युहन्‍ना 20

येसुजि जिइ उठलसि

(मति २८:१-८; मरकुस १६:१-८; लुका २४:१-१२)

1यतवरवाक दिन बिहना इजोर हखलिसे यागा मरियम मग्‍दलिनि चिन्‍डियामा यलिय हसे उअ चिन्‍डियाक मुहवामा रखलि पत्‍थरवा होटावल पउलिय। 2इअ देखके उअ सिमोन पतरुस हसे येसुजिक प्रेम करलि दोसरि चेलवा लघिना दगुरते जाके कहलिय, “हुनुका प्रभुके चिन्‍डियासे बाहरा लिगले बडइ हसे हुनेके कहवाँ रखले बडइ कहके हमार हइने थाह बडइ।”

3तब पतरुस हसे दोसरि चेलवा बाहरा निकडके चिन्‍डियावरि गेलइ। 4हुनुका दुन्‍हुँ जन सङ-सङहि दगुरलइ, बाकि दोसरि चेलवा पतरुससे हलहालि दगुरके वकरसे यागा चिन्‍डियामा पुगलिय। 5उअ ओन्‍हगातके चिन्‍डिया भितरा हेरइकि, घेउटलि सुतियाक लुगवा देखलिय, बाकि उअ भितरा हइने पेसलिय। 6तब सिमोन पतरुस वकर पाछा-पाछा यलिय हसे चिन्‍डिया भितरा पेसलिय। उअ सुतियाक घेउटलि लुगवा देखलिय। 7येसुजिक मुडवामा बन्‍हलि गमछावा सुतियाक लुगवासाङे हइने रहलइ, बाकि यकोरियाहे एक ठउरिमा दोबराके राखल रहलइ। 8तब चिन्‍डियामा पहिला यापुगलि चेलवा फेनि भितरा पेसलिय। उअ देखलिय हसे विस्‍वास करलिय। 9येसुजि मरलिसे जिइ उठे परतइ कहके धरमसास्‍तरवामा लिखइलि बतवा यखनिलइ हइने बुझलइ। 10वकरपाछा उअ दु जन चेलवाह यापन घर फिरलइ।

येसुजिसाङे मरियमक भेट

(मति २८:९-१०; मरकुस १६:९-११)

11याबे मरियम चिन्‍डियाक बाहरा ठडियाके कनइ रहलिय। उअ कनते ओन्‍हगातके चिन्‍डिया भितरा हेरलिय, 12हसे जहवाँ येसुजिक लसवा राखल रहलइ, वहवाँ गोरहर लुगा पेहरल दु जन स्‍वरगदुतके देखलिय। एक जन येसुजिक मुडवावरि हसे दोसरि टङवावरि बेठल रहलइ।

13तब हुनुका मरियमके पुछलइ, “अरि बहिनिया, तुइ केहके कनइ बडहि?”

मरियम हुनुकाके कहलिय, “हुनुका मोर प्रभुके लिगले बडइ हसे कहवाँ रखले बडइ कहके मोर हइने थाह बडइ।”

14इअ बतवा कहके मरियम पाछावरि फिरलिय हसे उअ येसुजिके ठडियाइल देखलिय। बाकि येसुजि हखसि कहके उअ हइने चिनलिय।

15येसुजि वकरेके कहलसि, “अरि बहिनिया, तुइ केहके कनइ बडहि? ककरेके खोजइ बडहि?”

मरियम हुनेके बगिचवामा काम करलाहर मन्‍से हखिय सोचके कहलिय, “हजि, यपनहुँ हुनेके यहवाँसे लिगले बडहुँ जउँ, कहवाँ रखले बडहुँ मोरके कहहुँ, मुइ हुनेके लेवे जेबहिँ।”

16तब येसुजि मरियमके कहलसि, “मरियम!”

उअ फिरके हुनेके हिब्रु भासामा “रब्‍बोनि!” कहलिय, जाकर यरथ “गुरुजि” हखइ।

17येसुजि मरियमके कहलसि, “मोरके पकडले झिन रखहि, केहकेकि मुइ यखनिलइ पिता लघिना हइने गेल बडहिँ। बरु मोर भयवानिक लघिना जाके, ‘मुइ यापन पिता हसे तोहार पिता, यापन परमेस्‍वर हसे तोहार परमेस्‍वर लघिना जाइ बडहिँ’ कहके कहदेसि।”

18तब मरियम मग्‍दलिनि जाके चेलवानिके “मुइ प्रभुके देखलहिँ!” कहके कहदेलिय हसे येसुजिक कहलि बतवा हुनुकाके सुनादेलिय।

येसुजि यापन चेलवानिक लघिना देखा परलसि

19उहे यतरवाक साँझ, जब यहुदि यगुवानिक डरेसे चेलवाह दुवरिया लगाके भितरा रहलइ, येसुजि याके हुनुकर बिचा ठडियलसि हसे हुनुकाके कहलसि, “तोहराके सान्‍ति हखइ!” 20यतुरा कहके हुने यापन हथवा हसे कोखवा चेलवानिके देखोलसि। प्रभुजिके देखके चेलवाह खाँ खुसि भेलइ।

21तब येसुजि फेरि हुनुकाके कहलसि, “तोहराके सान्‍ति हखइ। जसने पिता मोरके पठोलसि, वसने मुइ फेनि तोहराके पठोइ बडहिँ।” 22यतुरा कहलेपर हुने हुनुकरमा सास फुकलसि हसे हुनुकाके कहलसि, “पवितर-आत्‍मा लेह। 23जाकर पाप तोहरा छमा करबह, वकर पाप छमा हतइ हसे जाकर पाप तोहरा छमा नाहिँ करबह, वकर पाप छमा नाहिँ हतइ।”#मति १६:१९; १८:१८

येसुजि थोमा लघिना देखा परलसि

24जब येसुजि यलसि, तब बारह जन चेलवानिमधे थोमा जाकर उपनाउ जउराहा#२०:२४ ग्रिकमा यसके लिखल बडइ “थोमा जाकर उपनाउ ‘दिदुमस’ हखइ।” “दिदुमसक” यरथ जउराहा हखइ। रहलइ, उअ याको चेलवानिसाङे हइने रहलिय। 25उहेसे याको चेलवाह वकरेके कहलइ, “हमरा प्रभुके देखलहुँ।”

बाकि थोमा कहलिय, “जखनिलइ मुइ हुनेक हथवामा ठोकलि कटियाक चिन्‍हवा नाहिँ देखबहि हसे कटियाह ठोकलि चिन्‍हवामा यापन यङगुरिया नाहिँ घुसटोबहिँ तके हुनेक कोखवामा यापन हथवा नाहिँ घलबहि, तखनिलइ मुइ विस्‍वास नाहिँ करबहिँ।”

26वकर आठ दिन पाछा येसुजिक चेलवाह फेरि घरवामा जामा भेल रहलइ हसे थोमा फेनि हुनुकरसाङे रहलिय। तखनहिँ दुवरिया लगावल रहलइ, ताफेनि येसुजि भितरा पेसलसि हसे हुनुकर बिचा ठडियाके कहलसि, “तोहराके सान्‍ति हखइ!” 27तब हुने थोमाके कहलसि, “तुइ यापन यङगुरिया यहवाँ रखहि हसे मोर हथवा हेरहि। मोर कोखवामा यापन हथवा घलहि। तुइ सक झिन करहि, बरु विस्‍वास करहि।”

28तखनहिँ थोमा हुनेके कहलिय, “मोर प्रभु हसे मोर परमेस्‍वर!”

29येसुजि वकरेके कहलसि, “तुइ त मोरके देखलेसे विस्‍वास करले हखहि। बाकि हुनुका धन्‍यक हखइ, जुने मोरके हइने देखले बडइ ताफेनि विस्‍वास करसइ।”

इअ कितबवा लिखेके उदेस्‍य

30येसुजि याको बहुत यचम्‍मक चिन्‍हासभ यापन चेलवानिक यागा देखोलसि, जुन इअ कितबवामा हइने लिखाइल बडइ। 31बाकि तोहरा येसुजि परमेस्‍वरक पुतर, मुक्‍ति देलाहर ख्रिस्‍ट हखसि कहके विस्‍वास करिह हसे विस्‍वाससे हुनेक नाउँमा तोहरा जिवन पउह कहके इअ जम्‍मे बतवा इअ कितबवामा लिखाइल बडइ।

Currently Selected:

युहन्‍ना 20: CTHR

Highlight

Copy