Mberaand 7

Nowe a roka na kaal ale

1O Yaal oxe a laya a Nowe yee: «Roki na kaal ale, wo fo ƥasil of fop yaam ga’aam ee kaa o jof mbaambir es a ndeer suk neeke. 2No muumeen ke naangaandeena o ndiimbaa fop, xoti teen koor ɓetuu ƭik fo tew den, no ke na ndiimbeel koy, o xot teen ngoor fo ndew no xos oluu refna. 3Tiiƭ ke na asamaan itam, xoti no xos oluu refna ngoor fo ndew boo ɓetuu ƭik ndax o xos den a ñoowaa took lanq ke. 4Ndeer mene fo ñaal ɓetuu ƭik xam deɓiid took lanq ke boo ñaal qarɓeen nahik fo xa yeng den. Neene, xam moocand ke sakuuma fop took lanq ke.» 5Nowe a fi’ta fop ne o Yaal oxe a heblit’uuna o ten.

O jaɓ o maak ole

6Nowe xe jeg’a xa kiid teemeed ɓetuu fa leng no hiid ole o jaɓ o maak olaa a garna took lanq ke. 7Nowe fo o teem fo xa ƥeem fo rew den a ndoka na kaal ale ndax da muc no poofi ke no jaɓ ole.#Mace 24:38-39; Lik 17:27 8A ndeer muumeen ke naangaandeena o ndiimbaa fo ke na ndiimbeel, tiiƭ ke fo ƥood ke fop, 9ngoor fo ndew no xos oluu refna a ndoka na kaal ale fa Nowe, ne Roog a heblit’uuna o ten. 10Cinj ñaal ɓetuu ƭik, poofi ke no jaɓ ole a ngara took lanq ke.

11No hiid teemeed ɓetuu fa lengandeer ole no ñoow Nowe, no ñaal xarɓaxay fo ñaal ɓetuu ƭikandeer ne no nqool o ƭikandeer onqe, poofi ke na juwaam fee a ndalfooxa mbaɓir, pand ke na asamaan a mbetoox.#2Piy 3:6 12A refa no deɓaa took lanq ke boo ñaal qarɓeen nahik fo xa yeng den. 13Ñaal naaga sax sax, Nowe fa Seem, Xaam fa Yafet we xa ƥeem fo o tew oxe Nowe fo rew na xa ƥeem a ndoku na kaal ale, 14den fo xa qos muumeen axe fop: Cegel ke, o xos oluu refna teen fo xa qos ƥood axe na ƥoodaa took lanq ke fop, tiiƭ ke fop fo xa qos den fo fop ke jegna a nafir too a yetaa. 15Kuu na ñoowaa, ngoor fo ndew, a ndoka na kaal ale paam Nowe. 16Ngoor fo ndew no ke saqna njer, a ñoowaa fop, a ndoka na kaal ale, ne Roog a heblit’uuna a Nowe. Cinj kaaga, o Yaal oxe a wega begax ne na kaal ale.

17A teƥ ale no jaɓ ole a reta boo no ñaal qarɓeen nahik. Poofi ke a ŋaaya, soo a yoɗ a kaal ale ta rayaa. 18Poofi ke a moƴa o may tigi took lanq ke, soo a kaal ale a rayaa took poofi ke. 19Poofi ke kaa moƴ’u moƴ o mayaa took lanq ke, xa coong xa cigdu xe ɗuga asamaan fee kaa ƭuud’el. 20Poofi ke a muura xa coong axe boo a njolit a den took ngap xa noonoong xarɓaxay fo xa noonoong xa ƥetaq. 21Ke ñoowoogna took lanq ke fop a saŋkooxa, ta ref tiiƭ ke boo no cegel ke fo muumeen ke fo fop ke na yo’nooxaa took lanq ke fo pindeef ke fop. 22Ke jegna o ñis fop too a haaƭoogu took lanq beeru ke a xona. 23Roog a moocanda pindel ke ndeeƭna took lanq ke fop. Fop a moocande no lanq ke, Nowe fo we ndeeƭna fo ten na kaal ale soom yoq’u.

Nowe a sutooxa a kaal ale

24Poofi mayu ke a ndeeƭa took lanq ke boo ñaal teemeed fo ñaal qarɓeen ƥetik.

Currently Selected:

Mberaand 7: SRR23

Highlight

Copy