Zaburi Sya Daud 71
71
In te, Domine, speravi.
1Wenga, Bambo, nikukimbalila:
Nisikoseka lihamu mumu pela.
2Pa kukita malinga kwako unifuwule, ukaniyokole:
Unihenekele likutu lyako, ukaniyokole.
3Utame kwa nenga liganga lya kulama lyakutamila baho, uku nibita kibitile:
Utaukile kuniyokola, ndawa wenga liganga lya ulema wangu, ni lilinga lyangu.
4Uniyokole, Mlungu wangu, pa kiwoko kya wawifu:
Pa kiwoko kya yula wakuhengesa na wakugiginala.
5Ndawa wenga kawili mkukumbatila, Bambo Mlungu:
Kuhuwalila kwangu kitumbulile ukeke wangu.
6Nilamisike nu wenga kitumbulile pa lileme:
Wenga wamwene unipisite pa matumbo ya mao; yanikulumbe kilumbile.
7Niyii ngati kinyautiti kwa wingi:
Koma wenga uku nikimbalila kwene mbafu.
8Pa ndomo pangu yapameme malumbo gako:
Na kapambiko kako musi gwoha.
9Usinitaga pa lukumbi lwa kugogoloka:
Pa kulala makakala gangu usinileka.
10Ndawa wakuniwipila wakita ga nenga:
Na wala wakugulindilila umi wangu wapangana malango.
11Kukita, Mlungu wandekite:
Munkisaye, mukankamule, ndawa payilepe wakuwula.
12Mlungu, usibita kutali kwa nenga:
Mlungu wangu, yumbatika kunitangatila.
13Wakoseke lihamu wakalale wala wakanila umi wangu:
Wafunakalike nu kudogeka ni mihenje wala walonda‐londa fiwifu kwa nenga.
14Koma nenga yanihuwalile kihuwalile:
Na yaniyonjekese panani pa kulumba kwako kwoha.
15Pa ndomo pangu yapawalange kukita malinga kwako, nu uyokosi kwako musi gwoha:
Ndawa nakumanya mawalangiko gake.
16Yaniyiche ni fya kigosi fya Bambo Mlungu:
Yaniwandise umu ukitila malinga, ena wenga wakape.
17Mlungu, uniyigilise kitumbulile ukeke wangu:
Na mpaka hino niyenesa fya kupambana fyako.
18Ena, haka nikagogolwike na wona niyii ni fulisa; Mlungu, usinileka:
Mpaka niyenese kiwoko kyako kwa kihogosi kingi, ni kigosi kyako kwa ayii yoha yula yayiche.
19Kukita malinga kwako kawili, Mlungu, kuyii kwakunyanyamulika:
Wenga wakukita fikulungu, Mlungu, nna ngati wenga?
20Wenga, wakutilasa fyakufinyikisa fingi ni fiwifu:
Yaukiliuke, yautilamise, na pa fyakunyoleka fya ndima yautikwese kawili.
21Ugukite wingi ukulungu gwangu:
Ukakiliukile kawili kuninyamasa.
22Yaniwandise mbili yako nu muhawala, ga chakaka gako, Mlungu wangu:
Yanikuyimbile zabur pa lipango, wenga Wambalafu wa Israel.
23Milomo yangu yayilulute wona mukuyimbila zabur:
Nu umi wangu gula ugukombwili.
24Lumilo lwangu kawili yalwikanile musi gwoha pa kukita malinga kwako:
Ndawa wawona soni, ndawa wakoseka lihamu, wala walonda‐londa fiwifu pa nenga.
Currently Selected:
Zaburi Sya Daud 71: MGSPSA
Highlight
Share
Copy
Want to have your highlights saved across all your devices? Sign up or sign in
First published in 1913, by the Universities' Mission to Central Africa Mission Press