Markus 3

Lobuw kimai sompodi longon

(Mat 12:9-14; Luk 6:6-11)

1Mululio po si Yisus so waloi sosombooyangan-i. Dii kuwai ido koyuwan kimai sompodi longon. 2Tinu-tinu koyuwan dii modium nu pounayan monginsala' so si Yisus. Indadi, tinoyinu ya nosiro nu momali' ka Iyo nu Runat Pongintoronan ko' dai. 3Mutongaro yo si Yisus so lobuw kimai sompodi longon iiri nu, “Tuui ko yo!” koo. 4Mongoduato yo Iyo nu ongo lobuw dii ri nu, “Mongowaid nu Ukum toko, onu ka kowasa waalon toko nu Runat Pongintoronan, monabang ko' mongoraai nu lobuw? Kowasa ka monapul intawa momatoi?” koo.

Nga dai ya sinumambut nosiro. 5Aagut sono inawo ni Yisus nu kookosog nosiro. Monomburorowo yo Iyo so pililiwut Niyo ri mungot, om mutongaro yo so lobuw iiri nu, “Kaangi yo longon mu no,” koo. Kaangi yo nu lobuw-i longon niyo ri, om sonduun-duun-a nopoli'an. 6Lumobuso yo sono lobuw Parisi ri so waloi sosombooyangan-i, om muupokato yo nu lobuw ni Irudis nu momatoi so si Yisus.

Minomali' si Yisus nu osuang lobuw

7-8Nopupus iri, miano yo si Yisus om mompomaid Niyo ri so imbing nu Liu' Galilia, om osuang lobuw minaid so nosiro kiat so Galilia, Yudia, Yirusalim, wonuo nu Idumia, so sondipawon nu Bowang Yurdan, om so bandar Tirus om Sidun. Linumoga' nosiro dii so Iyo so' nokorongou-o nosiro nu pinuwaal Niyo. 9Pagka osuang sobana lobuw-i, suuo yo sono ni Yisus mompomaid Niyo ri mongalap nu alud sokoyan Niyo. 10Osuang lobuw pinoli'an Niyo, om muimpit-impit lobuw kiosakit-i rumani dii so Iyo tayon ong okuyutan Niyo.#Mrk 4:1; Luk 5:1-3 11Koduung osiou si Yisus nu kolobuwan sinorungan nu moinat-i, mogtuui sumurukud nosiro so tiningkuangon Niyo om gumonsok nu, “Ikau-o su Anak nu Kinoringan!” koo.

12Nga sinawoi ni Yisus nosiro nu dai ipotuturan ong isai Iyo.

Minomili' si Yisus nu opulu om duo mompomaid

(Mat 10:1-4; Luk 6:12-16)

13Nopupus iri, tumidongo yo si Yisus so ido bulud, om paawo yo lobuw koinginan Niyo ri. Lumogaa yo nosiro, 14om momilio yo Iyo opulu om duo so nosiro om iningoranan Niyo nu pinongoorapan. Mutongaro yo Iyo so nosiro nu, “Pinili' Ku yo kou nu maid s'Aku om suu'on Ku kou paabar nu Abar Owarong kiat so Kinoringan, 15om kikopogboya'an kou sono monusub nu moinat,” koo.

16Itu yo su ngaran nu opulu om duo koyuwan iiri, si Simun (paawon so si Pitrus), 17si Yakubus om sulod niyo, si Yuanis, iri inonakan ni Jibidius (iningoranan ni Yisus nosiro so si Buanirgis, orati, “Anak nu Korud”), 18si Andrias, si Pilipus, si Bartulumius, si Matius, si Tumas, si Yakubus anak ni Alpius, si Tadius, si Simun, iri kiat so puimpugan lumawan nu lobuw Ruum,#3:18: iri kiat so puimpugan lumawan nu lobuw Ruum; intawa: lobuw nu Jilut. 19om si Yudas Iskariut, iri minongoraai sono so si Yisus.

Si Yisus om si Biiljibul

(Mat 12:22-32; Luk 11:14-23; 12:10)

20Nopupus iri, mulio yo sono si Yisus om mompomaid Niyo ri. Nga osuang po lobuw linumoga' dii so nosiro muimpug, sampai dai kotodiri nosiro mongokan. 21Norongou-o po iri nu suku-sakat Niyo ri, miano yo nosiro moongoi so Iyo, so' kuwai minutangar nu, “Minulou-o Iyo!” koo.

22Mutongaro yo moomontuduk nu Ukum kiat so Yirusalim-i nu, “Sinorungan Iyo ni Biiljibul! Wowaidon nu komoinatan oono yo su minonaak so Iyo nu kuasa monusub nu moinat,” koo nosiro.#Mat 9:34; 10:25

23Paawo yo ni Yisus nosiro om monuturano yo Iyo nu salig-salig nu, “Onu koo ka moinat-o koponusub nu moinat? 24Bang muimpolanu mualod kolobuwan so ido tontong om musosondiang, tantu obinasa tontong oono. 25Om soko ono ya ong mualod sompinunguan om mususub, tantu dai tumaan nu olaid. 26Soko ono ya pudi Wowaidon nu Moinat om komoinatan-o ong mupipinig om mualod, kopogkuosaan nosiro no nga dai otatap tumaan, sondiang ko olaid-o po d'ado yo sono.

27Wowaidon nu Moinat oono soko ido koyuwan obasag om osukup sindata mongipat nu waloi niyo no. Kiawi' orata' niyo no osopulan. Nga bang lumoga' ido koyuwan obasag po ko' iyo mongodoog, lobuw oono koponolod nu kiawi' orata' nosongapan niyo no. Aku yo soko lobuw obasag oono.

28Ondomo muyu yo, kiawi' koraayan om totongaron mubaag, oompunan-a, 29nga bang totongaron mubaag nu Atod nu Kinoringan, dai oompunan, so' ono yo po koraayan musingkolaid,” koo.#Luk 12:10 30(Tinangar ni Yisus soko iri so' kuwai minutangar nu, “Sinorungan Iyo nu moinat,” koo.)

Ino om kosusulodan ni Yisus

(Mat 12:46-50; Luk 8:19-21)

31Nopupus iri, lumogaa yo sono ino om kosusulodan ni Yisus. Minongindad-a nosiro so dilabus-i, om minonuu' nu lobuw monogina so Iyo. 32Iya oono osuang lobuw mogom-ogom so pililiwut ni Yisus. Mutongaro yo nosiro so Iyo nu, “Dii maadi so dilabus ino om kosusulodan Mu ri, mokisosambat so Ikau,” koo.

33Nga sumombuto yo si Yisus nu, “Isai ka ino om kosusulodan Ku?” koo. 34Siowi yo Niyo lobuw minogom so pililiwut Niyo ri, om mutongaro yo nu, “Itu yo su ino om kosusulodan ku! 35Isai momaal nu koinginan nu Kinoringan, iyo yo su sulod Ku woinoi kusoi, om ino Ku,” koo.

Currently Selected:

Markus 3: TomPWPgLgPn

Highlight

Copy