Marcos 5

Ca quep xio pin tocwa wari' co corom pe ho' non caxicon jam

Mateus 8.28-34; Lucas 8.26-39

1Pan horoho pan horoho hwet ac cacain na xijein cacarain ma', je pain macaracocon oro wari' nein Gerasa ma'. 2Piri' mao iri na Jeju ne, hwet qui' ac ca na wari' co corom pe ho' non caxicon jam. Maqui' nain oro manain pacun ca cut corom to tococwa co cono' nana. Xut cam' ac con na Jeju. 3Wari' ma', pe taxipa' nain oro pacun ca cut corom to tococwa co cono' nana. Pao' pe xun paxi' nonon oro wari' ma', ane om na ca ne. Pao' pe xun pain arain too paxi' nonon quem. Ane om na camain' ca ne. 4Pao' pe ho' pao' pe ho' paxi' nonon pain oro arain too ma', pain caximacon pain micon ma'. Ane cuc tapiripit cain arain too ca pe micon ma' ne, jicat pin ac cain na arain too ca pe caximacon ma' quem. Hwara' opa paxi' nana co quep xun nonon ma', ane om ha' cocon pain ca quep cocon ne. Xi hwara' opa tamana ara ca ta. 5Tama' xut in ximao pe nain oro pacun ca cut corom to tococwa co cono' nana, je pain oro ca tamaja pan ne macan' ma' quem. Tama' u ximao na pain xec je pain xim ma', tama' mam' curuc ximao pan xucun pain pacun ma' quem.

6Querec pira iri non Jeju ne, mo hwet ac con na, pe torotop mi' ac con na. 7Merem mip ac con na: Cain' cain' xim mapa' quem Jeju Panxica Iri' Jam co Iri' Taramaxicon pan? Ac i ma' na ca merem mip con ma'. Ta quep em' mapa' me ta, tomi' mip inem. Tomi' an pe mi' ron pain ca tomi' nem Iri' Jam pata', om ta quep em' ton ta ron pata' ta non. 8Merem ac i ma' na wari' ma', xi om ne ca wara hwet ca' ron co cwa' ta ara con caxicon jam nucun ta.

9Tomi' querec pan ac con na Jeju: Cain' cain' ne wuxum quem non.

Om na, Iritocon napa' wuxu ta ac ca na. Xi mija ara urut pain ca caxicon jam urut ca' na ca tomi' ca ma'. 10Jain jain na wari' ma', pain ca tomi' mip con Jeju ma'. Ta tomi' hwerehwet mama' momon pain pira caxicon jam ne me ta na ca tomi' mip nucun.

11Cao' to nain i ma' caji mijac ma'. Mija na caji mijac. Iritocwinain ta. Cao' to nain ca tamaja pan ne macan'. 12Jain jain ac caca na oro caxicon jam nucun wari' ma'. Mama' jein caji mijac ma' xut me. Ma' ta corom hwet urut pain ta na ca tomi' mip cocon Jeju.

13Mama' jein ta ac tococwa na. Hwerehwet ca' ac cocon na, corom hwet ac cacain na caji mijac ma' quem. Mija na caji mijac. Ac ca ma' 2.000 ne na. Tamanain to pin ac ne na quem. Jein quiji' mama' ac nein na ca tamaja ne macan' ma', jein jein, wara ca' na com ma', pan corom mama' ac ne na, cono' cono' pi' pin ac ne na quem.

14Caram ma' co querec wet nanain caji mijac ma', jein mama' ac caca na, tomi' hwet ac cocon na oro wari' co to nanain cidade, wiricoco oro co to nanain oro xitot ma' quem. Tomi' hwet nonon pain oro carawa ca ara ne ma'. Maji querec xi' e' ac caca na. 15Jein hwet iri nonon Jeju ne, querec ac cocon na co ma' co mija nana oro caxicon jam co corom to ho' nonon ma' ira. Xao pe pin na. Pe pin na wom. Tamanain tamanain om pin na. Jin' pin ac caca na. 16Caram ma' co querec nanain ca ara ca Jeju ma', tomi' hwet nonon co xo' maqui' nana ma'. Tomi' hwet nonon pain carawa ca ara non co ma' co corom to ho' nonon caxicon jam ma' ira. Tomi' hwet nonon pain carawa ca ara nain caji mijac ma' quem. 17Taraju iri nana oro wari' ne, jain jain ac caca na, mao ra, paca' rain macaraxut ca' ac cocon na Jeju.

18Piton pe tain iri nain mam' horoho wa Jeju ne, hwet xim ta Jeju ac ca na co ma' co corom to ho' nonon caxicon jam pane.

19Om na ta ac con na Jeju. In mao rain xurum. In hwet roron oro ca nari nem ta. Tomi' hwet roron pain ca ara mi' quem Iri' Jam ca', pain ca quep xio pin quem ca', pain ca xiram pa' quem ca' na ca tomi' con ma'.

20In mao ac ca na, pijim' mao ac cain na oro xijein cidade pain Decápolis ma'. Xiram pa' napa' Jeju ta, quep xio pin napa' ta na ca pijim' tococwa ma'. Wa wa wa wa pi' pin ac cocon na oro wari'.

Ca quep xio pin cam narima' Jeju, je pain ca to' e' mami' cam pije' quem

Mateus 9.18-26; Lucas 8.40-56

21Pan horoho in mama' ac cacain na xijein cacarain com Jeju cocon co taxipa' ca ma'. Piri' mama' iri nana ne, coco' coco' mam' pin ac cocon na oro wari' pain cacarain cote ne com ma'. Mija nana wari' ta. Om ca paric camain' caca. 22Maqui' ac ca na wari' co win ma' ne nonon co querec wet nonon oro win judeu caca pain xirim ca cut in to xucucun ma'. Jairo na wixicon. Querec iri non Jeju Jairo ne, pe torotop mi' ac con na pain caximacon. 23Jain jain na, tomi' mip ac con na: Hap ra, mi' pin ta' na panxita' ta. Quep ram pain mum ta. Ma' ta xio pin cama, ma' ta om mi' pin cama ta non.

24Ma ac ca na, hwet ac con na.

Ja' ja' nonon oro wari' quem. Mija nana wari' ta. Om ca paric camain' caca. Xao xao tamana nonon. 25Pe nain i ma' narima' co ao tamana ma' quem. Ma' 12 na cawaxi' pain ca ao tamana cama ma'. 26Mija paxi' nana oro doutor co aramao nanam quem. Jain jain tamana na cocon. Pi' ca' nam dinheiro pain ca pagar cocon. Aramao paxi' nanam, ane om xio cama ne. Ximin pin na pain ca ao tamana nequem. 27-28Taraju iri tata oro wari' pain ca tomi' hwet cacain ca ara ca Jeju pain ca quep xio taxi' cocon co caxi nana ma' ne, coromicat ac cama na pain ximicam: Mo ta quep e' ton womicon ma', xio pin ac ta' tara ta na ca coromicat nequem. Mo hwet ton ta ac cama na, joc tutup ac tococwa na oro wari'. Joc tutup joc tutup hwet ac con na pain waracon, quep ac con na womicon. 29Om hap pin ac ne ca ao ximao cama na quem ma'. Taraju pin' xequem pain ca to' xio pin cam Jeju.

30Wara taxi' xucun Jeju pain ca mam' to' xio pin con wari' pain ca hwara' opa nucun. Xin in hwet ac tococwa na oro wari' co xao xao nonon ma'. Ma' co quep napa' con womu cwa' quem tata.

31Cain' cain' xima quem ac cocon na co taxipa' ca ma'. Om ca querec momon oro wari' co xao xao nenem cwa' ra? Para ma' co quep napa' cwa' ma ma' quem? Xi mija ara caca wari' co quep nenem cwa' ta na ca tomi' cocon ma'.

32Ane noro noro wet tococwa oro wari' co to to mam' pin nonon ma' ne. Ma' ta taxi' ton wari' co quep napa' ta na.

33Narima' ma', taxi' pin iri xequem pain carawa ca ara nam ne pain ca to' xio pin cam Jeju ma', xut hwet ac con na. Pe torotop mi' ac con na pain caximacon. Jin' na, cocoroc na pain ca jin' nequem. Tomi' hwet ac con na pain ca caxi nequem, je pain ca quep con womicon, je pain ca xio pin cama con.

34Tomi' ac cam na: Xio pin ma ta arain, xi om ne ca howa ara mapa' pain ca quep xio taxi' ta' ca' ac cam na. In mao ra. Ta toron mami' ne xumum me. Om pin na ca caxi nem ta na ca tomi' cam ma'.

35Tomi' tomi' wet nam narima' ma', maqui' ac caca na wari' ma', maqui' nanain xiricon Jairo ma', co querec wet nonon oro win judeu ca pain ca cut in xucucun ma'. Mi' pin na panxima ta ac cocon na. Om xi hap ra mami' mon Taramaxicon co ca' na taxipa' capijacon Iri' Jam ta nonon.

36Taraju nonon Jeju quem, taraju paxi' nonon pain ca tomi' nucucun ma', ane miri'om cocon ne. Tomi' ac con na Jairo: Ta jin' ma me. Howa e' ne pain ca quep xio taxi' tam ta non.

37To wet je pa'ao', ta ja' ja' mahu' me ta ac tococwa na oro wari' co ja' ja' nonon ma'. Xica' to nana Pedro con Tiago con coxa' ca ma', João ma', co harahap je ca ma'. Maji ta ac tococwa na. 38Hwet pin iri nanain xiricon Jairo ma' ne, querec ac tococwa na oro wari' co teretem nana ma'. Mija nana, awaran tamana nana. 39Corom ac ca na Jeju. Tomi' ac tococwa na: Cain' cain' xihwe quem? Para teretem hwe ma'? Para awaran hwe ma' quem? Om ca mi' pin cama pije' ta. Pi'am e' na, ac i ma' na ca tomi' tococwa ma'.

40Tatam' tatam' pi' pin ac cocon na, tomi' ximama' nonon quem. Ane tomi' tococwa ne: Hwerehwet mama' je e' tata. Harahap je ta ac con na cote cama cam jicam ma'. Harahap je quem tata co taxipa' ca co ja' ja' nonon ma' quem. Corom mama' ac cacamain na man ca terem' pe cama pije' ma'. 41Quep ac cam na pain micam. Talita cumi ac cam na. Pain ca talita cumi cam ma', tequi' pe ra ta pije' na ca tomi' mao nein.

42Tequi' pe hap ac cama na, xut ac cama na quem. Ma' 12 na cawaxi' nequem. Wa wa tamana ac ca na cote cama cam jicam. 43Tomi' mip ac tacacama na: Ta tomi' hwet huhun pain oro wari' me ta, ta tomi' hwet huhun pain ca to' e' mami' tam ca' me ta tata. Mi' jem pain carawa ca cao' wa ta ac tacacama na quem.

Currently Selected:

Marcos 5: TBPN

Highlight

Copy