Marcos 3
3
Ca quep xio pin tocwa wari' co xirac micon
Mateus 12.9-14; Lucas 6.6-11
1Oro xijein xec ma' iri na ne, corom mao mami' ac cain na xirim ca cut in to xucucun oro win judeu urut Jeju. Pe nain i ma' wari' co xirac micon ma'. 2To nanain i ma' co tocojin' nonon Jeju quem. Je ca ja' noro cocon ma'. Quep xio ton tara pain xec nein ca xao to wa ne ca xumu wa ca' ra? Om ta quep xio ton ca ra, ac i ma' na ca coromicat nucucun.
3Tomi' ac ca na Jeju, tomi' non wari' co xirac micon: Tequi' pe ra e'. Hap ra, xat pe rain ximijaxut ca' non.
4Tomi' querec ac tococwa na co tocojin' nonon ma'. Cain' cain' xixi' pain xec nein ca xao to wa ne ca xumu wa ca' quem? Ma' ca ara je capari' Iri' Jam quem? Om ca hohot ne pain ca quep xiho' xun wari' ra? Hohot na pain ca quep em' xun ra? Om ca hohot ne pain ca to' witan xun ra? Hohot na pain ca to' pa' pin xun ra? Ac i ma' na ca tomi' querec tococwa ma'. Hehe ac caca na quem. Om ca tomi' camain' caca.
5Noro ac tococwa na pain ca to to mam' pin cocon ma'. Mana' tata, tomi' xaxa' na cocon quem. Xi noc ara cacain ca taraju pa' wa ta. Tomi' ac con na co xirac micon ma': Coc matam rain mum ma' ta non. Coc matam ac cain na, awi pin ac ne na con.
6Hwerehwet mama' ac caca na oro fariseu ma'. Hwet ac cocon na oro win ma' ca taramaxicon Herodes ma' quem. Tomi' xo' xijexi' ta, ma' ta to' pa' pin xun Jeju ta xucucun.
Ca quep xio pin tococwa oro wari' pain cacarain com
7Maji ta ac ca na Jeju, mama' xin cacarain cote ne com ma' ac tococwa na co taxipa' ca ma', mama' ac caca na quem. Mija nana wari' co ja' ja' nonon. Om ca paric camain' caca. Maqui' nanain Galileia. 8Ma' nana co maqui' nanain Judeia quem. Maqui' nanain Jerusalém, maqui' nanain macarain Idumeia ma', maqui' nanain xijein cacarain com ma' quem, pain xijein cacarain Jordão ma', maqui' nanain oro xijein cidade ca to ja' pan nain Tiro je pain Sidom ma' quem, je ca maqui' caca oro wari' pane. Mija nana. Taraju ara xi' nanain oro ca ara ca Jeju pane. Hwet ac cocon na.
9Mija nana wari' ta ac ca na, tomi' ac tococwa na co taxipa' ca ma': An tac xo' mi' xine pain wijimain mam' horoho wa ma'. Xao pe tain, ma' ta om xao xao cacapa' oro wari' cwa' ta tata. 10Xi mija ara caca co quep xio ca pane ta. Je ca xao xao tamana cocon oro wari' co caxi nana ma'. Ma' ta quep xun nonon. 11Oro wari' co corom to ho' nonon oro caxicon jam ma', querec iri nonon Jeju ne, pe torotop mi' pe torotop mi' ac cocon na. Merem pan ac caca na oro caxicon jam nucucun. Panxica Iri' Jam ma ta nonon Jeju pain ca merem nucucun. 12Ane tomi' in pin tococwa ne. Ta tomi' hwet mahu' cocon oro wari' me ta tata pain ca tomi' mip tococwa ma'.
Ca tora' cocon oro apóstolo Jeju
Mateus 10.1-4; Lucas 6.12-16
13Jeju ma', piri' mao ac cain na ca tamaja pan ne macan'. Harahap je ac tococwa na co param pan ca ma'. Hwet ac cocon na. 14Tora' 12 ac tococwa na. Apóstolo je pain ca tomi' hwet huhun pain capija oro wari' ta ac tococwa na. Taxipa' xine, main pijim' ac hwein tara capijacon Iri' Jam, pijim' mama' ac hwein tara pain pira. 15Mi' xuhu' pain ca tomi' jein pin huhun oro caxicon jam quem ac tococwa na. 16Ma' 12 nana co tora' ca ma'. Mo nana: Simão ma', co wara o' ma' ni ca pane, pain ca Pedro pin ra ta con pane#3.16 O' ma' ni iri non Simão Jeju ne, pain ca Pedro pin ra ta con pane, ca' na ca coromicat nucun: Hwara' opa pan ra cocon oro win apóstolo ma ma'. Ac ca taramaxicon pe ho' momon tara, ac i ma' na ca coromicat nucun Jeju pane. Ma' nana wari' co Simão Simão wet nonon, ma' ac caca na co Simão Pedro nonon, ma' ac caca na co Pedro e' nonon quem. . 17Ma' ac ca na Tiago con coxa' ca João ma'. Mana panxica Zebedeu nana Tiago con João ma'. Tocwan na wixicocon con Jeju. Boanerges tara xijein wixicocon nonon. Ac comerem nana ta na ca tomi' mao ne xijein wixicocon. 18Ma' ac ca na André con Filipe con Bartolomeu con Mateus con Tomé ma'. Ma' ac ca na Tiago panxica Alfeu ma'. Ma' ac ca na Tadeu ma'. Ma' ac ca na Simão co jain jain tamana nonon oro win ma' ca pain ca witan ca' xun cocon oro romano ma'. 19Ma' ac ca na Judas Iscariotes ma' quem. Wirico Judas Iscariotes co quep xiho' nonon oro taramaxicon pain ca quep xun cocon Jeju pane, ame hwe e'. Ac i ma' nana oro co apóstolo je ca Jeju pane.
Ca tomi' napat cocon Jeju pain ca wirico Caxicon Jam co mi' nem pain ca hwara' opa nem ta cocon pane
Mateus 12.22-32; Lucas 11.14-23
20Corom mao ac cain na xirim Jeju. Maqui' mami' ac caca na oro wari' quem. Mija nana ta! To' i'ina nonon Jeju cocon co taxipa' ca ma'. To' i'ina nonon pain oro carawa ca ara xi' caca, om ca ha' cocon pain ca cao' wa quem. 21Taraju iri nana oro ca nari nucun ma' ne. Cain' cain' xira ne ac caca na. Tamanain na ron! Harahap je con! O in qui' xun ta nana.
22Oro co ca' na nanain ca xirao' nucun Moisés ma', co maqui' nanain Jerusalém ma', tomi' ximama' ac cocon na Jeju: Om na, corom pe ho' non Belzebu ta. Wirico Belzebu co taramaxicon nucucun oro caxicon jam ma', wirico co mi' non pain ca hwara' opa nucun. Wirico co mi' non pain ca tomi' jein pin cocon oro caxicon jam ta nonon.
23Harahap je, tomi' xo' xuhu' ta ac ca na Jeju: Ma' tara ca tomi' mo pin ac xucun Caxicon Jam ra tata, pijim' joc mam' mi' ac tococwa na cocon oro wari' co to ho' xucucun pain macaracocon. 24Noro jujun oro wari' co to ho' xucucun pain macaracocon ma'. Mo ta mana' caracan xucucun, to ho' to ho' om pin ac xucucun na. 25Ac i ma' nana oro wari' co nari xucucun ma' quem. Nari paxi' xucucun, xica' pe paxi' na xiricocon. Mo ta mana' caracan xucucun, to ho' to ho' om pin ac xucucun na quem. 26Ac i ma' na con Caxicon Jam cocon oro win caxicon jam ca ma' quem. Mo xi mana' caracan xucucun, mo xi tomi' jein pin caracan xucucun, om xi hwara' opa mami' caca. To' om pin ac xucucun xira pain ca hwara' opa nucucun. 27Je ca tomi' xuhu' ca' ac tococwa na. Noro jun wari' co cut noc xa tain nain caramaxicon waximain xirim co hwara' opa ma'. Om ca ha' con pain ca cut noc xa e' cain caramaxicon pain ca om pao' pe querec con ma'. To' pa hot pin iri tarain manain xiricon ne, pao' pe ac con tara waximain, ha' pin ac con tara pain ca cut noc xa pi' pin cain caramaxicon#3.27 Pain ca pijim' joc mam' mi' tococwa con wari' co hwara' opa ma', co hwara' opa tiquin' ca' non wari' co cut noc xa tain nain caramaxicon ma', tomi' xo' ca' tata: Wara to' quiji' pin inon Caxicon Jam, xi om ne ca hwara' opa tiquin' ca' ara ton ta. Je ca ha' capa' pain ca tomi' jein pin toton oro caxicon jam co corom to ho' nonon oro wari' ta na ca tomi' xo' tococwa ma'.. 28Je ca tomi' xuhu' ca', tomi' iri'o' inuhu' ta ac tococwa na. Oro wari' co pan teretem nana ma', co ara nanain oro xijein ca caracat wa ma', oro wari' co tomi' napat nonon Iri' Jam ma' quem, xic am pin ac xine tara ca caracat nucucun#3.28 Pain ca tomi' ac i ma' ca Jeju ma', tomi' mi' non wari' co cwirin' pin nain ca caracat nucun. Cwirin' pin iri nain ne, xic am pin ac xine na ca caracat nucun. . 29Wari' co tomi' napat nain Tamataracon Iri' Jam ma' iri na ne, om ta xic am pin camain' xine ca caracat nucun ta. Pe ho' cara toron ca caracat nucun ta na ca tomi' tococwa ma'.
30Tomi' ac i ma' na Jeju pane, xi om ne ca tomi' napat ara cocon pain ca corom pe ho' non Caxicon Jam ta cocon ma'.
Ca tomi' xun Jeju ta cama jicon cocon xurucun
Mateus 12.46-50; Lucas 8.19-21
31Maqui' ac cama na jicon Jeju cocon xurucun. Hwet to nana, tomi' ron Jeju ta ac cocon na wari' ma'. 32Mija nana wari' co xao to xao to mam' pin nonon Jeju ma' quem. Hwet to nana xerem cam jim ta Jeju ac cocon na. Tomi' xim nenem ta na ca tomi' cocon ma'.
33Ma' co na' ta' quem? Ma' co xere ta' quem na ca tomi' querec ca ma'. 34Noro ac tococwa na oro wari' co xao to xao to mam' pin nonon ma'. Wiricacam caram cwa' co na' ta' cwa', co xere ta' cwa' quem ac ca na. 35Oro wari' co ara nanain ca param nucun Iri' Jam ma', wiricacam co xere ta' ta, wiricacam co na' ta' quem na ca tomi' tococwa ma'.
Currently Selected:
Marcos 3: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
