Marcos 9
9
1Tomi' ac tococwa na: Wahu' pain ca to ho' mahu' ca', ma' tatara co querec pin' xun nonon Iri' Jam pain ca taramaxicon pe ho' xim cuhu' ta. Om ta cono' querec caca, wara querec tatarain ca taramaxicon hwara' opa nucun#9.1 Pain ca tomi' cain i ma' Jeju ma', ac ca tomi' tococwa na pain ca querec jimao pin ta' ne tocon pain cote ne pacun ma', pain ca hwet pa' xun cocon Elias con Moisés ma', pain ca mon cwa' Panxita' co om noc camain' ta' cwa' ton con Cote ca quem. Noro jein Marcos 9.2-8., ame hwe e'. Tomi' iri'o' inuhu' ta na ca tomi' tococwa ma'.
Ca jimao pin ne tocon Jeju
Mateus 17.1-13; Lucas 9.28-36
2Ma' 6 pin iri na xec pain ca wara tomi' xo' tococwa pain ca mi' pin ta' nucun Jeju ne, maji ta ac con na Pedro con Tiago con João ma', piri' mama' ac cacain na cote ne pacun. Xica' to nana pain i cain. Ca noro noro cocon Jeju ma', jimao pin ac ne na tocon. 3Toc meremem pin na womicon. Towo' tamana na con. Towo' tiquin' ca' non wom co to' to' cacama oro narima' cwa'. Om ca querec camain' tocwa wom co an xiho' non pain ca towo' nucun. 4Hwerehwet qui' ac caca na Elias con Moisés cara pane. Pijim' nonon Jeju quem.
5Tomi' ac con na Jeju Pedro. Awi na pain ca to xin i ca' quem Taramaxicon co ca' na taxipa' capijacon Iri' Jam. Quep 3 xut pain wijimain xirim. Mene rain wirain. Mene tarain wirain Moisés ma'. Mene tarain wirain Elias ma' quem na ca tomi' con ma'. 6Jin' tamana nana co taxipa' ca ma'. Je ca tomi' ximao ac i ma' ca Pedro.
7Hwet qui' ac ne na tajain nanawin. Tatep pa' ac tococwa na. Taraju ac cacain na ca tomi' wa ma', ca maqui' nain nanawin ma'. Mon cwa' Panxita' co om noc camain' ta' cwa'. Taraju wet jun ta na ca tomi' nucun.
8Noro in noro in ac caca na. Ane ane om pin na Moisés con Elias. Om ca querec mami' tococwa. Querec xica' pe e' nonon Jeju.
9Quiji' mama' ac cacain na pacun. Pain ca xuruxut xuruxut wet nucucun ma', tomi' ac tococwa na: Ta tomi' hwet huhun pain oro wari' ca querec hwe pata' me. To' e' mami' cain' tarapa' Te ta. Wata' pain ca Iri' Wari' ta' ca', to' e' mami' cain' tarapa' Te. Tomi' hwet ac huhun pain tara ca querec hwe pata' ta na ca tomi' tococwa ma'.
10Ma ac caca na. Om paxi' na ca tomi' hwet cacain, ane tomi' pan e' xucucun pain ne. Ma' tara ca e' mami' ac wa con ra? Cain' cain' xira con ne, ac i ma' xucucun. 11Tomi' querec ac cocon na quem: In qui' cain' tara nonon Elias oro co ca' na taxipa' nanain ca xirao' nucun Moisés ma'. In qui' cain' tara, maqui' ac ca tara co tomi' pe pin ca Iri' Jam pane nana. Cain' cain' xirara quem? Para tomi' ac i ma' caca quem? Ac i ma' na ca tomi' querec cocon ma'.
12Tomi' iri'o' paxi' nana ta ac tococwa na. In qui' cain' tara ta nonon Elias oro profeta pane. Ma' ta an to xo' cain ximicocon oro wari' nucun Iri' Jam pain ca winim' cocon co wara tomi' pe ca pane paxi' nonon. Ac i ma' paxi' na ca xirao' pe cacain ca in qui' nucun Elias pane. Je ca tomi' xuhu' ca' ac tococwa na. Mo xi an to xo' xine ximicocon oro wari' ma', je xi om xirao' pe ca' caca oro profeta pane quem: Na e' na pain ca jain jain tamana ca co wara tomi' pe ca Iri' Jam ma', co Iri' Wari' ma'. Na e' na pain ca noc cocon oro wari' ta, je xi om xirao' ac i ma' caca pane quem? 13Ane tomi' pan xuhu' pain i ca' ne: Wara in qui' paxi' na Elias cara pane#9.13 Noro jein Mateus 17.13. Om ca tomi' con Elias Jeju ma'. Tomi' non João co ja' taxipa' nonon pain com oro wari' pane. An xiho' non Elias João cara pane.. Ane quep em' cocon oro taramaxicon ne, om ca xiram pa' camain' cocon. Wara xirao' pe nanain i ma' oro profeta pane, xirao' pe nanain i ma', pain capijacon Iri' Jam con, xirao' pe nanain oro carawa ca ara ton non ta na ca tomi' tococwa ma'.
Ca quep xio pin tocwa pije' co pa' taxipa' tamanain
Mateus 17.14-23; Lucas 9.37-45
14In hwet iri tata oro xucucun co taxipa' ca pain ca to to wet cacain xiquijinain pacun ma' ne, querec ac tococwa na oro wari' co to to mam' pin nonon ma'. Mija nana wari' ta, om ca paric camain' caca. Ma' nana oro co ca' na taxipa' nanain ca xirao' nucun Moisés quem. Tomi' caracan nonon co taxipa' ca Jeju. Mija na ca tomi' in pin xucucun pain ca tomi' caracan xucucun. 15Querec iri nonon Jeju oro wari' ma' ne, teretem ac caca na pain ca wa wa nucucun pain ca tomi' querec te nucucun con. Jein hwet ac cocon na. Maqui' ma maqui' ma ac cocon na.
16Ma' ca tomi' caracan xujuhu' ma' quem ac tococwa na.
17Tomi' ac ca na wari' co xat pe ho' nonon oro wari' ma': An mi' xim paxi' inem con panxita' cwa' taramaxicon co ca' na taxipa' capijacon Iri' Jam. Om ca tomi' ac ca. Xi ma' ara ca caxicon jam co corom pe ho' non ta. 18Quep iri non ne, xin mi' ac con na pain macan'. Toroto ac ne na morocacon pain capijacon, cacacao' tamana ac cain na xicon, xao pin ac ne na curucun quem. Tomi' mo pin jun caxicon jam nucun paxi' inonon co taxipa' ma cwa'. Ane om ha' cocon ne na ca tomi' con ma'.
19Wa inuhu' me ac ca na Jeju. Wahu' pain ca wari' nuhu' pain oro xec nexi' ca', om ca howa camain' mahu'. Pain pin paxi' na ca pe ho' xuhu' ca'. Je xi howa mahu' quem? Cain' cain' xita' quem? Ha' tara pain ca winim' cara xuhu' pain ca howa xim mahu' ra? Je i ma' ira, an qui' ron pije' ma' ta ac ca na.
20An mi' ac cocon na con. Querec iri non Jeju caxicon jam nucun ne, pa' hap ac con na tamanain. Pan' mao ac cain na macan', xin tem xin tem ac ca na, toroto ac ne na capijacon pain morocacon.
21Tomi' querec ac con na cote ca pije' Jeju ma': Cain' ca ma' ne cawaxi' pain ca pa' con tamanain quem non.
Om na, wara pa' qui' non pain iri' ca pije' nucun, mao ac ne ma' na con. 22Caxicon jam nucun ma', xin mi' ho' xin mi' ho' non pain xe je pain com quem. Ma' ta to' pa' pin ton ta na. Am ha' quem, pain ca quep xiho' maparut ma', xiram pa' xut. Quep xiho' xut e' na ca tomi' con ma'.
23Mo ta ha' quem mapa' ra ac con na. Cain' cain' xima quem? Om na carawa ca tanacam' napa' pain ca howa mapa' ta na ca tomi' con ma'.
24Howa paxi' inem ta ac con na pain ca tomi' hap con ma'. Quep xiho' ne e'. Mi' ne pain ca howa mip xim ta non.
25Querec iri tata oro wari' pain ca jein hwet cocon ne, tomi' in pin ac con na caxicon jam nucun pije'. Tomi' mip inem ta caxicon jam. Wum co to' om pin nain capijacon pije' cwa'! Wum co to' om pin nain taraxicon ca' quem! Paca' ron ta! Ta corom in hwet camain' mon me ta na ca tomi' con ma'.
26U ac ca na caxicon jam ma'. To' cocoroc mip ac con na, hwet ca' ac con na, maram pin ac ne na curucun pije' ma' quem. Ac ca mi' pin ca na. Je ca mi' pin na ta cocon oro wari' ma' quem. Mija nana wari' co tomi' ac i ma' nonon. 27Ane quep cain micon Jeju ne. An tequi' pe ac con na, tequi' pe xat pin ac ca na quem.
28Corom mao iri nain xirim Jeju ne, tomi' querec ac cocon na co taxipa' ca ma'. Xica' to nana, om nonon xucun wari'. Para om ha' caparut pain ca tomi' mo pin urut con caxicon jam cara ne nonon.
29Om na, caxicon jam co an xiho' non co pacara ne, co corom pe ho' non pije' cara ne, na e' non wari' co tomi' mi' non con Iri' Jam ma', co an pe nain ca cao' wa pain ca tomi' mi' con quem na ca tomi' tococwa ma'.
30Maji ta ac xucucun na, mama' ac caca na, xuruxut tiquin' ca' ac cacain na macarain Galileia. Jeju ma', noc nonon oro wari' pain ca taxi' cocon pain ca to cacain i cain quem. 31Xi om ne ca ca' na ara tococwa pain capijacon Iri' Jam co taxipa' ca ma'. Tomi' ac tococwa na: Iri' Wari' paxi' ina. Ane ma' ca wari' co tomi' mi' xim napa' cocon oro co noc nanapa' ne. O mi' ac cacapa' tara cocon oro co to' pa' pin xun nanapa'. To' pa' pin ac cacapa' tara quem. Ma' 3 pin iri tarapa' xec pain ca mi' pin ne ne, to' e' mami' ac capa' tara Iri' Jam ta, ac i ma' paxi' na ca tomi' tococwa ma'. 32Ane om taraju pa' cacain ca tomi' nucun ne. Hehe nana pain ca tomi' querec cocon pain quem.
Wari' co hwara' opa tiquin' ca' nonon oro win ma' ca ma'
Mateus 18.1-9; Lucas 9.46-50
33Tan' mama' ac cacain na Cafarnaum ma'. Corom mao iri nain xirim Jeju ne, tomi' querec ac tococwa na co taxipa' ca ma', co ma' 12 nana ma'. Ma' ca tomi' caracan xujuhu' pain wana ma' ne na ca tomi' querec tococwa ma'. 34Hehe ac caca na. Wixipa' nana, xi tomi' caracan ara xucucun ta. Wata' co hwara' opa tiquin' ca' nuhu' ta xucucun. Om na, wata' ta, hwara' opa tiquin' ca' inuhu' ta ac ca na xucun. Wata' pan ta ac ca na xucun ma' quem.
35Xao pe ac ca na Jeju. Harahap je, xao to ho' xine ta ac tococwa na co taxipa' ca ma', co ma' 12 nana ma'. Tomi' ac tococwa na: Wari' co taramaxicon ta' ma', om ta xec xec ca. Taramaja mi' e' totoron oro win ma' ca ma' na ca tomi' tococwa ma'.
36Pe nain i ma' pije' quem. Hap ra ta pije' ac con na Jeju, an xat ac con na pain ximijacocon. Pe horoman tapan' ac con na. 37Tomi' ac tococwa na co taxipa' ca ma': Noro jun pije' cwa', co om hwara' opa cwa'. Wari' co tomi' querec te non pain ca om hwara' opa nucun ca', coromicat ca' iri na ne: Tomi' querec te inem, xi om ne ca howa ara ton Jeju ma', mo ta coromicat ac i ma' ca pain ca tomi' querec te inem con ma', ac ca tomi' querec te capa' na. Om ca xica' pe querec te capa'. Tomi' querec te iri napa' ne, tomi' querec te non co cwain co hwet roron oro wari' napa' ma' quem na ca tomi' tococwa ma'.
38Taramaxicon co ca' na taxipa' capijacon Iri' Jam ac con na Jeju João. Querec urut con wari' co tomi' jein pin nonon oro caxicon jam. Wirico Jeju co tomi' jein pin roron ta napa' cocon ta na. Tomi' in pin paxi' urut con, xi win ma' ne capari' ta na ca tomi' con ma'.
39Ta tomi' in pin hun me ta ac tococwa na. Wari' co an hwet nain ca hwara' opa wa ma', pain ca ara cain carawa ca om ara taxi' ne ca wari' wa ma', mo ta an hwet cain wuxu pain ca wirico Jeju co ara rain napa' ta ca ma', om ca ane ane tomi' napat ac capa' ta. 40Ta tomi' in pin hun me, xi quep xiho' ara capari' wari' co om ari napari' ta. 41Je ca tomi' xuhu' ca', tomi' iri'o' inuhu' ta ac tococwa na. Wari' co xiram pa' nuhu' ma', pain ca mi' cuhu' pain wijimain carawa ma', am cam mi' xim cuhu' pain wijimain com. Mo ta tomi' ca' cuhu': Cam mi' xim pain wijimain com ca', xi om ne ca howa ara mon Cristo ta, mo ta tomi' ac i ma' cuhu'. Main mi' ac con tara pain oro ca awi wa Iri' Jam ta na ca tomi' tococwa ma'.
42Wari' co to' caracat non win ma' ca co om hwara' opa ma', co an xiho' non pije' co howa napa' cwa', wap tamana ac con tara Iri' Jam ta ac tococwa na. Mija tara ca jain jain ca con. Mo xi tucu xine cote ne pacun pain paramacon ma', mo xi xin pocom mi' tocwa pain cote ne com quem, jain jain pije' ac ca xira. Pain ca wap ton con Iri' Jam pain ca to' caracat con wari' co an xiho' non pije' ma' iri xira ne, mija tamana pan ac ne xira ca jain jain ca con ta. 43Je ca tomi' xuhu' ca', tomi' inem pain ca to' caracat quem mum ma'. Mo ta to' caracat quem mum ma', pain ca ara main ca om awi wa ma', ara maho' rain e'. Ac ca ton tapit pin main tara mum ma', ac je tara. Hohot na pain ca mao main pawin pain ca om ne mum ma'. Cain' cain' xira quem? Hohot xira pain ca xin mi' xima pain cote ne xe ma', pain ca ma' ma' wet ne mum ra? Om xi hohot ne ta. Pain cote ne xe cain, om ca jo' ra na camain' ne xe pain i cain ta. 44Om ca cono' camain' ca cwamicocon orojima' pain i cain, om ca jo' ne xe pain i cain quem. 45Mo ta to' caracat quem caximam ma' quem, pain ca xut mao main ca caracat pe ta' ma ma', mao maho' rain i cain e'. Ac ca ton tapit pin main tara. Hohot na pain ca mao main pawin pain ca om ne caximam ma'. Cain' cain' xira quem? Hohot xira pain ca xin mi' xima pain cote ne xe ma', pain ca ma' ma' wet ne caximam ra? Om xi hohot ne ta. 46Pain cote ne xe cain, om ca cono' camain' ca cwamicocon orojima' ta, om ca jo' ne xe pain i cain quem. 47Mo ta to' caracat quem tucum ma' quem, pain ca querec param ximao main ca om awi wa ma', noro maho' rain e'. Ac ca hot pin main tara. Hohot na pain ca mao main pawin ca taramaxicon pe ca Iri' Jam ma', pain ca om ne tucum ma'. Cain' cain' xira quem? Hohot xira pain ca xin mi' xima pain cote ne xe ma', pain ca ma' ma' wet ne tucum ra? Om xi hohot ne ta. 48Pain cote ne xe cain, om ca cono' camain' ca cwamicocon orojima' ta, om ca jo' ne xe pain i cain quem.
49Je ca tomi' xuhu' ca' ac tococwa na. Ma' ma' xam' napari' oro ca to' i'ina napari' ca'. Quep xiho' napari', to' om pin nain ca om awi nexi' pain ca xuruxut nexi'. Win ne sal ma', pain ca om cunu ne carawa ca aramao xine pain sal ma'. Win ne xe pain ca tom tom pi' pin nein oro ca om awi wa ma' quem. Ac i ma' na ca quep xiho' capari' oro ca to' i'ina napari' ca' quem. 50Awi na sal, to' wita awi nain oro carawa ca cao' wa. Mo ta wita wita om ne, mo ta camain' pin ne, cain' xi wita mami' ac ne quem? Je ca tomi' xuhu' ca': An xiho' jein sal pain ca quep xiho' caracan xujuhu' ma'. Xin ne xujuhu', tomi' querec te xujuhu' ta na ca tomi' tococwa ma'.
Currently Selected:
Marcos 9: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
