متّی 15
15
قوم دے وَݙّیرئیں دی رِیت رِواج
(رَلدا مِلدا حوالہ: متّی 7:1-13)
1اِیندے بعد شہر یروشلم کنُوں کُجھ فرِیسی اَتے شرع دے عالم آ کرائیں یِسُوع کنُوں پُچھݨ لڳے، 2”تیݙے شاگِرد کھاݨا کھاوَݨ کنُوں پہلے ہَتھ کیوں نَئیِں دُھویندے جیرھی جو ساݙی قوم دے وَݙّیرئیں دی رِیت ہے۔“ 3یِسُوع جواب ݙِتا، ”تُساں اپݨے رِیت رِواجیں کُوں پورا کریندئیں ہوئیں خُدا دے حُکمیں کُوں کیوں تَروڑ ݙیندو؟ 4کیوں جو خُدا فرمائے،
’تُوں اپݨے پیِوُ دی اَتے اپݨی ماء دی عزت کریں‘ اَتے ’جیرھا کُوئی اپݨے پیِوُ ماء نال وَدھ گَھٹ الاوے او ضرور جان کنُوں مار ݙِتا وَنڄے۔‘
5پَر تُساں لوکیں کُوں سِکھیندو جو جے تُہاݙے ماء، پیِوُ کُوں کہیں شئے دی لوڑ ہووے تاں آکھو،’جیرھا کُجھ میݙا ہا او مَیں خُدا دی نذر کر چھوڑیے،‘ 6اُنہیں کُوں اپݨے پیِوُ دی عزت کرَݨ دی لوڑ کَینی، اِیویں تُساں خُدا دے کلام کُوں اپݨے رِیت رِواجیں نال تَروڑ ݙِتا۔ 7اَے رِیاکارو! خُدا تُہاݙے بارے یسعیاہ کُوں ٻَہُوں پہلے ݙسا ݙِتا ہا،
8’ایہ لوک خُشامدی ہِن جیرھے مُونہہ نال تاں میݙی ٻَہُوں عزت کریندِن پَر اِنہیں دے دِل میݙے کنُوں ٻَہُوں دُور ہِن۔
9اَتے اِنہیں دی عبادت محض ݙِکھاوا ہے کیوں جو ایہ اِنسانیں دے حُکمیں دی تعلیم ݙیندِن۔‘“
پلیت کرَݨ والی ڳالھیں بارے مثال
(رَلدا مِلدا حوالہ: مرقس 7:14-23)
10وَل یِسُوع بِھیڑ کُوں اپݨے کولھ سَݙ کرائیں آکھیا، ”سُݨو اَتے سمجھو۔ 11جیرھی شے تُساں کھندو او اِنسان کُوں پلیت نَئیِں کریندی پَر جیرھی ڳالھ تُساں کریندو اُوہو اِنسان کُوں پلیت کریندی ہے۔“ 12اِیندے بعد شاگِرد اُوندے کولھ آئے اَتے پُچھیا، ”کیا تَیکُوں پتا ہے جو فرِیسی تیݙیاں ڳالھیں سُݨ کرائیں ناراض تھئے وَدِّن؟“ 13اُوں جواب ݙِتا، ”جیرھا ٻُوٹا وی میݙے اَسمانی باپ نَئیِں رَہایا اُونکُوں پاڑ سمیت پَٹ ݙِتا ویسی۔ 14اُنہیں کیتے پریشان نہ تِھیوو او اَندھے رِہنما ہِن جیرھے اَندھئیں کُوں راہ ݙِکھیندِن اَتے جے ہِک اَندھا ݙُوجھے اَندھے کُوں راہ ݙِکھیسی تاں او ݙُوہائیں کَھݙے اِچ ڈھاسِن۔“ 15پطرس اُونکُوں آکھیا،”ایہ مثال ساکُوں سمجھا ݙے۔“ 16یِسُوع اُنہیں کُوں آکھیا، ”اَڄݨ وی تُہاکُوں سمجھاوَݨ دی لوڑ ہے؟ 17کیا تُساں نَئیِں ڄاݨدے جو جیرھا کُجھ مُونہہ کنُوں معدے اِچ ویندے او فُضلہ بݨ کرائیں ضائع تھی ویندے؟ 18پَر جیرھیاں ڳالھیں اِنسان دے مُونہہ کنُوں نِکلدِن اُوہو دِلوں نِکلدِن اَتے اُوہو ای اِنسان کُوں پلیت کریندِن۔ 19کیوں جو دِل کنُوں ای بُریاں سوچاں، حرام کاریاں، قتل، زِناہ، چوریاں، کُوڑیاں گواہیاں، اَتے کُفر نِکلدے۔ 20اِیہو ڳالھیں اِنسانیں کُوں پلیت کریندِن پَر ہَتھ دھووَݨ دے بغیر کھاوَݨ نال اِنسان پلیت نَئیِں تھِیندا۔“
ہِک کنعانی تریمت دا اِیمان
(رَلدا مِلدا حوالہ: مرقس 7:24-30)
21اَتے وَل یِسُوع اُتھوں کنُوں شہر صُور اَتے شہر صَیدا دے علاقیئیں دو روانہ تھِیا۔ 22اَتے ݙیکھو اُتھوں دی رَہݨ والی ہِک کنعانی تریمت اُوندے کولھ اَئی اَتے آکھݨ لڳی، ”سَئیِں! اَے داؤد دے پُتر میݙے اُتے رَحم کر کیوں جو ہِک بَدرُوح میݙی دِھی کُوں ٻَہُوں تنگ کریندی ہے۔“ 23پَر یِسُوع کُوئی جواب نہ ݙِتا تاں اُوندے شاگِردئیں اُوندے کولھ آ کرائیں مِنّت کیتی جو ایں تریمت کُوں ٹور ݙے کیوں جو او ساݙے پِچھُوں ٻَہُوں مِنّتاں فریاداں کریندی اَندی ہے۔ 24اُوں جواب ݙِتا، ”مَیں بنی اِسرائیل دے صرف اُنہیں لوکیں کولھ بھیڄیا ڳئیاں جیرھے بِھیݙیں وانگوں رُل ڳئین۔“ 25پَر اُوں تریمت آ کرائیں یِسُوع کُوں سِجدہ کیتا اَتے آکھیا، ”سَئیِں! میݙی مدد کر۔“ 26اُوں جواب اِچ آکھیا، ”ٻالیں دی روٹی چا کرائیں کُتیئیں کُوں سَٹ ݙیوَݨ ٹھیک کَینی۔“ 27تریمت آکھیا، جِیا سَئیِں! کیوں جو کُتے وی اُنہیں ٹُکڑیاں اِچوں کھندِن جیرھے اُنہیں دے مالکیں دی میز کنُوں ڈھاندِن۔ 28اِیندے بعد یِسُوع جواب اِچ اُونکُوں آکھیا، ”اَے تریمت! تیݙا اِیمان ٻَہُوں پکا ہے جیویں تُوں چاہندی ہِیں تیݙے کیتے اُونویں تھیسی۔“ اَتے اُوں لحظے اِچ اُوندی دِھی کُوں شِفا مِل ڳئی۔
یِسُوع ٻَہُوں سارے لوکیں کُوں شِفا ݙیندِن
29وَل یِسُوع اُتھوں روانہ تھی کرائیں گلِیل دی جھیل دے نیڑے پُڄ ڳیا اَتے پہاڑ تے ٻَہہ تھِیا۔ 30اَتے ٻَہُوں وَݙّی بِھیڑ اُوندے کولھ اَئی، جَیندے نال مَنڈے، اَندھے، فالج تھئے، گُنگے اَتے کئی ٻئی طرحاں دے بیمار ہَن، اَتے اُنہیں کُوں یِسُوع دے پیریں اِچ ٻلہا ݙِتا، اَتے اُوں اُنہیں کُوں شِفا ݙِتی۔ 31بھِیڑ ایہ ݙیکھ کرائیں حیران رہ ڳئی، کیوں جو گُنگے ٻولݨ، فالج دے مریض ٹھیک تھِیوَن، مَنڈے ٹُرݨ اَتے اَندھے ݙیکھݨ پئے ڳئے اَتے بنی اِسرائیل دے خُدا دی حمد کیتی۔
یِسُوع ہزاراں لوکیں کُوں کھاݨا کھویندِن
(رَلدا مِلدا حوالہ: مرقس 8:1-10)
32وَل یِسُوع اپݨے شاگِردئیں کُوں سَݙ تے اُنہیں کُوں آکھیا، ”مَیکُوں اِیں بِھیڑ تے ترس اَندے کیوں جو اِنہیں کُوں میݙے کٹھے رَہندئیں ترائے ݙینہہ تھی ڳئین، اَتے اِنہیں کولھ کھاوَݨ دی کُوئی شئے کَینی پَر مَیں اِنہیں کُوں بُکھ دی حالت اِچ نَئیِں بھیڄݨا چاہندا، اِیویں نہ تِھیوے جو او رَستے اِچ بُکھ کنُوں بےہوش تھی وَنڄن۔“ 33اَتے شاگِردئیں اُوں کنُوں پُچھیا، ”اِیں بَربیابان اِچ اَساں اِیں وَݙّی بھِیڑ کیتے اِتنی روٹیاں کِتھوں گھِن آؤں جو سارے رَڄ وَنڄن؟“ 34یِسُوع اُنہیں کنُوں پُچھیا، ”تُہاݙے کولھ کتنی روٹیاں ہِن؟“ اُنہیں جواب ݙِتا، ساݙے کولھ سَت روٹیاں اَتے کُجھ چھوٹیاں مچھیاں ہِن۔ 35یِسُوع بھِیڑ کُوں زمین اُتے ٻَہوَݨ دا حُکم ݙِتا۔ 36اَتے اُوں، اُنہیں سَت روٹیں اَتے مچھیئیں کیتے شُکرانے دی دُعا کیتی اَتے بھَن بھَن کرائیں شاگِردئیں کُوں ݙِیندا ڳیا اَتے شاگِرد بھِیڑ کُوں ݙیندے ڳئے۔ 37جیرھے ویلے سارے کھا کرائیں رَڄ ڳئے تاں وَل شاگِردئیں روٹی دے بچیے ہوئے ٹُکڑئیں دیاں سَت ٹوکریاں بھر کرائیں چاتیاں۔ 38اَتے کھاوَݨ آلے مَردیں دی تعداد چار ہزار ہَئی اَتے تریمتیں اَتے ٻال اِیں ڳِݨتری کنُوں علاوہ ہَن۔ 39وَل یِسُوع بھِیڑ کُوں بھیڄ کرائیں ٻیڑی اِچ چڑھ ٻیٹھا اَتے مگدن دی سرحدیں دو لڳا ڳیا۔
Currently Selected:
متّی 15: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
