Matius 26

Upakat momatoi so si Yisus

(Mrk 14:1-2; Luk 22:1-2; Yns 11:45-53)

1Nopupus-o po si Yisus potuduk nu kiawi' iiri, mutongaro yo Iyo so mompomaid Niyo ri nu, 2“Koduaan po om ologa' yo Rami-Rami Paska. Iya oono isalib Aku yo,” koo.#Kin 12:1-27

3Muimpugo yo sono ongo wowaidon nu imam om wowaidon nu lobuw Yaudi so waloi nu Imam Maayo ingoranan so si Kayapas. 4Minuupakat nosiro mongaakom so si Yisus nu potoyon, nga pagka osuang lobuw ong Paska, mutongaro yo nosiro nu, 5“Adang toko yo niiya nu Paska so' kalu rumoraayan ongo lobuw tu,” koo.

Inisu' si Yisus nu inosak lanung

(Mrk 14:3-9; Yns 12:1-8)

6Laid ni Yisus so Bitania, so waloi ni Simun, iri baya' binolangon-i, 7lumogaa yo ido woinoi dii so Iyo minongowit nu pusung kiasuw nu inosak lanung landu otaas. Laid ni Yisus mongokan-i, isuo yo nu woinoi-i ulu ni Yisus nu inosak#26:7: inosak; intawa: minyak lanung-i.#Luk 7:37-38 8Nosiou-o po nu mompomaid Niyo ri ginama' nu woinoi iiri, mungoto yo sono nosiro, om mutongaro yo nu, “Pusingraagan-a inosak lanung oono. 9Owarong po niwoli ono, om orogo no nitaak so lobuw omiskin!” koo.

10Nga noilaan-a ni Yisus pikiran nosiro ri, tongaro yo sono Niyo nosiro nu, “Nokuro su umungot kou nu woinoi iitu? Mugogoma'on iyo nu owarong sobana suat so Aku. 11Sombiya-biya ya koponabang kou nu lobuw omiskin, nga Aku oduruk-o kotondiang so kou.#Pom 15:11 12Orati yo po nu nopoisu' iyo so Aku nu inosak lanung-o, putimos-timosan niyo nu polobongan so Aku. 13Ondomo muyu tangar Ku iitu! Siombo-ombo ya poobaran nu Abar Owarong kiat so Kinoringan so pilolongkop nu wonuo tu, ginama' nu woinoi iitu no nga kotuturan-a, pongoondoman so iyo,” koo.

Inindoraai ni Yudas si Yisus

(Mrk 14:10-11; Luk 22:3-6)

14Miano yo sono si Yudas Iskariut, ido ungkiat so opulu om duo mompomaid ni Yisus, so ongo wowaidon nu imam, 15om mutongaro yo nu, “Bang nikomouli' ku Iyo so kou, onu itaak muyu so aku?” koo. Mongiapo yo sono nosiro tolu nopulu kaping siin pirok, om taaki yo nosiro so iyo.#Ja 11:12 16Kiat-o nu iri minongimat-a si Yudas nu kosiwatan mongoraai so si Yisus.

Minongokan-ngokan si Yisus om mompomaid Niyo ri, iya nu Paska

(Mrk 14:12-21; Luk 22:7-14,21-23; Yns 13:21-30)

17Nologa' yo po ponimpuunan nu Rami-Rami nu Baang-Baang D'ado Pongombang,#26:17: Rami-Rami nu Baang-Baang D'ado Pongombang: Siowan Kamus Kitab. lumogaa yo mompomaid ni Yisus dii so Iyo mongoduat nu, “Siombo ka koinginan Mu ponodia'an mai nu iinokanon nu Runat Paska?” koo.

18Sumombuto yo Iyo nu, “Ian kou yo sumambat so ido koyuwan so bandar iitu om tongaro muyu nu, ‘Minutangar guru mai ri nu, oduruk-o kopotoyan Niyo, indadi, moingin Iyo om mompomaid Niyo murami-rami nu Paska so waloi mu tu,’ koo yo muyu ya,” koo si Yisus.

19Osipo yo nu mompomaid Niyo ri onu yo po nisuu' Niyo so nosiro ri. Sodiaa yo nosiro iinokanon nu Runat Paska oono.

20Awi ri po, lumogaa kai yo sono maid so si Yisus so waloi iiri om mongokano kai yo. 21Laid mai mongokan-i, mutongaro yo si Yisus nu, “Pokoiloon Ku kou nu, ido koyuwan so kou mongoraai so Aku,” koo.

22Mompomaid Niyo ri nga ongo lulunggui sono nu norongou tinangar Niyo ri. Sumombuto yo nosiro soro ido-ido so Iyo nu, “Oo Tuhan, tantu okon-a ko Aku su kuanon mu!” koo.

23Sumombuto yo Iyo nu, “Ono lobuw poloob nu baang-baang so mangkuk Ku no su mongoraai so Aku.#Lgu 41:9 24Matoi Aku ya nai', Anak nu Riniba, soko tinangar nu poo'abar nu Kinoringan gulu ri nokosurat so Buuk Niyo, nga aagut-o lobuw mongoraai so Aku no. Gaam nai' dai iyo nopuanak,” koo.

25Sumombuto yo si Yudas nu, “Oo Guru, tantu okon-a ko aku su kuanon Mu,” koo.

Sumombuto yo Iyo nu, “Oo, ikau-o!” koo.

Minongokan si Yisus om mompomaid

Niyo ri

(Mrk 14:22-26; Luk 22:14-20; 1 Kur 11:23-25)

26Laid mai mongokan-i, mongolapo yo si Yisus nu baang-baang om mongunsopoto yo so Kinoringan. Kobi-kobio yo Niyo baang-baang iiri om boogio yo so kai maid nu mutangar nu, “Olapo om okano muyu yo! Itu yo su koyuwan Ku,” koo.

27Nopupus iri, olapo yo Niyo sawan kiasuw nu anggur-i, mongunsopoto yo so Kinoringan, om taaki yo Niyo so kai inuyud mutangar nu, “Ponginum kou yo kiawi' nu itu. 28Itu yo su raa' Ku, iri minonapus nu janji nu Kinoringan, nituntug suat so lobuw suang pongidu' nu koraayan nosiro.#Kin 24:8; Yir 31:31-34 29Pokoiloon Ku kou nu, kiat kosiono dai yo su monginum nu anggur musingkoinum toko nu anggur wagu so Pogkuosaan nu Amo Ku,” koo.

30Nopupus iri, muloguo kai yo mongorayou nu Kinoringan om noopod kai mulagu, miano kai yo so Bulud Jaitun.

Minomirasat si Yisus nu olimon Iyo

ni Pitrus

(Mrk 14:27-31; Luk 22:31-34; Yns 13:36-38)

31Mutongaro yo sono si Yisus so mompomaid Niyo ri nu, “Awi tu, putongiasan muyu Aku mongolaiw, so' nokosurat-o so Buuk nu Kinoringan nu,

‘Potoyon nu Kinoringan

wowaidon oono,

om mompomaid Niyo no

botongiasan mulaiw,’

koo ri.#Ja 13:7 32Nga oluli'an Aku ya, om mogulu Aku so kou mian so Galilia,” koo.#Mat 28:16

33Mutongaro yo si Pitrus nu, “Poogol pona nosiro so Ikau, nga aku dai ya,” koo.

34Nga mutongaro yo Iyo so si Pitrus nu, “Ondomo yo! Awi tu, dai po kopongingkukuuk piu' no, intolu ko yo mongolim so Aku,” koo.

35Nga sumombuto yo si Pitrus nu, “Monganggur aku matoi maid so Ikau. Adang-a nu mongolim aku so Ikau,” koo.

Wokon mompomaid-i nga soko iri ya tinangar.

Minogdu'a si Yisus so Gitsamani

(Mrk 14:32-42; Luk 22:39-46)

36Nopupus iri, miano yo si Yisus om mompomaid Niyo ri so ido tontong ingoranan Gitsamani. Mutongaro yo Iyo so nosiro dii nu, “Ogom kou po tuui. Mian Aku po dii mogdu'a,” koo. 37Iningolan sono Niyo si Pitrus om duo anak ni Jibidius, om Iyo nga umogutan om sobana ko gumagau. 38Mutongaro yo Iyo so mompomaid Niyo ri nu, “Sobana ko maagut inawo Ku no om moipopatoi yo koirosaan Ku. Ogol kou yo tuui om maid kou yo so Aku mingat-ingat,” koo.

39Rumowu-rowuo po Iyo om sumurukudo yo so tana' ri mogdu'a nu, “Oo Amo! Bang oingin Ko, kodi yo poirosaani so Aku kosonsora'an iitu no,” koo.

40Nopupus iri, mululio yo Iyo so tolu mompomaid iiri, om nosunsungan Niyo moturuw. Mutongaro yo sono Iyo so si Pitrus nu, “Insan sonjaam bo gaam nga dai kou koingat-ingat maid so Aku. 41Pogdu'a om koingat-ingato muyu yo, su' dai kou maid so ponginaman. Inawo muyu no moingin sobana momaal dadan nu owarong, nga dai kogoos kou momaal nu ono so' kou yo po lobuw-a,” koo.

42Nobogdu'a po si Yisus nu, “Oo Amo! Bang itu yo su koinginan Mu nu subai oirosaanan Ku kosonsora'an iitu, ono yo su otuman,” koo. 43Nopupus iri, mululio yo Iyo so mompomaid Niyo ri om nosunsungan-a Niyo nosiro moturuw po, so' sobana ko dinudu'on nosiro.

44Niogol po Niyo koimbagu nosiro om minogdu'a yo nu soko tinangar Niyo togna ri. 45Nopupus iri, mululio yo Iyo so mompomaid Niyo ri om mutongaro yo nu, “Dai kou po ka norios? Siowi muyu yo! Nologa' yo pokomouli'an so Aku so lobuw oraai. 46Rios kou yo om kayo toko yo! Orani yo lobuw mongoraai so Aku no,” koo si Yisus.

Inakom si Yisus

(Mrk 14:43-50; Luk 22:47-53; Yns 18:3-12)

47Dai po nopupus si Yisus mutangar, lumogaa yo si Yudas, ido kiat so opulu om duo mompomaid Niyo ri, minongowit nu lobuw suang, wokon kibosi, wokon kibangkau, om wokon kibobobog. Sinuu' nosiro nu ongo wowaidon nu imam, om wowaidon nu lobuw Yaudi. 48Pinokoilo laid ni Yudas ongo lobuw ono nu, “Lobuw singudan ku no, ono yo su okomo muyu,” koo.

49Tumorus-o ya si Yudas dii si Yisus om mutongaro yo nu, “Oo Guru, onu abar?” koo, om singudi yo si Yisus.

50Sumombuto yo Iyo nu, “Oo lakitu! Onu tomod muyu lumoga' tuui?”#26:50: Oo lakitu! Onu tomod muyu lumoga' tuui? intawa: Oo lakitu! Sikapo ya! koo.

Rumonio yo sono lobuw suang-i mongaakom so si Yisus. 51Ido mompomaid Niyo minongaawut nu badung om wintoso yo uripon nu wowaidon nu imam-i, noutas tolingo ri. 52Tongaro yo sono ni Yisus mompomaid Niyo iiri nu, “Posorungo yo badung ono, so' isai yo po momatoi nu lobuw badung su pokayon, badung-a su kopatoi so iyo. 53Bang mokitabang Aku so Amo Ku so surga, sonduun-duun-a monuu' Iyo nu ongo susuu'on Niyo nu osuang po ko' opulu om duo posukan#26:53: Koosampuw nu ido posukan nu soujar, onom noribu. nu soujar iitu. 54Nga bang soko ono, dai otuman tinangar so Buuk nu Kinoringan-i nu, subai ourug itu,” koo.

55Mutongaro yo sono Iyo so lobuw suang-i nu, “Lobuw oraai Aku bo gaam su linumoga' kou maid nu badung om bangkau mongaakom so Aku. Runat-runat montuduk Aku so kou so Waloi Maayo nu Kinoringan, nga dai muyu ya Aku inakom.#Luk 19:47; 21:37 56Nga owarong-a nu soko itu su' otuman nisurat so Buuk nu Kinoringan nu poo'abar Niyo gulu ri,” koo.

Nopupus iri, mulaiwo yo sono kiawi' mompomaid Niyo ri.

Binisara' si Yisus so Poongobisora'an

nu Ugama

(Mrk 14:53-65; Luk 22:66-71; Yns 18:13-14,19-24)

57Owito yo sono si Yisus nu lobuw minongaakom so Iyo ri so waloi nu Imam Maayo ingoranan so si Kayapas, pinuimpugan nu ongo moomontuduk nu Ukum om wowaidon nu lobuw Yaudi ri. 58Pagka moingin si Pitrus mongimpatong ong onu koompusan so si Yisus, sumuuto yo iyo ontob so natad nu waloi nu Imam Maayo ri, om mogomo yo iyo maid nu moongipat nu waloi oono. 59Mogkari'-kari' ongo wowaidon nu imam, om lobuw wokon so Poongobisora'an nu Ugama modium nu pounayan mongukum so Iyo nu potoyon. 60Nga d'ado pounayan nosiro monginsala' so Iyo pudi osuang lobuw monapud so Iyo nu topudan dai obana. Olaid-laid, lumogaa yo sono duo koyuwan mutangar nu, 61“Minutangar lobuw iitu nu, ‘Uyason Waloi Maayo nu Kinoringan, om kotoluan-o oulit Ku yo,’ koo Iyo,” koo nosiro.#Yns 2:19

62Mundiio yo sono Imam Maayo ri om duato yo niyo si Yisus nu, “Dai Ko ya ka sumambut nu topudan so Ikau-o?” koo. 63Nga minukokop nai' si Yisus. Tongaro po Iyo nu Imam Maayo ri nu, “Bontolo yo paabar so kai ong Ikau-o su Raja Nijanji nu Kinoringan, ono yo Anak nu Kinoringan,” koo.

64Sumombuto yo Iyo nu, “Nosuat bana mu mutangar. Pagka soko ono, kiat kosiono poimaid kou yo nu osiou muyu Aku ong wagu mogom umpak so wanan nu Kinoringan, om osiou muyu Aku lumoga' koimbagu so wonuo tu nosolui nu kawut,” koo.#Lgu 110:1; Dan 7:13

65Pisi'-pisio yo sono nu Imam Maayo ri sabung niyo ri#26:65: Pisi'-pisio yo … sabung niyo ri: Ono yo su koopotan nu lobuw Yaudi ong mungot nosiro sobana. om mutongaro yo nu, “Dai muru' modium nu wokon lobuw monapud so Iyo, so' kou kiawi' nga nokorongou nu tinangar Niyo no mongusiba' nu Kinoringan. 66Indadi, onu dikou pikiran kosiono?” koo Imam Maayo ri.#Ot 24:16

Sumombuto yo nosiro nu, “Kisala' Iyo om subai potoyon,” koo.

67Durai yo nosiro buatan ni Yisus, om lubako yo, wokon monampar#Yis 50:6 68maid nu mutangar nu, “Oo su PinokoRaja Nijanji nu Kinoringan, tokodo ong isai monampar so Ikau-o,” koo.

Inolim ni Pitrus si Yisus

(Mrk 14:66-72; Luk 22:56-62; Yns 18:15-18,25-27)

69Mogom-ogom si Pitrus so dilabus-i, lumogaa yo sono ido roraa dii so iyo mongoduat nu, “Okon ka ko ikau nga una' ya ni Yisus, lobuw Galilia oono?” koo.

70Nga mongolimo yo iyo nu, “Dai ku oilaan ong onu orati nu tongaron mu no,” koo. 71Miano yo si Pitrus so pintu nu galang nu natad-i. Nosiou sono iyo nu ido woinoi kukumoraja wokon, om mutongaro yo so lobuw wokon dii ri nu, “Lobuw iitu no songuna'an-a so si Yisus, iri kiat so Najarit-i,” koo.

72Nga mongolimo ya si Pitrus nu, “Bana-bana nu dai ku otondu'an lobuw oono,” koo.

73Dai olaid kiat nu iri, lumogaa yo ongo lobuw-i dii so iyo mutangar nu, “Ikau-o po una' ni Yisus, so' muinong poomutangar muyu,” koo.

74Mutongaro yo iyo maid nu mongibot nu, “Dai ku otondu'an lobuw oono,” koo iyo.

Soko iri po, mongingkukuuko yo su piu'. 75Noondoman-o sono ni Pitrus tangar ni Yisus so iyo ri nu, “Tadi' mongingkukuuk piu' no, ong intolu ko yo mongolim nu dai otondu'an mu Aku,” koo ri. Lumobuso yo sono iyo om moginoontob-o yo tumangi'.

Currently Selected:

Matius 26: TomPWPgLgPn

Highlight

Copy