VPOM 29
29
Yakop Laban Yhen Jweh
1Yakop nyah gyung cho tsoq loh las buisthuq mau bang nyeis yvmas jweh loh. 2Nyang yoeuh kat lyis hauh pa mha jeisdwang dvkoeuq bos zis nyvng. Hauh jeisdwang mas jeis gyangh gvmshuk las hauh nvm mas yvng somh phung whop joq. Hauh jeisdwang nghop dah luk gas kuh. 3Houmha yvng phung dvnganh dye tsainh toh thang lhyi, yvng yoeuh bang gas jeisdwang nghop toeu phanh las yvng lyis jeis tsain gvmshuk lho lha hauh luk lyis doms toeu nghop toh toh kuot.
4Yakop gas nyamoq lyis, Vmang vnoeuh moq eh, namoq khamha bang nghuot goh lah, ge nyei lyis nyamoq gas, Haran bang nghuot, ge.
5Tsai, nyang gas, Namoq Nahor nyeilo Laban lyis vseq goh lah, ge doms nyei lyis nyamoq gas, Seq, ge.
6Nyang dvyangh nyeis lhyeh, ge lyis nyamoq gas, Yangh nyeis; yoeuh aq, nyah lonyi Rakhel eq yvng komp los nyeis, ge.
7Yakop gas, Yoeuh aq, buis xing shih, gaunyhauq tsainh yoq ma nghuot shih; yvng lyis jeis gvmshuk lho lha loh yoeuh shih geh, ge.
8Nyamoq gas, Yvng phung dvnganh dye zain las, haih luk ma toeu tyamp dvchank ngamoq cha ma yoh kuot: Luk toeu tyamp thang lhyi ngamoq yvng lyis jeis dvyoh gvmshuk, tsain ge.
9Housoeh nyamoq yah jisgoh nyeis shih lyis Rakhel eq nyah uwus dah yvng yoeuh las, yvng tsain komp jweh los. 10Yakop gas nyah yukphoq Laban dah lonyi Rakhel yahge nyah yvng lyis tsain nyvng lyis, e lha, jeis dwang nyhop luk lyis toeu phanh lho lha Laban dah yvng lyis jeis tsain gvmshuk. 11Housoeh Yakop gas Rakhel lhyi bvlot tanh lho lha thwe thuq shoq ngaus. 12Yakop gas Rakhel lhyi, nyang gas Rakhel uwus dah loau, Rebeka dah lo nghuot cho taiq kyoh.
Rakhel nyah uwus lyis loh wuih taiq.
13Laban gas nyah loau Yakop dah loeus xauhgyo lyis, nyang lyis zes das ge wuih e lha, nyang lyis bvlot po tanh lho lha yhen mha shwih loh. Yakop eq nyah cho dvnganh Laban lyis taiq kyoh. 14Housoeh las Laban gas, Nvng gas ngah suih ngah shoh sain nghuot, ge. Housoeh nyah jyank mas lhamhmuh dvkhyvp nyeis.
Yakop Laban lyis Daih
15Laban gas, Nvng ngah loau nghuot; housoeh las nvng ngos lyis mvgon pangh tyamp das lhyeh. Nah uhkung phauh khanyhoq toh das zis ngos lyis taiq aq, ge. 16Laban lonyi aiq yuk yoh; kuh soeu nyings Lea, ngis soeu ka Rakhel nghuot. 17Lea gas nyoqjeih yom dvtsiq nhuk; Rakhel gas gungs khyank eq nyoqnho eq yungh.
18Yakop gas Rakhel lhyi ngwis las Laban lyis, Nah lonyi ngis vyuk Rakhel xiklyis ngos nvng lyis nyhet zvn phuqsoe das, ge.
19Laban eq, ngos gohyuk lyis dyeizo das thoq lyis nvng lyis dyeizo lyis zes gis, ngah jyank mas nyeis goh, ge. 20Yakop gas Rakhel xiklyis nyhet zvn phuqsoe; Nyang Rakhel lhyi ngwis yvmvyah khanyhank nyangh teh ma mus.
21Gvshih shishenh jweh las Yakop gas Laban lyis, Taiq toh shishenh jweh goeus, ngah yhensain nyhiq ngos yoeus lo bah, dyeizo aq, ge. 22Housoeh las Laban gas, houmha bang dvnganhmoq lyis khi lha pwe kuot. 23Nghuot laus eq nyenhthang lhyi nyang nyah lonyi Lea lyis Yakop jyank mas shwih hwank kat dyei; Yakop eq nyah jyank mas wvng yhet. 24Laban gas nyah jyeidwis Zilpa eq Lea lyis phiqkya kya dyei. 25Gvshih nvpyo lyis, yoeuh aq, Lea dvnghuot. Housoeh las Yakop gas Laban lyis, Hai nvng ngos lyis kuot cho cha nghuot? Rakhel xiklyis oen ngos nvng lyis phuqsoe ma nghuot lhyeh? Housoeh dvnghuot zis nvng ngos lyis chamus hwah zo, ge.
26Laban gas, Vbi ma dyeizo shih lyis vnoeuh lyis dyeizo thungh ngamoq mas ma bos. 27Hai pwe yoq dvdaus dyingh shih bas jungh: hauh thang lhyi nvng nyhet zvn doms phuqsoe das xiklyis ngamoq Rakhel lyis eq dyei das, ge toeuh.
28Yakop eq hauh dang yah dvyhangteh dvdaus langh lho lha, Laban gas nyah lonyi Rakhel lyis eq dyeizo. 29Laban gas Rakhel lyis nyah jyeidwis Bila phiqkya kya dyei. 30Yakop gas Rakhel jyank mas eq wvng yhet las, Lea thoq lyis Rakhel lhyi zes ngwis. Housoeh nyhet zvn top phuqsoe shih.
Yakop Lo jens
31Gvshih Lea lyis ma tham jyet yvlyis Yhensain nyvng dyei las nyang lyis lo bos das cho phank dyei. Rakhel ka dius thonh bweh nyeis. 32Lea ung mha loshang bos las yukgis lo khoeu. Nyang lyis Ruben#29.32 Ruben ge zis Hebre pheh nyvng, lo dyei, ge. nyhink: khasoeh ge lyis nyang gas, Ngos nhaiqngis nyeis uhlyis Yhensain yoeuh dyei, housoeh las ngah yhensain phoq ngos lyis ngwis lo das, ge. 33Tsai, nyang ung mha loshang bos las yukgis lo doms khoeu. Nyang lyis Simon#29.33 Simon ge zis Hebre pheh xauhgyo dyei, ge. nyhink: khasoeh ge lyis Lea gas, Ngos lyis ma jyet cho Yhensain xauhgyo dyei las ngos lyis haih loshang eq dyei, ge. 34Tsai, nyang ung mha loshang bos las yukgis lo khoeu. Hauh uhlyis nyang gas, Gvshih ngah yhensain phoq ngos yah zomh lo das; ngos nyah xiklyis yukgis lo somh yuk khoeu dyei goeus, ge lo lyis Lewi#29.34 Lewi ge zis Hebre mas twih toh ge zis nghuot. nyhink. 35Tsai, nyang ung mha loshang chi lha yukgis lo khoeu. Hauh uhlyis nyang gas, Gvshih ngos Yhensain lhyi chungh lo das, ge lo lyis Yuda#29.35 Yuda ge zis Hebre pheh Chungh, ge vjyuk nghuot. nyhink. Hauh thang lhyi lo ma bos nyeis.
Currently Selected:
VPOM 29: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
