Marcos 6
6
Ca in mao cain Nazaré Jeju
Mateus 13.53-58; Lucas 4.16-30
1Mao ac ca na Jeju ma', mao ac cain na macaracon#6.1 Nazaré na wixinain macaracon Jeju. Je ca pe pan ca pain ca xo' hwara' nucun. . Ja' ja' nonon co taxipa' ca ma' quem. 2Maqui' pin iri na sábado ne, ca' na toton pain capijacon Iri' Jam ta ac ca na, pijim' pe ac cain na xirim ca cut in to xucucun oro win judeu urut ma'. Oro wari' co taraju nonon ma', mija nana co in ac nonon pain ca pijim' nucun. He, cain' cain' ca co cwa' ne ta nana. Ma' co mi' non pain oro ca ara taxi' nucun ma'? Ma' co mi' non pain ca taxi' tamana nucun ma' quem? Ma' co mi' non pain ca ara cain oro ca om ara taxi' ne ca wari' wa ma' quem nana. 3Om ca wirico co cwa' co ara taxipa' pana cara pane ra ac caca na. Om ca cawiji con Maria cwa' ra? Om ca aji' con Tiago con José con Judas con Simão cwa' ra? Om ca to ho' cacapari' oro mon xojam' co aji' nonon cwa' ra? Cain' cain' xira ne nana, miri'om ac cocon na quem. Om ca howa camain' cocon.
4Tomi' ac ca na Jeju: Tomi' querec te paxi' ta profeta pain oro xijein cidade ma'. Pain iri' macaracon ma' iri na ne, om ca tomi' querec te tocwa. Noc pan nonon oro win ma' ca cocon iri' ca nari nucun na ca tomi' tococwa ma'. 5Je ca om ha' con pain ca ara pe cain Nazaré oro ca om ara taxi' ne ca wari' wa ma'. Quep xio e' tata co caxi nana ma'. Paric nana, om om nana. Quep iri tata pain micon ne, xio xio pin ac caca na. 6He, para om howa cacapa' oro win ma' ne cwa' ne ta ac ca na pain ca coromicat nucun.
Ca tomi' xo' tococwa oro apóstolo pain ca taramaja xi' nucucun
Mateus 10.5-14; Lucas 9.1-6
Hwet toton oro wari' co to nanain oro ca paric to ne xirim ma' ac ca na Jeju ma', mao ac ca na, ca' na ac tococwa na pain capijacon Iri' Jam oro wari'. 7Harahap je, tomi' xuhu' ta ac tococwa na co taxipa' ca ma', co ma' 12 nana ma'. Wawaran mama' je pain oro xijein macan' ta ac tococwa na. Mama' 2 mama' 2 xam' je pain ca hwet xun huhun oro wari' ma', pain ca cwirin' jein ca caracat nuhu' ta huhun ma'. Mi' inuhu' pain ca tomi' jein pin huhun oro caxicon jam ta na ca tomi' tococwa ma'.
8Ca' na ca tomi' xo' mam' tococwa ma'. Mama' xi' iri je ne, ta cut hwein oro caramajuhu' me, an xica' pe jein pana ca mam' pan xu wa. Carawa ca cao' wa ma', je caji coco ca mam' cut wa carawa ma', je dinheiro ma' quem, ta cut hwein me ta. 9To jein caji caxim nuhu' ma'. Ta cut tocwan hun wom quem me. 10Hwet iri jujun oro wari' pain oro xijein xirim ne, to ho' ac hun tara co pi'am to ho' xine pain xuru ca' nuhu' ma'. Om ta paca' hun. Mon to wet mon to wet maqui' pa' ac cuhu' tara xec nein ca hwet xun huhun xucucun wari' pain xijein cidade. 11Mo ta hwet xun huhun xucucun wari' co to nanain oro ca paric to ne xirim ma' quem, mo ta om tomi' querec te cucuhu'. Mo ta om ma' camain' ca wari' co taraju xin nanain ca pijim' nuhu' ma', paca' ac huhun tara, wap camara' ac hwein tara ximirinain macaracocon pain caximahu' pain ca paca' huhun ma'. Ma' ta querec pin' xujuhu' pain ca pan teretem nuhu' pain ca noc hwein ca taraju wa ta ac huhun tara quem. Ac i ma' na ca tomi' xo' tococwa pane.
12Mama' ac caca na, pijim' mi' ac tococwa na pain capijacon Iri' Jam oro wari' ma' quem. Cwirin' je, an to pin jein ca caracat nuhu' ta tata. 13Mija ac caca na oro caxicon jam co tomi' jein pin caca ma', mija nana oro co caxi nana co ji'ao mi' caca pain winacocon pain homain ma' quem. Ac i ma' na ca quep xio pin tococwa ma'.
Ca ton tapit pin xine winacon João co ja' taxipa' com
Mateus 14.1-12; Lucas 9.7-9
14Taramaxicon Herodes ma', taraju ac cain na ca tomi' nucucun oro wari' pain ca tomi' hwet cacain oro ca ara ca Jeju. Xi taraju taraju pi' pin ara cocon ta. Ma' nana co tomi' ca' nana ma': Om na, wirico co cwa' João cara pane, co ja' taxipa' nonon pain com oro wari' pane. E' mami' na João cara pane. Je tara ca ha' con pain ca ara cain oro ca om ara taxi' ne ca wari' wa ta, ac i ma' na ca tomi' caca ma'. 15Om na, wirico co cwa' Elias cara pane ac caca na oro xucucun ma'. Oro xucucun ma' iri nana ne, om na, xucun profeta tara, win caca oro profeta cara pane ta nana.
16Herodes ma', taraju iri nain ca tomi' nucucun ne, tomi' ac ca na: Om na, wirico tara João cara pane. Ton tapit pin jein winacon paxi' inonon oro wari' ne co taramaja mi' nanapa' pane, ane e' mami' ca ne. Wirico tara ta na.
17Ac i ma' na ca coromicat nucun Herodes con Jeju ma', xi wara quep ara con João pane ta. Quep jun, pao' pe jun, tao' pe jun pain xirinain ca tao' to tao' to to wa ta tata oro wari' nucun pane. Xi om ne ca noc pan ara con João Herodias ta. Wara an paxi' nam Herodias Filipe ma', coxa' ca Herodes ma'. Ane an pan cam Herodes ma' ne. 18Pan to' ac cain na taraxicon Herodes João ma'. Tomi' caho' nem pain ca an wa manacon coxa' ma Iri' Jam ta non.
19Je ca noc con João Herodias pane. To' pa' pin ton non, ane nain ho' con Herodes ne. Nain ho' non cam manacon. 20Xi jin' ara con ta. Jin' non pain ca querec pin' con pain ca xut xo' nucun je pain ca taramaja mi' con Iri' Jam ma'. Je ca nain ho' con ma'. Taraju taxipa' non pain ca pijim' nucun quem. Taraju iri non ne, i'ina ac ne na ximicon. Ane hohot cara con ca taraju wa ne.
21Aram aram maqui' ac ne na xec nein ca ara tain cama ca param nequem Herodias ma', pain xec nein ca mam' pe wet cacain ca pan' qui' nucun Herodes pane. Harahap je, cao' querec te wi xijexi' ta ac tococwa na oro win taramaxicon ca cocon oro taramaxicon nucucun oro soldado nucun ma' quem. Harahap je tata oro win ma' ca co caramaju tamana nana ma' quem, co to nanain Galileia ma'. 22Pain ca tomi' querec te pan xucucun ma', corom ac cama na cainacam Herodias ma'. Pi' xirao' in pi' xirao' in ac cama na, tomi' querec te ac cam na Herodes ma'. Tomi' querec te nanam oro win ma' ca co win tomi' querec te ca ma' quem.
Tomi' ac cam na: Ma' carawa ca param ma quem? Carawa ca mi' ne mapa' ma', mi' ac xim pain tara. 23Tomi' an pe mi' ac cam na pain ca tomi' nucun: Mo ta mi' ne pain xijein cacarain macaraxi' mapa', mi' ac xim pain tara. Tomi' iri'o' inem, om ca mixein ta'. Taraju napa' Iri' Jam pain ca tomi' an pe mi' xim pain ca tomi' ne ca'. Mo ta om mi' xim pain, wap ma' tarapa' Iri' Jam ne. Ac i ma' na ca tomi' cam ma'.
24Hwet mao ac cama na, tomi' querec ac cam na jicam. Ma' xi carawa ca mi' ne ton quem na ca tomi' querec cam jicam ma'.
Om na, ton tapit mi' ne pain winacon João co ja' taxipa' com ta ron ta ac cam na.
25Mo in hwet hap ac con na taramaxicon. Param inem pain ca ton tapit mi' mapa' pain winacon João co ja' taxipa' nonon pain com oro wari' ta. An pe tatarain pain too ta. Param ho' inain ta na ca tomi' con ma'.
26Cain' cain' xira pata' ne ta ac ca na Herodes. Om xi tomi' an pe mi' tam pain ca tomi' ne cara ne ta ca' xucun. Ane na e' ne pain ca tomi' ha' cam ne, xi om ne ca tomi' an pe mi' ara cam pain ca tomi' nucun ta. Wixipa' tata oro win ma' ca co taraju nonon pain ca tomi' nucun quem. Je ca om an in cain ca tomi' nucun.
27Tomi' hap ac con na soldado nucun: Ton tapit pin rain winacon João ma'. An qui' ac main tara ta na ca tomi' con ma'. Mao ac cain na xirinain ca tao' to tao' to to wa ma', ton tapit pin ac cain na winacon. 28An qui' ac cain na pain too. Mi' ac cam pain na, mi' tiquin' mi' ac cam na pain jicam ma' quem. 29Taraju iri nana co taxipa' ca ma' ne, pain ca mi' pin nucun ma', maqui' ac caca na, an mao ac cacain na curucun. An corom pe ac cacain na pain manain pacun.
Ca tomi' hwara' pin cain capam' con hwam Jeju
Mateus 14.13-21; Lucas 9.10-17; João 6.1-15
30In hwet ac cocon na Jeju oro apóstolo ma'. Tomi' hwet ac cocon na pain oro ca ara caca pain ca ca' na cocon pain capijacon Iri' Jam oro wari' ma' quem. 31Mija nana wari' co hwet nonon, to to, paca' ca' ac cocon na, maqui' maqui' ac caca na oro xucucun, to to, paca' paca' ca' ac cocon na quem. Mija nana, to' i'ina nonon Jeju cocon co taxipa' ca ma'. To' i'ina nonon pain oro carawa ca ara xi' caca, om ca na cocon ca cao' wa quem. Je ca tomi' cocon co taxipa' ca Jeju ma'. Harahap je, mama' xin i cain ta, pain ca om pe ca wari' cain. Xica' to xi', xao to wa pije' ac hwein tara xumuhu' ta na ca tomi' tococwa ma'.
32Piton to ac cacain na mam' horoho wa, pan horoho mama' ac cacain na ca om pe ca wari'. 33Xica' to xi' paxi' nana, ane mija caca wari' co querec nonon pain ca mama' nucucun ne. Querec pin' nonon quem. Maji cocon ta, ac xin macan' ta ac caca na, jein mama' ac caca na. Maqui' ac cacain na oro xijein cidade nucucun ma', jein mama' ac cacain na i cain, jein jein, wara tan' ca' ac cocon na quem.
34An tac iri nanain mam' horoho nucucun ne, piri' ac ca na Jeju. Querec ac tococwa na oro wari'. Mija nana wari' ta. Om ca paric camain' caca. Xiram pa' ac tococwa na, xi an xiho' ara cacain ovelha ca om ma' camain' wari' co querec wet nain ta. Ca' na toton pain capijacon Iri' Jam ta ac ca na, ca' na ac tococwa pain na quem.
35Wara irawin pin na. Mo tomi' xun Jeju ta ac caca na co taxipa' ca ma', xuruxut hwet ac cocon na. Irawin pin na ta Jeju. Om nain i ca' xirim ca cut pe xine carawa ca cao' wa quem. 36Mama' je ximomon oro wari' cwa' ac cocon na. Ma' ta mama' cacain oro xitot, je pain oro ca paric to ne xirim ma', cut pan ac cacain tara carawa ca cao' wa ta nonon.
37Om na, mi' pan jujun pain carawa ca cao' wa ta ac tococwa na.
Cain' cain' xuxut quem ac cocon na. Xi ma' caparut cote ne dinheiro ta. Mo xi cut tamana xuxut pain carawa ca cao' wa, mo xi mi' 200 urut pain denário#6.37 Denário ma', je i ma' dinheiro nucucun oro romano pain cara pane. Wari' co taramaja mi' non xucun wari' ma', pain ca taramaja qui' cain iri' xo' xec, taramaja taramaja irawin pa' ac con na pain ca taramaja nucun ma', an xica' pe ac cain na denário pain ca taramaja nucun. pain. Cain' cain' xuxut quem ne nonon.
38Cain' ca ma' ne capam' pahu'? Noro jein ac tococwa na.
Taxi' iri nanain ne, tomi' ac cocon na: Ma' 5 naparut wijimain capam' ca'. Ma' 2 naparut hwam cwa' quem nonon.
39Xao to ni xao to ni xam' jein tononoin ma' quem jujun oro wari' ta ac tococwa na. Awi na tononoin ma' quem. Xao to awi nonon oro wari'. 40Xao to ni xao to ni xam' ac caca na. Ma' 50 nana pain i ca', ma' 100 ac caca na pain i ma'. Ma' 50 ac caca na pain i cain, ac i ma' ac i ma' pi' pin nana. 41Cut ac cain na capam' ca ma' 5 ma', wirico hwam co ma' 2 ma' quem. Cut iri nain ne, noro pawin ac ca na, tomi' ac con na Iri' Jam: Tomi' querec te urut pum pain ca mi' maparut pain capam' con hwam cwa' quem Te non, jicaracat ac cain na capam', cut mi' ac tococwa pain na co taxipa' ca ma'. Maxiram' mi' jujun pain oro wari' ta ac tococwa na. Ac i ma' na con hwam quem. Jicaracat non, maxiram' mi' ac tococwa na con oro wari'. 42Cao' cao' xam' ac caca na. Ma'am ca' nanain, ma'am ma'am pi' pin nana. 43Pan cut xin pawirinain ta ac caca na co taxipa' ca ma', cut ho' cut ho' ac cacain na pain coco. Moin' 12 na cotain pain pawirinain capam' je pawiricon hwam. 44Ma' 5.000 nana ca tarama' nucucun co cao' nana quem#6.44 Ma' paxi' nana oro narima' cacam oro hwijima' quem. Ane om tomi' tacacama ne..
Ca xut cain quimain com Jeju
Mateus 14.22-36; João 6.16-21
45Pan cut pin iri nanain pawirinain capam' con hwam co taxipa' ca ne, tomi' ac ca na Jeju: Piton to jein mam' horoho wa ma' ac tococwa na. Wara pan horoho mama' jein xijein cacarain pain Betsaida cain ta tata. Querec querec mama' toton oro wari' pa'ao', aram aram hwet ac xuhu' tara quem ac tococwa na quem.
46Querec querec mama' iri nonon oro wari' Jeju ne, piri' mao ac cain na pacun. Tomi' ton Te ta na.
47Xo' um pin iri na ne, wara to pin nanain ximijain com pain mam' horoho nucucun co taxipa' ca ma'. Jeju ma' iri na ne, pe cara nain pacun. Xica' pe na. 48Querec pira ac tococwa na pain ca pan horoho caca ma'. I'ina nonon, xi nuru cam' ara cocon hotowa ta. Xec pin ta' iri na ne, om ca hwet querec ca xina, xut hwet toton ta ac ca na, xut hwet ac tococwa na quem. Xut hwet tata pain quimain com. Xut xut, wixicam pin ac tococwa na, ac ca xut tiquin' ca' toton ca paxi' na ira. 49Querec iri nonon pain ca xut cain quimain com ma' ne, coromicat ximama' ac caca na. Jima tara ron nana, merem merem nana. 50Querec querec pi' pin nonon. Jin' tamana nana.
Ane tomi' hap ca Jeju ne. Om na, ta jin' mahu' me ta, wata' ta. Quereme je ta tata. 51Piton pe ac cain na mam' horoho wa ma', nuru nuru om pin ac ne na hotowa. Wa wa tamana ac cocon na. 52Xi querec pin' cocon pain iri' ca hwara' opa tamana nucun pain ca mi' pan con pain ca to' hwara' pin cain capam' Iri' Jam ta. Opain ara xi' na ximicocon ta.
53Horoho mama' ac cacain na xijein cacarain cote ne com ma'. Tan' mama' iri nanain macarain Genesaré ma' ne, tucu pan ac cacain na mam' horoho nucucun ma'. 54Piri' iri nana ne, querec pin' hap ac cocon na Jeju oro wari'. 55Maji tomi' xuxun oro win ma' nexi' ta ac caca na, jein mama' ac cacain na oro xijein cidade ma'. Maqui' na Jeju ta, an mamam' mi' xun cocon oro win ma' nexi' co caxi nana cwa' ac caca na. Mon quem? Mao nain i cain ta, maji con, an toco' ac tococwa na pain wi, an mamam' mi' ac tococwa na con Jeju. 56Je curucucun pane. Oro ca mao nucun Jeju ma', pain ca hwet cocon oro wari' co to nanain oro ca paric to ne xirim ma', je pain oro cidade ma', je pain oro xitot ma' quem, jain jain nana oro wari'. Cut qui' tata co caxi nana ma', an to to ac tococwa na pain ca xao to to caca oro wari' pain ximijain cidade ma'. Ta narain ho' maparut pain ca quep urut pum ca', quep e' xut con cacaracon womum ma' ac cocon na Jeju. Co quep nonon pain cacaracon womicon ma', xio xio pi' pin ac caca na quem.
Currently Selected:
Marcos 6: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
