Lik 11

Kaa farna na qeƭ

(ɗeeti Mace 6:9-15; 7:7-11)

1Bes, Yeesu a xeɗooga o mbiñ. Yaa ta ƴutna, o leng no daalbe waa ten a layaan ee:

«O Yaal oxe, jangni a in ne i mbarna o nqeɗtaa, ne Saŋ a jangnituuna daalbe we ten.»

2Yeesu a laya a den ee:

«Boo nu nqeɗaa, layyo yee:

Faap,

yaasam gon of a tedleel!

Yaasam maat of a fadiid!

3Ci’i a in ñoowir in no mbeet oo mbeet! 4Waasani a in pakaad in,

yaam kaa i mbaasanaa we tooñna a in.

Ba o waas a in, i ndok no mbog!»

5Yeesu a layahina a den ee:

«A soƥangaa yee o leng na nuun kaa jeg a xaariit, oxeene a soƥiidin no mbind um o yeng o njeek, ndax ta layin ee: ‹Xaariit es, ɓandaam puuru tadik. 6O leng no qaariit es kaa ɗeetiidaam no mbind es, too jegiim tus kaa cooxanuuma.› 7Maaga, ndax xan a doonin ee: ‹Jegiim o daaw of! Wegaam boo ƴut, too kaa refeerna keene sax oo i mbondooxa, mi fo xa caaƈ axe. Waagiim o inooxiid cooxong puuru.› 8Mexe layaa a nuun ee: A inooxangee a cooxin a den sax oo yaam ne oxeene a refna xaariit um, xan a inoox yaam ndik ta wennoor a xoox um, too xan a cooxin fop ke ta soxla’na. 9Mi o mat, mexe layaa a nuun ee: Nqeɗyo a Roog, too xan nu ci’el, mbaaƭyo, too xan nu nga. Koŋ-koŋinyo, too xan nu mbetanel. 10Oxuu xeɗna a Roog, xan a ci’el, too oxuu waaƭna, xan a ga. Oxuu koŋ-koŋinna, xan a wetanel. 11Faap fum na nuun na cooxkaa o ƥeem fangool, yaa ta xeɗuuna liƥ? 12Ndi a xeɗangaan ɓoof ndax xan a ci’in a beex? 13Ke nu soxodna soxod fop oo, kaa nu ci’aa xa ƥiy nuun tig paax. Yaaga koy, ndax Faap nuun fee na asamaan ci’kee Yiif Tedu le we nqeɗuuna o ten?»

Yeesu a wodanda oxaa muumna too cini a ndamin

(ɗeeti Mace 12:22-30; Mark 3:22-27)

14Yeesu a raxa jini faa muumand’ina o kiin. Yaa jini faa a sutooxna, o muum oxaa a laya. Kaaga a bet’a wiin waa fop. 15Kaa koy, yaa leng-leng no waa ndeeƭna maaga a nanuuna, a laya yee:

«Na pexey Belsebul fee refna o maad oxe no cini ke a raxtaa cini ke.»#Mace 9:34; 10:25

16Maaga, lakas we a mbug’aan o mbog, too a laamtaan ta fi o anddiloor olaa inoorna na asamaan.#Mace 12:38; 16:1; Mark 8:11 17Yeesu a anda a qalaat den, too a laya a den ee:

«Boo we mbogna maat a nqaajoorna a ndeer den, maat naaga waagee o miñ. Mbind nuu refna xan a jiƭtoox took ngend um. 18Boo Saytaane a xaajoorna fa xoox um boog, nam mbind um a waagu miñit? Kaa nu layaa yee na pexey Belsebul um raxtaa cini ke? 19Mi koy, um naagangaa o raxaa cini ke na pexey Belsebul, yaaga xa ƥiy nuun na pexey an a ndaxtan? Ten taxu den fa qoox den na ndefkaa haahate nuun. 20Kaa koy, a refangaa yee na pexey nqol Roog um raxtaa cini ke, yaaga Maat ne Roog a fadiida me nuun.

21Boo o kiin o cegu doole a saqna ƥonax um, a yetooxaa mbind um, o jeg um fop a naaga o lewaa. 22Kaa koy, boo o kiin oxaa hupuuna doole a garna, xan a maafin, a jaɓ ñoxorir ke ta yaakaar’ina fop, soo a lasit ke ta jaɓitna no ten.

23Oxuu fareerna fa mi kaa fañaam, too oxuu fokateerna fa mi kaa pictaa#Mark 9:40

A kat ale na jini fee

(ɗeeti Mace 12:43-45)

24«Boo jini a xaƴna o kiin, a naaga o retaa na koƥ a beeru, a waaƭaa maa ta ñootnooxna. A ga’angee, xan a lay ee: ‹Xam nomtoox no mbind es naa sutooruuma.› 25A fadiidangaa koy, a soƥ ta leelel boo a xool, a mosandel, 26a naaga o retaa, a xot cini ɓetuu ƭik lakas kaa moƴuuna o soxod, da ndet a ndal kam mbind naa. Palakaand ke dalatna o kiin oxeene a naaga o moƴaa o faaxaƭar ke eet’uuna o dal.»

O ɗaay o ndigil

27Ye Yeesu a maadna o layaa, o tew a laya a maak ndeer no wiin waa yee:

«Oxe rimoonga, a numnong a ɗaaya!»

28Maaga, Yeesu a doonaan ee:

«We na nan-gilooxaa fa lay fee Roog, soo a ngayan kañ ƭaayu!»

O anddiloor ole Yoona

(ɗeeti Mace 12:38-42; Mark 8:12)

29Yaa wiin waa a moƴna o mayaa, Yeesu a laya a den ee:

«Xeet fa soxodu fene oxe xeɗaa o anddiloor. Kaa koy, Roog ci’kee a den o anddiloor o lakas olaa refeerna ole Yoona.#Mace 16:4; Mark 8:12 30Ne Yoona a refit’ina o anddiloor no Niininiif waa, neene o Ƥeenqe no kiin oxe a refitkaa o anddiloor na xeet fene.#Yoo 3:4 31Xan o maad o tew oxaa inoor’ina no ɓemb-roog o ñamaak a inoox na bes faa no nqel naa Roog, a soq goor we na xeet fene yaam a inoor’a no cat adna ndax ta nan-gilook o and o maak olaa Salomo. Oxe na layaa fa nuun koy hupu a Salomo.#1Md 10:1-10; 2Clr 9:1-12 32Na bes faa no nqel naa Roog, xan Niininiif we a inoox mbaambir no xeet fene, a soq a den, yaam a mbes’a pakaad den a cinj ye Yoona a waare’na a den. Oxe na layaa fa nuun koy hupu a Yoona.»#Yoo 3:5

A ngid refu o lampa cer

(ɗeeti Mace 5:15; 6:22-23)

33«O leng heƥandkee o lampa boo a ƴut, soo a ɗasnin o mbiñ mbaat ta sagin a saxal. Kaa ɗagan, ndax we na ndokiidaa na ndok ale a mbaag o nga a qoolaand ale.#8:16; Mace 5:15; Mark 4:21 34A ngid of refu o lampa cer of. Ñiiñax a ñaaƴangee a ngid of, xan cer of fop a nqool. Kaa koy, boo andoona yee ñiiñax a ñaaƴa a ngid of, cer of fop xan a nuk. 35Wootooxi boog yaam ndik a qoolaand ale refna na wo a ref o niɓaan. 36Boo cer of fop a nqoolna, too njegee o niɓaan o leng, xan a nqoolit nen o jam olaa xoolandoonga.»

Ndaw sabab took no Farisiya we fo jaajangin we no kebil ke

(ɗeeti 20:45-47; Mace 23:1-36; Mark 12:38-40)

37Yaa Yeesu a ƴutna fa lay, o Farisiya a xoyaan a put no mbind um. A roka, too a reera fo ten. 38Yaa o Farisiya xaa a ga’na Yeesu a ñaamaa too japee, kaaga a bet’aan. 39Kaa koy, o Yaal oxe a layaan ee:

«Nuun Farisiya we, kaa nu ƥogdaa took fee na tokol ale fo took fee no roon ole, too kam nuun kaa nu may fo kuuɗe fo coxod. 40Nuun soo ndef ɗof! Mee ndax Roog fee sakna tafil fee saku kam fee itam? 41Kaa nu mbar o sadax rool we kañ ke refna kam fee, too yaaga xan fop a xool na nuun.

42Kaa koy, ndaw sabab took nuun, nuun Farisiya we! Kaa nu cooxtaa a seek xarɓaxayandeer ale na naana fee fo no tuufe-duufe ke nuun moƴna o neew too njaree tig, soo koy nqaƴ o cofel ole fo o mbeq onqe Roog. Keene kaa jareena o fi oo, ndaa waree o tax nu yapatil tig lakas ke itam.#Paɗ 27:30

43Ndaw sabab took nuun, nuun Farisiya we! Kaa nu mbex o mbodaa mbaambir kam pind a qeƭ ke, too mbex o simnel no qel ke. 44Ndaw sabab took nuun! Yaam kaa nu nand fo poy kaa ƭasna, wiin we a ndakaa a den, too andkiran.»

45O leng no jaajangin maak waa no kebil kaa a layaan ee:

«O Caajangin oxe, o naagangaa o laytaa neene, kaa o wenaa a in itam.»

46Yeesu a doonaan ee:

«Ndaw sabab took nuun itam, nuun jaajangin maak we no kebil ke! Kaa nu ngadnaa wiin we a toq akaa ƭomeena ndoxondoox, too nu ndimle’itkee a den poye no saqit mbaambaañ sax. 47Ndaw sabab took nuun, yaam kaa nu maxaa poy ke no duleer we daan we nuun a mbarna. 48Nu seede’a boog a pi ake no daan we nuun, too nu njaɓa a den, yaam den a mbara duleer we, soo nuun o mat nu maxaa poy ke den. 49Ten taxu, oxe na xoyeel o Jeg-yiif ole Roog a laya yee: ‹Xam ɓisiid a den duleer fo apootar. Xan a mbar leng we, lakas we da ñagadil a den.› 50Neene, fo’oy laa no duleer waa mbar’eena no mberaandoong adna xan a yen took wiin we ndiiki, 51no kaa xotitna na Abel boo no fo’oy laa Sakari fee warit’eena a ndeer Mbind Roog naa fo o sadaxand olaa. Iyo, mexe layaa a nuun ee: Xan a laacel wiin we ndiiki.#Mbr 4:8; 2Clr 24:20-21

52Ndaw sabab took nuun, nuun jaajangin maak we no kebil ke, yaam nu njanga o jaafu le, mbegtin o and ole. Nuun fa qoox nuun, nu ndokee, soo yaqanaa we mbugna o ndok da ndokiid.»

53Yaa Yeesu a sutooxna o mbiñ onqaaga, jaajangin waa no kebil kaa fo Farisiya waa a ndalfooxa o ndef no nqasooxanan, a laamtan tig mayu. 54Kaa mbug’un o mbog too a cungaa ta juum no ɗelem.

Currently Selected:

Lik 11: SRR23

Highlight

Copy