متّی 17
17
یِسُوع دی صُورت دا وَٹیڄ وَنڄن
(رَلدا مِلدا حوالہ: مرقس 9:2-13؛ لُوقا 9:28-36)
1اَتے یِسُوع چِھی ݙینہہ بعد پطرس، یعقُوب اَتے اُوندے بِھرا یُوحنّا کُوں اپݨے نال ہِک اُچے پہاڑ اُتے اَنجھ گھِن ڳیا۔ 2اَتے اُنہیں دے ݙیہدئیں ݙیہدئیں یِسُوع دی صُورت وَٹیڄ ڳئی اَتے اُوندا چہرہ سِجھ وانگوں چمکݨ لڳ پِیا اَتے اُوندی پُشاک نُور وانگوں چِٹی تھی ڳئی۔ 3اَتے اُنہیں شاگِردئیں موسیٰ اَتے ایلیاہ کُوں یِسُوع نال ڳالھیں کریندئیں ݙِٹھا۔ 4پطرس، یِسُوع کُوں آکھیا، ”اَے خُداوند! ایہ ٻَہُوں چَنڳاں ہے جو اَساں اِتھاں ہَیں اَتے جے تیݙی مرضی ہووے تاں اَساں اِتھاں ترائے تنبو لاؤں، ہِک تیݙے کیتے، ہِک موسیٰ کیتے اَتے ہِک ایلیاہ کیتے۔“ 5اَڄݨ او ایہ اَہدا ای پِیا ہا تاں ہِک چمکدار بَدّل آ کرائیں اُنہیں اُتے چھاں کر ݙِتی اَتے اُوں بَدّل اِچوں اَواز اَئی، ”ایہ میݙا پیارا پُتر ہے جَیں کنُوں مَیں خُش ہاں اِیندی تعلیم سُݨو۔“ 6ایہ اَواز سُݨ کرائیں او شاگِرد ݙَر ڳئے اَتے مُوندھے ڈھہہ پئے۔ 7اَتے یِسُوع اُنہیں دے کولھ آیا اَتے اُنہیں کُوں ہَتھ لا کرائیں آکھیا، ”اُٹھو اَتے ݙَرو نہ۔“ 8جݙّاں اُنہیں سِر چا کرائیں ݙِٹھا تاں یِسُوع دے سِوا ٻِیا کُوئی نہ ہا۔
9اَتے پہاڑ کنُوں لَہندئیں ہوئیں یِسُوع اُنہیں کُوں حُکم ݙِتا، ”جیرھا کُجھ تُساں ݙِٹھے اُوندے بارے او تَئیِں کہیں کُوں نہ ݙسائے جݙّاں تَئیِں اِبنِآدم یعنی مَیں مَر کرائیں زندہ نہ تھی وَنڄاں۔“ 10شاگِردئیں اُوں کنُوں پُچھیا، ”وَل شرع دے عالم ایہ کیوں اَہدِن جو پہلے اِیلیّاہ اَؤسی؟“ 11یِسُوع جواب ݙِتا، ”ہا ایلیاہ تاں اَؤسی، اَتے مسِیح کیتے رَستے سِدھے کریسی۔ 12پَر مَیں تُہاکُوں اَہداں جو ایلیاہ تاں آ ڳئے پَر لوکیں اُونکُوں نَئیِں سُنڄاتا جو او کون ہے اَتے لوکیں اُوندے نال جیویں دِل کیتا اُونویں سلُوک کیتا، لوک اِبنِآدم یعنی مَیکُوں وی اِیویں ای ݙُکھ ݙیسِن۔“ 13اِیندے بعد شاگِردئیں کُوں سمجھ آ ڳئی جو او یُوحنّا بپتِسمہ ݙِیوَݨ آلے دے بارے اَہدا پئے۔
یِسُوع ہِک چھُوہَر اِچوں بَدرُوح کڈھیندِن
(رَلدا مِلدا حوالہ: مرقس 9:14-29؛ لُوقا 9:37-43)
14اَتے جݙّاں او بھِیڑ کولھ پُڄے تاں ہِک بندہ آ کرائیں یِسُوع دے پیریں اِچ ڈھہہ پِیا، 15اَتے آکھیا، ”سَئیِں! میݙے پُتر تے رَحم کرو کیوں جو اُونکُوں مِرگی دے دَورے پوندِن اِیں کیتے ٻَہُوں تکلیف اِچ ہے۔ اِیں وجہ کنُوں کئی واری او بھاہ اَتے پاݨی اِچ ڈھہہ پئے۔ 16اَتے مَیں اُونکُوں، تُہاݙے شاگِردئیں کولھ گھِن آیا ہامی پَر او شِفا نہ ݙے سڳے۔“ 17یِسُوع جواب ݙِتا، ”اَے گمراہ اَتے وِگڑی پیڑھی! مَیں کݙاں تَئیِں تُہاݙے نال رَہساں اَتے کݙاں تَئیِں تُہاکُوں برداشت کریساں؟ اُوں چُھوہَر کُوں اِتھاں میݙے کولھ گھِن آؤ۔“ 18اَتے یِسُوع بَدرُوح کُوں دَڑکا ݙِتا اَتے او اُوندے اِچوں نِکل ڳئی اَتے اُوں چُھوہَر کُوں اُوں لحظے شِفا مِل ڳئی۔ 19اِیندے بعد شاگِردئیں یِسُوع کنُوں کلہیپے اِچ پُچھیا، ”اَساں بَدرُوح کُوں کیوں نہ کڈھ سڳے؟“ 20یِسُوع اُنہیں کُوں جواب ݙِتا، ”تُہاݙی بےیقینی ای اِیندی اصل وجہ ہے۔ مَیں تُہاکُوں سچّ اَہداں جے تُہاݙے اِچ سَٹھڑی دے بیج جتنا وی اِیمان ہووے تاں تُساں اِیں پہاڑ کُوں آکھ سڳسو جو اِتھوں سُرک وَنڄ تاں او سُرک ویسی اَتے تُہاݙے کیتے سارا کُجھ ممکن تھی ویسی۔“ 21#17:21 پَر تُساں دُعا کرَݨ اَتے روزہ رکھݨ تُوں سِوا اینجھیاں بَدرُوحاں کُوں نَئیِں کڈھ سڳدے۔
یِسُوع ݙُوجھی واری اپݨی موت اَتے زندہ تھِیوَن دا بیان کریندِن
(رَلدا مِلدا حوالہ: مرقس 9:30-32؛ لُوقا 9:43-45)
22جݙّاں سارے شاگِرد صوبہ گلِیل اِچ کٹھے تھئے تاں یِسُوع اُنہیں کُوں آکھیا، ”اِبنِآدم یعنی مَیکُوں لوکیں دے حوالے کیتا ویسی، 23او مَیکُوں قتل کریسِن پَر تریجھے ݙینہہ مَیں زندہ تھی ویساں۔“
ایہ سُݨ کرائیں او ٻَہُوں ݙُکھی تھئے۔
ہَیکل دے ٹیکس بارے یِسُوع دی تعلیم
24جݙّاں یِسُوع اَتے اُوندے خاص شاگِرد شہر کفرنحوم اِچ آئے تاں ہَیکل دا ٹیکس گھِنݨ آلئیں پطرس دے کولھ آ کرائیں پُچھیا، ”کیا تُہاݙا اُستاد ہَیکل دا ٹیکس#17:24 ہَیکل دا ٹیکس ہَیکل دا نظام چلاوَݨ کیتے چاندی دے ݙُو سِکّے ہر اِسرائیلی بندے کُوں ݙیوَݨ لازم ہا۔ اِنہیں ݙُو سِکیں کُوں یونانی ٻولی اِچ ݙُو دینار آکھیا ڳئے جیرھے نیم مثقال وی اکھویندے ہَن۔ جیرھے چاندی دے ݙُو سِکّے ہِن ݙیندے؟“ 25پطرس جواب ݙِتا، ”ہا، او ݙیندے۔“ اَتے جݙّاں او گھر آیا تاں یِسُوع اُوندے ٻولݨ کنُوں پہلے پُچھݨ لڳا، ”اَے شمعُون! تُوں کیا سمجھدیں جو زمین دے بادشاہ کئیں کنُوں مصُول یا ٹیکس گھِندِن؟ پُتریں یعنی اپݨے لوکیں کنُوں یا پردیسیئیں کنُوں؟“ 26پطرس جواب ݙِتا، ”پردیسیئیں کنُوں،“ ایہ سُݨ کرائیں یِسُوع آکھیا، ”وَل پُتر یعنی اپݨے لوک تاں چُھٹل تھئے، 27پَر اَساں اُنہیں کُوں ناراض نَئیِں کرَݨ چاہندے۔ اِیں کیتے جھیل دو وَنڄ اَتے کُنڈی سَٹ ݙیویں اَتے جیرھی مچھی پہلے ہَتھ آوے اُونکُوں پکڑ تے ݙیکھیں اُوندے مُونہہ اِچ چاندی دا سِکّہ ہوسی او کڈھ کرائیں میݙے اَتے اپݨے وَلّوں مصُول گھِنݨ آلئیں کُوں ݙے ݙیویں۔“
Currently Selected:
متّی 17: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
