Matyo 28

Jesu na wag tɨ ngalɨm

Mrk 16.1-10; Luk 24.1-12; Ja̰ 20.1-10

1Ɗa̰y tɨ saaw bɛ lɔ tɨ pla, na aad na gaan cɔg, Mari tɨ Magdala a na Mari paa a si tɨ ngalɨm sul ləg. 2Tɨ daamu nəgri sul dig na dwari gɨna Baali na malayka paa o̰ tɨ ndɨlasul jir hina ɓɨrgɨ kura na taal le ər ti tɨ sul. 3Ər yḭbɨn kuna ndɨla na yibɨn la ər ngɔmi buy kar-kar kuna yḭra no̰. 4Ayri ɗəng ka bi tɨ ngalɨm ɓaw, a ndɔ kɔbgɨ la ta a ti kuna bi tɨ ulu no̰ la. 5Lɛ Malayka so jaa ja gɨ aa: «I ka ayri kar lo kəysul ən una ɓə yḭ wo Jesu ne a ɗɨb ər tɨ tɨla tɨ tərgɨ sul taam. 6Ər wo le lo, kəysul ər wag tɨ bi tɨ ulu daan, ər ti jili kuna ər ja toni. I hina, i ləg un ne ər ley tɨ nin. 7I si sandaw i ja gɨ ər bi tɨ wa̰y edɨ ɓə ər wag tɨ bi tɨ ulu daan. Ər wo saal tɨ i kwi toni tɨ Galile, tɨ un ne jo yḭ ɓə ər ləg tɨ nin kuna ər ja gɨ i toni.» 8Aa o̰ saan, a nɨm ngalɨm sul, na ayri ji la na ndula laar ɗəng, a yey, a hina na tomni ne gɨ Jesu na bi tɨ wa̰y edɨ. 9Tɨ daamu, Jesu tung a kwi la ər ja gɨ a: «Ən ka gɨ i lapya!» A kori tɨ ər ndɔ a par ər ɗa̰y la a yabu ər la. 10Gɨna, Jesu ja gɨ a: «I ka a ayri kar lo, i si i ja gɨ ən ɓungɨ ka a si tɨ Galile. Tɨ un ɗay jo a ɓə ən ləg.»

Bi tɨ ngalɨm ɓaw na mani

11Gorne aa wo tɨ ul sul, bi tɨ ngalɨm ɓaw tapeer hina wur tɨ lɔr hul tɨ gɨ bi tɨ hima ɓina ɗəng na woom wa̰y ne ka paa gun lɔ jul. 12Bi tɨ hima ɓina na woom tay peer na bi nii. Gorne a laa paa mu gɨna, a naa gɨ əli gursu dɨbla 13la a ja gɨ a: «Yḭ ja ɓə ɓər ne na bi tɨ wa̰y edɨ hina sila ər ulu na syɛl gorne yini wo ley lom. 14Jo Guberno̰ laa jaa ne kaw, yini una wa̰y ne i ɓə kar tɨ ər bunga, la yḭ ɓə pɛw tina lo la.» 15Əli ko gursu la a ka kuna a peer na a. Nejo, tɨ jaa ne, Juyb-a ka ma̰ni marway kakamle.

Jesu ɓla ər ndɔ gɨ ər bi tɨ wa̰y edɨ

Mrk 16.14-18; Luk 24.36-49; Ja̰ 20.19-23; Tom 1.6-8

16Jesu na bi tɨ wa̰y edɨ dɔkɔmɛ kar kede si tɨ Galile tɨ nan sul ne Jesu ɓla gɨ a toni. 17Gorne a ləg ər gɨna, a yabu ər lɛ bi tapeer tɨ a daan ko hul lo. 18Gɨna Jesu kori tɨ a ndɔ la ər ja ɓə: «Ndɨla naa gɨ ən dwari tɨ mum gun tɨ ndɨlasul la, tɨ lɔr nəgri sul la. 19I si na lwərgɨ gun, i duga bi ən bi tɨ wa̰y edɨ. I ka gɨ a batɛm na Ba ndil la, na Ɓa̰ ndil la, na Lal ɓari ndil la. 20I ɓla gɨ a mum gun ne ən naa gɨ i gṵ tɨ kar. La yin na i na ɗa̰y sul marway tɨ dunya̰ mu tɨ tong.»

Currently Selected:

Matyo 28: nie

Highlight

Copy