Lucas 5

Ca ja' ja' xine tococwa co taxipa' ca

Mateus 4.18-22; Marcos 1.16-20; João 1.35-42

1Maqui' ac ne na xec pain ca pe cain cacarain cote ne com pain Genesaré Jeju ma'#5.1 Tocwan na wixinain Genesaré. Genesaré, Galileia, ca' na wixinain cote ne com. . Mija nana wari' co xao xao nonon. Om ca paric camain' caca. Taraju xin capijacon Iri' Jam nana. 2Querec ac cain na mam' horoho wa pain cacarain cote ne com ma'. Ma' 2 na. Wara an tac to nanain caram ma' co pa' taxipa' nana hwam ma', co hohoc nanain caji wi ca mam' pa' caca hwam ma'. Querec iri nain Jeju ne, 3piton pe ac cain na wirain ma', ca mene ca Simão ma'. Amon joc in mao ca' ra pain namaji mam' horoho wa ca' ac con na. Xao pe pe ac cain na mam' horoho wa ma', ca' na ca' na ac tococwa na pain capijacon Iri' Jam.

4Pi' pin iri na ca tomi' nucun ne, tomi' ac con na Simão: Pan ho mao ra pain ca xopain ne com ma' ta ac con na. Wahu' quem, pa' je hwam quem ac tococwa na oro win ma' ca ma'. Xin mao je pain com caji wi ca mam' pa' wa hwam ta ac tococwa na.

5Xin towa urut pain caji wi nuxut quem Taramaxicon co ca' na taxipa' capijacon Iri' Jam ac con na Simão. Mija urut, xec pa' e' naparut pain ca xin xin urut pain caji wi. Om ca cut camain' urut con hwam ta non. Ane tomi' pan ma ma' ne. Xin mao ta' pain com caji wi ta ac con na.

6Xin iri nanain caji wi ne, cut tamana ac caca na hwam. Mija na, om ca paric camain' ca. Werewein pin ta' paxi' na caji wi ca mam' pa' caca ma'. 7Weo ac cocon na oro win ma' caca ma', co to nanain wirain mam' horoho wa ma'. Ma' ta quep xiho' cacapari' ta nana. Pan ho hwet ac cocon na, cut ho' moin' ac cacain na mam' horoho wa con hwam ma', moin' moin' pi' pin na mam' horoho nucucun. Pan corom mama' xi' paxi' nana ira.

8Querec iri nain i ma' Simão Pedro#5.8 Simão ma', Pedro na xijein wixicon con Jeju. Ma' ac caca na wari' co Simão Simão wet nonon, ma' ac caca na co Simão Pedro nonon, ma' ac caca na co Pedro e' nonon quem. ne, pain ca cut tamana caca hwam ma', pe torotop mi' ac con na Jeju pain caximacon. In ca' ne ta Taramaxicon ne. Om ca na ne pain ca pe ho' cara mapa' ca', xi caracat taxipa' ara ta' ta na ca tomi' con ma'. 9Wa wa tamana na Pedro pain ca cut tamana caca hwam ma'. Wa wa nana oro win ma' ca co to ho' nonon pain mam' horoho nucun ma' quem. Cain' cain' xira con ne nana. 10Ac i ma' nana mana panxica Zebedeu Tiago con João ma' quem, co taramaja wi ca ma'.

Om na, ta jin' ma me ta Simão ac ca na Jeju. Maho' rain ca cut wa hwam ta. Mi' ho' xim inem pain xijein ca taramaja wa pain xocori ca'. Cut in ho' roron wari' ta. Win ne ca cut in taxipa' mon hwam cwa', ac i ma' roron oro wari' ta. Ma' ta howa cacapa' pum ta inem na ca tomi' con ma'.

11An taratac pin ac cacain na mam' horoho nucucun pain namaji ma', maji con ta ac caca na, an to pin ac cacain na oro ca mam' pa' caca hwam ma', ja' ja' ac cocon na Jeju.

Ca quep xio pin tocwa wari' co ma' non caji nan

Mateus 8.1-4; Marcos 1.40-45

12Pe iri nain xijein cidade Jeju ma' ne, maqui' ac ca na wari' co ma' tamana non caji nan. Lepra na wixinain ca caxi nucun. Mija non nan pain curucun. Querec iri non Jeju ne, pe torotop tucu hwet mi' ac cain na macan', tomi' ac con na: Mo ta quep xio xim mapa' ma', taxi' inem pain ca quep xio taxi' mapa' ta non.

13An piri' iri nain micon ne, quep ac con na, tomi' ac con na: Param inain, xio pin ra ta non. Xio hap pin ac ca na, om pin ac con na caji nan.

14Tomi' ac con na Jeju, tomi' mip non: Taraju wet ne e'. Miri'om roron oro wari' ma'. Ta tomi' hwet momon pain ca quep xio xim ca' me ta non. Hwet e' ron sacerdote co taramaja pe nain cote ne xiricon Iri' Jam ac con na. Noro rain cwere pain ca xio pin ta' ca' ac mon tara, mi' ac mon tara pain carawa ca tomi' capari' Moisés pain cara pane, pain ca tomi' xo' capari' con wari' co xio pin pain caji nan. Mi' ron pain, tom mi' ron pain Iri' Jam me ac mon tara. Tom tain' iri tarain ne, querec pin' ac quequem tara oro wari' pain ca xio pin nem ma', je pain ca querec hohot pin quem Iri' Jam ma' quem na ca tomi' con ma'.

15Tomi' ac i ma' paxi' non, ane taraju taraju tiquin' caca oro wari' ne. Taxi' taxi' pi' pin ac cocon na Jeju pain oro ca ara ca ma'. Je ca hwet mija cocon oro wari' quem. Mija nana wari', om ca paric camain' caca. Taraju xun nonon. Quep xio tarapari' pain ca caxi nexi' ca' nonon quem. 16Ane mao taxipa' cain ca om pe ca wari' Jeju ne. Tomi' tomi' ac con na Cote ca.

Ca quep xio pin con wari' co carama pe Jeju

Mateus 9.1-8; Marcos 2.1-12

17Maqui' ac ne na xec pain ca ca' na tococwa pain capijacon Iri' Jam oro wari'. Pain ca ca' na tococwa ma', taraju nana oro fariseu#5.17 Judeu nana oro fariseu pane. Ac taramaxicon nana. Tomi' ca' nonon oro win judeu caca: Na e' na pain ca tomi' ha' xin oro ca xirao' nucun Moisés ca tomi' ha' je capari' Iri' Jam ta. Na e' na pain ca tomi' ha' xin oro ca xirao' nucucun oro hwanana nexi' ca tomi' ha' je cacapari' quem. Ma' ta querec hohot capari' Iri' Jam ta nana pane. cocon oro co ca' na taxipa' nanain ca xirao' nucun Moisés ma' quem. Maqui' nanain oro ca paric to ne xirim pain Galileia, je pain Judeia, maqui' nanain Jerusalém quem. Xao to to nanain i ma'. Jeju ma', pe ho' non ca hwara' opa nucun Iri' Jam quem. Je ca ha' con pain ca quep xio pin cocon oro wari' co caxi nana ma'. 18Maqui' ac caca na wari' co an mamam' nonon wari' co carama pe. Terem' pe nain witacon. Ma' 4 nana co an mamam' nonon ma'. An mamam' corom mao xun pain xirim paxi' nonon ira. Ma' ta an terem' pe mi' xun con Jeju ta nana. 19Ane om ha' cocon ne, xi mija ara caca oro wari' ta. Om ca paric camain' caca. Je ca piri' mama' cacain xonein xirim ma' quem. Pa ac cacain na, an quiji' ac cocon na pain ximijacocon oro wari' ma', an quiji' ja' pan mi' nonon pain iri' ca pe pan ca Jeju ma'.

20Querec pin' iri tata pain ca howa cocon ne, tomi' ac con na co carama pe ma': Xic am pin inain ca caracat nem ta xa' na ca tomi' con ma'.

21Coromicat ximama' ac caca na oro fariseu cocon oro co ca' na taxipa' nanain ca xirao' nucun Moisés: Cain' cain' xira con ne? Para tomi' ac i ma' ca ma' quem? Iri' Jam ina xi' ma na ron? Xi xic am pin taxi' cain ca caracat wa ca wari' wa ta! Xica' pe na Iri' Jam co xic am pin taxi' nain ca caracat wa ta na ca coromicat ximama' nucucun.

22Taxi' nonon Jeju pain ca coromicat ac i ma' caca ma'. Taxi' ximao na ximicon. Para coromicat ac i ma' hwe ma' quem ac tococwa na. 23I'ina xirapa' pain ca xic am pin tain ca caracat nem ton co carama pe cwa' ra? I'ina xirapa' pain ca tequi' pe ra ta, xut ra ta ton ra? Cain' xi i'ina ac capa' quem? 24Je ca tomi' xuhu' ca' ac tococwa na. Tomi' ton. Ma' ta taxi' mahu' pain ca mi' capa' pain ca hwara' opa wa Iri' Jam ta. Tomi' napa' pain ca Iri' Wari' ta' ca', xic am pin rain ca caracat nucucun oro wari' co to nanain oro xijein macan' ta napa'#5.24 Pain ca Iri' Wari' ina ta ca Jeju pane, ac ca tomi' ta' ca na ira: Maqui' paxi' inain pawin, ane ac wari' ta' ne. Wata' co iri' taramaxicon ta, co wara tomi' pe ca Iri' Jam pane. Ca' na ca wara tomi' pe ca Iri' Jam pata' pane: Main hwet turuhu' Iri' Wari' ne co to' witan xim nuhu' ta nuhu' pata' pane. To' witan ca' turuhu' pain ca caracat nuhu' ta nuhu' pata' pane, ac i ma' na ca tomi' ta' ca Jeju ira. . Tomi' ac con na co carama pe: Tequi' pe ra. An rain witam ca mam' terem' pe ma ma'. Mao rain xurum ta na ca tomi' con co carama pe ma'.

25Tequi' pe hap ac ca na, querec querec pi' pin nonon oro wari' pain ca tequi' pe hap ca ma'. An ac cain na witacon ca mam' terem' pe ca ma', mao ac cain na xiricon. Tomi' querec te tamana na, awi na Iri' Jam ta na quem.

26Wa wa wa wa pi' pin ac caca na oro wari' ma'. Awi na Iri' Jam ta nana. In ac tamana nonon Jeju pain ca querec pin' cocon pain ca hwara' opa ca ma'. Awi tamana na oro ca querec iri' pain xec ca' nana quem.

Ca ja' ja' ne con Levi Jeju#5.27 Levi na xijein wixicon Mateus.

Mateus 9.9-13; Marcos 2.13-17

27Jeju ma', quep xio pin iri non wari' co carama pe ne, hwet mao ac ca na, querec ac con na wari' co cut in taxipa' nain oro imposto#5.27 Wari' co cut in taxipa' nanain oro imposto pane, taramaja mi' nonon oro taramaxicon nucucun oro romano, taramaja mi' nonon taramaxicon Herodes quem. Mija nana co mixein ho' mixein ho' nonon oro win judeu caca. Cut in tiquin' ca' nanain dinheiro ca cut in je tococwa pane. Cut mi' wijimain iri tata pain oro taramaxicon ne, pe ho' wijimain ac cocon na quem. Je ca noc tococwa pane. Noc tamana nonon oro win judeu caca pane.. Xao pe pe nain ca taramaja pe ca ma', pain ca cut in cain oro imposto nucucun oro wari' ma'. Ja' ja' ne e' ac con na Jeju. 28Tequi' pe ac ca na, an pe pin ac cain na oro ca taramaja nucun pain ca cut in taxipa' cain oro imposto cocon oro taramaxicon ma'. Ja' ja' ac con na quem.

29Cao' querec te wi xijexi' con Jeju ta ac ca na Levi ma', tomi' ac tococwa na oro wari' ma', co cut in taxipa' nanain oro imposto ma', ma' nana oro xucucun quem. Mija nana wari' co cao' to ho' nonon pain xiricon. 30Ane om querec hohot cocon oro fariseu cocon oro win ma' caca co ca' na taxipa' nanain ca xirao' nucun Moisés ma' ne. Tomi' ximama' ac cocon na co taxipa' ca Jeju: Para cao' to ho' huhun co cut in taxipa' nanain oro imposto ma'? Para cao' to ho' huhun oro caracat ma' quem? Para toc to ho' huhun ma' quem na ca tomi' querec cocon ma'.

31-32Tomi' ac cocon na: Om ca cwirin' je toton oro wari' co awi urut xi' ma nana ma'. Cwirin' je e' inonon co querec pin' pan xucucun pain ca caracat nucucun. Win ne ca om aramao xio tococwa oro wari' co om caxi nana ma'. Aramao xio e' tata co caxi nana ma'. Ac i ma' ina quem, cwirin' je e' inonon oro caracat. Je ca maqui' ta' ca' na ca tomi' tococwa ma'.

Ca om na ne pain ca joc wanan xine ca pijim' nucun Jeju pain wara ca pijim' nucucun oro hwanana

Mateus 9.14-17; Marcos 2.18-22

33Ma' ac caca na wari' co tomi' ca' nonon Jeju: An to ho' an to ho' nanain ca cao' wa co taxipa' ca João ma', ma' ta tomi' xun Iri' Jam ta nana. Tomi' ho' tomi' ho' nonon quem. Ac i ma' nana co taxipa' caca oro fariseu ma' quem. Co taxipa' ma ma' iri nana ne, om ca an to cacain ca cao' wa pain ca toc wa. Cao' nana pain oro xijein xec, toc nana pain oro xijein xec quem na ca tomi' cocon ma'.

34Om na, noro jujun oro wari' co tomi' querec te xucucun pain ca an tam narima' ca win ma' nucucun ma' ac tococwa na. Ma' tara ca tomi' in pin ac huhun pain ca cao' wa pain ca pe ho' pe ho' wet cocon win ma' nucucun quem? Om ca an to ac cacain, xi tomi' querec te ara caca ta. 35Ame hwe e', main maqui' tara xec nein ca an ca' tococwa con. Je tara oro xec nein ca an to pin cacain ca cao' wa con na ca tomi' tococwa ma'.

36Pijim' joc mam' mi' ac tococwa na con wom pain ca om oc tacan mi' ac tocwa con wara wom con xocoricon pawiricon ma' quem. Pijim' ca' tata: Noro jun wari' co wein na wara womicon ma'. I' toron xocoricon wom pain ca oc tacan mi' ton con wara womicon ra? Om na. Mo ta i' con xocoricon wom ma', to' em' pin ac con tara. Om ta hohot con wara wom pawiricon xocoricon ma' quem. Xi an xiho' con ta. 37Ac i ma' na con wari' co ji'ao an pe xo' tain nain comi uva ca om mana' querec ma' quem. Om ca ji'ao an pe xo' cain pain wara tapari carawa. Mo ta ji'ao an pe xo' cain xocori comi uva ca om mana' querec pain wara tapari carawa ma', mana' iri tara ca moin' nein xocori ne, wein mao ac ne tara tapari carawa. Ao mao ac ne tara comi, em' pin ac ne tara tapari carawa ma' quem. 38Je ca na e' ne pain ca ji'ao an pe xo' e' cain xocori comi uva pain xocori tapari carawa ma'. 39Wari' co toc nain wara comi uva ma', noc nain xocori. Toc awi napa' wara comi uva ca', awi tiquin' ca' nain xocori ta ara xi' na. Ac i ma' na ca tomi' tococwa ma'#5.39 Pain ca pijim' joc mam' mi' tococwa con wara wom con xocoricon pawiricon ma', je pain comi uva ca om mana' querec ma' quem, ca' na ca tomi' mao nein ca pijim' nucun: Oro wari' co hohot naparut ta nanain oro ca tomi' nucucun oro hwanana ma', co hohot naparut ta nanain oro ca ca' na nucucun oro fariseu ma' quem, noc nanain xocori ca pijim' ne ta na. I'ina nonon pain ca howa ni ca' cacain oro wara ca howa nucucun. I'ina nonon pain ca howa pin cacain xocori ca pijim' ne ta na. .

Currently Selected:

Lucas 5: TBPN

Highlight

Copy