ni, kiddin ga kenga sol Abraham, dang Isak, dang Jakob, dang ké ga ba cogelé kebu go Kumu koi mam a duro Leu do Kumu toi na, keng da ’elé dang yidié go kegeigeng ca ké ba taigeng dong. 29Kalang da ’erga a kuaba go toiné dang kuaba go cainé, dang kuaba go milin barua, dang kuaba go goiyong, ka jom kebu do a duro Leu do Kumu toi. 30Ga pena ga karu da belé ga tumu, kané ga tumu da belé ga karu.

Jésu kederei ’yé Jorsalem

(Matié 23:37–39)

31A kiddin lé na Parisié ga pena ’yé gusu Jésu, ké yei wa: Sa, ji ’yé kiddin ga ddang cawa Hérod wa darein ca deddein. 32Jésu jogu yégé wa: Ga ’erageng yai gijang go hana lé wa: ’Enung wa taia habé ga isini cong, ’enung wa bogé kalang ga hoamya labia labegé dang waindo, wolé go subu ma, ’enung da ka gié guang dé. 33Ama na gad ’enung ’yé duro giyong labegé, dang waindo, dang waindo menga, cawa go cogelé kebu go Kumu koi bbal ca maré kiddin ga ddang ’eno, na a Jorsalem ba.

34Jorsalem, Jorsalem, mé do deddé ga cogelé kebu go Kumu koi, ké ga Kumu ba gigigé gusé na, mé worindégé dang keddang deddegé, cang mena ma, ’enung dar ca yaué kalndigé gusung main tuadda ba yauang karndo ga buddu to tela kain, ama mé dara ’eno. 35Sela, gulong gué cai da ji bodo kalin. ’Enung yogenga waldong wang: Keng go soalang ddang ’eno bera kiddin ga kenga yé wa: Kumu si busu ca ddi go orangang gusong go Bagulong koi.

Currently Selected:

Luk 13: TNG1978

Highlight

Copy