Ja̰ 19

1Gɨna Pilat naa gṵ ka a hina na Jesu a ɗɨb na ngar. 2Eli-a hiin jugɔ na umi dəgɨ a wur tɨ Jesu sul tɨ ər siri kar. A wur gɨ ər sər ɗəng ne hiina tɨ ər ndɔ la. 3A kori tɨ ər ndɔ a ja gɨ ər ɓə: «Lapya, Juyb-a na wa̰ay!» La a ɗɨb ər tɛm taal la.

4Pilat wag tɨ bayri cam ər ja gɨ bi: «Yḭ laa ɓari! Ən wo gɨ i na Jesu hina tɨ bayri. Lɛ, yḭ una ɓari ɓə ən ten jaa ɓudu tɨ kay tɨ ɓər ne sul lo.» 5Gɨna, a wag na Jesu tɨ bayri na jugɔ ne a ka na umi tɨ ər sul la na sər ɗəng hiina tɨ ər ndɔ. Pilat ja gɨ a: «Yḭ ləg, ɓər əm jo le!» 6Gorne bi tɨ hima ɓina na woom la bi tɨ un ɓaw ləg Jesu gɨna, a ka ngɔr: «Ɗɨb ər tɨ tɨla tərgɨ sul! Ɗɨb ər tɨ tɨla tərgɨ sul!» Pilat ja gɨ a: «Yḭ may ko ər la i ɗɨb ər tɨ tɨla tərgɨ sul. Yin ən ten jaa ɓa̰ in tɨ ər ndɔ ne lɛm jaa tɨ ulu kay tɨ ər sul lo.» 7Juyb-a duga gɨ ər: «Yini na gṵ hul wo nin. Tuna gṵ hul ne sul gɨna, ər ɓə ulu, kəysul ər ja ɓə yḭr tɨ Ndɨla na ɓa̰.» 8Gorne Pilat laa jaa ne gɨna, ayri ka ər nari cam. 9Ər duga na Jesu tɨ bang hul la ər ɓiri ər: «Yim tɨ wo ne əm o̰ tɨ ɓay a?» Lɛ Jesu duga gɨ ər jaa lo. 10Gɨna Pilat ja gɨ ər: «Əm taam gɨ ən ja jaa lo a? Pay əm una ɓə yin na dwari tɨ əm nɨm tɨ ndal la tɨ əm ɗɨb tɨ tɨla tərgɨ sul la lo a?» 11Jesu duga gɨ ər: «Yim na dwari tɨ ən sul lo, lɛ yḭr ne Ndɨla naa gɨ əm tɨ daa mu le. Tɨ nejo, wo ne nɨm ən tɨ əm daa ka ɓijim ura əm.»

12Un daan ɗay, Pilat taam ul tɨ Jesu nɨm tɨ ndal lɛ Juyb-a ka ngɔr tɨ ndal la a ja: «Jo əm nɨm ɓər ne tɨ ndal a, yim tɨ Sesar na pakɔr lo! Kəysul wo ne ja ɓə yḭr tɨ wa̰ay gɨna, ər tɨ Sesar na paa tɨ pɛni!» 13Gorne Pilat laa jaa ne gɨna, ər naa gṵ ka wag na Jesu tɨ bayri, ər ti tɨ goblə tɨ jaa tungni sul, tɨ un ne a soon ndil ɓə «Jaal tɨ sul kay na kura.» Na Hebrə gṵ ɓə «Gabata.»

14Tɨ ɗa̰y ne bi wo na ndɔ kaaw tɨ Pak kar. Na tili, Pilat ja gɨ Juyb-a: «I ləg i wa̰ay jo le.» 15Lɛ a ɗolɔ tɨ gwar kar, a ja ɓə: «Hun ər! Hun ər! Əm ɗɨb ər tɨ tɨla tərgɨ sul!» Pilat ja gɨ a: «Pay yḭ taam ɓə ən ɗɨb i wa̰ay tɨ tɨla tərgɨ sul a?» Bi tɨ hima ɓina na woom duga gɨ ər: «Sesar ɓudu jo tɨ i wa̰ay.» 16Gɨna Pilat naa gɨ a Jesu ka a ɗɨb ər tɨ tɨla tərgɨ sul. Eli-a ko ər a si na ər.

Eli-a ɗɨb Jesu tɨ tɨla tərgɨ sul

Mat 27.32-44; Mrk 15.21-32; Luk 23.26-43

17Jesu may yəg ər tɨla tɨ tərgɨ wag na tɨ lɔr ɓəgri, ər si tɨ un ne a soon ndil ɓə «Sul kuna.» Na hebrə gṵ «Golgota.» 18Tɨ un ne jo, eli-a ɗɨb Jesu tɨ tɨla tərgɨ sul na bi tɨ ndidi. Wo ɓudu tɨ ər lɨma sul la ɓudu tɨ ər gɨlay sul la, lɛ Jesu wo daan.

19Pilat kya̰ wa̰y tɨ baar hul ɗɨb tɨ Jesu sul tɨ ndal. A kya̰ ɓə: «Jesu wo tɨ Najarɛt, Juyb-a na wa̰ay.» 20Juyb-a dɨbla a edɨ jaa ne a kya̰ tɨ baar hul, kəysul un ne a ɗɨb na Jesu tɨ tɨla tərgɨ sul ti ndog na lɔr ɗəng. A kya̰ jaa ne na hebrə gṵ la, latḛ la, grek gṵ la. 21Bi tɨ hima ɓina na woom ja gɨ Pilat ɓə: «Hiina əm ɓə kya̰ tɨ baar hul ɓə: “Juyb-a na wa̰ay” lo, lɛ əm kya̰ ɓə: “Ɓər ne ja ɓə yḭr tɨ Juyb-a na wa̰ay”.» 22Pilat duga gɨ a ɓə: «Wa̰y ne ən kya̰, ən kya̰ teni.»

23Gorne eli-a ɗɨb Jesu tɨ tɨla tərgɨ sul gun gɨna, a so ər sərgɨ a ɓaan gɨ peer lɔ tɨ nḛni. Eli ɓudu na sər taal ɓudu ɓudu. A so ər sər ɗəng bla yewlu ne a hiin taal tɨ ndal marway tɨ lɔr. 24Eli-a ja gɨ peer: «I ka ər sər ne dḛr lo, lɛ ka i toy na mbara tɨ ləg pay ɓə tɨm ja maan a?»

Nejo jaa ne a kya̰ tɨ maktub hul toni tɨ kuri. A kya̰ ɓə:

«A ɓaan gɨ peer ən sərgɨ

la a toy mbara na ən sər ɗəng»

Nejo tɨ wa̰y ne eli-a ka.

25Ndog tɨ Jesu na tɨla tərgɨ taal, ər na̰ la, ər na̰ na ɓun tɨ ii la, Mari, Klehopas na ii la, Mari tɨ Magdala la, a lor wo nin. 26Gɨna Jesu ləg ər na̰ la, ər wo ne ər ka ər kum nari ti tɨ ər na̰ taal. Gɨna Jesu ja: «Ən na̰, əm ɓa̰ jo le.» 27La ər duga ər ja gɨ wo ne ər ka kum nari ɓə: «Ləg, əm na̰ jo le.» Tɨ un ne, Jesu na wo so Mari tɨ hina na tɨ ər ndɔ tɨ gə̰y.

Jesu na ulu

Mat 27.45-56; Mrk 15.33-42; Luk 23.44-49

28Tɨ mum ne ɓəgri, Jesu una ɓə mum gun ne ər Ba toon ər tɨ kar mu tong gɨna, ər ja: «Ndu yungni ka ən.» Ka jaa gun ne a kya̰ tɨ Ndɨla maktub hul ti jaa kuri#19.28 Psa 69.22. 29Tɨ un ɗay, man ndu sir kula wo tɨ nin. Eli-a wur sipo̰ tɨ tɨla ne a soon ɓə isop mu a kay tɨ Jesu mu. 30Gorne Jesu yḭḭ ndu man ne gɨna, ər ja ɓə: «mum gun tong teni!» Ər wur ər sul tɨ lɔr la ər uy.

Eli paa kura Jesu na taal na pɛni

31Ɗa̰y ne tɨ nja jima Juyb-a na woom taam ɓə Jesu na ulu ka gə̰y tɨ tɨla tərgɨ sul na ɗa̰y tɨ saaw bɛ lo, kəysul ɗa̰y tɨ saaw bɛ tɨ ɗa̰y ɗəng tɨ Juyb-a maan. A ɓiri Pilat ɓə: «Əm naa gɨ a ul mu ka a ha̰wni ər ɗa̰y lɛ ka a jir ər tɨ tɨla tɨ tərgɨ sul!» 32Eli-a hina bi ne wo tɨ tɨla tərgɨ sul ɗəygɨ ha̰wni. A ha̰w wo ne toni mani ɗəygɨ la ne tɨ ndidi mani ɗəygɨ la gɨna, 33gorne a hina Jesu ɗa̰y ha̰wni gɨna, ər uy teni. 34Eli ɓudu tɨ peer daan kura Jesu taal na ər pɛni, la tɨ daamu hima la ndu la yey tɨ ər ndɔ. 35Wo ne wo gɨ i jaa ne ja tɨ wo ne ləg wa̰y ne ka paa na ər ji, la jaa ne ər ja tɨ jaa kuri. Ka yḭ kaw i ko jaa ne hul la. 36Kuri, wa̰y ne ka paa ka jaa ne a kya̰ tɨ Ndɨla maktub hul ɓə: ər uma ɓudu in ɓə ha̰w lo ti kuri 37Ndɨla Jaa ja jak paa cam ɓə: «A ɓə wo ne a kura ər taal ləg.»

A bili Jesu tɨ guwaal hul

Mat 27.57-61; Mrk 15.42-47; Luk 23.50-56

38Josep, wo tɨ Arimate ne ko Krist hul na kuru Juyb na woom jaa, hina, ər ɓiri Pilat ul mu tɨ Jesu na ulu jir tɨ tɨla tərgɨ sul. Pilat naa gɨ ər ul mu. Ər si ər jir Jesu ulu tɨ tɨla tərgɨ sul. 39Nikodem ne si lahul ɓudu tɨ Jesu ndɔ na syɛl, ər hina na wa̰y ne uun ndinimani ne a soon mir la alohe la ne a tang lɛm kilo tɨ tedi. 40A ji tɨ ndidi gun a so Jesu a bini ər na sər tɨ ulu la a bɛ nɨm ne uun ndinimani tɨ ər sul kuna Juyb-a kaa hugṵ tɨ ulu bili. 41Ndog na un ne a ɗɨb na Jesu tɨ tɨla tərgɨ sul, waal paa wo nin, tɨ waal ne hul ngalɨm ɓini wo hul. Tɨ ngalɨm ne ɗang a bili wo tɨ nin lo. 42Tɨ ɗa̰y ne bi wo ndɔ kaaw tɨ pya̰ tɨ Pak tɨ Juyb maan kar, nejo a bili Jesu tɨ ngalɨm ne tɨ ndog tɨ gḛy lɔ.

Currently Selected:

Ja̰ 19: nie

Highlight

Copy