प्रेरित कितबवाक परिचय
कितबवाक परिचय
बहुत जन बाइबलक विद्धवानसभक विचारमा, लउठि नियममा भेलि २७ गो कितबवा मधे दु गो कितबवा लुकाक लिखलि खुसिक समाद हसे प्रेरितवानिक काम, प्रेरित कहले परमेस्वरक खुसिक समाद परचार करे पठावेके तहिँया येसु ख्रिस्टक चुनलि बारह जन चेलवाह हखइ। लुका इअ दुन्हुँ कितबवा थियोफिलस कहल एक जन मन्सेक तहिँया लिखलिय। उअ “खुसिक समादमा” येसु ख्रिस्टक बारेमा लिखलिय। लुका “प्रेरितवानिक कमवामा” येसुजिक छानलि प्रेरितवानिक हसे प्रेरित पावलक करलि कमवाक बारेमा लिखलिय। लुका एक जन बइध हसे इतिहासकार रहलिय। (थप जानकारिक तहिँया “लुकाक लिखलि खुसिक समाद” कितबवाक परिचय हेरे सकबहुँ) उअ कितबवामा येसु ख्रिस्ट स्वरगमा लिगइलि जुनवासे लेके धरतियाक कोने-कोनलइ कस्के खुसिक समाद फइललइ कहके लिखले बडिय। इअ कितबवाक कुनहुँ-कुनहुँ खन्डमा हमरा सबद उल्लेख भेलि ठउरियामा लुका यपनहिँ फेनि वहवाँ रहलिय कहके जाने सकबहुँ। लुका पावलक सङहतिया रहलिय हसे पावलक परचार यातरामा उअ फेनि कुनहुँ-कुनहुँ ठउरियामा वकरेसाङे गेल रहलिय (प्रेरित १६:१०-१७; २०:५–२१:१७)। पावल रोममा जाइखुनि लुका फेनि वकरसाङे गेल रहलिय (प्रेरित २७:१-२)। पावल रोमक झ्यालखनवामा परइखुनि लुका वकर सेवा करले रहलिय। (२ तिमोथि ४:११)।
इअ कितबवाके “प्रेरितवानिक काम” कहके जनसइ, बाकि सदियो इअ कितबवाके “पवितर-आत्माक काम” फेनि कहे सकेसइ, केहकेकि प्रेरितवानिक करलि जम्मे कमवा पवितर-आत्माक अनुग्रह हसे सक्तिसे कराइल रहलइ। प्रेरितवाह जहवाँ-जहवाँ गेलइ, पवितर-आत्मा वहवाँ फेनि येसु ख्रिस्टक बारेमा मन्सावानिके खुसिक समाद परचार करेके तहिँया हुनुकाके सक्ति देलसि। तखनहिँ प्रभु येसुजिमा विस्वास करलहरानिके खाँ सतोलइ, ताफेनि इसाइ विस्वास यरुसलेमसे सुरु भके रोमलइ फइललइ। उहेसे इअ कमवा पवितर-आत्माक सक्तिसे भेल हखइ कहके बुझे सकेसइ।
बिसय सुचि
येसुजि स्वरगमा गेलेपर पवितर-आत्मा याके प्रभु येसुजिमा विस्वास करलहरानिके, याको यहुदियानिके फेनि खुसिक समाद परचार करेके तहिँया सक्ति देलसि। प्रेरित १:१–६:७
यहुदि मन्सावाह स्तिफनसक हत्या करलइ, बाकि प्रभु येसुजिमा विस्वास करलहराह बहुत ठउरिमा जाके परचार करलइ हसे पाछेसे पावल फेनि विस्वास करलिय। प्रेरित ६:८; ९:३१
पतरुस, बारनाबास हसे पावल फेनि पाछेसे अयहुदियानिके येसुजिक बारेमा परचार करलइ। प्रेरित ९:३२; १२:२४
पावल हसे वकर सङहतियवाह अयहुदियानिके परचार करलइ हसे यरुसलेमक यगुवाह गल्ति सिछाके सुधार करलइ। प्रेरित १२:२५–१६:५
पावल बहुत ठउरिमा जाके परचार करलिय हसे वकर परचार सुनके बहुत जन विस्वास करलइ। प्रेरित १६:६; १९:२०
पावल झ्यालखनवामा परके रोममा गेलिय, वहवाँ फेनि उअ येसुजिक बारेमा बहुत जनके परचार करलिय। प्रेरित १९:२१; २८:३१
Currently Selected:
प्रेरित कितबवाक परिचय: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society