SAN LUCAS 20

Jun toclen Jesús at tuꞌn Dios

(Mt. 21:23-27; Mr. 11:27-33)

1Te jun kꞌij ocx Jesús tuj tja Dios te kꞌolte xnakꞌtzbil cye xjal bix te kꞌumlte jbaꞌn tpocbalel tcawbil Dios. Bix e pon kej pala mas nintzaj, cyuyax txꞌolbal ley bix kej nejenel cye xjal te tnom, 2bix e xiꞌ cykbaꞌnxin te Jesús:

—Kbantz keya, ¿ti tey toclena tuꞌn tbinchana cykilcaj nbint tuꞌna tuj tja Dios? ¿Bix al e kꞌonte toclena tuꞌn tbint jlu tuꞌna?―tz̈ikexin.

3Aj ttzakꞌbeꞌn Jesús cyexin:

—Jax juꞌx weya cxeꞌl nkanena cyey. Cykbantz weya, 4tej t-xiꞌ tkꞌumen Juan Bautista tzul Jscyꞌoꞌn tuꞌn Dios bix e cuꞌx ke xjal tuj aꞌ tuꞌnxin, ejeeꞌj xjal e cyajbe tuꞌn tul cyil tuj cycꞌuꞌj bix tuꞌn binne cyten tej tulxin, ¿al e kꞌonte toclen Juan tuꞌn tbint jlu tuꞌnxin? ¿Japa Dios, ma jaxxin?―tz̈i Jesús.

5Bix akꞌ kej xin pala bix kej xin txꞌolbal ley yolel cyxolx ti tten tuꞌn taj cytzakꞌbeꞌnxin:

—E tkbaxne jxin Juan Bautista ja Jesús Jscyꞌoꞌn tuꞌn Dios. Katzen ma txiꞌ kkbaꞌn te Dios taakꞌen Juan Bautista, ctkbaꞌtzen Jesús ke: “Ka juꞌwa, ¿tikentzen min e cyocslay tyol?” tz̈i tbel ke. 6Pero ka ma txiꞌ kkbaꞌn yaaꞌn te Dios taakꞌen e bint tuꞌn Juan, sino e tkꞌumexin nuk texxin tyolxin, ka ko tz̈i juꞌwa, ko cweltzen tuꞌn xak cyuꞌn xjal, cuma tuj cywitz xjal, tyolel Diosxin―tz̈ikexin cyxolxxin. 7Juꞌ tzunj e xiꞌ cykbaꞌnxin te Jesús:

—Mintiiꞌ tumel kuyena ka te Dios taakꞌen e bint tuꞌn Juan Bautista, bix ka min―tz̈ikexin.

8Bix e xiꞌ tkbaꞌn Jesús cyexin:

—Ka cycyꞌiy txiꞌ cykbaꞌna al e tzaj kꞌonte toclen Juan Bautista, jax mlay txiꞌ nkbaꞌna cyey al e tzaj kꞌonte weya woclen―tz̈i Jesús.

Jun techel cyiꞌj akꞌanal yaꞌan baꞌn

(Mt. 21:33-44; Mr. 12:1-11)

9Bix e xiꞌ tkbaꞌn Jesús jun tumel cye xjal:

—At junxin xjal e cuꞌx tawaꞌnxin uva tuj ttxꞌotxꞌxin. Bix e cub tnincꞌuꞌnxin cyuya ke t-akꞌanalxin tuꞌn t-xiꞌ cycyeꞌyen tiꞌj tawalxin, niyꞌjantzen twitz awal te cye bix niyꞌjantzen texin. Bix e xiꞌxin tuj jun tnom nakch, bix e tenxin nim tyem. 10Tejtzen tpon tumel tuꞌn t-xilj uva, e xiꞌ tsmaꞌnxin jun tsanjelxin cyuya t-akꞌanalxin, te kꞌilte niyꞌjan texin. Pero tej tpon tsanjelxin, bix oc cypjuꞌn ke t-akꞌanalxin, bix aj cysmaꞌnxin mintiiꞌ chꞌin kꞌiꞌn tuꞌn. 11Bix e xiꞌ tsmaꞌn taaw txꞌotxꞌ juntl tsanjelxin cyuya. Tej tpon sanjel, jax juꞌx e baja oc pjet cyuꞌnxin bix e baj yaset, bix aj mintiiꞌ chꞌin kꞌiꞌn tuꞌn. 12Bix e xiꞌ tsmaꞌn taaw txꞌotxꞌ juntl te toxen, pero jax juꞌx e baj cyyasen ke t-akꞌanalxin, bix el cylojoꞌnxin. 13E xiꞌ tkbaꞌn taaw txꞌotxꞌ: “¿Ti pjel weya? Cxeꞌlne nsmaꞌna oꞌcxcꞌa junx ncwala n-oc takꞌ weya. Kape cyniman ja ncwala oj tpon,” tz̈ixin. 14Pero tej t-xiꞌ cycyeꞌyen ke akꞌanal tcwalxin, e xiꞌ cykbaꞌnxin cyxolxxin: “Lu jkꞌa tcwal jxin taaw txꞌotxꞌ tzule. Tele tekꞌa cyjela ja txꞌotxꞌa te tkabkꞌa. Ko kbyaꞌcꞌakꞌa, tuꞌntzen tcyaj te ke,” tz̈ikexin. 15Bix ex cyiiꞌnxin tuj cojbil, bix e cub cybyoꞌnxin―tz̈i Jesús.

Bix e xiꞌ tkbaꞌntl Jesús cye xjal:

—¿Ti tseꞌ taaw txꞌotxꞌ ke t-akꞌanal? 16Cxeꞌl nkbaꞌna cyey, tzulxin bix chi cwel tbyoꞌnxin kej akꞌanala bix cnincꞌulxin tiꞌj cyuya cabtl xjal―tz̈i Jesús.

Tejtzen toc cybiꞌn xjal tyol Jesús, eltzen cyniyꞌ cyiꞌj t-akꞌanal taaw txꞌotxꞌ jun cyechel nejenel cye xjal cyxol judío el cyiiqꞌuen Jesús, bix e xiꞌ cykbaꞌn:

—¡Min! Mlay tzꞌel cyiiqꞌuen Jsmaꞌn tuꞌn Dios juꞌwa―tz̈i ke xjal tuj tja Dios.

17Oc tcyeꞌyen Jesús ejeeꞌ, bix e xiꞌ tkbaꞌnxin:

—Tzin cykbaꞌna mlay tuꞌn tel iiqꞌuet Jscyꞌoꞌn tuꞌn Dios, pero ka juꞌwa, ¿tikentzen tzin tkbaꞌn tyol Dios tiꞌj Scyꞌoꞌn tuꞌn Dios cyjulu: “Jxak el cyiiqꞌuen ke binchal jaaꞌ, cꞌoquel xak tej xak mas nintzaj te t-xeeꞌ jaaꞌ,” tz̈i tyol Dios? 18Jatzen xak kbalte ti pjel cye xjal. Alj xjal ncub tzꞌak twiꞌ jxak lu, biꞌx cwel buchj tuꞌn, bix oj ttzaj tzꞌak jxak lu tibaj jun xjal, biꞌx cwel patzꞌex―tz̈i Jesús.

Jun tumel tiꞌj chojentj

(Mt. 21:45-46; 22:15-22; Mr. 12:12-17)

19Tex jkꞌij, e cyajbe ke txꞌolbal ley bix kej pala mas nintzaj te tzyulte Jesús, cuma el cyniyꞌ tiꞌj tumel cyiꞌj t-akꞌanal jxin taaw txꞌotxꞌ e cub cybyoꞌn jkꞌa tcwalxin, cyiꞌjx toca ti japenina ja yola. Pero min e cub cytzyuꞌn jaxin, cuma at cytz̈i xjal cyiꞌj. 20Pero e jyonkexin tumel ti tten tuꞌn tcub tzꞌak Jesús tuj cykꞌabxin. E xiꞌ cysmaꞌnxin ke cyxelxin te xkelbilte te Jesús tiꞌ tyol, tisencꞌa e cyajbe tuꞌn cybinte alcye tnaablxin. Oc cyipen tuꞌn tcub tzꞌak Jesús tuj tyol tuꞌnj tkbantexin kaꞌ tiꞌj Roma, tuꞌntzen baꞌn t-xiꞌ cyiiꞌn jaxin twitz gobernador te kbalte ka yaaꞌn baꞌn tyolxin. 21E xiꞌ cykanenxin:

—Xnakꞌtzal, ktzkiꞌna jxnakꞌtzbil tzin tkꞌoꞌna jaxxix yol, bix nuk tuj tumel tzin tkꞌumena. Mintiiꞌ tey tzin tyeecꞌa pabl cye xjal. Judíole, aj Romale, mintiiꞌ cytz̈i tiꞌja te kbalte cye cykilca xjal ti taj Dios. 22Juꞌ tzunj, kbantz keya, ¿tajpa Dios tuꞌn t-xiꞌ kkꞌoꞌn te cawel te Roma jchojentj tzin tkanen ke, bix ka min?―tz̈ikexin.

23El tniyꞌ Jesús tiꞌj nuk e cyajbe tuꞌn tcub tzꞌak tuj tyolxin, tuꞌntzen ttzaj tkꞌoj jxin gobernador oj taj ttzakꞌbeꞌnxin tuꞌn yaaꞌn il tiꞌj tuꞌn t-xiꞌ cychjoꞌn judío chojentj te Roma, bix ka tuꞌn ttzaj cykꞌoj judío oj t-xiꞌ tkbaꞌnxin jtajbil Dios tuꞌn t-xiꞌ cychjoꞌn judío chojentj te Roma. E xiꞌ tkbaꞌnxin cye:

24—Cyyeecꞌatz jun pwak weya. ¿Ale tzunj witzbaj tcub twitz ja pwaka, bix ale biybaj toc tjakꞌ witzbaja?―tz̈ixin.

Aj cytzakꞌbeꞌnxin:

—Te cawel te Roma―tz̈ikexin.

25E xiꞌ tkbaꞌn Jesús cyexin:

—Ka juꞌ ttena, cykꞌonx te cawel te Roma alcyej te, bix cykꞌonx te Dios alcyej te Dios―tz̈i Jesús.

26Juꞌtzen e baj min e bint cyuꞌnxin tuꞌn tcub tzꞌak Jesús tuj cyxkelbilxin cywitz xjal. E jaw kleeꞌkexin, bix min akꞌtlkexin.

Jun kanbil tiꞌj itzꞌjlenel tuj cyamecy

(Mt. 22:23-33; Mr. 12:18-27)

27Mas yaj e pon tuya Jesús juntl cloj xjal, saduceo tbi cycloj. E cykba juntl clojxin lu mlay chi jatz itzꞌj cyimne juntl maj tuj cyamecy, tisen tzunj e tkba Jesús. 28E xiꞌ cykanexin texin:

—Xnakꞌtzal, e cyaj ttzꞌiꞌben Moisés ja ley lu: “Ka ma cyim jun xinak, bix ka min-al tal t-xuꞌl, il tiꞌj tuꞌn tmaje jun ttzicy bix ka jun titzꞌen tuya t-xuꞌl, tuꞌntzen titzꞌj jun tiyꞌjil, tuꞌntzen miꞌn naj tiyꞌjil,” tz̈i tley Moisés. 29Attzen jun maj at jun cloj te wuuk xinak cyitzꞌen cyiib. E maje cytzicy tuya jun xuuj, pero e cyimxin, bix min-al tcwalxin e cyaj. 30Bix e maje tneel titzꞌenxin tuya t-xuꞌlxin, tisen tzin tkbaꞌn tley Moisés, pero jax juꞌx e cyimxin, bix min-al tcwalxin e cyaj. 31Juꞌx e baj te toxen. Cykilcaj wuuk e maje tuya junx cyxuꞌlxin, bix cykilcakexin e cyimkexin, bix minxn-al jun cycwalxin e tzaj tiꞌ xuuj. 32Lepchxetzen tej tbajtl te xuuj. 33Ojtzen cyjatz itzꞌj ke cyimne juntl maj tuj cyamecy, ¿altzen cyxolj wuuk xinak cꞌoquel te tchmil ja xuuj? ¿Yaaꞌmpatzen il tiꞌj tuꞌn cyoc cykilcaj wuuk xinak te tchmilxuj, cuma tchmilbaxuj ejeeꞌ?―tz̈i ke saduceo, tuꞌn tcub cyyeecꞌan at pajbaj tuj cyaꞌj ka ma chi jatz itzꞌj ke cyimne tuj cyamecy juntl maj.

34Aj ttzakꞌbeꞌn Jesús cyexin:

—Twitz txꞌotxꞌ at najleꞌn. 35Pero cyxolj xjal ckꞌojel cye tuꞌn cyjatz itzꞌj tuj cyamecy juntl maj, bix min-altltzen te cmajebel. 36Ya mintiiꞌtl il tiꞌj tuꞌn cyitzꞌj neeꞌ, cuma ke xjal ya miꞌn chi cyimtl. Chi oquel tisen ke tsanjel Dios tuj cyaꞌj min chi cyim. Mlay chi cyim xjal, cuma jchunkꞌlal ckꞌojel cye tisen tchunkꞌlal Dios. 37Tuj cywitza, oj cycyim xjal, cyimneke te junx maj. Pero yaaꞌn juꞌwa. Cꞌoquel cycꞌuꞌja tiꞌj e cyaj ttzꞌiꞌben Moisés jun xnakꞌtzbil cyiꞌj xjal o cyim. Tej tyolen Dios tuj jun cꞌul chꞌiꞌx tuya Moisés, ja tzunxin e kbante cyjulu: “Inayena Tdios Abraham bix Tdios Isaac bix Tdios Jacob,” tz̈i Dios. 38Nukettzen cyimnen kej lu te junx maj tisen tzin cykbaꞌna, minttzele e tkba Dios te Moisés ka jaxin Cydios, cuma texin nuk Cydios kej xjal iꞌtz jaxin. Tuj twitz Dios, luke iꞌtz kej xjal o chi cyim―tz̈i Jesús cye saduceo.

39At juun cyxol txꞌolbal ley e xiꞌ cykbaꞌn:

—Xnakꞌtzal, baꞌn ma yolena―tz̈ikexin.

40Tej tbaj ttzakꞌbeꞌn Jesús cye saduceo, min-al juntl e tnimsa tiib tuꞌn tbaj t-xkelentl te Jesús.

¿Ale cwalbaj Cristo tuj cywitza?

(Mt. 22:41-46; Mr. 12:35-37)

41Bix e xiꞌ tkbaꞌn Jesús cye txꞌolbal ley:

—Inayen tzuna cꞌoquel nkanen te cyey. ¿Tikentzen e kbaj Jscyꞌoꞌn tuꞌn Dios te cawel tcwal jrey David? 42Cꞌoquel cycꞌuꞌja tiꞌj jax David e kbante ka ja Scyꞌoꞌn tuꞌn Dios Taawxin. Tuj uꞌj te Salmos tzin tkbaꞌnxin: “E xiꞌ tkbaꞌn Dios te Waawiya: ‘Kequey tuj nmankꞌaba te tneel xjal. 43Tcyaja tzalu hasta ojxe cyocx kꞌojlel tiꞌja tjakꞌ tkena wuꞌna,’ tz̈i Dios te Waawiya,” tz̈i David. 44Cykbantz weya, tej t-xiꞌ tkbaꞌn David ka Taawxin Jscyꞌoꞌn tuꞌn Dios, ¿tiken cꞌoquela kkꞌumen ka tcwal David Jscyꞌoꞌn tuꞌn Dios?―tz̈i Jesús.

Bix min akꞌlkexin tuꞌn.

Tej tyole Jesús tiꞌj cymodo txꞌolbal ley yaaꞌn baꞌn

(Mt. 23:1-36; Mr. 12:38-40; Lc. 11:37-54)

45Bix e xiꞌ tkbaꞌnxin cye t-xnakꞌatzxin cywitz cykilca xjal:

46—Miꞌn txiꞌ cyiiꞌna cynaabla tisen nbint cyuꞌn txꞌolbal ley. Cyaj tuꞌn cyiyꞌ cyxol xjal tuya cyxbalen jawnex te yecꞌbil jawnexsenke, bix oj nchi bet tuj plaza, cyaj tuꞌn cyoc kꞌolbet tujxix tumel. Cyaj ejeeꞌ chi oquex nejl tuj kꞌukbil mas jawnex tuj camon jaaꞌ, bix tiyꞌ cyuj ninkꞌij nchi jyonxin kej kꞌukbil te nimbil tiꞌ mes. 47Pero ejeeꞌ, nchi kanen nim manbil cypwak cye viuda, tuꞌntzen ka min xchjet cyuꞌn viuda, n-eltzen cyiiꞌntl cyjaxuj. Pero amale minttiiꞌ lastim cye viuda cyuꞌnxin, bix nchi naꞌnxin Dios nim tyem cywitz xjal, tuꞌntzen nim nchi ajbenxin te Dios tuj cywitzxin. Ejeeꞌ tzunj txꞌolbal ley, ckꞌojel mas castiwa cye tuꞌn Dios cywitzj cye niyꞌtl aj il―tz̈i Jesús cye t-xnakꞌatzxin.

Currently Selected:

SAN LUCAS 20: mamTS

Highlight

Copy