João 15

Jeju co Iri' Panaji Uva

1Wata' co Iri' Panaji Uva ta ac caparut na. Te iri na ne, wirico co querec wet nain panaji uva. 2Wari' co querec wet nain panaji uva ma', ton tapiripit taxipa' nain taparain ca om wina. Taparain ca wina ma', wawac wijimain pin ac cain na. Ma' ta wina tamana ne nain#15.2 Tomi' mi' tata oro wari' co howa paxi' nonon Jeju ma', co om xuruxut xo' nana pain ca om an hwet pe cacain ca howa nucucun. Ac ca ton tapiripit tococwa na. Pain ca horohot ca' tococwa pain oro carawa ca to' i'ina nonon oro co xuruxut xo' nana pain ca an hwet pe cacain ca howa nucucun ma' iri na ne, ac ca an xiho' capari' na pain ca wawac wijimain pin xin oro taparain panaji laranja ca', ac je na ca tomi' ca ma'. Wawac wijimain pin irin taparain panaji laranja, ma' ta mi tamana ne winain ta iri'. Ac i ma' napari' Iri' Jam pain ca xuruxut xo' iri' pain ca an hwet pe xin ca howa nexi' quem. Ac ca wawac wijimain capari' na, ac ca horohot ca' capari' pain na oro carawa ca to' i'ina napari'.. 3Wara an xiho' hwein oro taparain panaji uva ca wina ma'. Xi howa ara hwein capija ca pijim' mi' xuhu' ca'. 4Win cwere cara xine, win cwere cara ac xuhu' tara quem. Win ne ca wina e' ne taparain pana pain ca win cwere cara nein panaji ma'. Ac i ma' hwe quem. Mo ta om win cwere mahu', om ac ne tara ca xuruxut xo' hwe pain ca om an hwet pe hwein ca howa nuhu' quem.

5Wata' co Iri' Panaji Uva. Wahu' co taparain nana ma' quem. Wari' co win cwere napa' ma', wari' co win cwere ta' ma' quem, ac ca wina tamana ca tara pain ca xut xo' ca pain ca an hwet pe cain ca howa nucun. Je ca tomi' xuhu' ca': Mo ta om xuhu', om ca ara ac hwein ca awi wa ta. 6Wari' co om win cwere napa' ma', ac taparain panaji uva ca om wina ma', ca xin pin wa ma', ca mi' pin ma'. Oro taparain panaji uva ca cono' ac i ma' ma', cut in ac xine na, wixicaracao' mi' ac xine na pain xe ma', wiran mao ac ne na quem. 7Mo ta win cwere cara mahu', mo ta to ho' cara cuhu' oro ca tomi' ne quem, na ac cuhu' tara pain ca tomi' hun Te ma', pain ca mi' xut hun pain oro carawa ca param hwe ma'. Mi' mi' pi' pin ac cuhu' pain tara quem. 8Mo ta ara hwein oro ca hohot non Te ma', querec pin' ac cocon tara oro wari' pain ca hwara' opa nucun pain ca awi tamana nucun. Ac i ma' tara ca an hwet pe hwein ca taxipa' mahu' ma' quem na ca tomi' caparut.

9Om ca noc camain' xuhu' ta ac caparut na. Win ne ca om noc camain' capa' Te ma'. Je ca tomi' xuhu' ca': Win cwere cara xine. Ma' ta querec pin' mahu' pain ca om noc camain' xuhu' ca'. 10Mo ta tomi' ha' mahu' pain oro ca ara je xuhu' ca', om ac ne tara ca noc xuhu' ta. Win ta' con Te cwa', tomi' ha' inon pain oro ca ara ra capa', om ac ne na ca noc capa' quem. 11Tomi' ac i ma' inuhu', ma' ta tomi' querec te hwe inuhu'. Win ne ca tomi' querec te ta' ca', ac i ma' tara ca tomi' querec te nuhu' quem. Tomi' querec te tamana ac hwe tara ta. 12Tomi' ha' xine pain ca tomi' ca' xuhu' ca': Ta noc camain' xujuhu' me. Win ne ca om noc camain' xuhu' ca', ac i ma' tara ca om noc camain' xujuhu' ta. 13Wari' co mi' pin caho' nonon oro win ma' ca ma', querec pin' ac tocwa na pain ca om noc camain' cocon. Om na xucun wari' co an xiho' non pain ca om noc cocon ma'. 14Mo ta tomi' ha' mahu' pain oro ca ara je xuhu' ca', querec pin' ac xihwe tara pain ca win ma' ne mahu' ma'. 15Om ca querec querec ac wari' co taramaja mi' e' nonon taramaxicon nucucun mami' mahu', om na. Querec querec ac oro win ma' ne pin mahu'. Oro win ma' ne pin xuhu' ca' ira. Wari' co taramaja mi' e' non taramaxicon nucun ma', om ca taxi' cain ca ara ta' nucun taramaxicon nucun. Wahu' iri na ne, oro win ma' ne pin inuhu', xi tomi' hwet tomi' hwet pi' pin ara xuhu' pain oro ca tomi' capa' Te ta. 16Om ca wahu' ne co tora' pan napa' pain ca taxipa' xun mahu' ma', om na. Wata' pan co tora' nuhu'. Mi' inuhu' pain ca taramaja wa quem. Wawaran mama' je, pijim' mi' jujun pain capija oro wari' ta inuhu'. Howa cara ac caca tara co howa nanapa' pahu' inuhu' quem. Mo ta tomi' ha' mahu' pain ca mi' xuhu' pain ca taramaja wa ca'. Mo ta tomi' ca' hun Te ma': Mi' naparut pain ca tomi' urut pum Panxima Jeju ta, mo ta tomi' ac i ma' hun pata', ha' ac cuhu' tara pain carawa ca mi' xut pain hun ma'. Mi' mi' pi' pin turuhu' pain. 17Tomi' ha' xine pain ca tomi' ca' xuhu' ca' quem: Ta noc camain' xujuhu' me. Ac i ma' na ca tomi' caparut ma'.

Ca quep em' xun tococwa co howa nonon Jeju

18Ta wa ina me hwe pain ca noc cucuhu' oro wari' co om howa nanapa' me. Xi noc cain' ara cacapa' ta, mam' pe wet jein ta. Noc cain' cacapa' ca' ira ac caparut na. 19Mo xi win ma' ne huhun oro wari' co om howa nanapa' ma', om ac ne xira ca noc cucuhu' pain ca win ma' ne cucuhu' ma'. Ane tora' ca' xuhu' cocon ne. Om ca win ma' ne mami' huhun. Je ca noc cucuhu' ma' quem. 20Mam' pe wet jein ca tomi' xuhu' pane: Wari' co taramaja mi' e' non taramaxicon nucun ma', om ca hwara' opa tiquin' ca' con taramaxicon nucun, ac i ma' na ca tomi' xuhu' pane. Je ca tomi' xuhu' ca': Carawa ca ara mi' cacapa' oro wari' ma', je ta ara mi' cucuhu' quem. Ja' tequi' quep em' nanapa' oro wari' co noc nanapa' ma', ja' tequi' quep em' ac cucuhu' tara quem. Ma' nana co tomi' ha' nanapa' pain ca tomi' xo' toton pain capija ca', ma' ac caca tara co tomi' ha' nunuhu' pain ca tomi' xo' huhun pain quem. 21Oro wari' co noc nanapa' ma', om ca querec pin' cocon Te co hwet roron oro wari' ta napa'. Je ca noc xuxun cucuhu' ma'. Je ca quep em' xuxun cucuhu' ma' quem. Xi taxipa' ara mahu' ta. 22Mo xi om maqui' tain macan' ca', mo xi om tomi' toton oro wari' co noc nanapa' ma', om xi tomi' em' cocon pain ca caracat wa Te Iri' Jam. Ane tomi' toton ne. Om ca tomi' narain ho' ac xucucun pain ca caracat nucucun. 23Oro wari' co noc nanapa' ma', om ca xica' pe ta' pain ca noc cacapa'. Noc nonon Te quem. 24Mo xi om querec cacapa' pain ca an hwet pe tain ca hwara' opa ne pane, pain ca ara tain ca om ara taxi' ne ca wari' wa pane, om xi tomi' em' cocon pain ca caracat wa Te. Ane querec cacain ne. Noc cara nanapa', noc cara nonon Te quem. 25Je i ma' ira, na e' na pain ca noc cacapa' ta. Ma' ta hwet pin ne ca xirao' pe xine capijacon Te ca howa paxi' caca ca'. Noc ximama' nanapa', ac i ma' na ca xirao' pe nein pata' ta naparut.

26Hwet iri turuhu' co quep xiho' xim nuhu' ne, tomi' xo' ac cuhu' tara pain oro ca iri'o' wa con Te Iri' Jam ta ac caparut na. Tomi' inain Tamataracon Te ta, taraju pa' hwe? Maqui' toron Te. Wata' tara co mam' nuhu' pain. Tomi' hwet ac cocon tara oro wari' pata'. 27Tomi' hwet pan ac mahu' tara cocon oro wari' quem. Xi wara to ho' ara mahu' pain cara pane, pain ca xo' pijim' qui' xuhu' pain cara pane na ca tomi' caparut ma'.

Currently Selected:

João 15: TBPN

Highlight

Copy