Marcos 4
4
Ca pijim' joc mam' mi' tococwa con wari' co wixicaracao' nain tocwi trigo pain totacon
Mateus 13.1-23; Lucas 8.1-15
1Ca' na toton pain capijacon Iri' Jam ta ac ca na Jeju ma', ca' na pe ac cain na cacarain cote ne com. Mija nana wari' co coco' coco' mam' nonon ma'. Om ca paric camain' caca. Je ca piton pe tain cain mam' horoho wa ca ho pe cacarain com ma'. Xao pe ac ca na. Coco' to pan ac cacain na namaji pain cacarain com oro wari' ma' quem. 2Pain ca ca' na tococwa pain capijacon Iri' Jam oro wari' pane, mija na ca pijim' joc mam' mi' tococwa pain oro carawa pane.
3Taraju wet je e' ac tococwa na. Wixicaracao' tain tocwi trigo pain tota ta ac ca na wari' ma', 4wixicaracao' wixicaracao', ma' ac ne na tocwi trigo ca camara' to nain cacarain wana. Maqui' ac ne na oro wijimain me, itac pin ac nein na quem. 5Ma' ac ne na tocwi trigo ca camara' to nain pacun ca ma' wijimain macan' ma' quem. Orot hap na i ma', xi mija ne macan' ta. 6Hwet iri na xina ne, nonoc ac cain na, cono' pin ac ne na quem, xi mama' nein pira caximain ta. 7Camara' to ac nein na pi wirain tocwi trigo ma' quem. Hwara' ac ne na pi ma', mo' ac nein na quem. Om ca wina ac ne pain. 8Oro wirain tocwi trigo ca camara' to nain macan' ca awi ma' iri na ne, orot ac ne na, hwara' pin ac ne na, mi xo' tamana ac ne na quem. Pain xijein arain ma', mi 30 na tocwi. Pain xijein arain ma', mi 60 na tocwi. Pain xijein arain ma', mi 100 na tocwi quem. Ac i ma' na ca pijim' joc mam' mi' tococwa con wari' co wixicaracao' nain tocwi trigo pain totacon pane.
9Tomi' ac tococwa na: Mo ta taraju pa' xixi' na hwe ma', je ta taraju wet qui' hwe ta tata.
10Aram aram xica' to ac caca na. Mo nana: Wirico Jeju, wiricoco co taxipa' ca ma', co ma' 12 nana ma', wiricoco oro xucucun co to ho' nonon ma' quem. Tomi' querec ac cocon na: Para pijim' joc mam' mi' maparut con wari' co wixicaracao' nain tocwi trigo pain totacon quem? Cain' ca tomi' mao ne ca pijim' nem quem na ca tomi' cocon ma'.
11Om na, wara coromicat xo' na Iri' Jam pane ac tococwa na. Main taramaxicon pe ho' toton oro wari' co howa nanapa' ta na, ac i ma' paxi' na ca coromicat xo' nucun pane. Ane om tomi' hwet tococwa pain oro wari' ne. Wahu' pain ca taxipa' mahu' ca', an hwet mi' nuhu' pain ca coromicat xo' nucun. Mi' nuhu' pain ca taraju pa' wa. Oro xucucun wari' co om howa nanapa' ma' iri nana ne, pijim' joc mam' mi' e' inonon pain oro ca pijim' wa. 12Ma' ta hwet pin ne ca xirao' pe nucun profeta cara pane. Ca' na con pane:
Querec paxi' nana,
ane om querec pin' caca ne.
Taraju taraju paxi' nana,
ane om taraju pa' caca quem ne.
Mo xi taraju pa' caca,
in hwet ac cocon Iri' Jam xira,
xic am pin ac xine xira ca caracat nucucun ta.
Ac i ma' na ca xirao' pe nucun profeta cara pane ta na ca tomi' tococwa ma'.
13Tomi' querec ac tococwa na: Om ca taraju pa' hwein i cara ca pijim' ta' cara ne ra? Cain' xi taraju pa' ac hwein oro wirain ca pijim' ta' ma' quem tata. 14Tomi' xo' xuhu' pain ac tococwa na. Wari' co wixicaracao' nain tocwi trigo ma', tomi' joc mam' mi' non wari' co pijim' nain capijacon Iri' Jam. 15Tocwi trigo ma', ca camara' to nain cacarain wana ma', tomi' joc mam' mi' nain capijacon Iri' Jam. Carawa ca ara nain pain ca itac pin nein oro wijimain me ma', tomi' joc mam' mi' nain carawa ca ara nonon oro wari' co taraju paxi' nanain capijacon Iri' Jam. Taraju iri nanain ne, maqui' hap ac ca na Caxicon Jam, cut ca' ac tococwa na pain capijacon Iri' Jam ca wixicaracao' mi' wa pain ximicocon. 16Carawa ca ara nain tocwi trigo ca wixicaracao' mi' wa pain pacun ca ma' wijimain macan' ma' iri na ne, tomi' joc mam' mi' nain carawa ca ara nonon oro xucucun wari' co taraju paxi' nanain capijacon Iri' Jam. Tomi' querec te hap paxi' nanain, howa pin paxi' nanain quem. 17Ane om tomi' querec te cara cacain ne. Tomi' joc mam' mi' nanain pana ca om corom mip caximain pain macan' ma', om ca corom mao nein ximicocon capijacon Iri' Jam. Maqui' iri na carawa ca to' i'ina nonon ne, ja' tequi' quep em' iri nonon oro wari' pain ca howa cacain capijacon Iri' Jam ma' ne, an to hap ac cacain na ca howa wa. 18Carawa ca ara nain tocwi trigo ca wixicaracao' mi' wa pain pi ma' iri na ne, tomi' joc mam' mi' nain carawa ca ara nonon oro xucucun wari' co taraju paxi' nanain capijacon Iri' Jam. 19Ane coromicat ni ca' cacain ne. Ma' pin iri na oro ca to' i'ina nonon ne, toron ximama' ac ne na ximicocon. Caramaju xixi' na nana quem. Mo xi quep xiho' cocon oro caramaji macan' ca', ane om quep xiho' cocon ne, mixein e' nonon. Win xumu e' nanain oro ca param nucucun quem. Ac ca mo' nein na capijacon Iri' Jam oro caramaji macan' pain ximicocon. Ac ca om wina ne na, xi to' xucun wari' tococwa pain ta. 20Carawa ca ara nain tocwi trigo ca wixicaracao' mi' wa pain macan' ca awi ma' iri na ne, tomi' joc mam' mi' nain carawa ca ara nonon oro wari' co taraju nanain capijacon Iri' Jam. Howa ac cacain na, ac ca mi caca na quem. Win ne ca mi ne arain trigo ma'. Mi 30 na wirain ma'. Mi 60 na wirain ma'. Mi 100 na wirain ma' quem. Ac i ma' na ca horon tiquin' caca pain ca howa nucucun. Ac i ma' na ca tomi' xo' tococwa pain ca pijim' joc mam' mi' tococwa con wari' co wixicaracao' nain tocwi trigo pain totacon pane.
Ca pijim' joc mam' mi' tococwa pain naran
Lucas 8.16-18
21Cain' cain' ca wari' co tom nain naran quem ac tococwa na. Tatep pa' na pain too ra? An corom pe na pain tequipain tapit ra? Om na! Tom an hwet pe na pain maxinain. 22Je ca tomi' xuhu' ca' ac tococwa na. Oro ca tomi' ne ca', pain ca ca' na xuhu' pain capijacon Iri' Jam ca', om paxi' na ca taraju pa' cacain oro wari'. Ac ca joc xim tococwa pain na pain xocori ca'. Ame hwe e', main mi' totoron pain ca taraju pa' wa Iri' Jam. Oro ca tomi' ne ca om taraju pa' caca pain xocori ca', main tomi' xo' totoron pain. 23Mo ta taraju pa' xixi' na hwe ma', je ta taraju wet qui' hwe ta ac tococwa na.
24Taraju wet jein ca tomi' xuhu' ca' ac tococwa na. Mo ta taraju wet hwein, mi' ac cuhu' tara pain ca taraju pa' wa Iri' Jam. Mo ta taraju wet taraju wet tiquin' hwein, mi' mi' tiquin' ac cuhu' tara pain ca taraju pa' wa quem. 25Je ca tomi' xuhu' ca': Wari' co taraju wet ma', co taraju pa' xo' nain ca taraju nucun ma', mi' hwara' mami' ac tocwa tara pain ca taraju pa' wa. Wari' co om taraju pa' nain ca taraju nucun ma' iri na ne, pain ca om taraju wet xo' ca ma', an ca' ac tocwa tara pain wijimain ca taraju pa' nucun ma' quem na ca tomi' tococwa ma'.
Ca pijim' joc mam' mi' tococwa pain tocwi trigo ca to' jimama' xine
26Tomi' ac tococwa na: Carawa ca ara ne pain ca taramaxicon pe ho' cocon oro wari' Iri' Jam ma', an xiho' nain carawa ca ara nain tocwi trigo ma', ca wixicaracao' ca wari' pain totacon. 27In ca' ac cain na, taramaja ni ca' ac cain na quem. Pain xec, taramaja ac ca na, xim iri na ne, pi'am ac ca na quem. Oro xijein xec ma' iri na ne, aram aram orot pin ac ne na tocwi trigo ma'. Hwara' pin ac ne na quem. Om paxi' na ca taxi' cain carawa ca to' hwara' pin nain, ane hwara' pan ne ne. 28Je macan' ca to' orot pan nain tocwi trigo. To' wina nain. Hwet cain' na arain, hwet ac ne na xirinain, hwerehwet ac ne na tocwi quem. 29Paca' pin iri na ne, cat ac cain na waximain, xi maqui' pin ara ne xec nein ca cat xin xine ta. Ac i ma' na ca tomi' tococwa pain ca pijim' joc mam' mi' tococwa pain tocwi trigo ca to' jimama' xine pane#4.29 Ma' carawa ca ara nain tocwi trigo pain ca oin' xine ma'? To' hwara' pin nain Iri' Jam. Ac i ma' napari' pain ca taramaxicon pe ho' capari' quem. Wirico pan co to' horon napari' pain ca howa nexi'. Ca howa xun ca', ca to' horon pan capari' ca', aram aram maqui' ta' iri tara xec nein ca cut xim capari' ne, cut mama' ac capari' tara ta. .
Ca pijim' joc mam' mi' tococwa pain wijimain tocwi mostarda
Mateus 13.31-35; Lucas 13.18-21
30Tomi' mami' ac ca na: Ma' carawa ca ara ne pain ca taramaxicon pe ho' cocon oro wari' Iri' Jam quem? Main xi ca pijim' wa ca pijim' joc mam' mi' xuhu' pain quem? Taraju wet je e', an xiho' nain ca pijim' mi' xim xuhu' ca'. 31Carawa ca ara ne ma', pain ca taramaxicon pe ho' cocon oro wari' Iri' Jam ma', an xiho' nain carawa ca ara nain wijimain tocwi mostarda ma'. Iri' wijimain na tocwi mostarda. Om na xijein tocwi memem ca an xiho' nain oro ca oin' to iri' pain totaxi'. 32Oin' pin iri xin ne, hwara' pin ac ne na, hwara' tiquin' ca' ac nein na oro wirain ca oin' ximama' wa pain xitot. Tapara na quem, iri' cote ne taparain ta. Ha' nain oro wijimain me pain ca quep pe nein xirinain pain ca xio ne oro taparain ma' quem na ca tomi' tococwa ma'#4.32 Pain ca pijim' ac i ma' ca Jeju ma', tomi' mi' tata co taxipa' ca cocon oro wari' co howa nonon pane, pain ca paric to caca pane. Pijim' pijim' tiquin' ac tococwa na oro xucucun wari' ma', aram aram mija pin ac caca na oro wari' co howa nonon Jeju pain oro xijein macan'..
33Ac i ma' na ca pijim' cocon oro wari' Jeju pane. Pain ca taraju taraju wet cocon pain ca pijim' mi' tococwa pain capijacon Iri' Jam ma', pijim' joc mam' mi' e' tata pain oro carawa. 34Oro ca pijim' nucun pane, pain ca pijim' qui' tococwa oro wari' pane, pijim' joc mam' mi' e' tata pain oro carawa. Xica' pe pin iri na cocon co taxipa' ca ne, tomi' xo' pin ac tococwa na pain ca pijim' nucun quem.
Ca tomi' om pin cain camana' Jeju
Mateus 8.23-27; Lucas 8.22-25
35Xo' um pin iri na ne, maji pan horoho mama' xin xijein cacarain cain e' ac cocon na co taxipa' ca Jeju ma'. 36Mama' urut ta ac tococwa na oro wari' ma', piton to ac cacain na mam' horoho wa ma', ca wara xao pe pe ca Jeju ma'. Pan horoho mama' ac caca na. Ma' nana wari' co ja' ja' xun nonon quem, pan horoho ni nanain oro wirain mam' horoho wa ma'. 37Pan horoho pan horoho. Ane ane maqui' pa' ac cocon na camana' ca nuru mip tamana. Wap tamana na com ta! Wap cam' wap cam' nain mam' horoho nucucun ma', moin' pin tain na com ira. 38Pi'am pe nain nomoji mam' horoho wa Jeju ma' quem. Mam' pi'am nain ca mam' wina ca ma'. Ho' querec ac cocon na co taxipa' ca. Taramaxicon co ca' na taxipa' capijacon Iri' Jam! Pan corom mama' xi' iri' ta! Cain' cain' xima quem? Cono' ma' xi' ne ma ra na ca merem cocon ma'.
39Tequi' pe ac ca na, tomi' in pin ac cain na camana'. Mana' mana' om ra ta com ac cain na, tacana pe ra ta hotowa ac cain na hotowa ma' quem. Tacana pe pin ac ne na hotowa ma', mana' mana' om pin ac ne na com quem.
40Cain' cain' xihwe quem ac tococwa na co taxipa' ca ma'. Para jin' tamana hwe ma' quem? Om ca howa querec mahu' ra tata.
41Xi jin' tamana ara caca ta. Cain' cain' ca co cwa' ne ta ac xucucun na. Tomi' ha' ximao non oro carawa ra? Tomi' ha' non camana' pain com quem ra xucucun.
Currently Selected:
Marcos 4: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
