Marcos 2
2
Ca quep xio pin con wari' co carama pe Jeju
Mateus 9.1-8; Lucas 5.17-26
1Om ca pain homa ne, wa' mao mami' ac cain na Cafarnaum Jeju. Wa' qui' na Jeju ta, pe pin nain xiricon win ma' ca ta ac caca na oro wari'. 2Mija nana na oro wari' pain xiricon ma'. Mija nana, xao xao nanain tequipain xirim ma', xao xao nana co hwet to nana ma' quem. Om ca wixicam ac xine man ca corom ac wa cocon. Pijim' hwet ac tococwa na pain capijacon Iri' Jam.
3Maqui' ac caca na wari' co an mamam' nonon wari' co carama pe ma'. Ma' 4 nana co an mamam' nonon. 4Ane om ha' cocon pain ca an mamam' mi' cocon con Jeju ne, xi mija ara caca oro wari' ta. Je ca pa cacain xonein xirim ma', pain ca xat pe pan ca Jeju ma'. Pa pin iri nanain ne, an quiji' ja' pan mi' xun con Jeju ta ac caca na, an quiji' pe ac cocon na pain witacon ca mam' terem' pe ca ma'.
5Querec pin' iri tata pain ca howa cocon ne, tomi' ac con na co carama pe ma': Xic am pin inain ca caracat nem ta arain na ca tomi' con ma'.
6Xao to nanain i ma' oro co ca' na taxipa' nanain ca xirao' nucun Moisés. Coromicat ximama' ac caca na: Cain' cain' xira con ne? 7Para tomi' ac i ma' ca ma' quem xucucun. Iri' Jam ina xi' ma na ron? Xi xic am pin taxi' cain ca caracat wa ca wari' wa ta! Xica' pe na Iri' Jam co xic am pin taxi' nain ca caracat wa ta na ca coromicat ximama' nucucun.
8Taxi' nonon Jeju pain ca coromicat ac i ma' caca ma'. Taxi' ximao na ximicon. Para coromicat ac i ma' hwe pain xumuhu' ma' quem ac tococwa na. 9I'ina xirapa' pain ca xic am tain ca caracat nem ton co carama pe cwa' ra? I'ina xirapa' pain ca tequi' pe ra ta, an mao rain witam ca terem' pe ma ma', xut ra ta ton ra? Cain' xi i'ina ac capa' quem? 10Je ca tomi' xuhu' ca' ac tococwa na. Tomi' ton. Ma' ta taxi' mahu' pain ca mi' capa' pain ca hwara' opa wa Iri' Jam ta. Tomi' napa' pain ca Iri' Wari' ta' ca', xic am pin rain ca caracat nucucun oro wari' co to nanain oro xijein macan' ta napa'#2.10 Pain ca Iri' Wari' ina ta ca Jeju pane, ac ca tomi' ta' ca na ira: Maqui' paxi' inain pawin, ane ac wari' ta' ne. Wata' co iri' taramaxicon ta, co wara tomi' pe ca Iri' Jam pane. Ca' na ca wara tomi' pe ca Iri' Jam pata' pane: Main hwet turuhu' Iri' Wari' ne co to' witan xim nuhu' ta nuhu' pata' pane. To' witan ca' turuhu' pain ca caracat nuhu' ta nuhu' pata' pane, ac i ma' na ca tomi' ta' ca Jeju ira. . Tomi' ac con na co carama pe: 11Tequi' pe ra. An rain witam ca mam' terem' pe ma ma'. Mao rain xurum ta na ca tomi' con co carama pe ma'.
12Tequi' pe hap ac ca na, an ac cain na witacon ca mam' terem' pe ca ma', hwet mao ac ca na quem. Querec querec pi' pin nonon oro wari' pain ca hwet mao nucun ma'. Wa wa wa wa pi' pin ac caca na. Awi na Iri' Jam ta nana. Om ca querec camain' xine ca quep xio tocwa wari' co carama pe pane ta nana.
Ca ja' ja' ne con Levi Jeju#2.13 Levi na xijein wixicon Mateus.
Mateus 9.9-13; Lucas 5.27-32
13Mao mami' ac cain na cacarain cote ne com Jeju. Mija nana wari' co hwet nonon. Om ca paric camain' caca. Ca' na ac tococwa na pain capijacon Iri' Jam. 14Xut xut tiquin' ac ca na, querec ac con na Levi ma', panxica Alfeu ma'. Xao pe pe nain ca taramaja pe ca ma', pain ca cut in cain oro imposto nucucun oro wari' ma'. Ja' ja' ne e' ac con na Jeju. Tequi' pe ac ca na, ja' ja' pin ac con na quem.
15Cao' pe ac cain na xiricon Levi Jeju. Wirico Jeju, wiricoco co taxipa' ca ma' quem, cao' to ho' ac cocon na. Mija nana oro caracat co cao' to ho' nonon ma' quem, wiricoco co cut in taxipa' nanain oro imposto ma'#2.15 Imposto ma', je i ma' dinheiro ca pagar je caca oro taramaxicon pain governo. Ma' ta ha' caparut pain ca taramaja wa pain ca governo urut ca' nana. Je cwerein pain cara pane, je cwerein pain xocori ca' quem, pain ca pagar jein imposto ta cacapari' oro taramaxicon., oro xucucun co hwet taxipa' wixicocon ma' quem, cao' to ho' nonon quem. Xi mija ara caca co ja' ja' nonon ta. 16Querec iri nonon oro fariseu#2.16 Judeu nana oro fariseu pane. Ac taramaxicon nana. Tomi' ca' nonon oro win judeu caca: Na e' na pain ca tomi' ha' xin oro ca xirao' nucun Moisés ca tomi' ha' je capari' Iri' Jam ta. Na e' na pain ca tomi' ha' xin oro ca xirao' nucucun oro hwanana nexi' ca tomi' ha' je cacapari' quem. Ma' ta querec hohot capari' Iri' Jam ta nana pane. co ca' na taxipa' nanain ca xirao' nucun Moisés ma' ne. Querec iri nonon pain ca cao' pe ho' cocon oro caracat ne, co hwet taxipa' wixicocon ma', cocon co cut in taxipa' nanain oro imposto ma', tomi' querec ac cocon na co taxipa' ca ma': Cain' cain' xira co ma' co ca' na taxipa' nuhu' pain capijacon Iri' Jam ma' quem? Para cao' pe ho' cocon co cut in taxipa' nanain oro imposto ma'? Para cao' pe ho' cocon oro caracat ma' quem na ca tomi' cocon ma'#2.16 Wari' co cut in taxipa' nanain oro imposto pane, taramaja mi' nonon oro taramaxicon nucucun oro romano, taramaja mi' nonon taramaxicon Herodes quem. Mija nana co mixein ho' mixein ho' nonon oro win judeu caca. Cut in tiquin' ca' nanain dinheiro ca cut in je tococwa pane. Cut mi' wijimain iri tata pain oro taramaxicon ne, pe ho' wijimain ac cocon na quem. Je ca noc tococwa pane. Noc tamana nonon oro win judeu caca pane. .
17Taraju nonon Jeju ma' quem. Tomi' ac cocon na: Om ca cwirin' je toton oro wari' co awi urut xi' ma nana ma'. Cwirin' je e' inonon co querec pin' pan xucucun pain ca caracat nucucun. Win ne ca om aramao xio tococwa oro wari' co om caxi nana ma'. Aramao xio e' tata co caxi nana ma'. Ac i ma' ina quem, cwirin' je e' inonon oro caracat. Je ca maqui' ta' ca' na ca tomi' tococwa ma'.
Ca om na ne pain ca joc wanan xine ca pijim' nucun Jeju pain wara ca pijim' nucucun oro hwanana
Mateus 9.14-17; Lucas 5.33-39
18Co taxipa' ca João co ja' com ma', an to taxipa' nanain ca cao' wa pain ca tomi' xun Iri' Jam caca pane. Ac i ma' nana oro fariseu ma' quem, an to taxipa' nanain ca cao' wa pain ca tomi' xun Iri' Jam caca pane. Ma' ac caca na wari' co xuruxut hwet nonon Jeju ma'. Tomi' ac cocon na: Noro roron co taxipa' ca João ma'. Noro roron co taxipa' caca oro fariseu ma' quem. An to taxipa' nanain ca cao' wa, ma' ta tomi' xun Iri' Jam nana. Para om ac i ma' caca co taxipa' ma ma' quem na ca tomi' querec cocon ma'.
19Om na, noro jujun oro wari' co tomi' querec te xucucun pain ca an tam narima' ca win ma' nucucun ma' ac tococwa na. Ma' tara ca an to ac cacain ca cao' wa pain ca pe ho' pe ho' wet cocon win ma' nucucun co an tam nam narima' ra? Om ca an to ac cacain, xi tomi' querec te ara caca ta. Om ca ha' cocon pain ca an to cacain ca cao' wa pain ca pe ho' pe ho' wet cocon co an tam nam narima' ma'. 20Ame hwe e', main maqui' tara oro xec nein ca an ca' tococwa con. Je tara oro xec nein ca an to pin cacain ca cao' wa con na ca tomi' tococwa ma'.
21Noro jun wari' co oc xo' ton non wara wom co wein ma' quem ac tococwa na. Om ca oc tacan mi' con con xocoricon pawiricon wom. Mo ta oc tacan mi' con con xocoricon pawiricon wom ma', wixicon pin ac ca tara pain ca aram aram hohoc ton con quem, cote ne pin ac ne tara ca wein nucun. 22Ac i ma' na con wari' co ji'ao an pe xo' tain nain comi uva ca om mana' querec ma' quem. Om ca ji'ao an pe xo' cain pain wara tapari carawa. Mo ta ji'ao an pe xo' cain xocori comi uva ca om mana' querec pain wara tapari carawa ma', mana' iri tara ca moin' nein ne, wein mao ac ne tara tapari carawa. Em' pin ac ne tara comi uva, em' pin ac ne tara tapari carawa ma' quem. Je ca ji'ao an pe xo' e' xine xocori comi uva pain xocori tapari carawa ma' na ca tomi' tococwa ma'#2.22 Pain ca pijim' joc mam' mi' tococwa con wara wom con xocoricon pawiricon ma', je pain comi uva ca om mana' querec ma' quem, ca' na ca tomi' mao nein ca pijim' nucun: Oro wari' co hohot naparut ta nanain oro ca tomi' nucucun oro hwanana ma', co hohot naparut ta nanain oro ca ca' na nucucun oro fariseu ma' quem, noc nanain xocori ca pijim' ne ta na. I'ina nonon pain ca howa ni ca' cacain oro wara ca howa nucucun. I'ina nonon pain ca howa pin cacain xocori ca pijim' ne ta na. .
Ca tomi' em' tococwa co taxipa' ca Jeju pain ca om xao to wa cacain ximicocon pain sábado
Mateus 12.1-14; Lucas 6.1-5
23Maqui' iri na sábado ne, xut mao ac cain na totain trigo Jeju. Wirico, wiricoco co taxipa' ca quem, xuruxut mama' ac cacain na totain trigo. Xuruxut xuruxut, caracat ac cacain na xirinain trigo co taxipa' ca ma'. Ma' ta cao' xin ta nana.
24Ma' nana oro fariseu co tomi' ca' nonon Jeju ma': Noro roron co taxipa' ma ma'. Para taramaja caca pain sábado ca', pain ca caracat cacain xirinain trigo ma'? Tomi' caho' ara xi' napari' ca xirao' nucun Moisés pain ca taramaja wa pain sábado ta na ca tomi' querec cocon ma'.
25Om na ta ac cocon na Jeju. Om ca noro hwein capijacon Iri' Jam ra pain ca pijim' xine ca ara ca taramaxicon Davi cara pane, pain ca pe' qui' caca pain ca om qui' cocon carawa ca cao' wa Davi cocon oro win ma' ca pane? 26Pain oro xec pain cara pane ca iri' taramaxicon nucucun oro sacerdote Abiatar pane, corom mao ac cain na xiricon Iri' Jam Davi. Cao' ac cain na capam' ca an toco' mi' tocwa Iri' Jam. Cao' xica' to xirarain oro sacerdote. Tomi' caho' paxi' tata pain ca cao' wa oro xucucun wari'. Ane cao' pan cain Davi ne. Cao' jein quem ac tococwa na oro win ma' ca quem na ca tomi' tococwa ma'.
27Tomi' ac tococwa na: Mi' napari' pain xec nein ca xao to wa ne ca xumu wa Iri' Jam, ma' ta quep xiho' cuhu' pain ca wari' nuhu' ta napari'. Om ca mi' e' capari' pain ca tomi' ha' e' xun pain ca om taramaja wa pain xec nein ca xao to wa ne ca xumu wa ta. 28Je ca tomi' xuhu' ca' ac tococwa na. Taramaxicon ina. Wata' pain ca Iri' Wari' ta' ca', Taramaxicon pan ina. Wata' co tomi' xo' nuhu' pain carawa ca ara xi' hwe pain xec nein ca xao to wa ne ca xumu wa quem na ca tomi' tococwa ma'.
Currently Selected:
Marcos 2: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
