1 AkwaKorinte 1
1
Kuvumenena
1Yame no Paulu, oyu na ethsiwa keshima ya Nyambi ci nikare kanganda ka Krisitu Yesu, noku kwa mukwakutawa muenthzetu Sositene.
2Edi diñoro naa di ñorera kereke thza Nyambi ethzi thzi di mu Korinte, awa na kenithsiwa mu mwenthzi aye Krisitu Yesu no kwithsiwa ci ekare anu owakenu, mofoci kengeyo nowa wahe kokuhe awa ethsa pa dithzina dya Fumu wetu Yesu Krisitu, Fumu wo natwe kengeyo: 3Nyambi Tata wetu na Fumu Yesu Krisitu a mi pe thsihemo no thsiyaro.
Okanderero
4Naa kandereranga kwa Nyambi wange thsikati thsothsihe mukaci kenu, mukaci ko thsihemo thsenthzi ethsi na a mi pa mwa Krisitu Yesu. 5Inene mwa Krisitu, Nyambi naa mi fumithsa mwinu yoingi yoiwa, mu maywi oahe nodimukero ouhe. 6Nyambi na a tanarithsa mu kaci kenu ombangi wetu keyi ya Krisitu. 7Mweyo, ka mu pirire thsimweya kwipa yo Mupepo uno mu taterera nene Fumu wetu Yesu Krisitu ou a ku hokoriwa. 8Yodiyo wa ku mi tanarithsa shime ku ka kuma ku mamaneneno, ci mwa ku waniwa no kapongonyi mu diyuwa edi a ku keya Fumu wetu Yesu Krisitu. 9Nyambi wa ku rurama, aye oyu naa mithsera mu thsiciwano na Mwane Yesu Krisitu Fumu wetu.
Kucitepatepa mu kereke
10Andengenu, naa mi romba mu dithzina dya Fumu wetu Yesu Krisitu ci mu ciyuve mweyi mu amba yoihe, karo mwa citepatepa mu kaci kenu. Unone mu ciyuve mu maano no mwianekera yenu. 11Andengenu, amweya mu mwanda wa Kiloe na ni tongwera ci mu di no makanyi mu kaci kenu. 12Eyi ni amba po eyi: munu no munu ku kwenu aa amba ci: “Ame po naa shupwera Paulu.” Yumweya ci: “Ame po naa shupwera Apolosi.” Yumweya ci: “Ame po naa shupwera Kefasi#1.12 Karo aethsiwa ci Peturu..” Yumweya karo ci: “Ame po naa shupwera Krisitu.”
13Ene mwaa anekera ci Krisitu po wa ku citepatepa nji? Ene Paulu ne shime ambiwire pa mbinda mukaci kenu nji? Ene ou mwa korovethziwire ne shime mwa korovethziwire mu dithzina dya Paulu nji? 14Naa kanderera kwa Nyambi ci ka na ni korovethza ku kwenu shaanga munu yofoci shime Kirisipo na Gayusi. 15Mweyo, kwithsa munu shaanga yofoci ku kwenu oyu nga amba ci shime a korovethziwire mu dithzina dyange. 16Ii, shime na korovethzire no mwanda wa Setefanasi. Ku tunda apo ka ni dimukire karo ci shime naa korovethza munu yumweya. 17Inene Krisitu ka a ni tumine ku na korovethza, unone ku na honga Muthzimbu Ouwa, ku na u honga kadi konyanyami mu kuamba, ku yapithsa ci mbinda thza Krisitu thza pwera okoro.
Krisitu po okoro nonyanyami wa Nyambi
18Inene yo muthzimbu o mbinda po otomba kowa cithzira, unone ku kwetu atwe tu yoyithsiwa po okoro wa Nyambi. 19Inene ku na ñoriwa ci:
“Kenge na ku nongithsa onyanyami wanyanyami,
karo kenge na ku kana mathsaano akwa mathsaano.”
20Kupi oku a di munu o munyanyami? Kupi oku a di murongithsi o murao? Kupi oku a di mukwakukanyeka o kano kaye? Nyambi na a monithsa onyanyami o muno mu kaye ci otomba. 21Inene konyanyami wenthzi Nyambi, kaye ka na ka mu dimuka konyanyami wako. Unone na i roerithsa Nyambi ku yoyithsa awa na tawa ku kwenthzi keyi tu honga “yotomba”. 22Majuda aa fota thsimonithso, Magerike awo aa fota onyanyami. 23Unone atwe twaa honga Krisitu oyu naa ambiwa pa mbinda, yaa kuñukithsa Majuda, karo yotomba kwAnukenge.
24Unone kowa naethsa Nyambi, Majuda no Magerike kengeyo, Krisitu po okoro wa Nyambi nonyanyami wa Nyambi. 25Inene otomba wa Nyambi po unyanyami kupita onyanyami wanu, karo kufaratera kwa Nyambi kukoro kupita okoro wanu.
26Mweyo, andengenu, mu vuruke edi mwekarire ou mwethsiwire. Ongi wenu ka mwekarire owanyanyami ko mianekerero thzanu, nji kwikara owakoro, nji ku tunderera mu myanda thzothzikuru mu thsivaka. 27Unone Nyambi naa hangura enu yotomba yo muno mu kaye ku enithsa owanyanyami, Nyambi karo naa hangura enu yo ku faratera yo muno mu kaye ku enithsa owakoro. 28Nyambi naa hangura enu eyi na i kendiwa kwanu o muno mu kaye, enu eyi i na moniwa ci ka i kwathsire thsimweya. Nyambi naa i cikwathsithsa ku nongithsa eyi a mona anu ci ikuru mu thsivaka. 29Mweyo, kwithsa munu shaanga yofoci oyu wa ku cinuneka pa meho a Nyambi.
30Inene Nyambi naa mi waneka pofoci na Krisitu Yesu, karo Nyambi naa kwama ci Krisitu ekare onyanyami wetu, owawa wetu, kukenithsiwa kwetu no kupaturiwa kwetu. 31Mweyo, eci edi i na ñoriwa ci: “Yomuhe o ku cinuneka a cinuneke mwa Fumu.”
Currently Selected:
1 AkwaKorinte 1: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company