Mberaand 20
20
Abraham fa Abimelek
1Abraham a inoora no jegel olaa ta reeƭna ndax ta ret no ɓemb-roog o ñamaak. A dala ndeer Kades fa Suur. A reta Geraar, a refaa maaga o gataakoon. 2Abraham kaa layoogu na Saara fee o teem ee o cigeen um oo. Maaga, Abimelek fee o maad Geraar a gifa a Saara.#12:13; 26:7 3Took kaaga, Roog a feeñooxa a Abimelek o yeng no ƭaaɗ, a layin ee:
«Xan o xon, yaam o tew oxe gifoona o tew no kiin oo.»
4Abimelek fee yoon’afuleerna fa Saara a laya yee:
«Ndax xan o saŋik xeet a jofangaa sax oo? 5Ye Abraham a layaxama yee Saara o cigeen um oo, Saara yoo yee Abraham o camin um oo, nam waagum o andit ee o kor fo o teem oo? Ke fi’uuma kañ, xalaat fa mbaaxeer gartiran.»
6Roog a layaan no ƭaaɗ ole yee:
«Andaam kañ ee fo xeeñ xoolu fesoorto, too itam mi xañtong o tooñaam. Ten taxu um xañit o duqin. 7Ndiiki koy, jangi o tew oxe, ɓoxotin o kor um, yaam o koor oxeene o tuleer a refu, yaaga xan a xeɗanong, too xan o ñoow. Kaa koy, o ɓoxotangiran o teem, andi yee wo fo o jeg of fop xan nu saŋkoox.»
8Abimelek a inooxa ƥiiɓ teel, a xoy dag we ten fop, a wetandoox a den kaaga fop. Dag waa a ndiida ƭomu. 9Abimelek a xoya itam a Abraham, a layin ee:
«Xar fi’o a in kene? Tooñ num tooñoong boo a tax o ɓekaam, mi fo maat es, na bakaad fa mbod nene? Ke fi’oona naagee fi’eel!» 10Abimelek a layahina a Abraham ee: «Xar fosoox’o boo a tax o fesoor neeke?»
11Abraham a doonaan ee:
«Kaa saf’aam ee jegee o leng oxaa saɗarna a Roog no saax leeke, too mexaa layaa yee o tees oo, da mbaraam a njangin. 12Kaa jolna keene sax, ndigil oo kañ o cigeen es oo, yaam o ƥiy faap es oo, ndaa i mbogee a yaay. Ten taxu ta refat o tees. 13Ye Roog a joqooynooraxam maa goƭna mbind faap es, kaam lay a Saara yee: ‹Keeke refu ke um xeɗang. Muu i ndetna fat o lay ee o camin of refum.› »
14Abimelek a cooxa a Abraham a ked fo qoox, faɗ fo jeefeer, soo a ɓoxotin a Saara fee o teem. 15Cinj kaaga, Abimelek a layaan ee:
«Ga’i saax le fop oxey, muu feloonga dali teen.»
16A geleerooxa, a lay a Saara yee:
«Cooxaam o camin of xa qanjar juni xaaliis ndax we ndefna fa wo fop a and ee njofaƭar leng dalee took of.»
17Abraham a xeɗa a Roog, soo ta wodand a Abimelek fo o teem fo jeefeer um. Rew we a mbaag’ata o njeg xa ƥiy. 18O Yaal oxe kaa xatin’u mbind Abimelek fop da ndefat rimar yaam Saara fee o tew Abraham.
Currently Selected:
Mberaand 20: SRR23
Highlight
Share
Copy
Want to have your highlights saved across all your devices? Sign up or sign in
Copyright © 2015-2023 by Eglise luthérienne du Sénégal
