Saŋ 19
19
1Maaga, Pilaat a simta Yeesu a xotel, a xawel xa cap. 2Xiixire waa a ndalfooxa o ndiw o ndip kiƈ, a ndokanin o ten fo lori yaxgu coy, 3a ngaraa boo paam um a layaa yee:
«Daali maad no Yaawuur we, walid!»
Naaga, kaa muqoogun paƭ.
4Pilaat a dakooxa o sutooxiid, a lay Yaawuur we yee:
«Xam sutanin a nuun, ndax nu and ee mi fa xoox es ga’iim no ten sik fa leng.»
5Yeesu a sute, a rokel o ndip kiƈ onqe took xoox um fo lori yaxgu coy ne. Pilaat a laya yee:
«O kiin oxe xey.»
6Yaa saasadax maak waa fo alkaati kaa a nga’uuna, a mbuuqooga yee:
«Rengeen! Rengeen na kurwaa!»
Pilaat a doona a den ee:
«Njangeenoo ndengankin a qoox nuun, yaam ga’iim no ten sik fa leng, mi o mat.»
7Naaga Yaawuur we a ndoonaan ee:
«I njega kebil, too ne kebil neene a laytuuna, a wara o xon, yaam kaa fi’ooxaa o Ƥiy Roog.»
8Yaa Pilaat a nanna a ƭelem akeene, a moƴa o diid. 9A roka no xeloorand olaa, a lay a Yeesu yee:
«Mam inooro?»
Yeesu o mat, dooniran dara. 10Pilaat a dakooxaan o lay ee:
«Mi faño doon? Kaa andiro yee waagaaxoong o xaƴ mbaat um rengnong na kurwaa?»
11Yeesu a doonaan ee:
«Jegkoogiro sañ-sañ fa leng na mi, Roog a coox’angirang o ten. Ten taxu, oxe ɓoxotaxama a ndeer xa ƥay of a fi’a bakaad faa moƴna o magin fee wo.»
12No kaa xotitna na waxtu faaga, Pilaat kaa waaƭoogatu maa ta xaƴtuuna. Yaawuur we o mat kaa moƴ’u o mbalalooxaa yee:
«O xaƴangaan ta ret, o and ee refiro xaariit Kesaar fee. Oxuu ne’ooxna meen o maad, o pañ Kesaar fee yoo.»
13Yaa Pilaat a nanna a ƭelem akeene, a sutiida a Yeesu, a moof me ta hate’taa yaa nqeloor a jegna. Meene, kaa dungit’el a kac, too no ɗelem hebre da nqoyan Gabata. 14Kaa soƥ Xew fee na colandax ale a waajaneel, no mbuyukuun naa. Naaga, Pilaat a laya Yaawuur we yee:
«O maad nuun oo xeene.»
15Yaawuur waa a moƴa o mbalaloox ee:
«Fat a warel! Fat a warel! Rengeen na kurwaa!»
Pilaat a doona a den ee:
«Mi, um reng o maad nuun na kurwaa?»
Saasadax maak we a ndoonaan ee:
«I njegee o maad o tefee Kesaar fee.»
16Maaga, a ɓoxotaan a den, ndax ta rengel na kurwaa.
Yeesu a renge na kurwaa
(ɗeeti Mace 27:32-44; Mark 15:21-32; Lik 23:26-43)
A ndama a Yeesu soo a ƥisin. 17Yeesu a gadooxa a kurwaa um, a gar boo a fadiid me ne’eena «o mbiñ onqe no Nqolof ne», too no ɗelem hebre da layan Golgota. 18Maaga o mat a rengte na kurwaa, ten fo wiin ɗik lakas, da ndeerin.
19Ndax ta lalit ke taxna ta rengel, Pilaat a dalfooxa o bindin ee: «Yeesu o Naanasaret oxe, o maad oxe no Yaawuur we», soo ta daaƴel took a kurwaa le. 20Yaawuur mayu a njanga a pind akeene, yaam me Yeesu a reng’eena na kurwaa goƭ’ee Yeerusaleem. Oxe bind’e na hebre fo na lateñ fo na gerek. 21Saasadax maak we no Yaawuur we a laya a Pilaat ee:
«Ba o bind ee: O maad no Yaawuur we. Koo bindkaa yee: Kaa lay ee mi refu o maad oxe no Yaawuur we.»
22Maaga Pilaat a doona yee:
«Ke binduuma, bindaanum boo ƴut.»
23Cinj ye xiixire we a ndengna a Yeesu, a njanga tikoorik ke ten, a mbi a den a seek a nahak, o qiixire oxuu refna fo a seek. Cinj kaaga, a njanga sabadoor um ne jeg’eerna o ƭiis o leng, ndax a ref piis muum ƭiisaand sen no ke xotitna took boo a lanq, soo a lay ee:
24«Ba i nquuyin, fat i mbanjangin.»
Kaaga a xewa, a fadin ke a Pind a Tedu ke a ne’oogna, ye da layna yee:
«A lasra tikoorik es,
soo a mbanjang sabadoor es.»
Keene o mat xiixire we a mbi’u.#Kt 22:28
25Paam a kurwaa le Yeesu a rengeena, Mari fee ya um oxe geenooxa fo o ndeɓ um fa Mari fee o tew Kolopaas fa Mari-Magdala. 26Yaa Yeesu a ga’na a ya um, ta geenoox, o taalbe xe ta fex’ina a ref paam um, a laya a ya um ee:
«O tew oxe, o ƥeef oo xeene.»
27Cinj kaaga, a laya o taalbe xe yee:
«Ya of oo xeene.»
No kaa xotitna na waxtu faaga, o taalbe xeene a ɓisu a Mari no mbind um.
Yeesu a saaya
(ɗeeti Mace 27:45-56; Mark 15:33-41; Lik 23:44-49)
28Cinj kaaga, ye Yeesu a andna yee a fadna bareef um fop, a laya yee:
«Kaam hoɗomel.»
Kaa lay’un, ndax a Pind a Tedu ke a mbadnoox.#Kt 22:15; 69:21
29A jeg’a maaga o jalag o mayu muut fa bineegar. Xiixire we a ndalfooxa o njang o loq isoop, a morgin liir, soo a suupin na bineegar fee, a luuxnin o ten. 30Yaa Yeesu a ñimna bineegar faa, a laya yee:
«Fop a fadnooxa.»
A yoornooxa, soo a saay.
Wiin we a nga’a yee Yeesu a saaya
31Yaawuur we mbug’ee xa tal axe a maad took a kurwaa ke na Xew fee na colandax ale. Kaa mbaambir’u fa bes fee na ñootnax ale a jopir da mbaajanaa Xew fee na colandax ale. A nqeɗa a Pilaat ndax a caf ake no we ndengeena a ƥolel soo da ñof o mbudnel. 32Cinj kaaga, xiixire we a ngara me no we ndengeena, o eetaand oxe, da ƥol a caf ake, a suur no ƭikandeer oxe, a ƥol a caf ake itam, soo a ngar na Yeesu. 33Yaa da matiiduuna boo a nga ee a saaya yaaga, a mbañata o ƥol a caf ake. 34O leng no xiixire we a dibaan a salma no ɓemb, too ndak fo ndak a wata po’oy fa foofi. 35Oxe doonna keene a ngid a layaan, too ke ta layna ndigil oo. A anda xil itam ee ndigil a layu. Kaa layin, ndax nuun oo nu ngim. 36Keene a xewa ndax ke a Pind a Tedu ke a ne’oogna a fadnoox, ye da layna yee: «O hiiƈ um o leng ɓolkaand.»#Sut 12:46; Lim 9:12; Kt 34:20 37A jega maa a Pind a Tedu ke a laytahinna yee: «Xan a ndaxaaƴooxaa oxe da ndibna.»#Sak 12:10; Mbñ 1:7
Yeesu a gase
(ɗeeti Mace 27:57-61; Mark 15:42-47; Lik 23:50-56)
38Ye keene a xewna, Yoseef fee genna Arimate, too a reeƭu o taalbe Yeesu na pet, yaam a saɗar’u Yaawuur we, a reta maa Pilaat, ndax ta ci’in ta xendand o dal ole Yeesu. Pilaat a ci’aan o ten, too a gara, a xot o dal ole. 39Nikodeem fee mos’ina o ret maa Yeesu o yeng a gara itam, a ɓislooxiid ngap kilo qarɓeen tadik fo kilo tadik miir faa jaxaseena fa alowes.#3:1-2 40Ten fa Yoseef a njanga o dal ole Yeesu, a nqendandtin qeeñe-xeeñe keene, a laxasin njoor, ne Yaawuur we a mbi’antan xon den. 41Paam me Yeesu a reng’eena na kurwaa, a jeg’a a ƭing fo a mboy alaa o leng a mos’aandeena o ɓek. 42Ne Yaawuur we ndeeƭna no mbaajanaa Xew fee na colandax ale, too a mboy aleene a mat’u, a ndeta, a ƥek a Yeesu taaga.
Currently Selected:
Saŋ 19: SRR23
Highlight
Share
Copy
Want to have your highlights saved across all your devices? Sign up or sign in
Copyright © 2015-2023 by Eglise luthérienne du Sénégal
