Mberaand 23

Abraham a jikana a Saara a mboy

1Saara a ñoowa xa kiid teemeed fo xa kiid qarɓeen ƭik fo xa kiid ɓetaa ƭaq. 2Saara a xonta Kiryat-Arba na xoyeel a xoy Hebron no saax le Kanaan. Abraham a xaaraandaan soo a ñaawooxin. 3Cinj kaaga, a inoora me no dal ole Saara, a ret a lay xa taan axe Heet ee:

4«Kaam refat o gataakoon olaa genatna a ndeer nuun, ci’aamoo a mboy alaa gasuuma o qon oxe mi bo ta waag o mo a kid es.»#Pi 7:16; Heb 11:9, 13

5Heeheet we ndefna ndef xa taan Heet a ndoonaan ee:

6«Yaal mbind, nan-gilooxi a in! Kaa o ref o kelwaar Roog a ndeer in. Gasi o qon oxe wo kam a mboy aluu feloonga, ale o jilankaa a xoox of. O leng na in xañkirang a mboy um, maa gasoona o qon oxe wo.»

7Abraham a inooxa, a gung a lanq mbaambir xeet fee no saax le ndefna ndef xa taan axe Heet, 8a lay a den ee:

«Nu ci’angaam um gas o qon oxe mi bo ta mo a kid es, nan-gilooxaamoo too nqeɗanaam a Efron fee o ƥiy Soxar, 9ta cooxaam luf naa refna Makpeela ta jegna no cat kaa no qol um. Fat a cooxaam o ten, um softin podne ta warna o jar na xaaliis. Neene, xan a refat a mboy alaa refna o jeg es a ndeer nuun.»

10Efron o Heeheet oxe moof’ina a ndeer xa taan axe Heet, a doona a Abraham mbaambir xa taan axe Heet fo mbaambir no we ndeefoogna no ndokand ne na teeru fee yee:

11«Ha’aa, yaal mbind, nan-gilooxaam! Ci’aaxoong o qol olaa fo luf naa refna taaga fop. Ci’aaxoong a den na kid na xa taan axe na xeet es. Gasi taaga o qon oxe wo.»

12Abraham a gunga mbaambir xeet fee no saax le, 13soo a lay a Efron mbaambir no fop ee:

«Kaam xeɗang o nan-gilooxaam a paax! Jaɓi um jik o qol ole, cooxong njigand ne. Neene, xam gas teen o qon oxe mi.»

14Maaga, Efron a doona a Abraham ee:

15«Yaal mbind, nan-gilooxaam! Lanq kaa njarna xa monjong teemeed nahik#23:15 teemeed nahik Podne keene a refna andaand a paax. xaaliis, xar kaaga a refu a ndeer es fa wo? Waay waay reti gas o qon oxe wo!»

16Maaga, Abraham a anda ke Efron a layna, soo a eedanin xaaliis fee ta layna mbaambir xa taan axe Heet, xa monjong teemeed nahik xaaliis, ne jula we a mbi’tan. 17Neene, o qol ole Efron refna Makpeela jasnoorna fa Mamre, fo luf naa refna taaga fo taxar kaa ndefna kam o qol ole me a piis ale ten a reefeena fop a reftu o jeg Abraham 18na kid na xa taan axe Heet fo na kid no fop we na ndeeftaa no ndokand ne na teeru faa.

19Cinj kaaga, Abraham a gasa a Saara fee o teem no luf naa no qol olaa refna Makpeela jasnoorna fa Mamre refna Hebron no saax le Kanaan. 20O qol olaa fo luf naa refna taaga a refata o jeg Abraham maa ta fi’na poy, a xottin na xa taan axe Heet.

Currently Selected:

Mberaand 23: SRR23

Highlight

Copy