Ja̰ 12

Mari bɛ itɨr tɨ Jesu sul

Mat 26.6-13; Mrk 14.3-9

1Ɗa̰y minga toni barita Juyb-a pya̰ tɨ Pak kar ɓə hina, Jesu si tɨ Betani. Tɨ Lajar ne ər wag na ər tɨ ngalɨm lɔr hul. 2Tɨ un ne, a naa gɨ Jesu wa̰y tudi. Mart jo ɓaan gɨ a tudi. Bi ton ti tɨ lway mu na Jesu, Lajar kaw wo tɨ a daan la. 3Gɨna, Mari so itɨr ne towol dɨbla litɨr taal. Itɨr ne a ka na ya̰n ne uun laar ne a soon ɓə naar hur. Ər bɛ tɨ Jesu ɗa̰y sul la ər pla na ər sulɓwḭ. 4Jesu na wo paa ne ndil ɓə Judas Iskariot, ne ɓə ər sul sula ja ɓə: 5«Kəyjaa hiina i ka itɨr ne cingɨ i ko na sile aru mɨta lɛ i ɓaan gɨ bi tɨ ndemni kaw golgo lo a?» 6Judas ja jaa ne in kəysul ər ilgɨ tɨ bi tɨ ndemni sul lo, lɛ kəysul yḭr tɨ suga. Tɨ yḭr jo ər tɨ wo tɨ a gursu ɓaw. Ər jul gursu ne ər ɓaw taal ɓa̰ ndḛ-ndḛ. 7Lɛ Jesu ja: «I nɨm ər kɛgɛgɛ! Ka ər ka wa̰y ne toni barita ən ɗa̰y tɨ loom tɨ ngalɨm hul ɓə hina. 8Kəysul yḭ na bi tɨ ndemni yɔd na i. Lɛ yin ɓə na i tɨm yɔd lo.»

Juyb-a na woom taam Lajar humna.

9Juyb dɨbla laa ɓə Jesu wo tɨ Betani gɨna, bi si dɨbla lɛ a saal tuna Jesu sul ngoy lo, lɛ tɨ Lajar ne Jesu wag na ər tɨ bi tɨ ulu daan ləg. 10Gɨna bi tɨ hima ɓina woom kaw so gṵ tɨ Lajar humna. 11kəysul Juyb dɨbla nɨm a lɛ a ko Jesu jo hul.

Jesu na wur tɨ lɔr tɨ Jerusalɛm hul kuna wa̰ay

Mat 21.1-11; Mrk 11.1-11; Luk 19.28-40

12Ɗa̰y tɨ ndidi maani, bi ton hina tɨ pya̰ tɨ Pak kar laa ɓə Jesu hina wo tɨ Jerusalɛm. 13Gɨna bi jani sim gangɨ a wag a tung na Jesu kwi tɨ lɔr ɗəng mu tɨ bayri na ngɔr tɨ a mu ɓə: «Ojana! Dwari tɨ Ndɨla maan! Ka Ndɨla jul mu tɨ wo ne hina na ər ndil sul! Ka Ndɨla jul mu tɨ Israhel na wa̰ay sul!» 14Jesu ten lamkɛr ɓa̰ paa ər ɗɔl ər ti tɨ sul kuna a kya̰ tɨ Ndɨla maktub hul toni ɓə:

15«Lɔr ɗəng tɨ Siho̰, ka ayri kar lo!

Əm ləg, əm wa̰ay wo hina, ər ti tɨ lamkɛ̰r ɓa̰ sul.» #12.15 Zac 9.9

16Jesu na bi tɨ wa̰y edɨ una wa̰y ne ji lo, lɛ gorne Ndɨla jul Jesu tɨ a daan wur taan tɨ ər sul barita a ho̰ni jani ɓə mum ne a kya̰ tɨ maktub toni tuna Jesu sul la, la tɨ mum ne jo a ka gɨ ər la.

17Bi gun ne ti na Jesu gorne ər soon Lajar ka ər wag tɨ bi tɨ ulu daan, a ja ər jaa gɨ bi. 18Tɨ nejo bi hina tung Jesu kwi, kəysul a laa ɓə ər ka wa̰y ne ɓɔrji. 19Parisyḛ-a ja gɨ peer ɓə: «Yḭ ləg, wa̰y ɓudu ne i ɓə tina in teni, bi gun so ul tɨ ər lɔ!»

20Grek-a tapeer kaw a hina tɨ bi daan tɨ Ndɨla yabu na pya̰ tɨ Pak tɨ Jerusalɛm la. 21A si tɨ Pilip, wo tɨ Betsayda maan tɨ lɔr nəgri sul tɨ Galile a ɓiri ər: «Baali, yini taam Jesu ləg.» 22Pilip si ja gɨ A̰dre, la a ji tɨ ndidi gun a si a ja gɨ Jesu. 23Jesu ja gɨ a: «Ndogle, lula sul ne Wo Ɓa̰ ɓə taan tina lɛm teni. 24Kuri, ən ja gɨ i tɨ bayri, jo ya ji ɓudu tɨba tɨ nəgri nɨ ər kom lɔr lo gɨna, ər ji tɨ ɓudu yɔd. lɛ gorne ər kom uy gɨna, ər wag ji dɨbla. 25Wo ne ka ər ndula kum nari tɨ dunya̰ ne hul ɓə ər haam, lɛ wo ne ɓini ər ndula tɨ dunya̰ ne ɓə tɨm jili na kwi tina. 26Wo ne taam gɨ ən cida kar, ka ər so ul tɨ ən lɔ. La un ne ən wo tɨ nin, ər ɓə ən cida kar. Jo wo ka gɨ ən cida, ən Ba kaw ɓə ər hormo̰ kar la.»

27«Ndogle, ən ndoygɨ bra. Kəy jaa jo ən ɓə ja a? Pay ən ɓə ja ɓə: Ən Ba, əm jul ən tɨ pɛw hul na lula sul ne a? M-m, tɨ lula sul ne jaa jo ən hina na. 28Ən Ba, wur taan tɨ əm ndil sul!» Gɨna wo gṵ cḛy tɨ ndɨlasul pi ɓə: «Ən jul ən mu tɨ ər sul teni, la duga ən jul ən mu tɨ ər sul cam.» 29Bi ton lor tɨ un ɗay a ja ɓə: tɨ Ndɨla jo duur. Tapeer ja ɓə: «Tɨ malayka paa jo ja gɨ ər jaa!» 30Gɨna Jesu ja gɨ a: «Tɨ yin jaa jo wo gṵ cḛy tɨ Ndɨla sul lo, lɛ tɨ yḭ jaa. 31Lula sul ne, tɨ lula sul ne Ndɨla wo jaa tungni tɨ bi sul tɨ dunya̰. Ndogle, tɨ lula sul ne waa̰y tɨ dunya̰ ɓə saal tɨ dangay. 32Lɛ yin, gorne a ɓə ən jul na saal tɨ ndal gɨna, bi gun tɨ dunya̰ ɓə hina tɨ ən ndɔ.» 33Ər ja jaa ne ər ɓla na ulu ne wo ər humna. 34Bi duga gɨ ər: «Yini edɨ tɨ maktub tɨ gṵ hul ɓə Mesi ɓə tɨm jili na kwi, lɛ ka waa ta əm ja ɓə: a ɓə wo ɓa̰ ɗɨb tɨ tɨla sul a? Ja jo tɨ Wo Ɓa̰ a?» 35Jesu duga gɨ a: «Un ndeeri ɓə tɨm na lula sul ɓa̰ ndḛni ɗang na i. I taam un ndeeri na lula sul ne ɗang ər wo tɨ i daan nɨ ka un ɗoyri ka i dula tɨ lɔr lo. Wo ne si tɨ un ɗoyri una un ne ər wo saal tɨ nin lo. 36Gorne yḭ wo tɨ un ndeeri hul ɗang, yḭ ko un ndeeri hul. Nejo yḭ ɓə tɨm ɓimi tɨ un ndeeri.» Tɨ ja ne ɓəgri, Jesu jul ndɔ tɨ a daan ər si ər waal ər ndɔ.

Juyb-a na a hul sɨgra

37Mum ne ɓɔrji namkla ne Jesu ka kaw, Juyb-a a ko ər hul lo bad. 38Nejo, jaa ne nebi Esay jaa tɨ kuri. Ər jaa ɓə:

«Baali, jajo ko jaa ne yini ja hul a?

Gɨ ja jo Baali ɓla ər dwari a?»

39Nebi Esay ja jaa ɓə bi ne ko hul lo kəysul:

40«Ndɨla duga nina a ji la,

Ər ka a hul sɨgra nɨ a ka wa̰y una lo la,

A ka hul kula lo la.

Kuna ne gɨna, Ndɨla ɓə a nina lo!»

41Nejo tɨ jaa ne nebi Esay ja gorne ər ləg Jesu na lula sul tɨ taan.

42Tɨ Juyb-a woom daan kaw, bi dɨbla ko Jesu hul, lɛ a oy a ndula ɓla tɨ bayri Parisyḛ-a jaa. Kəysul a ɓə a kun tɨ li tɨ paa tina hul. 43kəysul biɓari na taan par a hul nari ura Ndɨla maan.

Jesu na jaa tungni

44Jesu ja na gṵ sɨgra tɨ ndal: «Wo ne ko ən hul ko ən hul ngoy lo lɛ ər ko wo ne toon ən hul la. 45Wo ne ləg ən, ləg wo ne toon ən la. 46Yin ən hina tɨ dunya̰ kuna un ndeeri, wo ne ko ən hul ɓə tɨm tɨ un ɗoyri lo. 47Jo wo la ən jaa lɛ, ər ka na wa̰y lo gɨna, tɨ yin jo ən ɓə jaa tungni tɨ ər sul lo, kəysul ən hina jaa tungni tɨ bi tɨ dunya̰ sul lo, lɛ ən hina bi tɨ dunya̰ nina. 48Wo tɨ lay ne taam ən jaa lo la, a ɓini ən jaa gɨna, may ten wa̰y tɨ jaa tungni tɨ ər sul na ɗa̰y lɔ tong. Tɨ jaa ne ən ja jo ɓə jaa tungni tɨ ər sul. 49Jaa ton wag tɨ ən mu, tɨ ən maan lo lɛ tɨ ən Ba ne toon ən maan. Ər ɓla gɨ ən jaa ne ən ɓə ja la, wa̰y ne ən ɓə gɨ bi ɓla la. 50La ən una ɓari ɓə, ən Ba na gṵ ne ər naa tɨ tɨm jili na kwi. Nejo jaa gun ne ən ja, tɨ ja ne ən Ba gɨ ən ka ən ja.»

Currently Selected:

Ja̰ 12: nie

Highlight

Copy