Mberaand 19
19
Yaq fee Sodoom fa Gomoor
1Malaaka ƭik a mbadiida Sodoom no kirand ngoor, a soƥ Lot a moof no ndokand ne Sodoom. Ye Lot a ga’na a den, a inooxa, a xetook a den, soo a gung a lanq. 2Cinj kaaga, a laya yee:
«Yaal we mi, ngela ngaryo no mbind no tag nuun, mbe maaga. Feek tige xe yengaa, xan nu mbaag o ƥoganel a caf, mbondoox boo yaa a kid a nqoolna, soo nu sog o suuraa.»
A ndoonaan ee:
«Ha’aa! No mbelaaƈ onqe i mbe’kaa.»
3Kaa koy, Lot a saya boo neen a njaɓatu o ndet no mbind um. A fi’ana a den a cu’ax, a juɗan a den puuru canja’e, soo da ñaam.
4Ye da maadna o ngirnaa, goor we na teeru fee ngenna Sodoom fop, maak fo xa caaƈ, a ngara, a mbid mbind ne Lot o kurul-keƥ. Fop maaga a nqetiid’u. 5A nqoya a Lot, a layin ee:
«Taa goor we mbe’iidna no mbind of? Sutiidi a den, boo i mbi a den nen rew.»#19:5 nen rew ɗeeti itam Rom 1:24-27. #Haa 19:22-24
6Lot a sutooxa na carind alaa, a weg a carind ale no mbind ne. 7A laya a den ee:
«Fog es, ba nu mbi sabab! 8Nu nga’a, jegaam xa ƥiy xa tew xa ƭaq axaa andafuleerna adna. Waagaam o sutaniid a nuun a den, nu mbi a den kuu felna a nuun. Kaa rek, goor wene andoona yee genar es a ndefu, ba nu mbi a den dara.»
9A laya a Lot ee:
«Goƭi mene waay! Kene refu ref ke na layeel. Woxey refa meen o gataakoon boo ƴut, soo bug o ref o kaahate! Cungi rek, yaam ke i ndoonkang na moƴkaa o faaxaƭar.»
A ndiña a Lot fa doole, soo a ndigan begax ne na carind ale ndax da ndaƈtin. 10Goor ɗik waa a kaara a Lot, a qicin ta jaaɓiid a den kam mbind ne, soo da mbeg begax ne. 11Cinj kaaga, a mbuulanda we ndiirooxoogna ndokiid fop, maak fo xa caaƈ, boo o leng na den andatee me a carind ale a farna.#2Md 6:18
12Goor waa a laya a Lot ee:
«O pog o lakas oxum jego kam teeru fee? Ta ref o seemir mbaat o ƥiy o ndew mbaat o ƥiy o ngoor fo xuu jegoona na teeru fee, suti a den o mbiñ onqene, 13yaam xan i yaq teeru fene. Paaxeer ke no we ngenna teen a magna lool mbaambir no Yaal oxe. Ten taxu o Yaal oxe a luliid a in, ndax i yaqin pic.»
14Lot a reta, a lay fo seemir um we ñaaƴoogna xa ƥeem ee:
«Inooxyo, sutoox o mbiñ onqene, yaam o Yaal oxe xan a yaq teeru fene.»
Ke ta layoogna koy, kaa dam’u seemir we ten calat.
15Yaa mbuyukuun naa a xoolaa, malaaka ke a ndefa no mbam’aa a Lot ee:
«Inooxi xot o teef fo xa ƥiy xa tew xa ƭaq axe wo ndefna meeke, yaam ndik o saŋkoox no njofaƭar ne na teeru fene.»
16Ne ta niidandooxoogna, goor ɗik waaga a ndamaan no ɓay, a ndeƈndeƈnin, ten fo o teem fo xa ƥiy xa tew xa ƭaq axe ten, a sut a den teeru faa, yaam o Yaal oxe kaa yirim’un.#2Piy 2:7
17Cinj ye goor ɗik we a sutna a den, o leng na den a laya yee:
«Ƴufti o ñis of too ba o wiƈaqiloox. Ba o geenoox na xa saawit axene fop. Sagi farna fo xa coong axaa yaam ndik o saŋkoox.»
18Lot a laya a den ee:
«Koo o Yaal oxe, a hupa jeg! 19Feek mi fee o tag of daawaam yirmande of, o lalaam o paaxel of boo mucil o ñis es, waagiim o ƴuf boo daawik xa coong axaa too taamaala fee daawiraam, too yaaga xam xon. 20Ga’i teeru fene a mata lool, ndax um jaɓnook maaga, too jaakee dara. Ey, um waag’angaa o ƴuf boo daɗik maaga.»
21Maaga, a doonaan ee:
«Yaaga boog, xam ci’ahinong keene, too taamaala fee pirkee teeru fee o ne’aa. 22Kaa koy, ñofi jaɓnook maaga, yaam fi’kiim dara a refangee kaa o fad.»
Ten taxu teeru faaga a ne’el Sowaar#19:22 Sowaar kaa tekit no ɗelem hebre «caakeer»..
23Ye njeeƈ ne a wataa, yaaga Lot a rokaa kam Sowaar. 24Maaga, o Yaal oxe a deɓiida took Sodoom fa Gomoor a teƥ nqeen kaa fiɗel a saasinna, ta hatiid na asamaan.#Mace 10:15; 11:23-24; Lik 10:12; 17:29; 2Piy 2:6; Yud 7 25A ɓisiida o njakad onqe took teeru keene, no saawit olaa fop, took no we ngenna no teeru keene fop fo took duufe le no lanq kaaga. 26O tew oxe Lot a wiƈaqilooxa, soo a dalfoox o suptoox juum fo jem.#Lik 17:32
27Abraham a inooxa ƥiiɓ teel ndax ta ret no mbiñ onqe ta geenoor’ina mbaambir no Yaal oxe. 28A deɓa a kid um farna fa Sodoom fa Gomoor fo no jegel ole na xa saawit axe fop, soo a ga fo suun olaa nandna nen fo suun ndoxan a yoɗoortaa no lanq ke.
29Ye Roog a saŋkaa teeru ke no jegel olaaga Lot a gen’ina, a wetandooxa a Abraham, soo a ci a Lot ta daɗ yaq faaga.
Lot fo xa ƥiy xa tew axe ten
30Lot fo xa ƥiy xa tew axe ten a inoora Sowaar, soo a ngenik na xa coong axaa, yaam kaa saɗaroogu o yoq Sowaar. Lot a genka kam luf, ten fo xa ƥeem. 31Maaga, taaw fee a laya o ndeɓ um ee:
«Me ta refna de faap in a nogoya, too o koor o leng oxaa waagna wondoox fa in ne fop a mbi’tan refee meeke. 32Fat i yerin a faap in biiñ, soo mbondoox fo ten, ndax ta jeg xa taan.»
33No yeng olaaga a yerna a faap den, soo taaw fee a ret a wondook fa faap um. Lot yeg’ee ye o ƥeem o ndew onqe a wondooxna fo ten, ne’atiim ye ta inooxna. 34No feet olaa, taaw fee a laya o ndeɓ onqe yee:
«Wondooxaam fa faap es o xoo. Fat i yernahinin biiñ no yeng olene, o ret wondook fo ten, ndax i sakan a faap in xa taan.»
35No yeng olaaga, a yernahina a faap den biiñ, soo o ndeɓ onqe a ret ndax ta wondook fo ten. Faap fee yeg’ee ye oxeene a wondooxiidna fo ten ne’atiim ye ta inooxaa.
36Xa ƥiy xa tew xa ƭaq axe Lot a mbuda, a nqottin na faap den. 37Taaw fee a ñoota o ƥiy o ngoor, soo a ne’in Mowaab#19:37 Mowaab kaa tekit «oxe inoorna na faap». Moomowaab we no batand ne no maag o Xanju le a ngenoogu.. Mowaab faaga refu o taan no Moomowaab we na maadaa boo xaye. 38O ndeɓ onqe yoo a ñoota o ƥiy o ngoor, soo a ne’in Ben-Ami#19:38 Ben-Ami kaa tekit «o ƥiy no pog es». Aa-amon we no batand ne no xuluɓ ole Yordaan a ngenoogu.. Ben-Ami faaga refu o taan no Aa-amon we na maadaa boo xaye.
Currently Selected:
Mberaand 19: SRR23
Highlight
Share
Copy
Want to have your highlights saved across all your devices? Sign up or sign in
Copyright © 2015-2023 by Eglise luthérienne du Sénégal
