Saŋ 18
18
Yeesu a dame
(ɗeeti Mace 26:47-56; Mark 14:43-50; Lik 22:47-53)
1Yaa Yeesu a layna neene boo a ƴut, a inooxa fo daalbe um, a njoot a Ƈufnand alaa Kederon, soo a ndok na ƭing alaa reeƭna maaga. 2Yudaa fee nar’uuna o ɓoxot a and’a o lunq olaaga a paax, yaam maaga Yeesu a mer’u o fokataa daalbe um. 3Yudaa a inooxa, a yoon fo alkaati ke saasadax maak we fo Farisiya we a ngebil’ina. A saq’a xa cam fo xa lampa fo ƥonax. 4Yeesu o mat, a and’a fop ke nar’uuna o dal, a xetiida fa den, a laamit a den ee:
«An nu mbaaƭaa?»
5A layaan ee:
«Yeesu o Naanasaret oxe.»
A doona a den ee:
«Mexey!»
Yudaa fee naruuna o ɓoxot o mat, oxe geenooxa a ndeer den. 6Yaa Yeesu a layna a den ee: «Mexey!» a ndakooxa a cinj, a mbat a yen. 7Yeesu a dakooxa o laamit a den ee:
«An nu mbaaƭaa?»
A ndoona yee:
«Yeesu o Naanasaret oxe.»
8Yeesu a laya yee:
«Mee ndax layaam a nuun ee mexey! A refangaa yee mi nu mbaaƭaa kañ, nqaƴyo weeke boog da ndet.»
9Kaa lay’u naaga, ndax a ƭelem um akeeke a mbadnoox: «O kiin o leng sax no we doxnaxamoona mo’ee.»#17:12 10Simoŋ Piyeer fee ɓonoox’ina laƥ a woosaan, a facin o tag oxe no saasadax o maak oxe boo nof ñamaak naa a ɗeg. O tag oxaaga koy, Malkis a ne’’e. 11Yeesu a laya a Piyeer ee:
«Nomti laƥ ne no xool um. Ndax kaa yerkiim o kaas coono le Faap fee a sepaxama?»#Mace 26:39; Mark 14:36; Lik 22:42
Maa no saasadax o maak oxaa
(ɗeeti Mace 26:57-58; Mark 14:53-54; Lik 22:54)
12Xiixire we fo aa-adax den fo alkaati ke no Yaawuur we nqotiidna a Yeesu, a ndamaan, a ngumin, 13soo a ƥisin pitik maa Xaan-Koor fee reeƭna o seemir Kayif. Kayif koy reeƭu o saasadax o maak no hiid olaaga. 14O ten o mat as’u Yaawuur waa yee: «O leng a xon moƴu xeet fee fop a nduguñel.»#11:49-50
Piyeer a laya yee andee a Yeesu
(ɗeeti Mace 26:69-70; Mark 14:66-68; Lik 22:55-57)
15Simoŋ Piyeer fo o taalbe o lakas a ndeefana a Yeesu. O taalbe xeene yoon’ina fa Piyeer koy, o saasadax o maak oxe a and’aan. Ten tax’u ta rok boo no maax um, 16Piyeer o mat, a yoqand na carind alaa. Oxe o saasadax o maak oxe a and’ina, a reta maa no mbindaand onqaa yetoogna a carind alaa, a lay fo ten, soo Piyeer a rokiid. 17Ye ta joonaa, o tag oxe a layaan ee:
«Wo itam o taalbe no qoye refo.»
Piyeer a doonaan ee:
«Refinum de.»
18Dag we fo alkaati ke a ngeƥanda fiɗel, a ndaƭooxaa, yaam kaa jopir’u a ƥuuɓ. Piyeer oo a gara, a geenoox paam den, a raƭooxaa.
Yeesu oxe laamteel
(ɗeeti Mace 26:59-66; Mark 14:55-64; Lik 22:66-71)
19O saasadax o maak oxe a laamta a Yeesu kaa jofna no daalbe um fo a cangin um. 20Yeesu a doonaan ee:
«Naa moofum o don es took a layaa, kaam jangnaa kam pind a qeƭ ke, kam Mbind Roog ne Yaawuur we fop a ndefaa. Jegee dara kaa layuuma na pet. 21Xar taxu o laamtaxam boog? Ke layuuma, laamteen we nan-gilooxoogaxama. A anda xil fa lay es.»
22Took a ƭelem akaaga, o leng no alkaati kaa reeƭna maaga a ranjaan mbaƭ, a layin ee:
«Neene o doonitkaa o saasadax o maak oxe?»
23Yeesu a layaan ee:
«Um layangaa cageer, lalteen, ndaa ke layuuma a jagangaa, xar taxu o fadaam?»
24Cinj kaaga, Xaan-Koor a ruuñaan fo mbeñ um fop a Kayif fee o saasadax o maak.
Piyeer a dakooxa o lay ee andee a Yeesu
(ɗeeti Mace 26:71-75; Mark 14:69-72; Lik 22:58-62)
25Simoŋ Piyeer o mat oxe raƭooxaa rek. O leng no we ndeeƭna fo ten a layaan ee:
«Kaa fogiro no daalbe we no qoye?»
A xaña, a lay ee:
«Fogiim na den.»
26O leng no dag we no saasadax o maak oxe reeƭna o pog no qoyaa Piyeer a ɗeg’ina nof naa a layaan ee:
«Mee ndax ga’aaxoong fo ten kam a ƭing alaa?» 27Piyeer a dakooxa o xañatiloox, too ndak fo ndak a siik a laya.
Yeesu mbaambir Pilaat
(ɗeeti Mace 27:1-2, 11-14; Mark 15:1-5; Lik 23:1-5)
28A inoorta maa Kayif fa Yeesu, soo a ndet no xeloorand olaa, refna ref me gofornoor fee a genoogna. Mbeet naa a xoola, too den Yaawuur we koy mbad’ee kam faa, yaam a mbañaa soɓe a daawit a den no xeloorand olaa, a yaqan a den da ñaam njaw ne na bes fee na Colandax ale. 29Naaga, gofornoor Pilaat a sutooxiida, a lay a den ee:
«Xar nu njambaa oxeeke?»
30A ndoonaan ee:
«A reeƭangee o piifi paaxeer, i ƥisiidkoogiran me wo.»
31Took kaaga, Pilaat a laya a den ee:
«Ƥiseenoo ngate’tin ne a ƭat nuun a simtituuna.»
Yaawuur we a layaan ee:
«Kaa i nqañtel a bar o kiin.»
32Naaga fa lay fee Yeesu a lay’ina a fadnoortu, ye ta lalitna ne ta xonitkaa.#3:14; 12:32 33Pilaat a roka no xeloorand olaa, a xoy a Yeesu, soo a layin ee:
«Ndax wo refu o maad oxe no Yaawuur we?»
34Yeesu a doonaan ee:
«Koo xalaatanin a xoox of, ndi lakas layong o ten?»
35Pilaat a doonaan ee:
«Mi yii? Kaam ref o Yaawuur! Mee ndax xeet of fo saasadax maak we ngoƥattong me mi! Mi kañ, kaam laamtang ke fi’oona.»
36Yeesu a doonahinaan ee:
«Maat es inooree na adna feeke. Maat es a inoor’angaa na adna feeke, dag es a nqire’kooga, ndax ɓoxotkaandeem Yaawuur we. Kaa koy, maat es inooree na adna feeke.»
37Pilaat a layaan ee:
«O maad refo boog?»
Yeesu a doona yee:
«Ne’aano boo ƴut, o maad refum tigi. Kaam rimel, gar na adna fee, ndax um seede’anaa ndigil ne. Oxuu fogna no ndigil ne kaa nan-gilooxaa o ñuxur es.»
38Pilaat a layaan ee:
«Xar refu ndigil?»
Xan Yeesu a warel
(ɗeeti Mace 27:15-31; Mark 15:6-20; Lik 23:13-25)
Cinj kaaga, Pilaat a sutooxahina, a ret maa no Yaawuur waa. A gara, a lay a den ee:
«Ga’iim sik fa leng no kiin oxene. 39Ne andoona koy ee kaa nu njeg o mbaax onqaa layna yee na Xew fee na colandax ale, o leng no we ƥekeena kaso a sutel, ndax nu mbuga um xaƴan a nuun o maad oxe no Yaawuur we?»
40Maaga, a mbuuqa yee:
«Ba xaƴin, xaƴi a Barabaas!»
Barabaas koy, a cuut a maak a maak a reeƭu.
Currently Selected:
Saŋ 18: SRR23
Highlight
Share
Copy
Want to have your highlights saved across all your devices? Sign up or sign in
Copyright © 2015-2023 by Eglise luthérienne du Sénégal
