युहन्ना 21
21
येसुजि सात जन चेलवानि लघिना देखा परलसि
1वकरपाछा येसुजि फेरि यापन चेलवानि लघिना परकट भेलसि। इअ पारि हुने तिबेरियस तलवाक तिरवामा परकट भेलसि। इअ यसके भेलइ: 2सिमोन पतरुस, जउराहा कहल थोमा, गालिलक काना सहरमा रहलाहर नथानेल, जब्दियाक दु जन बेटवा हसे हुनेक याको दु जन चेलवा फेनि सङहि रहलइ। 3सिमोन पतरुस हुनुकाके कहलिय, “मुइ त माछर मारे जाइ बडहिँ।” हुनुका सिमोनके कहलइ, “हमरा फेनि तोरसाङे जेबहुँ।” हुनुका जाके डोङवामा चढलइ, बाकि उहे राति हुनुका एगुडा फेनि माछर हइने मारलइ।#लुका ५:५
4धुसमुसहि बिहना येसुजि तलवाक तिरवामा ठडियलसि, बाकि चेलवाह येसुजि हखसि कहके हइने चिनलइ।
5तब येसुजि हुनुकाके कहलसि, “अजि सङहतियवाह, यपनहुँसभसाङे किहो माछर बडइ?”
हुनुका येसुजिके उतर देलइ, “अहँ, हइने बडइ।”
6येसुजि हुनुकाके कहलसि, “जलवा डोङवाक दहिनिकलहरवा खेपह हसे माछर पउबह।” तब हुनुका जलवा खेपलइ तके यतुरा बहुत माछर परलइ कि, हुनुका जलवा तानहिँ हइने सकलइ।#लुका ५:६
7इअ देखके येसुजिक प्रेम करलि चेलवा पतरुसके कहलिय, “हुने प्रभु हखसि!” इअ बतवा सुनतेकि पतरुस यापन बाहराक लुगवा ठेकनवामा घेउटलिय (केहकेकि उअ काम करेके तहिँया लुगवा फोउले रहलिय) हसे तलवामा उफरलिय। 8तखनहिँ याको चेलवाह डोङवामा बइठके मछरियासे भरलि जलवा तानते तिरवावरि यलइ। हुनुका तिरवासे बहुत तनाउ त हइने, बाकि लगभग सय मिटर जतुरा तनाउ रहलइ। 9जब हुनुका तिरवामा पुगलइ, तब वहवाँ कोइलवाक यगिया वपरा माछर हसे लजिके रोटि राखल देखलइ।
10तब येसुजि हुनुकाके कहलसि, “तोहार भरखे पकडलि किहो माछर मोर लघिना यनह।”
11सिमोन पतरुस डोङवामा चढके मछरियासे भरलि जलवा तिरवामा तानके यनलिय। उअ जलवामा एक सय तिरपन्न गो जबड-जबड माछर रहलइ। ताफेनि उअ जलवा हइने फटलिय। 12येसुजि हुनुकाके कहलसि, “यउह हसे जेउना करह।” तखनहिँ कुनहुँ चेलवा फेनि “यपनहुँ कुने हखहुँ?” कहके पुछेके याट हइने करलइ, केहकेकि हुनुका “हुने प्रभु हखसि” कहके जनले रहलइ। 13तखनहिँ येसुजि याके रोटिया लेके हुनुकाके देलसि हसे वसने मछरिया फेनि देलसि। 14मृत्युसे जिउतलेपर येसुजि यापन चेलवानि लघिना देखा परल इअ तिसरि पारि रहलइ।
येसुजि हसे पतरुस
15जब हुनुका खासकलइ, तब येसुजि सिमोन पतरुसके पुछलसि, “अरे युहन्नाक बेटवा सिमोन, कथि तुइ मोरके हिनिकरसे बहुत माया करसहिँ?”
उअ कहलिय, “हजि प्रभु, यपनहुँक थाह बडइ कि मुइ यपनहुँके माया करसहिँ।”
येसुजि वकरेके कहलसि, “मोर पठरुवानिके चरहोसि।”
16हुने वकरेके फेरि पुछलसि, “अरे युहन्नाक बेटवा सिमोन, कथि तुइ मोरके माया करसहि?”
उअ कहलिय, “हजि प्रभु, यपनहुँक थाह बडइ कि मुइ यपनहुँके माया करसहिँ।”
तब येसुजि वकरेके कहलसि, “मोर भेडवानिके चरहोसि।”
17हुने सिमोनके तिसरि पारि पुछलसि, “अरे युहन्नाक बेटवा सिमोन, कथि तुइ मोरके माया करसहि?”
तब सिमोन दुःखित भेलिय, केहकेकि येसुजि तिसरि पारि वकरेके “कथि तुइ मोरके माया करसहि?” कहके पुछलसि। उअ हुनेके कहलिय, “प्रभु यपनहुँ जम्मे बतवा जनसहुँ। मुइ यपनहुँके माया करसहिँ कहके यपनहुँ जनसहुँ।”
येसुजि वकरेके कहलसि, “मोर भेडवानिके चरहोसि। 18मुइ तोरके सदियो कहबहिँ, जब तुइ ढोठनिया रहलहि तुइ यापन फडवा यपनहिँ बनहिँ हसे जहवाँ मन लगइ वहवाँहिँ जाहि। बाकि जब तुइ बुढ हखबहि, तब तुइ यापन हथवा पसरोबहिँ हसे दोसरि जन तोर फडवा बानदेतइ तके तोर जहवाँ नाहिँ जायके मन लगतइ वहवाँहिँ लिगतइ।” 19कस्नुक खलिक मृत्युसे पतरुस परमेस्वरक यादर देबिय कहके येसुजि इअ बतवासे कहे खोजइ रहलसि। यतुरा कहके येसुजि वकरेके कहलसि, “मोर पाछा लाग।”
येसुजिक प्रेम करलि चेला
20पतरुस पाछवरि फिरके हेरइकि येसुजिक प्रेम करलि चेलवाके पाछा-पाछा यवइकि देखलिय। (इअ उहे चेलवा हखिय, जुने साँझखुनि जेउना करइ येसुजिक छतियामा वठङके, “प्रभु, यपनहुँके पकडा देलहरवा कुने हखिय?” कहके पुछले रहलिय।)#युहन्ना १३:२५
21उअ चेलवाके देखके पतरुस येसुजिके पुछलिय, “प्रभु, इअ मन्सावाक कथि हतइ त?”
22येसुजि पतरुसके कहलसि, “यगर मुइ नाहिँ यवइलइ उअ जिउते रहिय कहके मोर इछा बडइ त तोर कथि भेलइ? तुइ मोर पाछा लाग।” 23उहेसे उअ चेलवा नाहिँ मरबिय कहके हाला येसुजिक याको चेलवानिक बिचा फइललइ। येसुजि उअ नाहिँ मरबिय कहके हइने कहले रहलसि, “बाकि मुइ नाहिँ यवइलइ उअ जिउते रहिय कहके मोर इछा बडइ त तोर कथि भेलइ?” कहके कहले रहलसि।
24इअ उहे चेलवा हखिय, जुने इअ जम्मे बतवाक बारेमा गवाहि देइ बडिय। उहे इअ लिखले बडिय हसे हमार थाह बडइ कि वकर गवाहि सत्य बडइ।
25याको बहुत कामसभ येसुजि करलसि। यगर हुनेक करलि जम्मे कमवा एकहक करके लिखले जउँ, मोर यसनुक लगसइ कि, हुनेक बारेमा लिखलि कितबवा संसारमा फेनि नाहिँ यटेतइ।
Currently Selected:
युहन्ना 21: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
