Maheveru 9
9
Kurombera ko pano pashi noku ko mu wiru
1Thsiyuvano thso kutanga thsekarire neraa yo ku rombera mofoci kengeyo no Ndau thzo Shokenu Nene thzo pano pashi thzo ku romberera ethzi a umbire anu. 2A umbire tende ethzi thzekarire no tupingwethzi twidi. Mu kapingwethzi ko kutanga omu mwekarire thsimeko thso kambarambara, tafure no makende aa a tupwerire Nyambi, kethsiwire Ndau thzo Shokenu. 3Ku thsambwadiya thzo dimbatu dyo muthsidi kwekarire kapingwethzi ko muthsidi aka kethsiwire Ndau thzo Shokenu Nene. 4Omo kwekarire katara ko gauda apa a tumekerangire insense, no pongithsi thzo thsiyuvano ethzi thza thsikiwire kokuhe ko gauda. Mu pongithsi mwekarire kafuma ko gauda omu mwekarire maana, no mutaa wa Aroni ou wa shoshomenine mamuna, no mathzo o mawe apa pa ñoriwire maywi o thsiyuvano. 5Peuru thzo pongithsi kwekarire ekupuro yo makeruvimi#9.5 Makeruvimi po nedi yumbiwa yo mu wiru eyi na i kwamenanga Nyambi eci tungeru twenthzi edi na tu mu kwamenanga. o kutethzima kwa Nyambi, aa vapurire mando ao ku thsika ndau thzotetero o thsivi. Uno honi pano po ka tu twethsa ku tongonona eyi enu ko kuyara.
6Enu yoihe ou ya pwire ku roithsiwa, mapurisita engenangire mu kapingwethzi ko kutanga diyuwa no diyuwa ku ka tenda ekwama yo. 7Unone mupurisita shokuru yodiyo pohuma wengenangire mu kapingwethzi ko muthsidi, muendo ofoci mu mwaka. Wengenangiremo nonyinga weyama ou a ka tupurangire mukaci kevi yenthzi nevi yanu eyi a tendire ko kukana ku dimuka. 8Mweyo, Mupepo Oukenu wa monithsire ci dikuñwa dyo ku thza mu Ndau thzo Shokenu Nene di shime ku hokoriwa, pakuninga ci tende thzo kutanga shimbi thzekarerako.
9Ethsi po thsodiyo thsimoni-thso thso thsino thsikati, ethsi thsi monithsa ci nupu neyambero yemuna eyi i tupuriwa tumba i twethsa kwononokithsa mumoneno wa mukwakurombera. 10Eyo shime ya piterire pohuma kwidya, enwa nedika yo mishovoshovo yo ku cikenithsa. Eyi po eraa pohuma yo ku kenithsa erama, eyi ya pakiwire shime ku kuma mu thsikati thso ku pirura enu.
Onyinga wa Krisitu
11Uno honi Krisitu na a keya, aye Mupurisita Shokuru wenu yoiwa eyi i diko pano. Naengena mu tende thzoshokuru thzo kwononoka nene thzo mu wiru. Ka thza kwamiwire ko moko anu, ku monithsa ci ka thzi di kuno ku kaye aka kombiwire. 12Krisitu wengenine mu Ndau thzo Shokenu Nene muendo ofoci karo ro mahurerero. Kaengeninemo konyinga wekungwe nji o mapohoana, unone konyinga wenthzi shemwa, ku tu wanena kupaturiwa ko diyere.
13Onyinga o membe no mapoho, no mututwi o mandema ya shamawerangiwire anu o ku thsirekiwa ci a kenithsiwe erama yo. 14Kwa ngepi honi kukenithsiwa oku wa ku kenithsa onyinga wa Krisitu mimoneno thzetu ci tu kwamene Nyambi oyu yoya, inene Krisitu wa citupurire yothsinda kwa Nyambi ko Mupepo Oukenu o diyere kwikara thsiyambero thsevi yetu thso kupira kapongonyi.
15Mweyo, Krisitu yodiyo mukwakwimanena thsiyuvano thsothsipe ci awa ethsiwa kwa Nyambi a tambure thsiyauthzi thso diyere ethsi a kumbwethzire Nyambi. Inene Yesu wa fire ci a pature anu kumango ou a tendire mu thsiyuvano thso kutanga.
16Keyi yo ndaano thzo munu, kwaa roera kwikara nombangi o ku monithsa ci thsinda wa fa. 17Ndaano thzaa kwamanga pohuma thsinda thsathzo o ku na fu, inene tumba thzi kwama thsinda thsathzo o ku yoya.
18Eyo ngeyi ya retithsire ci no thsiyuvano thso kutanga ka thsa shishiwire ko kupira onyinga. 19Uno honi Mushe ou a manine ku amba eraerera yoihe yo murao kwanu wahe, wa shimbire onyinga o mapohoana nekungwe, wa u vandakanine no meyu no ku u shamawera pa vuka thzo murao nanu wahe ko ku cikwathsithsa mapukumuna o hisopa nohunga oukihu. 20Wa ambire ci: “Ou po onyinga o thsiyuvano ethsi a mi raererire Nyambi ci mu thsi hengeke.” 21Mofoci kengeyo, karo wa shamawerire onyinga pa tende netenga yoihe eyi ya cikwathsithsiwangire mwirombero. 22Karo kokuthza ko murao, ongi wenu yoihe yaa roera ku kenithsiwa konyinga, ko kupira ku via onyinga evi tumba i teteriwa.
Thsiyambero thsa Krisitu thsaa tundithsa evi
23Mweyo, kwa roerire ci enu yo mu thsikupuro thsenu yo ku wiru i kenithsiwe keyambero yo kenge. Unone enu yo mu wiru ayopo yaa roera eyambero yoiwa nene kupita eyi.
24Inene Krisitu ka engenine mu Ndau thzo Shokenu Nene ethzi thza kwamiwire ko moko anu, ethzi thza tendiwire mu thsikupuro thso ndau thzo shemwa thzo mu wiru, unone wa thzire mu wiru shemwa omu a na ka twimanena pa meho a Nyambi. 25Ka engenine mu wiru ci a hukahukere rorungi ku citupura yothsinda, eci edi a nengenanga mupurisita shokuru mu Ndau thzo Shokenu Nene mwaka no mwaka nonyinga ou u ninga ci kadi wenthzi. 26Nga kengeyo po, Krisitu shime ou nga na a nyanda rorungi ku tunda ku kumbiwa ko kaye. Uno honi naa monahara rofoci karo ro mahurerero ku mamaneneno ekati, ku na tundithsa evi ko ku citenda thsiyambero aye thsinda.
27Eci dyodi a na roera munu yomuhe ku fa muendo ofoci, munyima no ku mu ratura Nyambi, 28mofoci, Krisitu naye wa tendiwire thsiyambero muendo ofoci ku tundithsa evi yanu owangi. Kenge a ku monahara ro muthsidi, kadi ku na tundithsa thsivi, unone ku na yoyithsa awa a na mu taterera.
Currently Selected:
Maheveru 9: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company