YouVersion Logo
Search Icon

Atos 10

10
Taramaxicon Cornélio
1Pe nain xijein cidade wari' co taramaxicon nucucun oro soldado. Cornélio na wixicon. Cesareia na wixinain cidade ca pe pan ca ma'. Ma' 100 nana oro soldado co taramaxicon ne nonon ma'. Maqui' nanain Itália. Soldado wi nana cocon oro xucucun soldado co maqui' nanain Itália quem. Je ca Oro Italiano tococwa ma'. 2Om paxi' na ca judeu ca Cornélio ma', ane xut xo' ca con Iri' Jam ne. Wirico, oro ca nari nucun cocon oro wari' co to ho' nonon pain xiricon ma' quem, xuruxut xo' nana pain ca win xumu taxipa' cacain ca param nucun Iri' Jam. Tomi' ha' nonon quem. Cornélio ma', xiram pa' tamana nonon oro wari' co om nonon carawa ma'. Tomi' taxipa' non Iri' Jam quem.
3Maqui' ac ne na xec pain ca querec ca carawa Cornélio ma'. Piquirim pin na xina ma', pain 3 hora ma', ac ca tohwein' ca na. Querec paxi' na, om ca pi'am ca. Ac ca querec con na jam co taramaja mi' non Iri' Jam. Om ca querec tocohon ne tocon, querec iri'o' non. Ac ca xut hwet con na, Cornélio ac con na.
4Jin' tamana ac ca na Cornélio. Noro tamana non. Ma' carawa quem taramaxicon ac con na.
Om na, taraju nem Iri' Jam pain ca tomi' mon ma'. Hohot mon pain ca xiram pa' momon oro wari' co om nonon carawa quem. 5Je ca tomi' xim ca' ac con na: Tomi' ho' roron oro wari' nem ma'. Mo'o totoron Simão pain Jope cain. Pedro na xijein wixicon quem ac con na#10.5 Pedro na xijein wixicon Simão con Jeju. Ma' nana wari' co Simão Simão wet nonon, ma' nana co Simão Pedro nonon, ma' nana co Pedro e' nonon quem. . 6Pe ho' non Simão co xu taxipa' tapari carawa cwain. Pe ja' pan nain cote ne com xiricon quem, ac ca tomi' ac i ma' con na.
7Mao iri na jam co tomi' non ma' ne, harahap je ac tococwa na wari' nucun co taramaja mi' nonon ma'. Ma' 2 nana. Tomi' ac tocwa na soldado co quep xiho' non ma' quem, co xut xo' pain ca win xumu e' cain ca param nucun Iri' Jam ma' quem. 8Tomi' hwet ac tococwa na pain ca tomi' nucun jam co taramaja mi' non Iri' Jam cara ne. Mama' jein Jope cain, mo'o jun Pedro cwain ac tococwa na, mama' ac caca na.
9Xec pin iri na ne, xuruxut xuruxut tiquin' ac caca na oro wari' nucun Cornélio ma'. Tocon xina pin iri na ne, pain ca xuruxut xuruxut wet cacain wana ma', wixicam pin ac cacain na Jope. Pedro ma' iri na ne, piri' pe tain xonein xirim ta ac ca na. Piri' pe ta', tomi' ton Iri' Jam ta pan xucun. 10Aram aram pe' pin ac ca na, cao' ta' carawa ta ac ca na quem. Hoc xin iri nanain con ne, ac ca tohwein' ca na. Querec paxi' na, om ca pi'am ca pain ca tohwein' nucun. 11Ac ca querec cain na ca wein mao nein nanawin ma'. Ac ca quiji' qui' cain na pawin carawa ca ac cote ca wom ma'. Tucu tucu xam' na tamacon. Ac i ma' na ca quiji' hwet cain macan'. 12To non oro carawa ca ein caca oro judeu ma'. Ma' na oro caji carawa, ma' na oro caji em', ma' na oro caji me quem. 13Tomi' ac con na ca tomi' wa ma': Tequi' pe ra ta Pedro. To' pa' ra carawa ma', cao' ra ta napa' ca tomi' wa ma'.
14He! Om na ta Taramaxicon ne ac ca na Pedro. Xi wara cao' tain caji carawa pane ta. Om ca cao' camain' tain caji carawa ca tomi' caho' caparut Moisés pane ta na pain ca tomi' in pin ca ma'.
15Ta caji carawa main carawa ca to' hohot pin ca Iri' Jam me, ac i ma' na ca tomi' con ma'.
16Tomi' cain' non co tomi' non ma', tomi' mami' ac con na, tomi' mami' ac con na quem. Ma' 3 pin iri na ca tomi' con ne, cuc in mao ac tocwa na cote ca wom ma'. In mao ac cain na pawin.
17Cain' cain' xira ne ac xucun na Pedro ma'. Cain' ca tomi' xim capa' Iri' Jam pain ca tohwein' ne cara ne xucun pain ca coromicat nucun. Coromicat ac i ma' coromicat ac i ma' wet iri na ne, tan' mama' ac cacain na Jope wari' co tomi' ca Cornélio cara ne. Main ca pe ne xiricon Simão ma' quem? Om na, pe nain i ma' ta ac tococwa na. Je win cain' cain' xira ne ca Pedro ma', hwet ac cacain na manain xiricon Simão. 18Merem ac caca na: Je i ca' ca pe ca Simão ma', co Pedro na xijein wixicon cocon oro wari' ma'? Ac i ma' na ca merem caca ma'.
19Cain' cain' xira ne cain' cain' xira ne wet na Pedro pain xonein xirim ma' quem. Tomi' ho' non Tamataracon Iri' Jam: Ma' 3 nana co pirao' nenem ma' Simão. 20Je ca tomi' xim ca': Tequi' pe ra ta. Quiji' hwet roron. Ja' ja' roron quem. Ta hehe momon me. Xi wata' ara ne co tomi' nonon ta. Mo'o jun ta pan inonon, ac i ma' na ca tomi' con Pedro Tamataracon Iri' Jam.
21Quiji' hwet ac tococwa na. Maqui' hwe? Wata' co pirao' hwe ma'. Para maqui' hwe ma' quem ac tococwa na.
22Om na, mo'o jun Pedro ta naparut taramaxicon nuxut Cornélio pum. Xut xo' taxipa' na Cornélio. Tomi' ha' taxipa' non Iri' Jam. Querec pin' querec pin' pi' pin nonon oro judeu pain ca xut xo' nucun. Tomi' ca' non jam co taramaja mi' non Iri' Jam quem: Tomi' roron oro wari' nem ma'. O qui' totoron Pedro pain xurum ca'. Ma' ta taraju mon pain ca tomi' xim ta, ac i ma' na ca tomi' con taramaxicon nuxut jam co taramaja mi' non Iri' Jam pum ta nonon.
23Na ra ac ca na Pedro ma'. Corom qui' je ta. Pi'am to ho' xine ta ac tococwa na.
Xec pin iri na ne, maji ta ac xucucun na, mama' ac caca na. Ma' nana wari' nein Jope co ja' ja' nonon, co win howa ca ma' quem. 24Xuruxut xuruxut xuruxut. Toco' toco' xec pa' ac cocon na. Xec pin mami' iri na ne, tan' mama' ac cacain na Cesareia. Wara winim' nonon Cornélio. Wara tomi' cut in tata oro ca nari nucun cocon oro win ma' ca co taxipa' ca ma' quem. Winim' xun Pedro ta xucucun. 25Hwet ac cain na xiricon Cornélio Pedro ma'. Corom mao ta' iri na ne, hwet qui' ac ca na Cornélio. Maqui' ma? Maqui' ina ta ac xucucun na. Pe torotop mi' querec te pan ac con na Cornélio. 26Ane tomi' in pin con Pedro ne. Om na, tequi' pe ra ta. Wari' ta' ca' ira. Win ma ma', ac i ma' na ca tomi' con ma'.
27Ca corom cain xiricon ma', pijim' xuruxut ac xucucun na. Querec ac tococwa na oro wari' co wara cut in nana ma'. Mija nana wari' ta. 28Tomi' pan ac cocon na Pedro: Taxi' maparut pain ca judeu urut ca'. Moji'ac urut cocon oro wari' co om judeu nana. Om ca hwet urut cocon pain xiricocon quem, je curuxut. Taxi' maparut ma' ira. Ane tomi' pan capa' Iri' Jam ne: Ta moji'ac momon me ta. Ta caxicon wari' nana momon me ta napa'. 29Je ca om ari toton co mo'o nanapa' cwa'. Om ca tomi' in pin toton. Maqui' ac ta' na quem. Je ca tomi' xuhu' ca': Para maqui' ra mahu' quem? Tomi' xine e' ac tococwa na.
30Tomi' hwet xim pain ac con na Cornélio ma'. Ma' 4 pin napa' xec pain ca tomi' ton Iri' Jam pane. Tomi' pe inon pain xuru ca'. Ac co cwa' na xina pata', pain 3 hora pane, tomi' ac ton na Iri' Jam. Ane ane xat quima hwet ac capa' na wari'. Toc meremem tamana na womicon. 31Tomi' ac capa' na: Taraju nem Iri' Jam pain ca tomi' mon ta Cornélio. Mam' pe wet nem pain ca xiram pa' momon oro wari' co om nonon carawa quem. 32Tomi' ho' roron oro wari' nem ac capa' na. Mo'o totoron Simão cwain, co Pedro na xijein wixicon cwain. Pe nain Jope cain. Pe ho' non Simão co xu taxipa' tapari carawa. Pe ja' pan nain cote ne com xiricon ma', ac i ma' na ca tomi' capa' pane. 33Je ca tomi' hap toton oro wari' ne cwa'. Mo'o jun ta inonon pum. Tomi' querec te inem pain ca maqui' nem ca'. Wara cut in xujuxut con Iri' Jam quem. Winim' urut pum pain ca pijim' ta' ma ma'. Taraju xixin na urut pain ca pijim' ra quem Taramaxicon nexi' ta. Ac i ma' na ca tomi' con Pedro Cornélio ma'.
34Pijim' ac cocon na Pedro: Taxi' pin inon Iri' Jam pain ca om tomi' querec te paxica' cocon oro wari' ta. 35Oro wari' co maqui' nanain oro xijein macan' ma', mo ta xuruxut xo' caca, mo ta tomi' ha' taxipa' cocon Iri' Jam quem, tomi' querec te tomi' querec te xam' pan nonon Iri' Jam. 36Taxi' hun Iri' Jam pain ca wara tomi' hwet caparut pain ca wari' nein Israel urut ca', pain ca ha' pin cuhu' pain ca toron toron om pin ne xumuhu' pain ca caracat nuhu', xi om ca Jeju Cristo co taramaxicon pe ho' taramaxicon pe ho' pi' pin nonon oro wari' ta caparut pane. 37Taxi' hwein oro carawa ca ara to nain oro xijein cidade pain Judeia pane quem. Ara pe cain' na pain Galileia, mao ac ne ma' na pain oro xijein cidade pain Judeia. Pijim' iri na João cara pane ne, pain ca ja' je com, ma' ta querec pin' xihwe pain ca cwirin' pin hwein ca caracat nuhu' ta tococwa oro wari' pane, mao ac ne ma' na ca ara ne oro ca awi wa pane, taxi' hwein i ma' quem. 38Taxi' hun Jeju co maqui' nain Nazaré, taxi' hun pain ca mi' con pain Tamataracon Iri' Jam, je pain ca mi' con pain ca hwara' opa nucun quem. Taxi' hun pain ca xut mao cain oro xijein cidade pane, pain ca tama' xiram pa' cocon oro wari', je pain ca tama' quep xio cocon oro wari' co ximin nana con Caxicon Jam quem. Ha' non Jeju pain ca ara ac i ma' ca pane, xi om ne ca pe ho' pan ara con Iri' Jam ta.
39Querec querec pi' pin urut pain oro ca ara ca Jeju pane. Oro ca ara pe cain macaraxut pain ca judeu urut ca', je pain Jerusalém ma' quem, tomi' hwet mi' urut cocon pain oro wari'. Je ca to' pa' pe tocwa quem. Tatatain mi' ta pain pana pane. 40Ane to' e' mami' con Iri' Jam ne. Ma' 3 pin iri na xec pain ca mi' pin nucun ne, to' e' mami' ac con na Iri' Jam. Querec urut con quem, xi an hwet mi' ara caparut con ta. 41Om ca querec querec pi' pin cocon oro wari', om na. Xica' to urut pain ca querec urut con pain ca e' mami' nucun. Xica' to urut pain ca querec urut con pain ca cao' to ho' urut con quem. Xi om ne ca wara tora' ara caparut Iri' Jam pain ca tomi' hwet jujun oro wari' pain ca querec hun ta caparut pane ta. 42Tomi' ca' naparut Jeju quem: Tomi' hwet xine cocon oro wari' ta, tomi' hwet jujun pain ca tomi' pan capa' Iri' Jam cwa', pain ca mi' pan capa' pain ca juiz ta' ca', pain ca main tomi' xo' ton toton oro wari' co wara cono' nana, wiricoco co e' e' wet nana quem, pain ca main tomi' xo' ton toton pain oro carawa ca ara caca pain ca e' e' wet nucucun ma'. Wirico Iri' Jam co tomi' napa' pain ta, tomi' hwet jujun pain oro wari' ta, ac i ma' na ca tomi' caparut pane. 43Wara tomi' nonon oro wari' oro profeta pane quem, pain ca tomi' hwet tomi' hwet xam' tococwa con wari' nucun Iri' Jam co wara tomi' pe ca pane. Ca' na ca tomi' hwet tococwa pane: Oro wari' co howa xun nonon ma', xic am pin ac xine tara pain ca caracat nucucun ta, xi om ca wari' nucun Iri' Jam co wara tomi' pe ca pane nana oro profeta pane. Ac i ma' na ca pijim' cocon Pedro ma'.
44Pijim' pijim' wet na Pedro ma', ane ane hwet pa' ac cocon na Tamataracon Iri' Jam. Pe ho' mip pe ho' mip xam' tata oro wari' co taraju nonon ma'. 45Wa wa ac caca na oro judeu co wara howa pin nonon Jeju ma', co ja' ja' nonon Pedro pain ca maqui' nucun ma'. Mi' nonon pain Tamataracon Iri' Jam caram cwa' co om judeu nana cwa' ra nana. 46Xi taraju ara tococwa pain ca tomi' cacain oro xijein ca capija wa ca om wara tomi' taxi' caca ta. Taraju tata pain ca awi na Iri' Jam awi na Iri' Jam ta caca pain ca tomi' nucucun quem.
Tomi' ac cocon na oro win ma' ca Pedro ma': 47Mi' cocon pain Tamataracon Iri' Jam ca' ira! Win capari' pane. Cain' cain' xuxun quem? Narain ho' xuxun pain ca ja' wa com ra? Om ca narain ho' ac xuxun pain! Ac i ma' na ca tomi' tococwa ma'. 48Na e' na pain ca ja' tococwa pain com ta. Ma' ta querec pin' tococwa pain ca howa cocon Jeju ta ac tococwa na. Ja' ac tococwa na pain com quem.
Ja' pin iri tata pain com ne, tomi' ac xucucun na: Pe ho' wijimain xut e' ta Pedro ac xucucun na, pe ho' wijimain ac tococwa na.

Currently Selected:

Atos 10: TBPN

Highlight

Share

Copy

None

Want to have your highlights saved across all your devices? Sign up or sign in