João 16

1Wara tomi' hwet inuhu' pain oro ca tomi' ne ca' ac caparut na. Ma' ta om aram aram i'ina ne xumuhu' pain ca quep em' xim cucuhu' oro win judeu hwe ma' inuhu'. 2Mana' hwerehwet ca' tuturuhu' pain oro xirim ca cut in to xujuhu' ma'. Om ta corom mami' ac hwein. Om ta xica' pe ne ca mana' hwerehwet cucuhu' quem, main ma' tatara co to' parapa' pin xim nunuhu'. Coromicat ximama' tatara quem: Ara urut pain ca param nucun Iri' Jam pain ca to' parapa' pin urut cocon caram cwa' ta tatara pain ca coromicat pan teretem nucucun pahu'. 3Ara ac i ma' tuturuhu', xi querec pin' cocon Te Iri' Jam ta. Om ca querec pin' cacapa' quem. 4Tomi' hwet inuhu' pain ca quep xim cucuhu' ma'. Ame hwe e', aram aram maqui' iri tara xec nein ca quep em' xim cucuhu' ne, mam' pe wet ac hwein tara ca tomi' ne ca', pain ca quep em' xim nunuhu' ta xuhu' ca'. Om ca wara tomi' hwet xuhu' pain cara pane, pain ca xo' taxipa' qui' mahu' pane. Xi om ne ca pe ho' pe ho' wet ara xuhu' pane ta na ca tomi' caparut ma'.

Ca taramaja nein Tamataracon Iri' Jam

5In hwet ton paxi' inon Te co hwet roron oro wari' ta napa' pane ac caparut na. Je xi tomi' querec mahu' pain ca main ca mao ta' ma ma' quem mahu'? Om ca tomi' querec camain' mahu' pain. 6Tomi' xaxa' tamana e' hwe, xi om ne ca mao ta' ina ta ara xuhu' ta. 7Tomi' xaxa' paxi' hwe pain ca paca' xim xuhu' ca'. Ane awi tamana cuhu' ca mao ta' ne ca' ne, tomi' iri'o' inuhu'. Mo ta om mao ta', om ta maqui' ne Tamataracon Te ca quep xiho' xim nuhu'. Mo ta mao ta', mam' ac xuhu' pain tara. 8Maqui' iri tara ne, ca' ac ne tara ca taramaja nein: Meo tarain ximicocon oro wari' co om howa nanapa'. To' querec pin' totoron pain ca caracat nucucun. To' querec pin' totoron pain ca xut xo' ne ca'. To' querec pin' totoron pain ca wap toton cocon Te Iri' Jam quem. 9To' querec pin' totoron pain ca caracat nucucun ma', pain ca om howa cacapa' ma'. 10To' querec pin' totoron pain ca xut xo' ne ca', xi om ne ca in hwet ara ton Te ta. In hwet iri ton ne, om iri tara ca querec mami' mahu' ne, je tara ca to' querec pin' cocon pain ca xut xo' ne ca'. 11To' querec pin' totoron pain ca wap toton cocon Te ma' quem, xi om ne ca wara wap ton ara con Caxicon Jam co taramaxicon pe ho' nonon ma'. Taxi' pin ac cocon tara Te pain ca wap toton pan cocon pain ca caracat nucucun.

12Mija mija wet paxi' na oro ca tomi' xim xuhu' pain xocori ca'. Mo xi tomi' ho' xuhu' pain, om xi taraju pa' ac hwein. I'ina xira xumuhu' pain ta. 13Ane maqui' ta' ne Tamataracon Te ca an hwet pe taxipa' nain oro capijacon Te ca iri'o' ne. Maqui' iri tara ne, tomi' xo' ac cuhu' tara pain oro capijacon Te ca iri'o'. Om ta tomi' hwet cuhu' pain ca coromicat pan nein, om na. Tomi' hwet e' turuhu' pain oro ca taraju ne con Te. Tomi' hwet turuhu' pain oro carawa ca ara ta' ma' quem. 14Oro ca tomi' ne pain ca coromicat ne ca', an hwet mi' ac cuhu' pain tara. Ac i ma' tara ca an hwet mi' cuhu' pain ca hwara' opa ne ca', je pain ca awi tamana ne ca' quem. 15Oro ca coromicat nucun Te cwa', an xiho' nain ca coromicat ne ca'. Je ca tomi' ac i ma' xuhu' pain Tamataracon ca' ne, pain ca an hwet mi' xim cuhu' pain oro ca tomi' ne, je pain oro ca coromicat ne ca' quem na ca tomi' caparut ma'.

Ca tomi' xaxa' nuxut pain ca mao ta' nucun, je pain ca tomi' querec te nuxut pain ca querec mami' xun urut con quem

16Maqui' ho' tara xec nein ca querec querec om mahu' ta ac caparut na. Ame hwe e', om ta pain homa ne, querec mami' ac mahu' tara quem naparut.

17Tomi' ca' ac xujuxut na: Cain' cain' ta' ca pain ca maqui' ho' tara xec nein ca querec querec om mahu' capari' quem ne? Cain' cain' ta' ca pain ca om ta pain homa ne, querec mami' ac mahu' tara ta capari' quem? Cain' cain' ta' ca pain ca xi hwet ton ara ton Te ta ara ca quem? 18Cain' cain' ta' ca pain ca om ta pain homa ne capari' quem? Om ca taraju pa' xin ca tomi' nucun ta xujuxut.

19Taxi' naparut Jeju pain ca tomi' querec xun urut con quem. Je ca tomi' caparut ma': Tomi' querec xujuhu' pain ca tomi' xuhu' ne ra, pain ca maqui' ho' tara xec nein ca querec querec om mahu', om ta pain homa ne, querec mami' ac mahu' tara xuhu' ne ra? Je ca tomi' querec xujuhu' ma' ra? 20Je ca tomi' xuhu' ca', tomi' iri'o' inuhu' ta ac caparut na. To' pa' pin iri tatarapa' ne, awaran tamana ac hwe tara pain ca tomi' xaxa' nuhu'. Oro wari' co om howa nanapa' ma' iri tatara ne, tomi' querec te pan tatara. Jain jain paxi' pan je pain ca tomi' xaxa' nuhu'. Ame hwe e', main tomi' xaxa' tomi' xaxa' om je, tomi' querec te ac hwe tara ta. 21Win cama narima' co caxi nam cawinacam pain ca pan' ta' nucun ma'. Tomi' xaxa' paxi' na, xi maqui' ara ne xec nein ca jain jain ta' cama pain ca pan' ta' ca cawinacam ta. Ame hwe e', pan' qui' iri na cawinacam ne, ji'am pin ac camain na ca jain jain nequem, xi tomi' querec te tamana ara cama pain ca pan' qui' nucun cawinacam. 22Ac i ma' xi' hwe quem. Tomi' xaxa' paxi' hwe pain xocori ca'. Ame hwe e', main querec mami' xijexi'. Tomi' querec te tamana ac hwe tara. Om tara wari' co to' om pin ac nain ca tomi' querec te nuhu' quem.

23Maqui' iri tara xec nein ca querec mami' xijexi' ne, om ta mi' xut pain mami' mahu' pain ca param nuhu'. Je ca tomi' xuhu' ca', tomi' iri'o' inuhu': Mo ta tomi' xun hun Te ma', mo ta an hwet mi' hun pain wuxu pain ca mi' naparut pain ca tomi' urut pum ca' hun pata', mi' ac cuhu' pain tara ca mi' xut pain hun ma'. 24Om ca an hwet mi' querec hun pain wuxu pain ca mi' xut hun pain ca param nuhu' ma'. Pain xocori ca' iri na ne, tomi' jun. Mi' xut pain ca param nuxut ca' jun. Mi' ac cuhu' pain tara. Ma' ta tomi' querec te tamana hwe ta turuhu' ta na ca tomi' caparut ma'.

Ca pi' pin ne ca tomi' caparut Jeju

25Pain ca tomi' hwet xuhu' pain oro ca tomi' ne ca', pijim' joc mam' mi' inuhu' pain oro carawa pain ca ca' na xuhu' pain capijacon Te ac caparut na. Ame hwe e', main maqui' tara xec nein ca pijim' joc mam' mi' pijim' joc mam' mi' om pin xuhu'. Tomi' xo' e' xuhu' con Te. Ma' ta taraju pa' hwe con ta inuhu'. 26Maqui' iri tara xec nein ca tomi' xo' xim xuhu' con Te ne, tomi' ac hun tara, an hwet mi' ac hun tara pain wuxu pain ca mi' xut hun pain ca param nuhu'. Om ta wata' ne co tomi' mi' nuhu' con. Tomi' mi' pan jun pain. 27Xi noc cuhu' Te ta. Om ca noc cuhu', xi noc pan mahu' ta. Howa mahu' pain ca maqui' ton Te quem. 28Maqui' inon Te pain ca maqui' tain macan' pane. Paca' ho' tain ina quem. In hwet ac ton tara Te na ca tomi' caparut ma'.

29Tomi' ac urut con na: Aram aram taraju pa' pin urut pum. Xi tomi' xo' ara maparut ta. Om ca pijim' joc mam' mi' mami' e' maparut pain oro carawa ta. 30Taxi' urut pum pain ca taxi' taxi' pi' pin main oro carawa. Oro ca tomi' querec xim urut pum quem, om ca param maparut pain ca tomi' querec urut pum pain, xi wara taxi' ximao ara main oro ca param nuxut ta. Je ca howa urut pum pain ca maqui' mon Iri' Jam ta urut con.

31Aram aram howa pin mahu' ra ac caparut na. 32Tara pahu' ac caparut na. Wixicam pin na xec nein ca wawaran mama' xi' hwe ta. Maqui' pin iri na ta. Wawaran pi' pin ac hwe tara, mama' mama' pi' pin ac hwein tara xuruhu'. An pe pin xim mahu', xica' pe ac ta' tara pa'ao'. Om paxi' tara ca xica' pe ta' quem, xi pe ho' taxipa' ara capa' Te ta. 33Tomi' hwet inuhu' pain oro ca tomi' ne ca', ma' ta om toron ne xumuhu' pata' inuhu'. Ma' paxi' turuhu' oro ca to' i'ina nuhu' pain macan' ca'. Na e' nuhu' pain ca hwara' opa hwe. To' quiji' pin ara xi' inon co ma' co taramaxicon pe ho' nonon oro wari' co om howa nonon Te ta na ca tomi' caparut ca'.

Currently Selected:

João 16: TBPN

Highlight

Copy