Atos 9
9
Ca howa pin con Jeju Saulo
1Saulo ma' iri na ne, mana' mana' tiquin' na. To' parapa' xitoton na nonon oro wari' co howa nonon Taramaxicon nexi'. Je ca hwet con sacerdote co iri' taramaxicon ma'. 2Tomi' ac con na: Xirao' mi' roron pain carta co querec wet nonon oro win judeu iri' cwain, pain oro xirim ca cut in to xucucun pain Damasco cain. Ma' ta taxi' cacapa' pain ca tomi' mapa' ca'. Mam' iri toton co howa nanain oro ca pijim' nucun Jeju pain i cain ne, quep ac toton tara, pao' to cut in qui' ac toton tara pain Jerusalém ca'. Ca tarama' nucucun, ca narima' nequequem quem, pao' to cut in qui' tatam ta, ac i ma' na ca tomi' con taramaxicon nucucun oro sacerdote Saulo ma'.
3Mao ac ca na, wirico Saulo, wiricoco co ja' ja' nonon quem, mama' ac caca na. Jein jein, wixicam pin iri nanain Damasco ne, ane ane joc xec qui' ac nein pawin na naran. Joc xec joc xec mam' pin non Saulo. 4Pan' mao ac cain na macan'. Taraju ac cain na ca tomi' wa: Saulo. Saulo. Para quep em' mapa' ma' quem Saulo, ac i ma' na ca tomi' con ma'.
5Cain' ca wari' ma quem Taramaxicon ne ac ca na.
Wata' ta, co quep em' ma cwa'. Jeju ina ta ac con na. 6Tequi' pe ra ta ac con na. Mo hwet rain cidade ma'. Tomi' xo' ac quem tara wari' pain carawa ca ara ra xim ca'. Ac i ma' na ca tomi' con Saulo ca tomi' wa ca taraju ca ma'.
7Coco' e' nana co ja' ja' nonon Saulo ma'. Om ca tomi' ac caca, xi jaxicao' tamana ara tococwa ta. Taraju paxi' nanain ca tomi' wa ma'. Ane om querec tocwa co tomi' ma' ne. 8Tequi' pe ca' ac cain macan' na Saulo ma'. Pa paxi' na tocon, ane om querec mami' ca ne. Paxi' pe na, om na tocon. Je ca coc papan mi' tocwa ma'. Oro win ma' ca co ja' ja' nonon ma', coc papan wa' mao ac cocon na pain Damasco. 9Pe e' ac ca na Saulo. Om na tocon. Om ca cao' ca, om ca toc ca. Pe e' na. Ma' 3 na xec pain ca pe e' ca ma'.
10Pe nain Damasco wari' co howa non Jeju quem. Ananias na wixicon. Tohwein' ac ca na. Querec paxi' na, om ca pi'am ca pain ca tohwein' nucun. Tomi' ac con na Taramaxicon nexi': Ananias ac con na.
Ha'? Wata' ta Taramaxicon ne ac con na.
11Hap ra ta Ananias ac con na. Mao rain wana ca Direita ne wixinain ma'. Parac iri rain ne, hwet ac main tara xiricon Judas. Pe ho' nem wari' co maqui' nain Tarso ra? Saulo na wixicon ac mon tara. Tomi' non Iri' Jam quem. 12Tohwein' na Saulo. Querec paxi' na, om ca pi'am ca pain ca tohwein' nucun. Ac ca querec quem na Ananias. Ac ca querec quem na pain ca corom hwet mon pain xirim ca pe pan ca ma'. Ac ca quep mon na pain mum quem. Ma' ta ma' mami' ne tucum mon, ac ca tomi' ac i ma' mon na pain ca tohwein' nucun na ca tomi' con Ananias Taramaxicon nexi'.
13Mija nana wari' co tomi' hwet nanapa' con co ma' ta Taramaxicon ne ac ca na Ananias. Tomi' hwet nanapa' pain oro ca ara ca quem, pain ca quep em' cocon oro wari' nem pain Jerusalém ta. 14Je ca maqui' cain Damasco ca' quem. Quep quep pi' pin toton oro wari' co howa nonon Jeju ta na. Wiricoco oro taramaxicon nucucun oro sacerdote co quep roron nonon ta na ca tomi' con Taramaxicon nexi' Ananias ma'.
15Om na ta Ananias ac con na Taramaxicon nexi'. Mo hwet ron Saulo cwain. Wara tora' inon. Mi' ton inon pain ca taramaja mi' capa'. Tomi' hwet tarapa' cocon oro wari' co om judeu nana, wiricoco oro taramaxicon nucucun quem. Tomi' hwet tarapa' cocon oro wari' nein Israel ma' quem. 16Pijim' hwet iri tarapa' cocon oro wari' ne, mija ac ne tara ca jain jain ca pain oro carawa ca ara ton non. Tomi' hwet pan ton pain. Ac i ma' na ca tomi' xo' con Ananias Taramaxicon nexi'.
17Ma ac ca na, mao ac cain na xirim ca pe pan ca Saulo ma', corom mao ac ca na, quep ac con na pain winacon. Xa' Saulo ac con na. Tomi' napa' Taramaxicon nexi' Jeju pum, co hwet pa' nem pain wana pain ca maqui' nem ne. Hwet ron ta napa' pum. Ma' ta querec mami' ca, ma' ta corom hwet con Tamataracon Te ta napa' pum, ac i ma' na ca tomi' con ma'.
18Ane ane camara' ca' ac cain na tocon ca ac tocwixicon hwam ma', ca tatep pa' nain tocon ira. Querec mami' ac ca na. Tequi' pe ac ca na, ja' ac tocwa na pain com quem. Xi om ne ca howa pin ara con Jeju ta. 19Cao' ac ca na, wa pin ac ne na ximicon.
Ca pe cain Damasco Saulo, je pain ca in mao cain Jerusalém quem
Saulo ma', pe ho' ac cocon na co howa nana ma', pain Damasco ma'. Om ca tocwan homa ne xec pain ca pe ho' cocon ma'. 20Pijim' hwet ho' toton con Jeju ta ac ca na, pijim' pe ac cain na oro xirim ca cut in to xucucun oro judeu. Panxica Iri' Jam na Jeju ta nonon pain ca pijim' cocon ma'. 21Wa wa wa wa xam' ac cocon na oro wari' co taraju nonon quem. He! Om ca wirico ca co to' om pin toton nonon co howa nonon Jeju pain Jerusalém ra? Om ca quep toton cocon pain i ca' quem ra? Je ca maqui' ca ca' ira! Quep toton, pao' to cut mi' toton cocon oro taramaxicon nucucun oro sacerdote ta ca ma' ira. Ac i ma' paxi' na ca tomi' caca ma'. 22Ane pijim' hwara' opa tiquin' pijim' hwara' opa tiquin' ca Saulo ma' ne. Jeju pan na co winim' hwe ma', wirico co Cristo ta tata oro win judeu ca co to nanain Damasco ma'. Hehe ac cocon na quem. Om ca tomi' in pin ac cocon. Xi querec pin' ara cocon pain ca pijim' iri'o' nucun ta.
23Ac i ma' ac i ma' nana. Pain pin iri na ne, cut in ac xucucun na oro taramaxicon nucucun oro judeu. To' pa' pin xun Saulo ta ac xucucun na. 24Ane ma' ca wari' co tomi' hwet non pain ne. To' pa' pin xim nenem ta Saulo. Coco' ho' nanain oro manain cote ne pacun ca tao' caho' nain oro xirim ca', ca corom ac caca oro wari' ma'. Winim' nenem. Hwet mao ta' iri ra ne, quep ac quequem tara, to' pa' pin ac quequem tara ta non. 25Tomi' hwet ac tococwa na co taxipa' ca ma'. Xim pin iri na ne, o mao pan ac cocon na pain cote ne pacun ca tao' caho' nain cidade ma'. An ho' pe ac cocon na pain cote ne coco, wara ca' na man pain pacun ca tao' caho' nain cidade ma', an quiji' pe ac cocon na pain xijein cacarain quem.
26Mao iri nain Jerusalém Saulo ma' ne, jao jao ma' toton co howa nonon Jeju cwa' paxi' na. Ane jin' cocon ne. Jin' jin' pi' pin nonon. Om ta howa iri'o' ca ma' nonon. Howa mixein tara ma' nonon. 27Quep xiho' pan ac con na Barnabé ma'. Maji tomi' xuxun oro apóstolo ma', o mi' ac tococwa con na. Tomi' xo' ac tococwa na: Querec non Taramaxicon nexi' Saulo cwa'. Querec pe non pain wanaji Damasco. Tomi' napa' quem non. Pijim' pe ac cain na Damasco. Om ca pijim' jin' ca pain ca pijim' hwet cocon con Jeju oro wari' ta, ac i ma' na ca tomi' xo' cocon oro apóstolo Barnabé ma'. Na ra ac caca na. 28Ac i ma' na ca pe ho' pin cocon ma'. Jao jao ma' nonon pain oro ca mama' nucucun pain Jerusalém ma'. Pijim' na quem. Om ca pijim' jin' ca pain ca pijim' hwet tococwa con Taramaxicon nexi' oro wari' ma'. 29Tomi' tomi' paxi' tata oro judeu co tomi' e' nanain capijacocon oro grego. Pijim' xo' paxi' tata, ane tama' to' pa' pin xun cocon ne. 30Co howa nonon Jeju ma', taxi' pin iri nonon pain ca to' pa' pin xun cocon ne, o mao pan ac cocon na pain xijein cidade pain Cesareia cain. In mao rain macaram pain Tarso ta ac cocon na, mao ac ca na.
31Pain oro xijein cidade pain Judeia, je pain Galileia, je pain Samaria ma', om pin na wari' co mana' nonon oro co howa nonon Jeju, om pin na wari' co quep em' nonon quem. Mija pin ac caca na co howa nana ma', xi om ne ca quep xiho' pan ara cocon Tamataracon Iri' Jam ta. To' hwara' opa tata pain ca howa nucucun. Win xumu e' nanain ca param pan nucun Taramaxicon nexi' quem.
Ca taramaja pe cain Lida je Jope Pedro
32Pedro ma' iri na ne, xut mao nain oro xijein cidade ma'. Xut xut xut, tomi' ac xucun na: Mo querec toton oro wari' nucun Iri' Jam co to nanain Lida ta ac ca na, hwet ac tococwa na. 33Wa' mao iri nain i cain ne, querec ac con na wari' co carama pe. Eneias na wixicon. Ma' 8 na cawaxi' pain ca terem' e' cain wi ma'. 34Tomi' pan ac con na Pedro: Quep xio pin nem Jeju Cristo ta Eneias. Tequi' pe ra ta. An pe xo' rain witam ma' na ca tomi' con ma'. Tequi' pe hap pin ac ca na. 35Querec querec pi' pin nonon oro wari' co to nanain Lida je pain Sarona ma'. An to pin nanain ca wara howa ximama' nucucun, howa pin ac cocon na Taramaxicon nexi'.
36Pe nain xijein cidade narima' co howa non Jeju quem. Tabita na wixicam pain capijacocon oro judeu. Pain capijacocon oro grego ma' iri na ne, Dorcas na wixicam. Jope na wixinain cidade ca pe cama ma'. Tama' ara nain ca awi wa Dorcas ma', xiram pa' nonon oro wari' co om nonon carawa quem. Mi' taxipa' nonon pain oro carawa ca wajim' caca ma', je cwerequem pane. 37Pain ca pe pe wet cain Jope Pedro ma', caxi ac cama na Dorcas, mi' pin ac cama na quem. Hohoc ac cacamain na cwerequem, an piri' mao xim e', wara ca' na manain xirim pain pawin ma', an terem' pe ac cacam na.
38Om ca pira ca' xijein Jope pain Lida ma'. Co howa nonon Jeju pain Lida ma', taxi' pin iri nonon Pedro pain ca pe cain Lida ne, mo'o jun ta ac tococwa na wari' ma'. Ma' 2 nana co mo'o jun wawa ma'. Maqui' hap ra me jun ta tata. Mama' ac caca na.
39Maji ta ac cocon na Pedro ma'. Ma, ja' ja' ac tococwa na. Xuruxut xuruxut, hwet iri nanain Jope ne, o piri' mao ac cocon na pain manain xirim pain pawin ma', ca terem' pe cama ma'. Coco' coco' mam' pin nonon oro narima' co wara cono' ca' nanam waram taxicacam ma'. Awaran nanam, mam' pe mi' nonon con oro wom co oc cama Dorcas pain ca e' e' wet nequem ma'. Oro wom cam, iri' curucun wom, oro to' om capin' ma' quem. Mon cwa' wom co oc mi' caparut pane nana.
40Hwerehwet ca' jein man ca' ac cacam na Pedro. Hwerehwet mama' hwerehwet mama' pi' pin iri nana ne, pe torotop pe ac ca na. Tomi' ac con na Iri' Jam. Xin in hwet ac cam na, tomi' ac cam na: Tequi' pe ra e' ta Tabita nam. Querec ac cama na. Querec iri non Pedro ne, xao pe ac cama na. 41Quep ac cam na pain micam, an tequi' pe xat ac cam na. Corom qui' je ta ac tococwa na oro wari' nucun Iri' Jam ma', wiricacam oro narima' co wara cono' ca' nanam waram taxicacam ma' quem. Mam cwa' ta. E' mami' na ta, ac i ma' na ca tomi' tacacama ma'. 42Oro wari' co to nanain Jope ma', taraju taraju pi' pin ac caca na pain ca e' mami' cama Dorcas ma'. Mija ac caca na co howa pin nonon Taramaxicon nexi'. 43Mon to wet ac cain Jope na Pedro ma' quem. Pe ho' non Simão co xu taxipa' tapari carawa ma'.
Currently Selected:
Atos 9: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
