Atos 11
11
Ca tomi' xo' cocon co howa nonon Jeju Pedro
1Oro apóstolo cocon co howa nonon Jeju ma', co to nanain oro xijein cidade pain Judeia ma', tomi' hwet ac tococwa na cocon oro wari' co om judeu nana ma', co howa pin nanain capijacon Iri' Jam ma'. 2Je ca tomi' napat pan cocon Pedro oro judeu co howa nonon Jeju ma'. In mao iri nain Jerusalém Pedro cocon oro win ma' ca ne, tomi' napat ac tococwa na: 3Cain' cain' xima quem? Corom mao a ximain xiricocon tatirim co om wac xirac nanain taparinain ca xirac nucucun ta. Cao' pe ho' momon quem, ac i ma' na ca tomi' napat cocon ma'.
4Tomi' hwet xuhu' pain oro ca ara napa' pane ac cocon na Pedro. Pain ca xo' ara ten qui' capa' pain cara pane, tomi' xo' xuhu' pain ac tococwa na. 5Ca' ina pane, pain ca pe qui' tain Jope pane, tomi' ac ton na Iri' Jam. Tohwein' ac ta' na quem. Querec paxi' ina, om ca pi'am ta' pain ca tohwein' ne. Ac ca querec tain na carawa ca quiji' qui' nain pawin ma'. Ac cote ca wom na. Tucu tucu xam' na tamacon. Ac ca quiji' hwet capa' na, xat pe ho' ac capa' na quem. 6Noro ac tain na tequipacon. Querec inain oro carawa. Oro caji carawa ca mana', oro caji em', oro caji me, je ca querec ta' pane. 7Ac ca taraju tain na ca tomi' wa quem. Tomi' ac capa' na: Tequi' pe ra ta Pedro. To' pa' ra carawa ma', cao' ra ta ac capa' na. 8Om na ta Taramaxicon ne ac ta' na. Xi wara cao' tain caji carawa pane ta. Om ca cao' camain' tain caji carawa ca tomi' caho' caparut Moisés pane ta ina pain ca tomi' in pin ton pane. 9Tomi' mami' ac capa' na ca tomi' wa ca tomi' qui' nain pawin: Ta caji carawa main carawa ca to' hohot pin ca Iri' Jam me ac capa' na pane. 10Tomi' cain' napa' co tomi' napa' ma', tomi' mami' ac capa' na, tomi' mami' ac capa' na quem. Ma' 3 pin iri na ca tomi' capa' ne, cuc in mao ac tocwa na cote ca wom pain oro carawa. In mao ac cain na pawin.
11In mao pin iri nain pawin cote ca wom pain oro carawa ca to nain tequipacon ne, maqui' ac caca na wari' nein Cesareia. Ma' 3 nana. Hwet nanapa' pain xirim ca pe pan ta' pane. Mo'o jun ta nonon taramaxicon nucucun pata'. 12Tomi' ac capa' na Tamataracon Iri' Jam: Ta hehe momon me ta, ja' ja' roron ta napa'. Mama' ac urut na quem. Ja' ja' nanapa' xerexi' cwa', co 6 nana cwa'. Corom mama' ac urut pain na xiricon wari' ma', Cornélio ma', co om judeu. 13Tomi' hwet ac caparut na con jam co taramaja mi' non Iri' Jam quem. Ca' na ca tomi' caparut: Querec inon jam co taramaja mi' non Iri' Jam pane, pain ca xat pe cain xuru ca'. Tomi' ho' roron oro wari' nem ta ac capa' na. Mo'o totoron Simão cwain, co Pedro na xijein wixicon cwain. Pe nain Jope cain ac capa' na quem, ac i ma' na ca tomi' caparut Cornélio. 14Tomi' hwet terem con Iri' Jam ma', pain ca mi' xim quem pain ca witan ca' main ca caracat nem ma'. Wum, oro ca nari nem cocon oro wari' co to ho' nenem pain xurum ma' quem, mi' xim nuhu' pain ca witan ca' hwein ca caracat nuhu' ta napa' jam co taramaja mi' non ma'. Ac i ma' na ca tomi' caparut Cornélio pane.
15Pijim' toton ta ac ta' na. Om ca pijim' homa ta', hwet pa' ac cocon na Tamataracon Iri' Jam. Pe ho' mip nonon. Win capari' pain cara pane, pain ca xo' pe ho' mip ten qui' capari' pane. 16Mam' pe wet ac tain na ca tomi' capari' Taramaxicon nexi' pane: João cara pane, ja' nonon pain com oro wari'. Wahu' iri tara ne, mi' ac xihwe tara pain Tamataracon Iri' Jam ta napari' pane.
17Je ca tomi' xuhu' ca' ac cocon na Pedro. Mi' nonon pain Tamataracon Iri' Jam ta. Iri'o' ta, mi' nonon pain. Win capari' pain ca howa xun Taramaxicon nexi' Jeju Cristo pane. Cain' cain' xita' cocon quem? Om ca ari ac ton Iri' Jam ta. Ac i ma' na ca tomi' cocon co howa nana Pedro ma'.
18Taraju iri nanain ca pijim' nucun ne, tomi' napat tomi' napat om pin ac cocon na Pedro. Tomi' querec te pin nonon Iri' Jam quem. Awi na Iri' Jam ta nana. Wa wa urut con pain ca xiram pa' cocon oro wari' co om judeu nana ta. Xiram pa' inuhu', ma' ta cwirin' pin hwein ca caracat nuhu', ma' ta e' cara hwe pain pawin ta cocon ma' ira, ac i ma' na ca tomi' caca pain ca tomi' querec te nucucun ma'.
Oro co howa nana co to nanain Antioquia
19To' pa' pin iri ta Estêvão cara pane ne, ja' tequi' quep em' ac tococwa na co howa nonon Jeju. Wawaran mama' ac caca na pain oro xijein macan'. Ma' nana co mama' nanain macarain Fenícia, ma' nana co mama' nanain xixi pan nein macan' Chipre. Ma' nana co mama' nanain xijein cidade pain Antioquia quem. Pijim' paxi' nanain capijacon Iri' Jam, ane pijim' hwet e' cocon pain ca win judeu caca ne. 20Co to' wawaran ca' wawa pain Jerusalém ma', ma' nana co to pin nanain Chipre je xijein cidade pain Cirene ma'. Tan' mama' iri nanain Antioquia ne, pijim' pijim' ac tococwa na co om judeu nana ma' quem. Tomi' hwet tata pain capijacon Iri' Jam ca tomi' hwet napari' pain ca to' witan xim capari' Taramaxicon nexi' Jeju. 21Quep xiho' tamana pan nonon Taramaxicon nexi' quem, pain ca mi' cocon pain ca pijim' hwara' opa wa ma'. Howa mija ac caca na oro wari' co om judeu nana quem. An to pin nanain ca wara howa ximama' nucucun, howa pin ac cocon na Taramaxicon nexi'.
22Tomi' hwet ac tococwa na co howa nana pain Jerusalém ma'. Howa pin nana wari' co om judeu nana ma', co to nanain Antioquia ma' tata. Je ca mo hwet roron pain Antioquia ta cocon Barnabé ma'. 23Wa' mao iri nain i cain ne, querec pin' ac tococwa na pain ca xiram pa' cocon Iri' Jam, je pain ca quep xiho' cocon quem. Hu ac tococwa na: Win xumu jun Taramaxicon nexi' ma'. Hwara' opa cara je pain ca howa hun quem tata. 24Barnabé ma', awi na, xut xo' taxipa' na. Pe ho' mip non Tamataracon Iri' Jam, howa mip na quem. Ma' mija pin ac caca na oro wari' co howa nonon Taramaxicon nexi' con.
25Pirao' ton Saulo ta ac ca na Barnabé ma', mao ac cain na Tarso. Je i ma' cidade nucun Saulo cara pane. 26Mam' iri non ne, o mao ac con na pain Antioquia. Mon to wet ac cacain na i cain. Cut in cut in ac xucucun na cocon co howa nonon Jeju ma' quem. Ma' mija nana co ca' na caca pain capijacon Iri' Jam. Ca' na ca' na cawaxi' pa' ac cocon na. Co howa to nanain Antioquia pane, je win o' ma' pin tococwa pain ca howa cocon Cristo. Oro wari' nucun Cristo ta tata pane.
27Pain ca to to wet cacain Antioquia Barnabé con Saulo ma', maqui' ac cacain Jerusalém na oro win howa caca co profeta nana ma'. Tomi' hwet taxipa' nanain xocori ca tomi' nucun Iri' Jam. 28Tomi' hwet xuhu' pain ca xo' tomi' capa' Tamataracon Iri' Jam ta ac ca na xucun ma', Ágabo na wixicon. Pe' tamana tatara oro wari' co to nanain oro xijein macan' ta na. (Iri'o' na ca tomi' nucun Ágabo quem, xi pe' tamana ara caca oro wari' pain ca taramaxicon taramaxicon wet ca Cláudio cara pane ta.) 29Tomi' xo' ac xucucun na co howa nonon Jeju ma': Cut mi' xuxun pain dinheiro oro xerexi' co to nanain Judeia ta ac xucucun na. Co ma' tamana nonon dinheiro ma', cut hwara' ac caca tara. Co om hwara' nonon ma' iri tatara ne, cut pije' ac caca tara quem. Ac i ma' na ca tomi' xo' tomi' xo' xam' xucucun ma'. 30Ara ac cacain na. Cut nanain dinheiro nucucun, cut mi' ac tocwa na pain Barnabé con Saulo ma'. Cut mi' jujun pain dinheiro nexi' oro xerexi' co querec wet nonon co howa nonon Jeju pain Jerusalém ta ac tococwa na, cut mama' ac cacain na.
Currently Selected:
Atos 11: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
