ມັດທາຍ 2
2
ໂຫລາຈານມາພົບພຣະເຢຊູເຈົ້າ
1ຫລັງຈາກທີ່ພຣະເຢຊູເຈົ້າໄດ້ເກີດທີ່ເບັດເລເຮັມໃນແຂວງຢູດາຍ, ໃນສະໄໝຂອງກະສັດເຮໂຣດ, ມີພວກໂຫລາຈານ#2:1 ໂດຍປົກກະຕິແປວ່າ ນັກປາດຈາກທິດຕາເວັນອອກໄດ້ມາທີ່ນະຄອນເຢຣູຊາເລັມ 2ແລະ ໄດ້ຖາມວ່າ, “ຜູ້ທີ່ມາເກີດເປັນກະສັດຂອງຊາວຢິວນັ້ນຢູ່ໃສ? ພວກເຮົາໄດ້ເຫັນດາວຂອງເພິ່ນປາກົດຂຶ້ນທາງທິດຕາເວັນອອກ ແລະ ພວກເຮົາຈຶ່ງມາເພື່ອຈະນະມັດສະການເພິ່ນ”.
3ເມື່ອກະສັດເຮໂຣດໄດ້ຍິນດັ່ງນັ້ນແລ້ວກໍກັງວົນໃຈຫລາຍ ແລະ ຊາວເຢຣູຊາເລັມທຸກຄົນກໍພາກັນກັງວົນໃຈນໍາດ້ວຍ. 4ເມື່ອເຮໂຣດໄດ້ເອີ້ນພວກຫົວໜ້າປະໂລຫິດ ແລະ ພວກຄູສອນກົດບັນຍັດຂອງປະຊາຊົນທັງໝົດມາເຕົ້າໂຮມກັນແລ້ວ, ເພິ່ນກໍໄດ້ຖາມພວກເຂົາວ່າພຣະຄຣິດເຈົ້າ#2:4 ຫລື ພຣະເມຊີອາຈະມາບັງເກີດຢູ່ທີ່ໃດ. 5ພວກເຂົາຕອບວ່າ, “ຢູ່ໃນເມືອງເບັດເລເຮັມແຂວງຢູດາຍ, ເພາະຜູ້ທຳນວາຍໄດ້ຂຽນໄວ້ດັ່ງນີ້ວ່າ:
6“‘ສ່ວນເຈົ້າ ເບັດເລເຮັມໃນດິນແດນຢູດາຍເອີຍ,
ເຈົ້າບໍ່ແມ່ນຜູ້ເລັກນ້ອຍທີ່ສຸດໃນທ່າມກາງບັນດາຜູ້ປົກຄອງຂອງຢູດາຍ,
ເພາະຈະມີຜູ້ປົກຄອງຜູ້ໜຶ່ງອອກມາຈາກເຈົ້າ
ຜູ້ທີ່ຈະເປັນຜູ້ລ້ຽງປະຊາຊົນຊາວອິດສະຣາເອນຂອງເຮົາ’#2:6 ມກ 5:2,4”.
7ດັ່ງນັ້ນ ເຮໂຣດຈຶ່ງເອີ້ນພວກໂຫລາຈານເຂົ້າມາພົບຢ່າງລັບໆ ແລະ ສືບຖາມພວກເຂົາເຖິງເວລາທີ່ແນ່ນອນທີ່ດາວນັ້ນໄດ້ປາກົດຂຶ້ນ. 8ແລ້ວເພິ່ນກໍໃຊ້ພວກໂຫລາຈານໄປຍັງເບັດເລເຮັມ ແລະ ສັ່ງພວກເຂົາວ່າ, “ຈົ່ງໄປຊອກຫາກຸມມານນັ້ນຢ່າງຄັກແນ່. ເມື່ອພວກເຈົ້າພົບເພິ່ນແລ້ວຈົ່ງບອກໃຫ້ເຮົາຮູ້ທັນທີ, ເພື່ອເຮົາຈະໄດ້ໄປນະມັດສະການເພິ່ນເໝືອນກັນ”.
9ຫລັງຈາກພວກໂຫລາຈານໄດ້ຍິນຄຳສັ່ງຂອງກະສັດແລ້ວ, ພວກເຂົາກໍພາກັນເດີນທາງອອກໄປ ແລະ ດາວທີ່ພວກເຂົາໄດ້ເຫັນເມື່ອເວລາທີ່ດາວປາກົດຂຶ້ນນັ້ນ ກໍໄດ້ນຳໜ້າພວກເຂົາໄປຈົນໄດ້ມາຢຸດຢູ່ຊື່ບ່ອນທີ່ກຸມມານຢູ່. 10ເມື່ອພວກເຂົາໄດ້ເຫັນດາວນັ້ນແລ້ວ, ພວກເຂົາກໍຊື່ນຊົມຍິນດີຫລາຍ. 11ເມື່ອເຂົ້າໄປໃນເຮືອນ, ພວກເຂົາກໍໄດ້ເຫັນພຣະກຸມມານພ້ອມກັບມາຣີແມ່ຂອງເພິ່ນ, ແລ້ວພວກເຂົາຈຶ່ງກົ້ມລົງຂາບ ແລະ ນະມັດສະການເພິ່ນ. ແລ້ວພວກເຂົາກໍໄຂຫີບສົມບັດຂອງພວກເຂົາອອກມາ ແລະ ມອບຂອງຖວາຍແກ່ພຣະອົງຄື: ຄຳ, ກຳຍານ ແລະ ຢາງໄມ້ຫອມ. 12ແລະ ພວກເຂົາໄດ້ຮັບຄຳເຕືອນທາງຄວາມຝັນວ່າບໍ່ໃຫ້ກັບໄປຫາເຮໂຣດ, ດັ່ງນັ້ນ ພວກເຂົາຈຶ່ງກັບຄືນໄປປະເທດຂອງຕົນໂດຍໃຊ້ທາງເສັ້ນອື່ນ.
ການໜີໄປເອຢິບ
13ເມື່ອພວກໂຫລາຈານໄດ້ຈາກໄປແລ້ວ, ເທວະດາຕົນໜຶ່ງຂອງອົງພຣະຜູ້ເປັນເຈົ້າໄດ້ມາປາກົດແກ່ໂຢເຊັບໃນຄວາມຝັນ ແລະ ກ່າວວ່າ, “ຈົ່ງລຸກຂຶ້ນ ພາກຸມມານ ແລະ ແມ່ຂອງເດັກໜີໄປຍັງປະເທດເອຢິບ. ຈົ່ງຢູ່ທີ່ນັ້ນຈົນກວ່າເຮົາຈະບອກເຈົ້າ, ເພາະເຮໂຣດກຳລັງຊອກຫາກຸມມານເພື່ອຈະຂ້າເພິ່ນ”.
14ໂຢເຊັບຈຶ່ງລຸກຂຶ້ນ ພາກຸມມານ ແລະ ແມ່ຂອງເພິ່ນເດີນທາງໄປຍັງປະເທດເອຢິບໃນເວລາກາງຄືນ 15ແລະ ໄດ້ຢູ່ທີ່ນັ້ນຈົນເຮໂຣດຕາຍ. ເຫດການທີ່ເກີດຂຶ້ນທັງໝົດນີ້ກໍເພື່ອໃຫ້ສຳເລັດຕາມທີ່ອົງພຣະຜູ້ເປັນເຈົ້າໄດ້ກ່າວໄວ້ຜ່ານທາງຜູ້ທຳນວາຍວ່າ, “ເຮົາໄດ້ເອີ້ນເອົາບຸດຂອງເຮົາອອກຈາກປະເທດເອຢິບ”.#2:15 ຮສອ 11:1
16ເມື່ອເຮໂຣດໄດ້ຮູ້ວ່າພວກໂຫລາຈານຫລອກລວງຕົນ, ເພິ່ນກໍໃຈຮ້າຍຫລາຍ ແລະ ເພິ່ນຈຶ່ງສັ່ງໃຫ້ຂ້າເດັກນ້ອຍຜູ້ຊາຍທັງໝົດໃນເບັດເລເຮັມ ແລະ ບໍລິເວນໃກ້ຄຽງທີ່ມີອາຍຸສອງປີລົງມາ, ເຊິ່ງສອດຄ່ອງກັບເວລາທີ່ເພິ່ນໄດ້ຮູ້ຈາກພວກໂຫລາຈານ. 17ເຫດການທີ່ໄດ້ເກີດຂຶ້ນນີ້ກໍໄດ້ສຳເລັດຕາມທີ່ຜູ້ທຳນວາຍເຢເຣມີຢາໄດ້ກ່າວໄວ້ວ່າ:
18“ໄດ້ຍິນສຽງໜຶ່ງໃນບ້ານຣາມາ,
ເປັນສຽງຮ້ອງໄຫ້ ແລະ ສຽງຄ່ຳຄວນ,
ນາງຣາເຊັນກຳລັງຮ້ອງໄຫ້ນໍາບັນດາລູກຂອງຕົນ
ແລະ ບໍ່ຍອມຮັບຄຳປອບໃຈໃດໆ,
ເພາະລູກທັງຫລາຍນັ້ນຕາຍແລ້ວ”.#2:18 ຢມຢ 31:15
ການກັບມາຍັງນາຊາເຣັດ
19ຫລັງຈາກເຮໂຣດໄດ້ຕາຍແລ້ວ, ເທວະດາຕົນໜຶ່ງຂອງອົງພຣະຜູ້ເປັນເຈົ້າໄດ້ມາປາກົດແກ່ໂຢເຊັບທາງຄວາມຝັນໃນປະເທດເອຢິບ 20ແລະ ໄດ້ກ່າວວ່າ, “ຈົ່ງລຸກຂຶ້ນ, ພາກຸມມານ ແລະ ແມ່ຂອງເພິ່ນກັບຄືນໄປຍັງດິນແດນອິດສະຣາເອນ, ເພາະບັນດາຜູ້ທີ່ພະຍາຍາມເອົາຊີວິດກຸມມານນັ້ນໄດ້ຕາຍແລ້ວ”.
21ດັ່ງນັ້ນ, ໂຢເຊັບຈຶ່ງລຸກຂຶ້ນ, ພາກຸມມານ ແລະ ແມ່ຂອງເພິ່ນມາຍັງດິນແດນອິດສະຣາເອນ 22ແຕ່ເມື່ອລາວໄດ້ຍິນວ່າອາກເຄລາວໄດ້ຂຶ້ນປົກຄອງແຂວງຢູດາຍແທນເຮໂຣດຜູ້ເປັນພໍ່, ໂຢເຊັບກໍຢ້ານທີ່ຈະໄປທີ່ນັ້ນ. ຫລັງຈາກໄດ້ຮັບຄຳເຕືອນໃນຄວາມຝັນ, ໂຢເຊັບຈຶ່ງໄປຍັງແຂວງຄາລີເລ, 23ແລະ ໄປອາໄສຢູ່ທີ່ເມືອງໜຶ່ງຊື່ວ່ານາຊາເຣັດ. ດັ່ງນັ້ນ ຈຶ່ງສຳເລັດຕາມທີ່ໄດ້ກ່າວໄວ້ຜ່ານທາງບັນດາຜູ້ທຳນວາຍວ່າ, “ທ່ານຈະຖືກເອີ້ນວ່າ: ໄທນາຊາເຣັດ”.
Currently Selected:
ມັດທາຍ 2: LCV
Highlight
Share
Copy
Want to have your highlights saved across all your devices? Sign up or sign in
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
