Lucas 4

Ca tomi' querec con pain ca caracat wa Jeju Caxicon Jam

Mateus 4.1-11; Marcos 1.12-13

1Pe ho' mip iri non Tamataracon Iri' Jam Jeju ne, in ca' ac cain na Jordão ma'. An mao ac tocwa na pain cote ne mahweri. Je Tamataracon Iri' Jam pan na ca an mao non ma'. 2Ma' 40 ac ne na xec pain ca momon tomi' querec con pain ca caracat wa Caxicon Jam. Om ca cao' camain' ca pain oro xec ca mon to wet cain i cain. Pi' pin iri na oro xec nein ne, pe' pin ac ca na quem.

3Tomi' ac con na Caxicon Jam: Ara capam' pin ximain pacun ca' quem? Win ne ca Panxica Iri' Jam ina ma ma' na ca tomi' querec con ma'.

4Om na ta ac con na Jeju. Ac i ca' na ca xirao' pe xine pain capijacon Iri' Jam:

Om ca xica' pe ne capam' ca to' e' nain ca wari' wa ma'.

Ac i ma' na ca tomi' in pin con Caxicon Jam.

5An mao ac con na pain iri' cote ne pacun ca mao tamana pawin. An mao non pain iri' tamain. An hwet mi' ac con na pain oro xijein macan' pain pira, an hwet mi' hap non pain, ac pain ca xopin' pin e' ne ca tucu wa na pain ca an hwet mi' hap con pain. 6Tomi' ac con na: Mi' xim pain ca taramaxicon pe ho' momon oro wari' pain oro xijein macan' cain. Mi' xim pain oro caramajinain quem. Mene mene pi' pin rain xim. Xi wara mi' ara capa' pain Iri' Jam ta. Ha' napa' pain ca mi' tiquin' ton pain co param ta' quem. 7Je ca tomi' xim ca': Mo ta pe torotop mi' querec te mapa' pain ca taramaxicon ne mapa' ca', mi' ac xim pain tara, mene mene pi' pin ac main tara ta na ca tomi' con ma'.

8Om na ta ac con na Jeju. Ac i ca' na ca xirao' pe xine pain capijacon Iri' Jam:

Pe torotop mi' querec te e' ron Taramaxicon co Iri' Jam ne ma ta.

Xica' pe tara co ma' co tomi' ha' wa pain ca taramaja mi' tocwa ta.

Ac i ma' na ca xirao' nein con ta non.

9An mao ac con na pain Jerusalém ma'. Wara ca' na xonein cote ne xiricon Iri' Jam ma', pain iri' tamain ma', an xat pe ac con na. Tomi' ac con na: To' jao cun mao rain macan' cain. Win ne ca Panxica Iri' Jam ina ma ma'. 10Xi xirao' pe ara xine pain capijacon Iri' Jam ta:

Querec wet jun ta totoron oro jam co taramaja mi' nonon pum.

11Quep cam' teterem pain micocon.

Ma' ta om wein mao ne caximacon pain pacun ta totoron pum.

Ac i ma' na ca xirao' pe xine pum ta non.

12Om na ta ac con na Jeju. Ac i ca' na ca xirao' pe xine pain capijacon Iri' Jam:

Ta tomi' querec mon Taramaxicon co Iri' Jam ne ma cwa' me ta.

Ac i ma' na ca xirao' pe xine con ta non quem.

13Pi' pin iri na oro ca tomi' querec con ma' ne, paca' ac con na. Oro xijein xec tomi' querec mami' ton ta ac ca na quem.

Ca in mao cain Galileia Jeju

Mateus 4.12-17; Mateus 13.53-58; Marcos 1.14-15; Marcos 6.1-6

14In mao ac cain na Galileia Jeju. Pe ho' mip non ca hwara' opa nein Tamataracon Iri' Jam quem. Tomi' hwet tomi' hwet pi' pin ac xucucun con na oro wari' pain oro xijein cidade pain i cain. 15Ca' na pe nain oro xirim ca cut in to xucucun oro judeu, awi na awi na pi' pin ac cocon na oro wari' quem.

16In mao ac cain na Nazaré, je i ma' cidade ca hwara' pe ca pain ca pije' nucun. Sábado pin iri na ne, corom mao ac cain na xirim ca cut in to xucucun ma'. Je curucun pane. Noro tain capijacon Iri' Jam ta ac ca na, tequi' pe ac ca na quem. 17An mi' ac cocon na pain ca joc top xine tapari carawa ca xirao' pe ne ca xirao' nucun profeta Isaías cara pane#4.17 Oro livro cocon hwanana pain cara pane, om ca an xiho' nein oro livro nexi' pain xocori ca'. An e' nanain tapari carawa, xirao' xirao' ac cacain na, joc top ac cacain na quem. Ac i ma' na livro nucucun hwanana pane.. Pa ac cain na, mam' ac cain na ca xirao' pe nucun ca noro ta' ca ma'. Ca' na ca noro nucun:

18Pe ho' napa' Tamataracon Iri' Jam.

Xi tora' ara capa' ta.

Pijim' hwet roron pain capija oro wari' co ximin nana ta napa',

pijim' hwet roron pain capija ca tomi' hwet nonon pain ca to' witan ton toton ca' napa'.

Oro wari' co om tococon ma',

pijim' hwet roron pain napa'.

To' querec pin mami' xuhu' ta nuhu' ta napa'.

To' witan roron co quep em' wawa ta napa'.

19Tomi' ca' roron ta napa':

Maqui' pin na xec nein ca xiram pa' pan toton oro wari' ta roron napa' Iri' Jam quem.

Ac i ma' na ca xirao' pe ca profeta Isaías ca noro ca Jeju ma'.

20Pi' pin iri na ca noro cain ne, joc top in hwet ac cain na, an in mi' ac con pain na co cut xo' to nain oro ca xirao' nein capijacon Iri' Jam ma'. Xao pe ac ca na quem. Momon noro momon noro pi' pin ac cocon na oro wari' co cut in xucucun ma'. 21Tomi' ac tococwa na: Je i ca' xec nein ca win hwet pin ne capijacon Iri' Jam ca xirao' pe xine pane, ca xo' taraju hwe ca' ne na ca tomi' nucun ma'.

22Oro wari' co taraju nonon ma', awi na awi na pi' pin nonon. Wa wa paxi' nana pain ca taraju cacain ca pijim' taxi' tamana nucun, ane tomi' querec pan xucucun ne: Cain' cain' xira co cwa' quem? Om ca panxica José ca ra na ca tomi' querec pan xucucun.

23Tomi' ac tococwa na: Taxi' inuhu' pain ca tomi' ca' xim mahu' pain i ca' quem, ca tomi' taxipa' caca oro wari' ma'. Tomi' ca' xim mahu': Taraju urut pum pain ca quep xio pin momon oro wari' co to nanain Cafarnaum cain. Je xi quep xio pin momon oro wari' co to nanain macaraxi' ca' quem, ac i ma' paxi' xim mahu' ma' na ca tomi' tococwa ma'#4.23 Ca' na ca coromicat nucun Jeju cocon oro win ma' ca pain macaracon pain Nazaré ma': Om ca howa cacapa'. Param e' nanapa' pain ca quep xio pin toton, ma' ta querec pin' xut pum pain ca Cristo iri'o' ma ma' nanapa', ac i ma' na ca coromicat nucun Jeju. .

24Je ca tomi' xuhu' ca', tomi' iri'o' inuhu' ta ac tococwa na. Om ca tomi' querec te tocwa profeta pain iri' macaracon. 25Tomi' iri'o' inuhu' pain i ca' quem: Pain oro xec nein ca profeta ca Elias cara pane, to' om pin nain xowi' Iri' Jam. Ma' 3 pin iri na cawaxi' ne, je pain ximijain xijein ma' quem, pe' tamana ac caca na oro wari' pain oro xijein macan'. Ma' mija paxi' nana oro narima' co to nanain Israel pane, co cono' ca' nanam waram taxicacam pane. 26Ane om quep xiho' raram ta con Elias Iri' Jam ne. Om ca ma' camain' cacama co quep xiho' wawa pain Israel, om na. Quep xiho' ram ta non cam narima' co om judeu ma', co pe nain wijimain cidade ca pe ja' pan nain Sidom pane. Sarepta na wixinain cidade nequem. Wara mi' pin ca' nam taxicam pane, quep xiho' ram ta ac con na Elias Iri' Jam. 27Ac i ma' na pain oro xec nein ca profeta ca Eliseu cara pane quem. Mija nana oro wari' co to nanain Israel ma', co ma' nonon caji nan quem. Ane om ma' camain' caca co quep xio pin wawa pain Israel pane ne. Quep xio xica' pe ta Naamã co wari' nein Síria pane na ca tomi' tococwa ma'.

28Oro wari' co cut in xucucun pain i ma', taraju iri nanain ca tomi' ca ne, mana' tamana ac cocon na. Mana' mana' pi' pin nonon quem#4.28 Wari' nucun Iri' Jam nana oro judeu pane, xi wiricoco ara caca co wara tora' wawa pane. Noc taxipa' nonon oro wari' co om judeu nana. Tomi' querec te e' napari' Iri' Jam pain ca oro wari' ne capari' ta nana. Caram ma' co mana' nonon Jeju ma', tomi' hwet iri tata cacam co om judeu nana ma', pain ca xiram pa' tacacama ma', coromicat ximama' ac caca na: Tomi' ximao na co cwa' ta, ac ca tomi' querec te tamana cocon na co om judeu nana Iri' Jam ta, ac ca tomi' querec te wijimain e' capari' na pain ca judeu iri' ca', ac je na ca tomi' hwet capari' Jeju cwa' nana pain ca coromicat ximama' nucucun. Je ca mana' mi' cocon Jeju ma'. . 29Tequi' to ac caca na, jein hwet ac cocon na, xin hwet pin ac cocon na, ja' tequi' hwet mao ac cocon na pain cidade. Ja' tequi' ja' tequi' hwet ac cocon na pain tamain pacun ca pe pan ne cidade nucucun ma'. Joc pan' pin xun paxi' nonon ira. 30Ane witan ca' cocon ne. Joc tutup joc tutup nonon, mao ac ca na quem.

Ca tomi' mo pin con caxicon jam Jeju

Marcos 1.21-28

31Mao ac cain na Cafarnaum Jeju ma'#4.31 Cafarnaum na wixinain cidade nucun Jeju. . Pe nain Galileia. Sábado pin iri na ne, pain xec nein ca xao to wa ne ca xumu wa ma', pijim' ta' ta ac ca na, ca' na ac tococwa na pain capijacon Iri' Jam oro wari'. 32Wa wa wa wa pi' pin nonon oro wari' co taraju nanain ca pijim' nucun. Xi an hwet pan ara cain ca hwara' opa nucun pain ca ca' na cain capijacon Iri' Jam ta.

33Pain xirim ca cut in to xucucun ma', ma' na wari' co corom pe ho' non caxicon jam. Merem mip ac ca na pain ca jain jain nucun: 34Cain' cain' xim maparut quem Jeju co maqui' nain Nazaré? To' om pin xim maparut ra? Querec pin' inem ta! Wum co Iri' Wari' co wara tora' ca Iri' Jam pane! Iri' Panxica ma ta! Ac i ma' na ca merem ca ma'.

35Tomi' in pin ac con na Jeju. Merem maho' ra ta! Hwet ca' ron co cwa' ta na ca tomi' con ma'. Joc pan' ac con na wari' caxicon jam nucun, pain ximijacocon oro wari' ma'. Xin mi' non pain macan'. Hwet ca' ac con na. Hwet ca' e' non, om ca xa con.

36Wa wa wa wa pi' pin ac caca na oro wari' ma'. Cain' cain' xira con ne? Ac taramaxicon na, hwara' opa tamana na ta! Hwerehwet ca' jujun oro wari' ta iri tata oro caxicon jam ne, hwerehwet ca' ac cocon na, ac i ma' na ca tomi' xucucun. 37Tomi' hwet tomi' hwet pi' pin ac xucucun con na oro wari' co to nanain oro xijein cidade ma', taxi' taxi' pi' pin ac cocon na quem.

Ca quep xio pin cocon oro wari' Jeju

Mateus 8.14-17; Marcos 1.29-34

38Jeju ma', hwet ca' ac cain na xirim ca cut in to xucucun ma', mao ac cain na xiricon Simão. Caxi na japinacon Simão ma'. Xain tamana na. Xiram pa' ram ta Jeju ac cocon na. 39Xut hwet ac cam na, wina quiji' hwet ac cam, tomi' in pin ac cain na ca xain nequem. Xain xain om pin ac cama na. Tequi' pe hap ac cama na, ara mi' pan ac cocon na pain carawa ca cao' wa quem.

40Corom mao iri na xina ne, o qui' xuxun co caxi nana cwa', o mi' xuxun con Jeju ta ac caca na oro wari' ma', o qui' o qui' pi' pin ac cocon con na oro wari' co ma' nonon oro xijein ca caxi wa ma'. Quep xio quep xio xam' ac tococwa na. 41Mija nana oro wari' co corom to ho' nonon caxicon jam ma' quem. Tomi' jein pin iri tata ne, hwerehwet ca' ac cocon na. Hwerehwet ca' iri tata ne, merem merem ac cocon na Jeju: Panxica Iri' Jam ma ta nonon. Ane tomi' in pin tococwa ne. Narain ho' tata pain ca tomi' wa, xi om ne ca taxi' ara cocon pain ca Cristo ca ma', pain ca wirico co wara tomi' pe ca Iri' Jam pane.

42Xec pin iri na ne, pain iri' xo' xec ma', mao tain ca om pe ca wari' ta ac ca na Jeju, mao ac ca na. Pirao' pirao' ac cocon na oro wari' ma' quem. Mam' iri nonon ne, tomi' ac cocon na, tomi' mip nonon: Ta paca' maparut me ta nonon.

43Om na, na e' na pain ca pijim' mi' toton pain capijacon Iri' Jam oro wari' pain oro xijein cidade ta. Pijim' mi' toton pain capijacon Iri' Jam ca tomi' xo' nonon pain ca taramaxicon pe ho' ton cocon ta. Je ca mao rain macan' capa' Iri' Jam pane na ca tomi' tococwa ma'. 44Tiquin' mao ac cain na oro xijein cidade pain Judeia ma' quem. Pijim' pijim' pe ac cain na oro xirim ca cut in to xucucun oro judeu ma' quem.

Currently Selected:

Lucas 4: TBPN

Highlight

Copy