VPOM 35
35
Mangso, Yakop lyis Shvmanh
1Hauh thang lhyi Mangso Yakop lyis taiq zis gas, Bethel mha lvnyap loh doq nyeis aq; nvng nah vmang Esau jyank masyah phang uhlyis nvng lyis thuq xoeuq dah Mangso xiklyis phon ci dyei aq, ge.#Vpm 28.11-17
2Housoeh las Yakop gas nyah yhenbang yahge nyang yah dvgeh nghuot bang dvnganh lyis nyamoq yoh dah lvbaus mangso lhyi tyamp geh; namoq nyang gungs lyis shangkyei nhang lha dyimis thaiq geh. 3Bethel mha doq loh das zis dyens toq goh ngos shanghsenh buisnyeis lyis ngos lyis gyo yoeus dyei las ngos suh e cho mha ngos yah dvgeh nyeis dah Mangso xiklyis ngos houmha phon ci das, ge. 4Hauh uhlyis nyamoq gas nyamoq nyang tsain yoh dah lvbaus mangso dvnganh yahge nodangh dvnganh yah Yakop lyis tsain kyauh las, Yakop gas hauh yvlyis Shekhem nvm mas yuk dah wons zains khyei mha nyhop tyamp dyei.
5Housoeh nyamoq tsain cheh loh. Vwi vyvm mas dah wugungs bang mas Mangso kyuk cho bos yvmvyah, nyamoq Yakop yahge nyah loloeu jens lyis ma womh chank khat. 6Yakop yahge nyang yah dvgeh loh bang dvnganh Khanan mau, Luza ge dah Bethel mha tsain jweh loh. 7Nyang houmha phon ci lha hauh joqyos lyis El Bethel ge nyhink. Khasoeh ge lyis nyang nyah vmang jyank masyah phang uhlyis, Mangso ka houmha nyang lyis thuq xoeuq. 8Gvshih Rebeka lhyi bau kat soeu Debora shei lha Bethel mha yuk dah wons zains khyei mha nyhop. Housoeh las hauh saiq lyis ngaus dah wons zains ge, Alonbakhut nyhink.
9Yakop Padan Aram masyah tauh los thang lhyi Mangso ka nyang lyis dvlhain doms thuq xoeuq las shvmanh dyei. 10Shvmanh yvmas Mangso ka, Nah nyings Yakop nghuot, thang pheh nah nyings Yakop oen ma lui lo, Israel ge dvlui lo das, ge nyang lyis Israel nyhink.#Vpm 32.28 11Tsai Mangso ka nyang lyis, Ngos Yomzains Mangso nghuot; jebais las nyo los aq; dvnyau ma goh, vnyau nyoshoq nvng masyah dyos das, nvng masyah hwankti eq tsain thuq los das, ge.#Vpm 17.4-8 12Ngos Abraham yahge Isak lyis dyei goeus dah maunyeis nvng yahge nah vnyau vshih lyis eq dyei das, ge. 13Hauh thang lhyi Mangso ka nyang yah jisgoh masyah doq loh. 14Yakop gas Mangso yah xauh jisgoh joqyos mas luk dvlom cuk jyih toh las hauh thoq mas shuk phoh jyungshuk yahge coeu huot kat.#Vpm 28.18-19 15Yakop gas Mangso yah xauh jisgoh las, nyang hauh joqyos lyis Bethel ge nyhink.
Rakhel Shei
16Hauh thang lhyi nyamoq gas Bethel masyah doms cheh loh. Ephrat jweh das zis we shih lyis Rakhel ka khoeu das buisnyeis jweh las nos changh nyeis. 17Housoeh khoeu yau nyeis lyis bos yoeuh khoeu dyei soeu ka, Vgyuk, nvng yukgis lo dvyuk doms yoh goeus, ge. 18Rakhel ka shei loh nyeis lyis hauh loshang lhyi Ben-oni#35.18 Ben-oni ge zis Hebre pheh Ngos kuk lo, ge vjyuk bos. ge nyhink khoq; nghuot laus eq nyah uwus gas Benyamin#35.18 Benyamin ge zis Hebre pheh Kamh bos lo ge zis nghuot. dvlui.
19Housoeh Rakhel shei lha Betlehem ge dah Ephrat pheh loh dah choyvm mas nyhop. 20Yakop eq nyah lop thoq mas luk dvlom cuk jyih toh. Hauh luk gas khvnyhik jweh shoq Rakhel dah lop jyih luk nghuot. 21Hauh thang lhyi Israel gas doms cheh las Elen tyoeuqzvm lai yvmas nyah zvng kuot.
Yakop Lo jens
(1Ss 2.1-2)
22Israel houmha nyeis yoq lyis Ruben nyah uwus nyinhungh Bila yah wvng yhet: hauh cho lhyi Israel xauhgyo.#Vpm 49.4
Yakop dah lo jens dvci aiq yuk nghuot. 23Lea khoeu kat bang Ruben, thang lhyi Simon, Lewi, Yuda, Isakha, Zebulun. 24Rakhel dah loloeu tang Yosep yahge Benyamin. 25Rakhel dah phiqkya Bila lotang ka Dan yahge Napthali. 26Lea dah phiqkya Zilpa lotang ka Gad yahge Asher nghuot. Haih lo jens gas Padan Aram mas khoeu bang nghuot.
Isak Shei
27Yakop gas Abraham yahge Isak nyeis khoq, Mamre mau Hebron ge Kiriat Arba mas nyeis uwus Isak jyank mas jweh loh.#Vpm 13.18 28Isak gas dvxo xetci zvn nyeis khoq. 29Nyang mang shei lha nyah vnyau huom yvmas jweh loh. Nyah loloeu tang Esau yahge Yakop gas nyang lyis ba nyhop.
Currently Selected:
VPOM 35: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
