VPOM 34
34
Dina Khyanktau Xauh
1Gvshih Yakop yhensain nyhiq Lea khoeu kat dah lonyi Dina gas hauh mau mas nyelo changh jens jyank mas kwang loh. 2Hauh uhlyis hauh yvmas dah mungh zau Hiwi vnyau Hamor lo Shekhem ka Dina lyis nyvng lyis loh tsoengh shwih yhet zis yah nyah nyoqnho ngelang lhoeu thyoq dyei. 3Hauh soeu dah nhaiqlom gas Yakop dah lonyi Dina mas wvng joq zis yah hauh lonyi lyis ngwis las nyang lyis dang vlhomuh jis. 4Housoeh las Shekhem ka nyah uwus Hamor lyis, Haih lonyi ngah xiklyis sang dyei aq, ge.
5Yakop gas Shekhem yah nyah lonyi Dina lyis nyoqnho ngelang lhoeu thyoq dyei cho xauhgyo laus eq, nyah loloeu jens gas pa mha gaunyhauq yah dvgeh dvnyeis yvmvyah, nyamoq jweh los shoq samlo nyeis. 6Shekhem uwus Hamor gas Yakop yah jisgoh das ge thuq loh. 7Yakop dah loloeu jens hauh cho xauhgyo las pa mhayah jweh los. Shekhem ka Yakop lonyi yah yhet las Israel vnyau mas ma shop cho, ma gis kuot muh kuot goeus yvmvyah, nyamoq nhaiqkuk zis yah nhaiqlom phot phot tsoeu nyeis.
8Hamor eq nyamoq yah jhent las, nyah lo Shekhem ka nyamoq dah lonyi lyis ngwis nyeis yvmvyah jenh dyeizo geh. 9Namoq yahge ngamoq yukphoq lomoq doeusgoh; namoq dah lonyi ngamoq lyis dyeizo geh, ngamoq dah lonyi eq namoq yoeus geh. 10Namoq eq ngamoq yah dvgeh nyeis las haih mau gas namoq dah mau bweh das; houmha nyeis las soenghi kuot geh, nyeisgis yaplhoq los das, ge.
11Shekhem eq Dina dah uwus yahge mungs yis lyis, Ngos namoq xikkhonh mas nyoqnho dvyoh das lyis gas ngos namoq sang nyhoq dyei das. 12Haih lonyi ngos lyis dvjenh dyeizo geh, lonyi phauh whot, jyungshuk gas khanyhoq nghuot laus eq namoq sang zis yah dvyhangteh ngos dyei das, ge.
13Gvshih Yakop yahge nyah loloeu jens gas nyamoq dah nhamhmuh Dina lyis nyoqnho ngelang lhoeu thyoq dyei yvmvyah Shekhem phvtang Hamor lyis joeui yah mhuih las taiq zis gas, 14Ngamoq dah nhamhmuh lonyi lyis vthyoh ma tyomh bang lyis dyeizo cho ka ngamoq xiklyis xoq chank bos yvmvyah ma yoh dyeizo. 15Namoq eq ngamoq thungh yah dvyhangteh yukgis lo jens dvnganhmoq vthyoh tyomh cho chank lyis kyingh ngamoq dvyoh dyeizo das. 16Housoeh khau yah ngamoq lonyi namoq lyis dyeizo las, namoq lonyi eq ngamoq yoeus das. Housoeh yang dvgeh nyeis las dvnyau teh bweh los das. 17Nghuot laus eq namoq ngamoq taiq dang ma gyo, vthyoh tyomh cho ma chank lyis gas, ngamoq nhamhmuh lonyi lyis shwih loh lo das, ge.
18Hamor yahge vlo Shekhem ka hauh dang lyis tsain gyo ngwis las, 19hauh loloeu lo gas Yakop lonyi lyis ngwis las eq, nyah yhenbang dvnganhmoq thoq mas nyang nyoqnho ngelang zes bos soeu nghuot yvmvyah hauh zis chank kuot das xiklyis ma sheq nyeis lo.
20Housoeh las Hamor yahge nyah lo Shekhem ka nyamoq dah wus khomh mas loh las wus mas bang lyis taiq zis gas, 21Haih bang, yah buisnoms nghuot goeus. Housoeh las nyamoq yah mau mas nyeis las soenghi tsain kuot bas jungh; yoeuh aq, haih mau gas nyamoq nyeis ko dvm; yang nyamoq lonyi yoeus goh, yah lonyi eq nyamoq lyis dyeizo goh. 22Nghuot laus eq nyamoq vthyoh tyomh teh yang mas yukgis lo jens dvnganhmoq vthyoh tyomh lyis kyingh nyamoq yah jyank mas nyeis las dvnyau teh kuot das cho dvgyo das. 23Nyamoq dah yvng shvbeq, zisyos yahge gaunyhauq dvnganh gas yah zis duot das ma nghuot lhyeh? Yang nyamoq ehnyet chank dyei goh, housoeh lyis nyamoq yah jyank mas nyeis das, ge. 24Hamor yahge nyah lo Shekhem taiq dang lyis, nyah wus khomh mas thuq wvng kuot bang dvnganhmoq gyo yoeus dyei las hauh wus mas dah yukgis lo dvnganh gas, vthyoh tsain tyomh.
25Vthyoh tyomh thang lhyi somh vnyeih lyis nyamoq tsain nos nyeis uhlyis Yakop lonyi Dina dah mungs tang Simon yahge Lewi gas sham dvyuk dvchamh chi lha wus mas nyamoq cha yos ma soh nyeis uhlyis, yukgis lo dvnganh lyis wvng sat. 26Hamor yahge nyah lo Shekhem lhyi eq sham yah sat las, Shekhem yhen mhayah Dina lyis she thuq shwih loh. 27Yakop lo jens gas nyamoq nhamhmuh lyis vchoqh vlhauq kuot dyei yvmvyah, sat khoq goeus wus lyis loh doms thyoq yoeus. 28Hauh bang dah yvng shvbeq phung eq, noeu, mauhlyihzoe eq, wus mas kyahsoe eq, danh pa mha kyahsoe eq; 29nyamoq dah zisyos, nyamoq dah loshang jens yahge vmesbih jens lyis nyhik las, yhen mha dah vyhang eq dvnganh thyoq yoeus loh.
30Housoeh las Yakop Simon yahge Lewi lyis taiq zis gas, Nah zomh ngos lyis tsain lhoeu yau goeus; haih mau mas dah Khanan dius yahge Perizi dius jens ngos lyis choqh das khyvlyis nah zomh kuot; yang dius ma tham nyeis yvmas nyamoq ngos lyis chomp sat lo das; hauh uhlyis ngos eq ngah yhenbang eq thank lo das, ge.
31Nyah zomh gas, Ngamoq dah nhamhmuh lyis nghe nyhiq lyis teh yoh kuot das lah, ge.
Currently Selected:
VPOM 34: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
