Lik 14

Yeesu a wodanda na bes fee na ñootnax ale

1Na bes fee na ñootnax ale, Yeesu a roka kam mbind no aa-adax no Farisiya waa, ndax ta reer fa den a ñaam. Wiin waa kaa ngorooxoogun rek. 2O koor oxaa cer um a nqimiƈna a reeƭa paam um. 3Yeesu a laamta jaajangin waa no kebil kaa fo Farisiya waa yee:

«Ndax o kiin a waaga o wodand na bes fee na ñootnax ale?»

4Yaa da nanna kaaga, den fop a naaga cel! Maaga, Yeesu a letna o ɓay um, a doonin took o koor oxaa, a wodandin, soo a xaƴin ta ret. 5Cinj kaaga, a laya a den ee:

«An o kiin na nuun oxe na jegkaa o ƥiy mbaat naak, ta yen na ngas, soo ta fañin o sut ndak fo ndak ee yaam bes fee na ñootnax ale yoo?»#Mace 12:11

6Kaa koy, mbaag’iran o ndoon dara no kaaga.

A seek ake adooxna

7Yaa Yeesu a ga’na we nqureena na ñaam ale a mbod no moofir ke moƴna o niwnoox, a naxooxa a den, a lay ee:

8«Boo o kiin a xuroonga na xew ngulook, ba o moof na seek a eetaand ale, yaam ndik ta jeg no we nqureena o kiin oxaa hupoonga.#Peƭ 25:6-7 9Neene, oxe xurna a nuun, wo fo o kend of, a waaga o gar a layong ee: ‹Inooxi ɓand oxene ta moof.› Maaga, xan o sedat o ret moofik na seek alaa falakna. 10Kaa koy, o xurange na xew, reti moof na seek ale falakna, ndax oxe xoyoonga a garangaa, a layong ee: ‹Xaariit es, ŋaayi took faa.› Yaaga xan genar we fop a niwong. 11Yaam oxuu magnandooxna xan a neewandel, too oxuu neewandooxna xan a yoɗel.»#18:14; Mace 23:12

12Yeesu a laya itam oxaa xoy’uuna yee:

«Boo o xoytataa a put mbaat a cu’ax, ba o xoy qaariit of mbaat fog of mbaat we fogtoona mbind mbaat we njegna kalal, yaam ndik da nqurong wo itam, a ndabdong leng kut ke. 13Kaa koy, boo o xurtataa, xoyi rool we fo xaru we fo ɓoof we fo fuul we. 14O naagangaa o fi’taa neene, ɗaayaa. Yaam ne weene a mbaagkeeroonga o ndabid, xan Roog a rabdong, yaa jofu we a nqontooxkaa.»

A naxax ale no ngulook ne

(ɗeeti Mace 22:1-10)

15O leng no waa ndeer’ina fa Yeesu a nana a ƭelem akaaga, too a layaan ee:

«Oxe na ci’keel o ñaamaa no Maat ne Roog a ɗaaya!»

16Kaa koy, Yeesu a doonaan ee:

«O koor a jawna a put a maak, soo a xoy wiin mayu. 17Yaa waxtu a put a fadna, a lula o tag um ta xoyik we njawaneena a put ale, too a lay a den ee: ‹Ngaryo, yaam fop a ƴuta!› 18Kaa koy, waa nqoyeena fop kaa mbaasnooxoogu. O eetaand oxe a layaan ee: ‹Kaam jik o qol, too kaam warin o ɗeetik. Mexe xeɗang o waasanaam.› 19O lakas oxe a laya yee: ‹Kaam jik peer ƥetik qoox, too waraam o tartik a den. Mexe xeɗang o waasanaam.› 20O tadkandeer oxe a laya yee: ‹Kaam sogaa gilig, ten taxu waagkiim o gar.› 21O tag oxaa a nomtooxa, too a lay o yaal mbind um ke wiin we a njangtooxna. O yaal mbind naa a fuuxa, too a laya o tag um ee: ‹Reti no paayo ke fo no ped ke kam saate fee, too ɓisiid rool we fo xaru we fo ɓoof we fo fuul we.› 22Yaa ta ɓaatinna, o tag oxe a gara, a lay ee: ‹O yaal es, ke heblitoona a fi’e, too a maada o yoqaa a seek.› 23O yaal mbind naa a laya o tag oxaa yee: ‹Reti na ƭat ake fo na xa salit axe, too fi’i fop ndax we o ga’kaa a ndokiid, ndax mbind ne mi a waag o may.› 24Yaam mexe layan a nuun ee: O leng no we nqoyeena a mbañ, ñaamkee na put ale mi.»

Ne Yeesu a wareena o reefanit

(ɗeeti Mace 10:37-38)

25Wiin mayu a ndeefanooga a Yeesu. Maaga, a geleerooxa, a lay a den ee:

26«Oxuu bugaxama o reefan, too moƴaninum a faap um mbaat a ya um mbaat o teem mbaat xa ƥeem mbaat maag um mbaat xa teɓ um mbaat o ñis um sax, waagkee o ref o taalbe es.#Mace 10:37 27Oxuu gadooxeerna a kurwaa um, a reefanaam, waagkee o ref o taalbe es.#9:23; Mace 10:38; 16:24; Mark 8:34 28O kiin na nuun a bugangaa o maxin taax-took, ndax moofkee boo a ɗeet ne xaaliis um a fodna, boo a and ndax a jega kaa ta ƴutandtuuna? 29Aha kañ, yaam ndik ta doonin soo waagkiran o ƴutand. Yaaga we na nga’kan fop xan a nqaadnooxan, 30a layaa yee: ‹O koor oxene a fera tabax, too waagiran o ƴutand.› 31Kaam ee o maad oxuu na xire’kaa fo o maad o lakas xan a eet o moof, a xalaat boo a and, ndax fo xiixire cuni xarɓaxay we ta jegna a waaga o xire’ik fo xe na ñoxoriidaa fo ten yoonitna xiixire cuni qarɓeen ƭik. 32A waagangiran, too o maad oxe ta warna o xettik a maad o goƭaa, xan a lul o tag no dag we ten ndax da njamoor. 33Neene boog, oxuu waaseerna na nuun ke ta jegna fop soo a reefanaam, waagkee o ref o taalbe es.»

Fo jem fo maasu le

(ɗeeti Mace 5:13; Mark 9:50)

34«Fo jem tig paax oo. Kaa koy, boo fo jem a jemateerna, xar waagatu o tax ta jem? 35Jiriiñee tus no lanq ke too waagee a tos, a refangee a deɓel tafil. Oxuu jegna nof nanir, fat a nan-giloox!»

Currently Selected:

Lik 14: SRR23

Highlight

Copy