Atos 12
12
Ca pa hwet tocwa pain xirinain ca tao' to tao' to to wa Pedro
1Pain ca mama' cacain Jerusalém Barnabé con Saulo ma', je i ma' oro xec pain ca quep em' toton cocon co howa nonon Jeju taramaxicon Herodes ma'. Je ca quep jujun ta mi' tococwa oro soldado nucun. Ma' ac caca na co tao' to wawa pain xirinain ca tao' to tao' to to wa ma'. 2Ton tapit pin jein winacon Tiago ma' quem ac tococwa na. Aji' non Tiago João ma'. Apóstolo nucun Jeju nana pane.
3Querec pin' iri nonon oro taramaxicon nucucun oro judeu Herodes ma' ne, pain ca hohot cocon pain ca to' pa' pin tocwa Tiago ma', ac i ma' ton Pedro quem ac ca na, quep jun ta ac tococwa na oro soldado nucun. Je i ma' oro xec nein Páscoa#12.3 Páscoa na wixinain xec nein ca tomi' querec te xucucun oro judeu pain ca mam' pe wet cocon oro hwanana nucucun pain ca to' witan ca' tococwa pain Egito pain cara pane. ma', pain ca cao' querec te e' cacain capam' ca om joc wanan wa pain ca to' memerem nein pane. 4Quep iri ta Pedro ne, tao' pe ac tocwa na pain xirinain ca tao' to tao' to to wa ma'. Querec wet xo' jun ta ac tococwa na oro soldado. Ma' 16 nana oro soldado co querec wet nonon ma'. Ma' 4 nana co querec wet cain' nonon, corom corom ac caca na xucucun co 4 nana ma', xin hwet xin hwet ac xucucun na quem. Wara an pe xo' nain ca coromicat nucun Herodes ma': Pi' pin iri tara ca tomi' querec te nucucun oro wari' pain xec nein Páscoa ca' ne, an hwet mi' ac toton tara con Pedro cwa'. Ma' ta querec cocon pain ca tomi' querec ton ta' ca', pain ca em' ma, na e' na pain ca to' pa' pin xima ta ton ta' ca', ac i ma' na ca wara coromicat pe nucun Herodes.
5Tao' pe ac tocwa na Pedro pain xirinain ca tao' to tao' to to wa ma'. Ane tomi' mi' tamana cocon con Iri' Jam oro co cut in xucucun pain ca howa cocon Jeju ma' ne. Tomi' mip nonon Iri' Jam pain iri' ximicocon.
6Pi' pin iri na oro xec nein Páscoa ne, pain iri' xim nein ca xec an hwet mi' toton con oro wari' Pedro ta ca Herodes ma', pe pe wet nain xirinain ca tao' to tao' to to wa Pedro ma' quem. Joc ximija pe nonon soldado co querec wet nonon ma'. Mam' tucu nonon pain arain too ma', pain iri' curucun ma', pain paraxicon ma' quem. Ma' 2 ac caca na xucucun soldado co coco' caho' nanain manain xirim ma' quem. Pi'am na Pedro ma'. 7Ane ane hwet qui' ac ca na jam co taramaja mi' non Taramaxicon nexi'. Toha pin ac ne na naran pain man ca tao' pe pe tocwa ma'. Meo non pain quiricon, ho' querec ac con na quem. Hap ra, tequi' pe ra ta ac con na. Camara' ca' ac nein micon na arain too ma' quem. 8Tucu rain macoricon womum ma'. Pe ra caji caximam ma' quem ac con na. Tucu ac cain na, pe ac cain na caji caximacon. Pe ron to' om capin' nem ma', ja' ja' ne ta ac con na. 9Hwerehwet mama' ac caca na. Ja' ja' paxi' non jam Pedro ma', ane om querec pin' ca ne. Om ta pa hwet capa' jam co taramaja mi' non Taramaxicon ne cwa' ma' na. Tohwein' ina xi' ma na. 10Xuruxut xuruxut tiquin' ca' ac tococwa na oro soldado co coco' caho' nanain manain xirim ma'. Xuruxut xuruxut tiquin' ca' ac tococwa na oro wiracocon ma'. Xuruxut xuruxut, wara ca' na iri' cote ne manain xirinain ca tao' to tao' to to wa ma', ca hwet ac hwet ac wa pain oro xirim ma'. Iri' cote ne arain too na ca tao' pa' nain. Pa ximao pan ac ne na. Hwerehwet mama' ac caca na. Xuruxut xuruxut ca' nana, hwet iri nanain tamain wana ne, ane ane om pin ac ca na jam co taramaja mi' non Taramaxicon nexi'.
11In pin ac ne na ximicon Pedro ma'. Taxi' pin inon Taramaxicon ne pain ca mam' capa' con jam co taramaja mi' non ta. To' witan ca' napa' con Herodes ma'. To' witan ca' napa' cocon oro win judeu ta' cwa', pain ca winim' cocon oro soldado pain ca to' pa' pin xim cacapa' ma' quem, ac i ma' xucun.
12In pin iri na ximicon ne, pain ca to' witan pin con Taramaxicon nexi' ma', mao ac cain na xiricam Maria ma', jicon João Marcos ma'. Wara cut in to xucucun pain xiricam Maria co howa nonon Jeju ma'. Mija nana. Tomi' nonon Iri' Jam. 13Tataca ac cain na panaji cote ne manain xirim, tataca tataca. Maqui' ac cama na xojam' ma', co taramaja pe nain xirim ma'. Rode na wixicam. Maqui' ac cama na. Ha'? Ma' wari' ma' quem ac cama na.
14Wata' ta ac ca na Pedro.
Taraju pa' iri nain ca tomi' nucun Pedro ne, tomi' querec te tamana ac cama na. Pa xiron pain man xi tomi' querec te nene cama ta. Mo in mao e' ac cama na. Hwet pe na Pedro, xat pe ho' nain manain xirim ca' ac tococwa na.
15He, tamanain ma ra ac cacam na.
Om na, hwet pe na, iri'o' ta ac cama na.
Tara. Jam co querec wet non tara ta ac caca na.
16Ca tomi' tomi' xucucun ma', ca tataca tataca tiquin' ca Pedro ma' quem. Pa ac cacain na manain xirim. Querec iri nonon ne, i'ina ac ne na ximicocon. Wum ra Pedro? Cain' cain' xira quem ac cocon na.
17An piri' ac cain na micon. Tacana to je ta ac tococwa na, tomi' hwet ac tococwa na pain ca pa hwet tocwa ma'. Pa hwet napa' Taramaxicon nexi' ta. Tomi' hwet jun pain Tiago cocon oro xerexi' me ac tococwa na. In ca' ac tococwa na, mao ac cain na xijein xirim.
18Xec pin iri na ne, teretem ac caca na oro soldado co querec wet nonon ira. I'ina tamana na ximicocon. Cain' cain' xira ne ta? Ma' carawa ca ara non Pedro cara ne? Main xi mao ca quem, ac i ma' na ca tomi' xucucun pain ca teretem tamana nucucun.
19Pirao' jun ta ac cocon oro soldado na Herodes ma'. Pirao' pirao' paxi' nonon, ane om mam' cocon ne. Je ca tomi' querec pan tococwa oro soldado co querec wet nonon ira. Cain' cain' hun quem? Main ca mao ca pahu' ac tococwa na. To' parapa' pin jujun ta ac tococwa na oro win ma' caca ma', to' parapa' pin ac tococwa na.
Ca mi' pin nucun Herodes
To' parapa' pin iri tata oro soldado co querec wet nonon Pedro ma' ne, mao ac ca na Herodes. Paca' nain Judeia, mao ac cain na Cesareia, je i ma' wixinain cidade ca mao ca ma'. Mon to wet ac cain na i cain. 20Ac i ma' ac i ma' nana, mana' tamana ac tococwa na oro wari' nein Tiro je Sidom ma'. Cain' cain' xira con ne ac caca na. Na e' na pain ca tomi' xo' xun ta, xi maqui' pan ara nein macaracon oro carawa ca cao' iri' ca' ac caca na. Mo hwet xun ta ac caca na. Tomi' toto cain' nonon Blasto ma', co hwara' opa ma', pain ca taramaja mi' con Herodes ma', pain ca querec wet cain xiricon ma'. Quep xiho' xut me ac cocon na. Tomi' xo' ron Herodes ma', pain ca mana' caparut ca'. Mana' maho' xijexi' quem ca' xun urut quem, tomi' toto ac i ma' nonon Blasto ma'. Ma ac ca na.
21Maqui' pin iri na xec nein ca wara coromicat an pe xo' ca Herodes ne, pain ca taraju toton pain ca tomi' xim cacapa' ta ca ma', pe ac con na iri' womicon co awi tamana, iri' womicon taramaxicon ma' con. Xao pe ac cain na ca mam' xao pe nucun pain ca taramaxicon ca ma' quem. Pijim' toton caram cwa' co maqui' nanain Tiro je Sidom ma' ta ac ca na. 22Ca pijim' pijim' tococwa ma', merem merem ac caca na: Om ca wari' ca co pijim' ma'. Iri' Jam na co pijim' ma' ta nana pain ca merem nucucun. 23Wap hap ac con na Herodes jam co taramaja mi' non Taramaxicon nexi' ma'. To' caxi pin non. Xi tomi' in pin tococwa oro wari' pain ca Iri' Jam na co pijim' ma' ta cocon ta. Tomi' in pin xiroron. Om na, wata' cwa' ira, om ca Iri' Jam ta', awi tamana pan na Iri' Jam ta, tomi' in pin ac i ma' xiroron. Je ca wap con jam co taramaja mi' non Taramaxicon nexi' ma'. Cao' pin non caxicon cwam, mi' pin ac ca na.
24Pijim' pijim' tiquin' ac cacain capijacon Iri' Jam na co howa nonon Jeju ma'. Ca pijim' pijim' caca ma', ca howa howa caca oro xucucun wari' ma', mija pin ac caca na co howa nana ma'.
25Barnabé con Saulo ma', ara ara pi' pin iri nanain oro ca taramaja nucucun pain Jerusalém ne, in mama' ac cacain na Antioquia. O mao nonon João ma' quem, co Marcos na xijein wixicon ma'.
Currently Selected:
Atos 12: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
