Lik 10

Yeesu a lula daalbe qarɓeen ɓetuu ɗik [fo daalbe ɗik]

1Cinj kaaga, o Yaal oxe a jila daalbe qarɓeen ɓetuu ɗik [fo daalbe ɗik], soo a lul a den ɗik-ɗik, da adookin no teeru ke fo fop me ta narna o ret ten fa xoox um. 2Maaga, a laya a den ee:

«A saxad ale a magna, ndaa jaajal we mayee. Nqeɗyo o Yaal a saxad ale boog, ndax ta luliid jaajal na saxad ale ten.#Mace 9:37-38 3Ndetyo! Mexe lulaa a nuun nen fo mbaal kam xa moon.#Mace 10:16 4Ba nu saq nafa mbaat o fof mbaat xa ñaaƭ, too ba nu simnireel rek yaa nu ndefna na ƭat.#9:3-5; Mace 10:7-14; Mark 6:8-11 5Boo nu ndokaa no mbind, fat nu eet o lay ee: ‹Yaasam mbind nuun a jeg jam!› 6O kiin jam a refangaa no mbind naaga, xan jam nuun a fudoox took um, ndaa a jegangee, xan jam nuun a nomtooxiid took nuun. 7Ndalyo no mbind naaga, ñaamaa yeraa ke nu mbugko cooxeel boo yaa a tet nuun a fadkaa, yaam oxe na jalaa a wara o rabdel. Ba nu ndalaa ndeer mbind fo mbind.#1Kor 9:14; 1Tim 5:18 8Na teeru fuu nu ndokna, too ngenarel, ñaamyo ke nu cooxkeel. 9Mbodandyo jiru we nu soƥkaa maaga, too mbaare a den ee: ‹Maat ne Roog a matiida a nuun.› 10Kaa koy, na teeru fuu nu ndokna, too ngenaree a nuun, sutooxyo no ped ke, too lay ee:#Pi 13:51 11‹In we yirfaa a nuun fo ut ole na teeru nuun taƥna na caf in. Yaag oo toox de fat nu and ee Maat ne Roog a matiida.› 12Mexe layaa a nuun ee: Na bes faa na hate faa Roog, teeru faa Sodoom na moƴkaa o yooɓiɗ hate teeru faaga.»#Mbr 19:24-28; Mace 10:15; 11:24

Yeesu a xasana teeru kaa

(ɗeeti Mace 11:20-24)

13«Ndaw sabab took of, wo Korasiin, ndaw sabab took of, wo Betsayda, yaam a pi katil ake mbi’eena me nuun a mbi’’ange kam Tiir fa Sidoŋ, a mbeskooga pakaad den a cinj yaaga, a nderoox xa saaku, a moof no ndaw, ndax da lalit ee a ndicooxa.#Es 23:1-18; Hes 26:1—28:26; Yow 4:4-8; Am 1:9-10; Sak 9:2-4 14Ten taxu, no nqel naa Roog, Tiir fa Sidoŋ na moƴkaa o yooɓiɗ a nuun hate. 15Wo Kapernawum o mat, ndax xan o yoɗel boo na asamaan? Ha’aa! Xan o fudnel boo kam jaaniif.»#Es 14:13-15

16Yeesu a dakooxa o lay daalbe um ee:

«Oxuu nan-gilooxna a nuun, mi a nan-gilooxu, oxuu fañna a nuun, mi a fañu, too oxuu fañaxama, Faap es fee luliidaxama a fañu.»#9:48; Mace 10:40; Mark 9:37; Saŋ 13:20

Qarɓeen ɓetuu ɗik [fo ɗik] we a nomtooxiida

17Daalbe qarɓeen ɓetuu ɗik we [fo daalbe ɗik we] a nomtooxiida fo o ɗaay, too a lay ee:

«O Yaal oxe, cini ke sax a nanana a in yaam gon of.»

18Yeesu a laya a den ee:

«Ga’aam a Saytaane ta yentiidaa na asamaan nen o hiiñ. 19Nan-gilooxyo: Ci’aam a nuun sañ-sañ faa nu ñaaƴtaa took ƥood ke fo a beex ake fa katil ke no pañ oxe fop, too dara waagkee o gaañ a nuun.#Kt 91:13 20Ndiiki boog, ba nu mbelakinoox yaam ne cini ke a nananaa a nuun, ndaa mbelakinooxyo yaam ne a kon nuun a mbindeena na asamaan.»

Yeesu a felakinooxa

(ɗeeti Mace 11:25-27; 13:16-17)

21Na waxtu faaga sax, Yeesu a maya fo o ɗaay no Yiif Tedu le, too a lay ee:

«Faap, mexe gidmang, wo o Yaal asamaan fo lanq, yaam ɗasnaa kene yaal-o-and we fo jegu yiif we, soo feeñlin we moƴna o neew. Iyo Faap, neene mat a waagu refit, yaam ten felong.

22Faap es a cooxaxam fop, too o leng andee o Ƥeenqe a refangeerna Faap fee. O leng andee a Faap fee itam, a refangeerna o Ƥeenqe fo xaa ta buguuna o feeñil.»#Saŋ 3:35; 10:15

23Maaga, Yeesu a geleerooxa, a faambir fo daalbe we ten, too a lay a den, den doŋ ee:

«A kid ake na nga’aa ke nu nga’aa, a ƭaaya. 24Yaam mexe layaa a nuun ee: Duleer mayu fo maad mayu a mbug’a o nga ke nu nga’aa, too nga’iran, a mbug o nan ke nu nanaa, too naniran.»

O Saasamari paaxu xe

25O caajangin o maak no kebil ke a bug’a o ɗeetloox a Yeesu. A inooxa, a laamtin ee:

«O Caajangin oxe, xar warum o fi ndax um jeg o ñoow o fagkeer ole?»#Mace 22:35-40; Mark 12:28-34

26Yeesu a doonaan ee:

«Xar binde no Safe le no kebil ke? Xar jango teen?»

27A doona a Yeesu yee:

«Xan o fex o Yaal oxe Roog of no xeeñ of fop, no laaw of fop, na doole of fop, fo na qalaat of fop, too xan o fex o kend of nen a xoox of.»#Paɗ 19:18; Cang 6:5

28Maaga, Yeesu a layaan ee:

«Ndigil kak layo. Fi’i keene, too xan o ñoow.»#Paɗ 18:5

29Kaa koy, o koor oxaaga a bug’a o ɓur, too a laamta a Yeesu yee:

«An refu o kend es?»

30Maaga, Yeesu a doonaan ee:

«O koor a inoor’a Yeerusaleem, a retaa Yeriko. Yaa ta retaa boo na ƭat ale, guuɗ a songaan, a njaɓ tikoorik um. A nqawaan boo a ngaañin soo a ndet, a nqaƴin maaga ta meeñaa. 31A soƥa o saasadax a reef a ƭat alaaga. Yaa ta ga’na o koor oxaaga, a joona, a waan. 32O Leelewi a fadiida maaga itam. Yaa ta ga’na o koor oxaa, a fi’a nen o eetaand oxaa, a joon, a waan. 33Yaa oxaaga a waanna boo a ɓaatin, o Saasamari a fadiida. Yaa ta ga’uuna, a yuɗaan lool.#2Clr 28:15 34A matiidaan, a ɗuumanin diwliin fa biiñ no kaañax ke, a laxasanin o ten, soo a ŋaaynin no faam um, a ɓisin no mbind naa genar we a ndalnoogeena, soo a topatooxin a paax. 35No feet olaa, a suta xa qanjar xa ƭaq, refna ndabid calel ñaal ƭik, a cooxin o yaal mbind naa, soo a layin ee: ‹Topatooxi o koor oxene ne waritna. Boo nomtooxiiduuma, xam rabdong ke na foolkaa teen.› »

36Maaga, Yeesu a laamtaan ee:

«Oxum no daduk weene laltu yee o kend no xe guuɗ we a song’ina a refu?»

37O caajangin oxaa no kebil ke a doonaan ee:

«Oxe yirim’uuna.»

Maaga, Yeesu a layaan ee:

«Reti, too fi naaga!»

Yeesu no mbind Marta fa Mari

38Yaa Yeesu fo daalbe waa ten a ndefna na ƭat, a ndoka na saate, too o tew oxaa ne’eena Marta a dalna a Yeesu no mbind um.#Saŋ 11:1 39O ndeɓ um onqaa ne’eena Mari, kaa moof’u paam Yeesu, soo a nan-gilooxaa a cangin um. 40Marta a topatooxooga mayu yaam genar we. A gara, too a lay a Yeesu yee:

«O Yaal oxe, ndax keeke ɗomirang, o ndeɓ es a moof, a xaƴaam fo calel ke, mi soom? Layeen boog ta dimle’aam!»

41Yeesu a doonaan ee:

«Wo kañ Marta, kaa o roxondoox mayu, too may kaŋ-kaŋ, 42ndaa tig leng kut jegu o njiriiñ. Ɗeeti, Mari a jila a las a paax ale o leng a jaɓkeerna no ten.»

Currently Selected:

Lik 10: SRR23

Highlight

Copy