Markus 5

Minonusub si Yisus nu moinat so ido kusoi so Gorasa

(Mat 8:28-34; Luk 8:26-39)

1Indadi nokologa' yo sono nosiro so sondipawon nu Liu' Galilia so wonuo nu Gorasa.#5:1: Gorasa: tinu-tinu solinan silaid-i nokosurat nu Gadara (Bosa'on po Mat 8:28), om kuwai ya nokosurat nu Gorgisa. 2Nokotindal-a si Yisus so alud-i, lumogaa yo ido kusoi kiat so kolobongan sumambat so Iyo. 3Lobuw iiri sinorungan nu moinat om polak-polak-o po so kolobongan. Dai yo okogosan iyo pudi rantai su pongkogos. 4Obulit-o kogosan nu rantai akod longon niyo, nga owukat-o po om bosi niapid so akod niyo ri opodang-a niyo. Sobana ko obasag iyo sampai d'ado koponguut so iyo. 5Awi runat mogilolongkop iyo so kolobongan om so kobubuludan, maid nu muap-luap om musimpilat nu watu.

6Orawu' po, nosiou-o niyo si Yisus. Mundako yo iyo sumamung om sumurukudo yo so tiningkuangon Niyo ri. 7Lumuapo yo iyo nu, “Oo Yisus, Anak nu Kinoringan Opangkat! Kuroon Mu ka aku? Mindamo aku so Ikau so ngaran nu Kinoringan, kodi aku yo sonsoraa!” koo. 8(Minutangar iyo soko iri, so' sinuu' ni Yisus moinat-i polaiw kiat dii so iyo).

9Duato yo iyo ni Yisus nu, “Isai ka ngaran mu?” koo.

Sumombuto yo lobuw iiri nu, “Ngaran ku si Ligiun,#5:9: Laid ni Raja Agustus mogkuasa so Ruum, ido ligiun onom noribu sampuw soujar. so' bana ko osuang kai!” koo. 10Minindamo sobana lobuw iiri so si Yisus, nu dai niposusub moinat-i kiat dii.

11Orani dii, osuang ulod moingpoongokan so ombaron. 12Mutongaro yo sono moinat-i so si Yisus nu, “Lilai kai yo sumarung so ulod oono,” koo. 13Lilai yo ni Yisus nosiro, om lumobuso yo kiat so lobuw-i sumarung so ulod-i. Mundako yo sono ulod-i tumuop so liu' ri, om nolosod-a sono. Koosuang nu ulod iiri kiro-kiro duo noribu.

14Mundako yo moongipat nu ulod-i potuturan nu iri so lobuw so bandar om kampung so kumoronian-i, om osuang lobuw minian monsiou nu iri. 15Miano yo nosiro dii si Yisus om nosiou-o nosiro lobuw sinorungan nu moinat-i mogom-ogom. Kipokakas-o sono iyo om osayu yo pongindan. Nosiro kiawi' linumaa'. 16Lobuw nokosiou kondiri nu iri, nopotuturan so nosiro nu nourug so lobuw sinorungan nu moinat-i om ulod-i.

17Suuo yo sono si Yisus nu ongo lobuw-i polaiw.

18Iya ni Yisus sumakoi koimbagu so alud-i, mindomoo yo lobuw baya' sinorungan nu moinat iiri nu maid.

19Nga dai linila'an ni Yisus. Ala' nai' tinangar nu, “Uli' yo om tuturani yo so anak sulod mu poonabang om koowarong nu Kinoringan so ikau,” koo si Yisus.

20Momponowo yo lobuw iiri so tontong ingoranan nu Opulu Bandar potuturan nu pinonobangan ni Yisus so iyo ri. Noiranan sono lobuw nokorongou nu tuturan niyo ri.

Anak ni Yairus, om woinoi minonudul

nu sabung ni Yisus

(Mat 9:18-26; Luk 8:40-56)

21Mululio po si Yisus muripau so liu' ri. Lumogaa yo sono lobuw suang muimpug so pililiwut Niyo ri. 22Si Yairus, wowaidon so waloi sosombooyangan so bandar iiri, nga linumoga' ya. Nosiou-o po niyo si Yisus, mundako yo iyo lumoga' sumurukud so tiningkuangon Niyo ri 23mindamo nu, “Sumakit sobana anak woinoi ku ri. Tobango aku yo. Loga' yo dii potopop nu palad Mu no so koyuwan niyo su' opoli'an,” koo.

24Maido yo sono si Yisus so iyo om osuang-a lobuw minaid.

25Kuwai sono ido woinoi morosakit nu tumuntug opulu yo om duo toun laid. 26Naawi' yo niyo pobarai kiawi' orata' niyo ri so lobuw moongubat so iyo, nga dai ya iyo opoli'an, ala' nai' sumosooi. 27Norongou-o po niyo abar suat so si Yisus, sumurato ya iyo so lobuw suang-i rumani dii si Yisus kiat so tinoudion, 28so' oilaan niyo so inawo nu, otudul pona niyo sabung ni Yisus, opoli'an-o iyo!

29Tudulo yo niyo sabung ni Yisus om sonduun-duun-a minintoron tumuntug, om noilaan-o niyo nu nopoli'an-o. 30Iya ya iiri, noirosaan ni Yisus nu kinumurang kuasa Niyo. Kumowiio yo sono Iyo mongoduat so lobuw suang-i nu, “Isai ka minonudul nu sabung Ku tu?” koo.

31Sumombuto yo sono mompomaid Niyo ri nu, “Siowi bo! Osuang lobuw muimpit-impit. Nokuro su mongoduat Ko po nu isai minonudul nu sabung Mu no?” koo.

32Nga monomburorowo yo si Yisus so pililiwut Niyo ri mongudio ong isai minonudul nu sabung Niyo ri. 33Noilaan-o po nu woinoi iiri onu nourug so iyo, miano yo iyo sumurukud so tiningkuangon ni Yisus maid nu mikip-kikip lumaa' om paabar nu iyo yo su minonudul. 34Mutongaro yo sono si Yisus so woinoi-i nu, “Oo, anak! Pagka nopoimaid ko, nopoli'an ko yo! Panou-o om ikod-o kigagau. Dai yo sono sumoup osakit mu ri!” koo.

35Laid ni Yisus mutangar, lumogaa yo tinu-tinu susuu'on kiat so waloi ni Yairus pokoilo nu, “Minatoi-o anak mu ri. Kodi yo oguto guru iitu no,” koo.

36Dai ya pinoduli' ni Yisus pinutangar nosiro ri, nga tongaro yo Niyo si Yairus nu, “Ikod-a kilaa'! Poimaid-o!” koo. 37Lumombuso yo si Yisus, nga dai linila'an Niyo ongo lobuw-i maid so Iyo, sondiang ko si Pitrus, om duo musulod si Yakubus om si Yuanis. 38Nokologa' nosiro so waloi ni Yairus, nosiou ni Yisus lobuw dii botongi'an om bousoyan. 39Mosuwo yo sono Iyo om mutongaro yo so nosiro nu, “Nokuro su umogutan om tumangi' kou? Okon-a ko minatoi lolaing oono, moturuw-a,” koo.

40Muoyako yo sono nosiro so Iyo. Pagka soko iri, suuo yo nosiro ni Yisus polabus. Ingoli yo Niyo ino amo nu lolaing iiri om tolu mompomaid Niyo ri masuw so bilik ginilian nu lolaing-i. 41Kuyuti yo ni Yisus longon nu lolaing iiri om mutongaro yo nu, “Talita kum,” koo. Orati nu iri, “Oo su woinoi, tungag-o!”

42Tumungago yo roraa iiri om musimponowo yo. Umur niyo opulu yo om duo toun. Noiranan sono lobuw nokosiou nu iri. 43Nga sobana ko pinogos ni Yisus nosiro potuturan nu iri so isai-isai ya. Mutongaro yo Iyo nu, “Pookano muyu yo lolaing iitu,” koo.

Currently Selected:

Markus 5: TomPWPgLgPn

Highlight

Copy