Marcos 8
8
Ca tomi' hwara' mami' cain capam' con hwam Jeju
Mateus 15.29-39
1Oro xijein xec ma' iri na ne, mija mami' ac caca na oro wari'. Om ca paric camain' caca. Om nonon carawa ca cao' wa quem. Harahap je ac cocon na co taxipa' ca Jeju ma'. Tomi' ac tococwa na: 2Xiram pa' inonon oro wari' cwa'. Ma' 3 ara xi' na xec pain ca to ho' cacapari' ca'. Om nonon carawa ca cao' wa quem. 3Mo ta in mama' jein xuruhu' toton pain ca pe' nucucun ma', xuruxut camara' to ac cacain tara wana pain ca naro ne curucucun pain ca pe' tamana nucucun. Xi ma' ara caca co maqui' nanain pira ta tata.
4Cain' cain' xixi' quem ac cocon na co taxipa' ca ma'. Main xi mam' pe xin carawa ca to' ma'am nonon pain i ca' quem, xi ma' ne xirim ca cut pe xine ta nonon.
5Cain' ca ma' cuhu' capam' quem ac tococwa na.
Ma' 7 e' naparut capam' ca' ac cocon na.
6Xao to jein macan' ta ac tococwa na oro wari'. Cut pin iri nain capam' ca ma' 7 ma' ne, tomi' ac con na Iri' Jam: Tomi' querec te urut pum pain ca mi' maparut pain capam' ca' quem Te non, jicaracat ac cain na, cut mi' ac tococwa na pain co taxipa' ca ma'. Ma' ta maxiram' mi' huhun pain oro wari' ma' ta tata. Maxiram' mi' ac tococwa pain na. 7Ma' paric ca' e' nonon oro wixicon hwam quem. Tomi' querec te urut pum pain ca mi' maparut con hwam cwa' quem Te ac ca na, maxiram' mi' jujun con ta ac tococwa na co taxipa' ca ma' quem. 8Cao' cao' ma'am pin ac caca na oro wari' ma'. Ma'am ca' nanain, ma'am ma'am pi' pin nana. Pan cut xin pawirinain ta ac caca na co taxipa' ca ma', cut ho' cut ho' ac cacain na pain coco. Moin' 7 na cotain cocon. 9Ac ca ma' 4.000 caca na ca tarama' nucucun co cao' nana ma'.
Mama' je iri nonon oro wari' Jeju ne, 10maji quem ac tococwa na co taxipa' ca ma', piton to ac cacain na mam' horoho wa, pan horoho mama' ac cacain na macarain Dalmanuta cain.
Ca ara rain oro ca to' querec pin' naparut pain ca pe ho' quem Iri' Jam ta cocon Jeju
Mateus 16.1-4
11Maqui' ac caca na oro fariseu. Tomi' querec xun ta nana. Am iri'o' ca, am om iri'o' ca quem nana. Je ca tomi' cocon ma': Ara rain carawa ca to' querec pin' naparut pain ca pe ho' quem ca hwara' opa nucun Iri' Jam ta nonon. 12Wereme to ac ca na pain ca tomi' xaxa' nucun cocon. Wa inuhu' pain ca wari' nuhu' pain oro xec nexi' ca' ac tococwa na. Para ara rain carawa ca to' querec pin' naparut pain ca pe ho' quem ca hwara' opa nucun Iri' Jam mahu' quem? Om ta ara tain pahu'. Tomi' iri'o' inuhu' ta tata. 13In ca' ac tococwa na, in hwet ac cain na mam' horoho nucucun ma', horoho mama' ac cacain na xijein cacarain com.
Ca tomi' napat ximama' nucucun oro fariseu cocon oro wari' nucun Herodes
Mateus 16.5-12
14Pain ca horoho mama' xin xijein cacarain com caca ma', om ca cut cacain capam' co taxipa' ca ma'. Ji'am pin nanain. Ma' xica' pe nonon capam' pain mam' horoho nucucun ma'. 15Tomi' mip ac tococwa na: Ma' tara xumuhu' me. Ein jein ca to' memerem nein capam' nucucun oro fariseu cocon oro wari' nucun Herodes ta tata.
16Na ra ac caca na co taxipa' ca ma'. Xi ma' capari' capam' ta, je ca tomi' ac i ma' capari' ca' nana.
17Taxi' pan nonon Jeju quem, taxi' tata pain ca tomi' ac i ma' xucucun. Para tomi' ac i ma' xujuhu' pain ca om cuhu' capam' ma' quem ac tococwa na. Om ca taraju pa' querec hwe ra? Om ca querec pin' querec mahu' pain iri' ca hwara' opa tamana ne ra pain ca mi' pan capa' pain ca to' hwara' pin tain capam' Iri' Jam quem. Opain na xumuhu' ra? 18Ma' paxi' na tucuhu'. Je xi querec pin' hwein ca querec hwe ma' quem? Ma' paxi' na tarajuhu'. Je xi taraju pa' hwein ca tomi' xuhu' ca' quem? Om ca mam' pe wet hwein 19ca ma' 5 e' capari' capam' cocon wari' co ma' 5.000 nana pane ra? Jicaracat mi' inonon pain, ma'am ca' ac cacain na. Cain' ca ma' ne cotain pawirinain ca cut ho' moin' hwe pane quem?
Ma' 12 naparut ta ac caca na.
20Om ca mam' pe wet hwein ca ma' 7 e' capari' capam' cocon wari' co ma' 4.000 nana pane quem ra? Jicaracat mi' inonon pain, ma'am ca' ac cacain na. Cain' ca ma' ne cotain pawirinain ca cut ho' moin' hwe pane quem?
Ma' 7 naparut ta ac caca na.
21Om ca taraju pa' querec hwe ra ac tococwa na#8.21 Om ca taraju pa' cacain ca tomi' nucun Jeju co taxipa' ca ma'. Om paxi' na ca tomi' mi' cain ca to' memerem nein capam'. Tomi' mi' nain ca tomi' ximama' nucucun oro fariseu cocon oro wari' nucun Herodes ma'. Win ne ca to' memerem nein capam' ma', pain ca to' hwara' pin nein capam', ac i ma' na ca tomi' ximama' nucucun ta tata. Tomi' ximama' iri nonon Jeju ne, taraju ac caca na oro wari' co an xin tiquin' nanain ma', aram aram taraju taraju xam' ac caca na oro xucucun wari'. Je ca ma' tara xumuhu' cocon me tococwa co taxipa' ca ma'. Ta taraju wet hwein ca tomi' ximama' nucucun me ta tata. .
Ca quep ma' pin mami' cain tocon wari' co pe nain Betsaida
22Mama' ac cacain na Betsaida. Ma' ac caca na oro wari' co o qui' nonon co om tocon ma'. Quep xio ron win ma' nuxut cwa' ac cocon na. 23Ma ac ca na Jeju, quep ac cain na micon, coc papan mao ac con na, o hwet ca' ac con na pain oro xirim ca to caca oro win ma' ca ma'. Cupa' ac cain na tocon, quep ac con na pain micon. Tomi' querec ac con na: Querec ma quem? Ma' carawa ca querec ma ma' non.
24Noro in noro in ac ca na. Querec paxi' ina. Querec inonon oro wari' ma'. Xuruxut paxi' nana. Ac pana nanapa' ta na ca tomi' ca ma'.
25Quep mami' ac cain na tocon. Querec pin' ac ca na. Ma' pin mami' na tocon. Querec toha awi tamana pin non. 26In mao rain xurum ta ac con na. Ta in mao main oro xirim ca to caca oro win ma' nem me, in mao e' rain xurum ta non.
Ca tomi' hwet pin cain iri' wixicon Jeju Pedro, je pain ca tomi' pe cain ca mi' pin ta' nucun pain ca e' mami' ta' nucun quem
Mateus 16.13-20; Lucas 9.18-27
27Maji ta ac caca na, hwet ac cocon na oro wari' co to ho' xucucun pain oro ca paric to ne xirim ma', ca to ja' pan nain Cesareia Filipe ma'. Wirico Jeju, wiricoco co taxipa' ca ma' quem, mama' ac caca na. Pain ca xuruxut xuruxut wet caca ma', tomi' querec ac tococwa na: Om ta cain' ca wari' ca ne cacapa' oro wari' ra? Cain' ca coromicat mi' cacapa' pain ca Iri' Wari' ta' ca' quem na ca tomi' querec tococwa ma'.
28Om na, ma' nana co João co ja' taxipa' com cara pane xi' ma nenem ac cocon na. Ma' nana oro xucucun co profeta Elias cara pane xi' ma nenem. Oro xucucun ma' iri nana ne, om na, xucun profeta xi' ma nenem quem na ca tomi' cocon ma'.
29Wahu' quem? Cain' ca coromicat mi' pan mahu' ma' quem ac tococwa na.
Wum co Cristo#8.29 Ca' na ca tomi' mao nein ca Cristo wa cocon oro judeu pane. Iri' wari' co wara tora' ca Iri' Jam pane ta nana. Iri' Taramaxicon tara, wirico tara co to' witan toton nonon oro wari' ta nana. ta ac con na Pedro.
30Tomi' mip ac tococwa na: Ta tomi' hwet mahu' cocon oro wari' pain xocori ca' me, ta tomi' hwet huhun pain ca Cristo ta' ca' me tata.
31Tomi' xo' ac tococwa na: Na e' na pain ca jain jain tamana ta' ta' ca'. Wata' pain ca Iri' Wari' ta' ca', jain jain tamana ta'. Noc tatarapa' oro taramaxicon nexi' pain ca judeu iri' ca'. Noc tatarapa' oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés ma' quem. To' pa' pin tatarapa' quem. Ma' 3 pin iri tarapa' xec pain ca mi' pin ne ne, e' mami' ac ta' tara ta na ca tomi' tococwa ma'.
32Tomi' xo' ac i ma' tata pain oro carawa ca ara ton non. Quep ac cain na taparacon Jeju Pedro. Coc papan hwet mao ac con na, tomi' carapita ac con na: Ta tomi' ac i ma' ma me ta non.
33Xat tucu in hwet ac con na Pedro Jeju. Noro tata co taxipa' ca ma' quem. Tomi' carapita ac con na Pedro: Ac Caxicon Jam a xima pain ca tomi' querec mapa' ta Pedro. Mo ca' ne ta ac con na. Om ca an xiho' main ca coromicat nucun Iri' Jam. An xiho' e' main ca coromicat nein ca wari' wa ta na ca tomi' carapita con Pedro Jeju.
34Harahap je, tomi' xo' xuhu' ta ac tococwa na oro wari' cocon co taxipa' ca ma'. Wari' co ja' ja' xim napa' ma', miri'om ac cain tara ca param nucun. Om ta xiram pa' camain' cain curucun pain ca jin' cain ca mi' pin wa. Ac ca an tiquin' pan cain tara panaxicon ca mam' tatatain mi' xun tocwa ma'. Ja' ja' ac capa' tara ta. 35Xi e' cara pe tain cain pawin wari' co win xumu e' nain ca param pan nucun pain macan' ta. Wari' co miri'om nain ca param pan nucun pain macan' ca' iri na ne, pain ca win xumu e' capa' ma', je pain ca pijim' hwet cocon oro wari' pain capijacon Iri' Jam pain ca to' witan toton cocon ca', wirico tara co e' cara pe tain nain pawin ta. 36Je ca tomi' xuhu' ca' ac tococwa na. Mo ta ma' ma' xam' capari' oro carawa pain macan' ca'. Mo ta miri'om xin ca e' cara wa pain pawin cain, mo ta mama' xin cote ne xe quem. Ma' na ca quep xiho' ac capari' oro caramaji macan' ca cut iri' pain ca e' e' wet nexi' ra? Om ca quep xiho' capari' ta! 37Xi ma' ne caramaji macan' ca mam' an in ac xin ca e' cara nexi' ta. 38Mija nana wari' co caracat tamana nana pain oro xec nexi' ca'. An to pin nonon Iri' Jam. Mo ta ma' ca wari' co wixipa' napa' ma', pain ca noc capa' pain ca wari' ne ton ca', pain ca noc cain ca tomi' ne ca' quem, to' wixipa' ac capa' tara pain ca Iri' Wari' ta' ca'. Maqui' wi iri ta' cocon oro jam co taramaja mi' nonon Te ne, pain ca mam' maqui' tain ca hwara' opa nucun ma', wixipa' ac ta' con tara, om ta wari' ne ton ta na ca tomi' tococwa ma'.
Currently Selected:
Marcos 8: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
