Atos 8
8
1Saulo ma', hohot non pain ca to' pa' pin tocwa Estêvão ma'. Awi na ca to' pa' pin tocwa ta na.
Ca quep em' tamana tococwa co howa nonon Jeju
Je i ma' xec nein ca ja' tequi' quep em' tamana tococwa co howa nonon Jeju pain Jerusalém pane. Quep em' xuxun, quep em' tamana ac tococwa na, mao ac ne ma' na ca mana' tococwa. Jain jain tamana nana. Ja' wawaran ja' wawaran pi' pin ac tococwa na, wawaran mama' ac cacain na oro xijein cidade pain Judeia je pain Samaria. Xica' to nana oro apóstolo co to wet nana pa'ao' pain Jerusalém. 2An corom pe xin curucun Estêvão pain manain pacun ta ac caca na caram ma' co win xumu nanain ca param nucun Iri' Jam ma'. Awaran tamana nonon quem.
3Saulo ma' iri na ne, to' parapa' to' parapa' pi' pin xitoton na nonon oro wari' co howa nonon Jeju. Quep em' tamana tata. Corom corom nain xiricocon, coc ororo hwerehwet qui' ac tococwa na ca tarama' nucucun, wiricacam ca narima' nequequem ma' quem, wara ca' na xirinain ca tao' to tao' to to wa ma', tao' to ac tacacama na pane.
Ca pijim' mao cain Samaria Filipe
4Co howa nonon Jeju ma', co ja' wawaran wawa ma', pijim' pijim' ac cacain na capijacon Iri' Jam pain oro xijein cidade ca mama' caca ma'. 5Ac i ma' na Filipe quem, mao ac cain na cidade ca pe nain Samaria, pijim' mi' ac tococwa na oro wari' co to nanain i cain. Pijim' hwet tata con Cristo. 6Taraju iri nonon pain ca pijim' nucun ne, querec iri nonon pain ca an hwet pe cain ca hwara' opa nucun Iri' Jam ma' ne, pain ca ara cain carawa ca om ara taxi' ne ca wari' wa ma', xin ne xin ne pi' pin ac caca na pain ca taraju wet cocon ma'. 7Mija nana wari' co quep xio pin wawa pain ca tomi' jein pin tococwa oro caxicon jam co corom to ho' nonon ma'. Tomi' jein pin iri tata ne, u mip ac caca na, hwerehwet ca' ac tococwa na. Co carama to nana ma', co xuruxut xirac nana ma' quem, ma' mija nana co quep xio pin wawa. 8Je ca tomi' querec te tamana caca oro wari' co to nanain Samaria pane.
Simão co ara xirac nonon oro wari'
9Ma' na xucun wari' co pe nain cidade ca to caca ma'. Ara xirac nonon oro wari'. Simão na wixicon. Pain cara pane ca ara xirac cocon oro wari'. Jaxicao' jaxicao' xam' tata oro wari' co to nanain oro xijein cidade pain Samaria. Xin to na. Hwara' opa tamana ina ta na pain ca xec xec nucun. 10Taraju wet taraju wet pi' pin nonon oro wari' co to nanain i ma'. Co om caramaju homa nana ma', wiricoco co caramaju tamana nana ma' quem, xin ne xin ne pi' pin nonon. Hwara' opa na co cwa' ta! To' hwara' opa non Iri' Jam co hwara' opa pan ta nonon. 11Pain cara pane ca xin ne cocon pain ca taraju wet cocon ma', xi om ne ca jaxicao' pan ara tococwa pain ca ara xirac nucun. 12Ane howa pin cocon Filipe ne. Pijim' pan iri nonon con Iri' Jam Filipe ne, pain ca taramaxicon pe ho' xitoton na nuhu' ta cocon ma', je pain ca to' witan xitoton na nuhu' Jeju co wara tomi' pe ca Iri' Jam pane cocon ma', howa pin ac cacain na ca pijim' nucun. Ja' ac tococwa na pain com quem. Ca tarama' nucucun, ca narima' nequequem quem, ja' ac tococwa na pain com. 13Howa pin ac ca na Simão ma' quem. Ja' iri ta pain com ne, ja' ja' ac con na Filipe pain oro ca mao nucun. Querec iri non Filipe pain ca an hwet cain ca hwara' opa nucun Iri' Jam ne, pain ca ara cain carawa ca om ara taxi' ne ca wari' wa ma', wa wa ac con na quem.
14Tomi' hwet ac tococwa na oro apóstolo co to nanain Jerusalém ma' quem. Howa pin nana oro wari' co to nanain oro xijein cidade pain Samaria cain, howa pin nanain capijacon Iri' Jam con Jeju ta tata. Taraju iri nana ne, hwet jujun ta ac tococwa na Pedro con João ma'. 15Tan' mama' iri nanain i cain ne, tomi' mi' pan ac cocon na con Iri' Jam oro co xo' howa nana ma'. Mi' roron pain Tamataram caram cwa' ta nana pain ca tomi' mi' cocon con Iri' Jam. 16Xi corom hwet querec cocon ta. Om ca corom hwet querec cocon Tamataracon Iri' Jam, om om nonon. Ja' e' tata pain com pane. Ma' ta querec pin' xihwe pain ca howa pin hun Taramaxicon nexi' Jeju ta tata pane. 17Pedro con João ma', quep ac cocon na pain winacocon, corom hwet ac cocon na Tamataracon Iri' Jam.
18Querec nain i ma' Simão ma' quem. Querec tata co xo' howa nana ma', pain ca mam' mi' tococwa pain Tamataracon Iri' Jam pain ca quep pan cocon pain winacocon oro apóstolo ma', Pedro con João ma'. Je ca tomi' con Pedro con João ma': Mi' xuhu' pain dinheiro ca'. 19Mi' ac mahu' tara pain ca hwara' opa nuhu' ma' quem. Wari' co quep ta' pain winacon ma', corom hwet ac con tara Tamataracon Iri' Jam. Ac i ma' na ca tomi' con Pedro con João Simão ma'.
20Ane tomi' in pin pan con Pedro ne: Jao jao mao ra pain dinheiro nem pain cote ne xe cain ta non. Cain' cain' xima quem? Na tarapa' pain ca mam' an ta' pain dinheiro main carawa ca mi' e' ca Iri' Jam ra? 21Om ca na camain' ne pain ca taramaja wi maparut ta, xi taramaja wi roron ta quem Iri' Jam parut ta. Querec pin' nem pain ca om xumu xo' ma ma'. 22Cwirin' rain ca coromicat pan tem nem ta. Tomi' ron Taramaxicon nexi'. Am xic am pin cain ca caracat nem pain ca param ximao nem ma', pain ca coromicat pan tem nem ma'. 23Cwirin' ra ta, xi querec pin' ara xim pain ca juhum' tamana ne xumum parut, pain ca ma' xirapa' na main ca hwara' opa nucun Iri' Jam ca mi' pan caparut ca'. Ac ca quep mip quem na ca caracat wa ta. Pao' pe quem ma' ira. Ac i ma' na ca tomi' in pin con ma'.
24Om na, tomi' mi' xine con Taramaxicon nexi' me ac ca na Simão ma'. Tomi' mi' xine con, ma' ta om ara capa' ca tomi' noro mahu' ma' na.
25Pijim' pijim' tiquin' ac cocon oro wari' na Pedro con João ma'. Tomi' hwet nonon con Jeju, pijim' pijim' ac cocon na pain capijacon Iri' Jam quem. Pi' pin iri na cocon ne, in mama' xin Jerusalém ta ac caca na. Pain ca xuruxut xuruxut caca ma', pijim' to ac cacain na oro ca paric to ne xirim pain Samaria ma'. Pijim' mi' pijim' mi' tata con Jeju oro wari' ma', pain ca to' witan xim cuhu' Jeju ta tococwa ma'.
Filipe con taramaxicon co maqui' nain Etiópia
26Hwet ac con na Filipe jam co taramaja mi' non Taramaxicon nexi'. Hap ra, xut mao rain wanaji Gaza pain quiricon xina cain, ca ac nein mahweri cain. Je i cain wana ca maqui' nain Jerusalém cain, ca mao nein cidade pain Gaza cain, ac i ma' na ca tomi' con ma'.
27Mao ta' ta ac ca na, mao ac ca na. Xut xut xut, querec pira ac con na wari' ma', co maqui' nain Etiópia, je i ma' wixinain macan' ca maqui' ca. Taramaja mi' nam Candace co taramaxicon pe ho' nonon oro wari' nein Etiópia. Hwara' opa na pain ca taramaja mi' cam ma', xi om ne ca querec wet ara cain dinheiro nequem ta. Wara mao nain Jerusalém. Ma' ta pe torotop mi' querec te ton Iri' Jam ta na ira. 28Je ca win in mao tain cain macaracon ma' quem. Xao pe nain carroça nucun, noro noro ac cain na ca xirao' nucun profeta Isaías cara pane.
29Tomi' ac con na Filipe Tamataracon Iri' Jam: Mo hwet ron wari' co xao pe pe nain carroça cain, ja' ja' ron ta non.
30Mo hwet ac con na, taraju ac con na pain ca noro cain ca xirao' nucun profeta Isaías cara pane. Tomi' ac con na: Taraju pa' main ca noro ma ma' non.
31Cain' xi taraju pa' ac tain quem ac ca na ma'. Xi ma' capa' wari' co tomi' xo' napa' pain ta na. Piri' pe ra e'. Xao pe ho' ne e' ac con na.
32Je i ca' ca xirao' nein capijacon Iri' Jam ca noro ca ma':
Win ne ovelha pain ca an mao xine pain ca to' pa' pe xine ma',
ac i ma' na pain ca an mao cocon co ma', pain ca to' pa' pin xun cocon ma'.
Win ne ca tacana pe ne wijimain ovelha pain ca wijac pin xine tenenein ma' quem,
ac i ma' na ca tacana pe ca co ma', je pain ca om tomi' camain' ca quem.
33Tomi' xirac nonon, tatam' tatam' ac cocon na.
Nain ho' nonon pain ca tomi' querec xo' tocwa pain carawa ca ara ca ma',
pain ca tomi' mi' tocwa pain ca wap wa pain ca wum co em' ta tocwa ma'.
Om nana mana panxica cocon waram winacon quem,
xi om ne ca to' pa' pin ara tocwa ta.
Ac i ma' na ca xirao' nein capijacon Iri' Jam ca noro ca wari' ma'.
34Ma' co tomi' ca profeta quem ac con na Filipe wari' ma'. Tomi' pan xucun ra? Tomi' non xucun wari' ra? Tomi' xo' ne con ac con na.
35Tomi' xo' ac con pain na Filipe ma'. Tomi' xo' non pain capijacon Iri' Jam ca xirao' pe ca profeta Isaías cara pane, tomi' xo' tomi' xo' ac con na pain oro wirain ca xirao' pe nein capijacon Iri' Jam quem. Tomi' hwet tomi' hwet ac con na con Jeju pain ca to' witan xim capari' quem.
36Ca tiquin' mama' caca pain wana ma', aram aram hwet ac cacain na com ma', xuterem' ma'. Tomi' ac ca na wari': Noro ra, main ma' com ma'. Hohot na pain ca ja' mapa' pain com quem? Ac i ma' na ca tomi' con ma'.
37Hohot na. Mo ta howa mon Jeju Cristo pain iri' xumum ma', hohot ac ne na pain ca ja' xim pain com ta ac con na Filipe.
Howa ina ta ac ca na. Howa inon Jeju Cristo pain ca Panxica Iri' Jam ca ma' ac ca na quem.
38Je ca tomi' con wari' co cuc in cuc in nain cavalo nein carroça. Quep xat rain ta, quep xat ac cain na. Xat iri na ne, quiji' ca' ac cacain na. Wirico Filipe ma', wirico wari' ma' quem, quiji' hwet ac cacain na com ma', ja' pan ac con pain na Filipe. 39Hwerehwet ca' iri nanain com ne, ane ane om pin ac ca na Filipe ma'. Tamataracon Iri' Jam na ca an mao non. Wari' ma' iri na ne, om ca querec mami' con Filipe. Xut tiquin' mao ac ca na. Tomi' querec te tamana na quem.
40Filipe ma' iri na ne, ane ane pe pin ac cain na Azoto, je i ma' wixinain cidade ca pe pin ca ma'. Pe pin iri nain i cain ne, pijim' ac tococwa na oro wari'. Pijim' mi' tata con Jeju pain ca to' witan toton cocon ma'. Pijim' tiquin' pijim' tiquin' mao ac cain na oro xijein cidade pain wanaji Cesareia ma'.
Currently Selected:
Atos 8: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
