VPOM 30
30
1Gvshih Rakhel ka Yakop xiklyis lo ma bos yvmvyah, vbi lyis noh las Yakop lyis, Ngos lyis loshang dyei aq, ma nghuot lyis ngos shei tyamp bah, ge.
2Yakop gas Rakhel lhyi nhaiqyo las, Ngos gas nvng lyis ung mha vshih ma shih nhang dah Mangso gungsthaiq nghuot lhyeh, ge.
3Rakhel ka, Hai ngah jyeidwis nyih Bila nyeis, nyang ngah sainhkhonh mas lo khoeu dyei las, ngos eq nyah gvng mas lo yoh soeu nghuot bas jungh, nyah jyank mas wvng aq, ge. 4Housoeh nyah yhensain nyhiq kuot das xiklyis nyah jyeidwis nyih Bila lyis dyei; Yakop eq nyah jyank mas wvng. 5Housoeh Bila ka nyang ung mha loshang chi lha Yakop xiklyis yukgis lo khoeu dyei. 6Rakhel ka, Mangso ngah cho lhyi thyet dyei goeus; ngos dung dang eq gyo dyei las ngos lyis yukgis lo dyei, ge nyang lyis Dan nyhink. 7Rakhel dah jyeidwis nyih Bila ung mha loshang chi lha Yakop xiklyis yukgis lo aiq vyuk khoeu dyei. 8Housoeh las Rakhel ka, Ngos ngah vbi yah xiqgoh lyis ung goeus ge nyang lyis Napthali#30.8 Napthali ge zis Hebre pheh gas zan, ge zis nghuot. nyhink.
9Lea gas nyang lo bos doms yvlyis soh lyis, nyah jyeidwis nyih Zilpa lyis Yakop dah yhensain nyhiq kuot nhang. 10Lea dah jyeidwis Zilpa ka Yakop lyis yukgis lo khoeu dyei. 11Housoeh las Lea gas, Tsahwa bos ge, nyang lyis Gad nyhink. 12Tsai, Lea dah jyeidwis Zilpa ka Yakop lyis yukgis lo aiq vyuk khoeu dyei. 13Housoeh las Lea gas, Ngos kha iq pyo. Vmesbih jens ngos lyis ngelhoq soeu ge lui das ge nyang lyis Asher#30.13 Asher ge zis Hebre pheh Pyo, ge vjyuk nghuot. nyhink.
14Sunghso yet nyos lyis Ruben gas yos masyah dudai shih nyvng las nyah ungwes Lea jyank mas chi los. Hauh uhlyis Rakhel ka Lea lyis, Nah lo chi los dah dudai shih ngos lyis dvkhamh dyei aq, ge.
15Lea gas, Nvng ngah yhensain phoq yoeus zis ma geh; ngah lo dah dudai shih eq yoeus mes shih nyvng, ge.
Rakhel ka, Nah lo dah dudai shih nyhenshang nyang khvnyens nvng yah yhet bas jungh, ge.
16Nyenhthang lhyi Yakop yos masyah los lyis Lea gas nyang lyis zes das ge thuq loh las, Nvng khvnyens ngos yah yhet das, ngos nvng lyis ngah lo dah dudai shih yah nghoh toh, ge lhom taiq. Nyang hauh nyenh lyis Lea yah yhet.
17Mangso ka Lea dung dang gyo dyei las nyang ung mha loshang chi lha Yakop xiklyis yukgis lo oeng vyuk khoeu dyei. 18Hauh uhlyis Lea gas, Ngos ngah yhensain phoq lyis ngah jyeidwis dyeizo yvmvyah Mangso ngos lyis jyungshuk dyei ge nyang lyis Isakha nyhink. 19Tsai, Lea ung mha loshang chi lha Yakop xiklyis yukgis lo khyuk vyuk khoeu dyei. 20Housoeh las Lea gas, Mangso ngos lyis gis dah jyungshuk dyei goeus; gvshih ngos ngah yhensain phoq lyis yukgis lo khyuk yuk khoeu dyei goeus las nyang ngos lyis nyoqnho ngelang dyei lo das ge nyang lyis Zebulun#30.20 Zebulun Hebre mas Jyungshuk xauh yoeus, ge. nyhink. 21Hauh thang lhyi nyang lonyi khoeu lha nyang lyis Dina nyhink.
22Hauh uhlyis Mangso ka Rakhel lhyi soh dyei zis yah nyang dung dang gyo dyei las nyang lyis loshang bos nhang. 23Nyang ung mha loshang chi lha yukgis loshang khoeu. Housoeh las nyang gas, Ngos xauh dah jwangh cho lhyi Mangso yoeus tyamp dyei goeus ge eq, 24Yhensain ngos lyis yukgis lo dvyuk lung dyei shih bas jungh ge, nyang lyis Yosep nyhink.
Yakop Laban lyis Dyet Khyoq
25Rakhel Yosep khoeu thang lhyi Yakop gas Laban lyis, Ngos ngah mau, ngos nyeis jang pheh loh lo bah, ngos lyis pont kat aq. 26Ngos nvng lyis phuqsoe lha yoh dah ngah yhensain nyhiq jens, loshang jens yoh shwih loh das toeuh dyei aq. Ngos nvng lyis khasoeh phuqsoe zis nvng nyang seq, ge.
27Laban gas, Ngos nah xikkhonh mas nyoqnho yoh nghuot lyis gas, thoeng shih aq; Yhensain ka nah gvng mas ngos lyis shvmanh dyei oen soh. 28Nah uhkung phauh thyet aq, ngos nvng lyis dyei das, ge.
29Tsai, Yakop gas, Ngos nvng lyis khasoeh phuqsoe zis eq, nah gaunyhauq ngah loq mas bos zis eq nvng seq. 30Ngos ma jweh shih lyis nah zisyos nainlo dvnghuot; gvshih svsoh nyo los goeus, ngos loh cho khanghmuh mas Yhensain ka nvng lyis shvmanh dyei goeus. Ngos ngah yhenkhung yoskhyangh xiklyis khanhamp yoh kuot das lah, ge.
31Laban gas, Ngos nvng lyis cha dyei das lah, ge Yakop lyis nyei lyis Yakop gas, Cha eq ma dyei noh; nghuot laus eq heisoeh kuot dyei nghuot lyis gas, nah yvng shvbeq phung lhyi ngos yoeuh shih bah. 32Ngos khvnyhik nyang nah yvng, shvbeq phung gonh suh lai las, yvng mas, kywank ya kywank zis, lhaih ya lhaih zis, yvnglo mas eq noq ya noq zis, shvbeq mas lhaih ya lhaih zis lyis khyen toh das, houka ngah uhkung phauh bweh das. 33Housoeh las thang pheh ngah uhkung phauh cho nvng lyih yoeuh uhlyis, ngos dan dan kuot cho houmha dwvng das: shvbeq mas ma kywank, ma lhaih, yvng mas eq ma noq zis ngah jyank mas bos nghuot lyis gas, houka ngos khauh toh oen nghamh aq, ge.
34Laban eq, Nghuot goeus, nah dang yah dvyhangteh nghuot bas jungh, ge. 35Hauh nyeih lyis Laban gas kywank, lhaih dah beqlus jens lyis eq kywank lhaih dah beqzains jens dvnganh yahge thyoeu ya thyoeu zis, yvng mas eq noq ya noq yvlyis kangh las nyah lo jens lyis tsain dyei. 36Yakop yahge nyah vjo mas somh nyeih cho kyo nhang lha tsain toh. Yakop gas nyet joq khoq Laban dah yvng shvbeq lyis tsain yoeuh nyeis.
37Hauh thang lhyi Yakop gas lipna, Luza, Almon saiq nyaus zains mas dah vko zan yoeus las vthyoeu dvxet, vnyaus dvxet bweh shoq saiq yeis xik lho lha, 38hauh uhlyis yvng yahge shvbeq jens shuk lang, yvng shvbeq jens xikkhonh mas cuk toh. Hauh bang jeis los shuk yvmas shi tsain chank. 39Yvng, shvbeq jens hauh zains jens xik mas, shi chank las vkywank kywank, vkhyoh khyoh, vlhaih lhaih zis tsain suot.
40Yakop gas hauh yvnglo jens lyis eq gohtoeu kangh toh. Nyet yvlyis gas Laban dah yvng phung vkhyoh, vnoq jens shot pheh xoeu nhang toh. Housoeh nyah yvng shvbeq lyis kangh las Laban dah gaunyhauq yah dvgeh ma toh.
41Yombos dah yvng shvbeq jens shi chank lyis hauh saiq loq xik mas chank bas jungh ge, Yakop gas hauh jeis lvng, yvng shvbeq xik mas gyangh cuk toh dyei. 42Yom ma bos dah yvng shvbeq xik mas gas ma cuk dyei. Housoeh las yomnhuk dah yvng shvbeq gas Laban zis tsain nghuot. Yombos zis gas Yakop xiklyis nghuot. 43Housoeh Yakop gas svsoh yoh las yvng shvbeq khom, jyeidwis vbusbih vmesbih, gola-u yahge mauhlyihzoe nyoshoq yoh los.
Currently Selected:
VPOM 30: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
