Lik 13

Supityo o ñoowooƭ!

1Na waxtu faaga sax, wiin leng-leng no waa ndeeƭna maaga a ngara maa Yeesu. A mbetandooxaan kaa farna no ke dal’ina Gaagalile waa Pilaat a warin’ina, yaa da ƥoxotaa a Roog sadax, a fokat fo’oy den fo fo’oy le na sadax fee. 2Yeesu a doona a den ee:

«Ndax kaa nu mboog ee Gaagalile waaga moƴ’u o ndef baabakaad wiin lakas we ngenna Galile yaam coono fee da coono’na? 3Ha’aa, mexe layan a nuun. Kaa koy, boo nu supteerna o ñoowooƭ, xan nu saŋkoox nuun fop nen lakas we. 4Ndi kaa nu mboog ee wiin xarɓaxay fo ɓetuu daduk we, taax maak naa Silowe a yen’ina took den boo a war a den, moƴ’u o ndef baabakaad wiin lakas we Yeerusaleem fop? 5Ha’aa, mexe layan a nuun. Nu suptangee o ñoowooƭ, xan nu saŋkoox nuun fop nen a den.»

Yeesu a naxooxa kaa farna no ndun

6Yeesu a dakooxa o naxoox ee:

«O kiin a jeg’a ndun no qol um. A gara a waaƭiid xa tim, ndaa soƥee teen tig. 7Maaga a laya oxaa topatooxoogna o qol olaa yee: ‹Xa kiid xa tadaq axey axaa andoona yee um garangaa waaƭiid o rim no ndun ne, soƥkiim teen tus. Godeen deɓin. Xar taxu ta ñaamaa lanq ke, too jegee meen o njiriiñ?› 8Oxe topatooxoogna o qol ole a doonaan ee: ‹O yaal mbind es, xaƴahineen no hiid olene. Xam jiqit lanq ke me widuuna, too yip teen suqi. 9Xeƈa no hiid ole na garaa xan a rim xa tim xa paax mbaat fat o godin, deɓin.› »

Yeesu a wondanda na bes fee na ñootnax ale

10Na bes fee na ñootnax ale, Yeesu a jangnooga kam mbind a qeƭ. 11A jeg’a koy maaga o tew o ciru oxaa jini a dam’ina boo xa kiid xarɓaxay fo xa kiid ɓetaa tadaq. Kaa kuuƴ’atu, o let a xoxin sup. 12Yaa Yeesu a ga’uuna, a xoyaan, too a layin ee:

«Tew oxe, jir of a woda.»

13Yeesu a doona xa ƥay um took um itam, too ndak fo ndak a leta boo a simataa a Roog. 14Kaa koy, o aa-adax oxaa no mbind a qeƭ naa kaa fuux’u, yaam ne Yeesu a wodandoogna na bes fee na ñootnax ale. Maaga, a laya faan laa yee:#Sut 20:9-10; Cang 5:13-14

«Mee ndax ñaal ɓetuu fa leng mbare o njalaa? Ndax kaa nu mbaagee o ngaraa no pes keene, nu mbugangaa o mbodandel, too mbañ o ngaraa na bes fee na ñootnax ale?»

15O Yaal oxe a doonaan a ƭelem akene yee:

«Yememaar we nu ndefna ndef! Mee ndax na bes fee na ñootnax ale, oxuu refna na nuun kaa woktitaa naak um mbaat o faam um na sanqul um, a yernikin? 16O tew oxeeke andoona yee o ndaan Abraham oo, too Saytaane a dam’un boo xa kiid xarɓaxay fo xa kiid ɓetaa tadaq, ndax waagaand o wodand na bes fee na ñootnax ale?»

17Fa lay faaga na Yeesu a sedanda fañ um lool, ndaa faan laa fop naa da mbodeena, kaa ƭaay’u na pi a cegu o ndam akaa Yeesu a fi’oogna.

A naxax ale no xonq seneew ole

(ɗeeti Mace 13:31-32; Mark 4:30-32)

18Yeesu a dakooxa o naxoox a den, too a lay ee:

«Xar um nandanditkaa Maat ne Roog, ndi xar um samandaalitkan? 19Kaa nand fo o xonq seneew, too o kiin a jangin, a duufin kam o qol um. A saxangaa, a naaga o refaa ndaxar, too tiiƭ ke na asamaan kaa ndutaa kam a naaq um.»

A naxax ale no poɗaxnir ke

(ɗeeti Mace 13:33)

20Yeesu a dakooxa o naxoox a den ee:

«Xar um nandanditkaa Maat ne Roog? 21Kaa nand fo poɗaxnir kaa o tew a jangna, a jaxasin fo a saxal a tadak mbiɗel. Naaga, fop a dalfooxa o foɗax.»

Ndokityo no don-maax o ŋooɓu le

(ɗeeti Mace 7:13-14, 21-23)

22Yeesu a xaañooga teeru ke fo caate ke, a jangnaa, too a retaa Yeerusaleem. 23O leng no wiin waa a laamtaan ee:

«O Yaal oxe, ndax xan a jeg o ndik onqaa na muckaa boog no wiin we?»

Yeesu a doona a den ee:

24«Ngoorgoorlooxyo o ndokit no don-maax o ŋooɓu le, yaam mexe layan a nuun, xan mayu a njeem o ndokit teen too mbaagkiran.

25Yaa o yaal mbind ne a inooxkaa boo a weg begax ne fo o jaafu, xan nu mbod tafil koŋ-koŋnaa begax ne too layaa yee: ‹O Yaal oxe, wetani a in!› Xan a doon a nuun ee: ‹Mosiim o and me nu ngenna.› 26Maaga, xan nu layin ee: ‹Ndax i ndeeree fa wo a ñaam soo yer fa wo, too jangnaa no ped ke no teeru ke in fo no caate ke in?› 27Xan a dakoox o lay a nuun ee: ‹Mosiim o and me nu ngenna. Ngoƭaamoo, nuun we na mbi’aa paaxeer fop!›#Kt 6:9 28Maaga xan a jeg xa lool fo ƈaxrand a ñiiñ, yaa nu nga’kaa a Abraham fa Isaak fa Yakoob fo duleer we fop no Maat naa Roog, a soƥkaa nu ndeɓel tafil faa!#Mace 8:11-12; 22:13; 25:30 29Xan wiin a inoorit no batand fo no mudand, wene no ɓemb-roog o janoon fo no ɓemb-roog o ñamaak, too xan a mbog o roon no Maat naa Roog. 30Maaga, we mbalakna ndiiki a ndefitkaa we adooxna, soo we adooxna ndiiki a ndefat we mbalakna.»#Mace 19:30; 20:16; Mark 10:31

Yeesu a ɗomatooxa a Yeerusaleem

(ɗeeti Mace 23:37-39)

31Na waxtu faaga, leng-leng no Farisiya waa a matiida a Yeesu, a layin ee:

«Inooxi mene, too ret o mbiñ o lakas, yaam Herood kaa bugong o warin.»

32Yeesu a doona a den ee:

«Ndetyo lay o ɓox-a-koƥ olaaga yee: ‹Xaye boo o feet kaam bugko raxaa cini ke, wodandaa jiru we, soo paang calel es kalte-feet.› 33Kaa koy, kaam war o ñaaƴ xaye fo o feet fo kalte-feet, yaam o tuleer waree o saayit maa refeerna Yeerusaleem.

34Yeerusaleem, Yeerusaleem, wo fee na saŋkaa duleer we, wartaa a kac we luliideena me wo, a caf a mayu bug’aam o fokat xa ƥeef ne a cek a fokattaa xa ñeek um yoora a nafir um, too nu mbañ! 35Ten taxu, xan Mbind Roog nuun a xaƴel. Mexe layaa a nuun ee: Nu nga’katiraam muk, boo yaa nu laykaa yee: ‹Oxe na garaa no gon le no Yaal oxe a hela o simatel!› »#Kt 118:26; Yer 22:5

Currently Selected:

Lik 13: SRR23

Highlight

Copy